小霸王1023的个人专页

翠豐未開對面舖之前經常都會到此宵夜，以前經常見到有兩個後生仔女負責，好好禮貌，幾好招呼，上一次去翠豐，因為舊舖無位，所以過對面舖坐，已經覺得不多對路，今次俾多次機會，再去一次，同樣要坐對面舖，由於唔太餓，叫左蠔餅同蒜香一口牛，坐左一陣蠔餅到了，蠔仔尚算有肉，但好厚炸粉，我們已經是慢慢食，等等下唔多對路，個一口牛仲未出現，以為唔通無落單，望下張單又有喎，幾個伙計在鄰檯食宵夜，本來都唔想打搞佢地，見佢地食完吹緊水，我足足叫左3聲「唔該」，終於有個亞姐有反映，我問佢我地碟一口牛叫左好耐仲未到，佢好氣定神閒答我，師父食緊宵夜，等陣啦，嘩!我真係未見過咁巴閉嘅食肆呀!本來真係好想取消，見個師父起左身行番過對面，就再等下啦，終於等到「蒜香一口牛」，買相是中式牛柳，一D都唔係一口牛，大大舊，味道就係蒜頭加黑椒，牛肉好淋，但唔似係肉本身淋，好求期食左碟野，我真係唔會再幫襯囉!…查看更多

長沙灣荔枝角區一直都係工廠林立之地，但近年多左商業大廈落成，而且部份更直迫甲級，所以現時該區食肆已經由舊日的飯堂快餐店，轉為開設不少高級食肆，上月揸車路經長沙灣道909號，發現在此商廈地舖開了一間門面頗大的餐廳，心諗搵日要去試試。剛好昨晚有時間就決定去試試。我們選擇了餐廳入口右面的地方用餐，因為覺得左面檯與檯之間太近，而右面就正正是一大幅落地玻璃，而且有live band。坐下先看看menu，有兩款set dinner，分別是$288及$388，另外亦有其他main course, pasta，但menu選擇不太多。我們選擇了一個set dinner($388)，Appetizer是烤焗蟹腳，出奇地經過烤焗，蟹肉仍然保持鮮甜及有少少海水味，main course選了rib eye，set dinner包括daily soup(青豆湯)，跟set一個湯，但佢地安排左兩份，好貼心!而食完Appetizer後亦送上雪芭清清味蕾，因為我們除了order一份set dinner，亦order左black mussell with white wine sauce($148)，個sauce點面包一流呀!個manager好nice，不停問我們要唔要加面包，另外再order左鹽焗銀雪魚($178)，銀雪魚好滑，最驚喜係配菜中的薯蓉，應該是甜蕃薯做，好好味。rib eye 要4成熟，的確做到4成，但血水唔多，唔錯。其實已經好飽，連set個甜品都食唔落，不過見到幾精緻都食左少少，因為太飽，manager再次貼心地奉上熱檸檬茶，呢餐幾滿足!…查看更多

本來去之前食過大坑另一間甜品店，去到休息無開，架車經過「小甜谷」門口，有有位泊，所以就試下啦!打開餐牌，都係大路野，2個人叫左2件桂花糕($12)，2件芒果糯米滋($12)，芒果涼粉西米露($26)。先黎桂花糕，質地太淋，係好多桂花食到成口都係，之後芒果西米露，其實我地叫芒果涼粉西米露，不過見佢都整左，費事換啦。芒果唔甜，西米露無味，差不多食完，發現2件芒果糯米滋未到，應該係漏單。之後追左一陣終於出現，一放入口，吓!暖暖地，唔係掛，難食到呢!我只能講一句，明星效應囉~…查看更多

澳門簡直係我同bf嘅後花園，因為工作關係，每個幾月就會去澳門一次，亦因為工作關係，我地都會平日出發，酒店又平d，搵野食亦無咁多人。我地唔太鍾意睇旅遊書搵食，因為好多時d書「講就天下無敵」，所以我地會問下當地澳門人有咩野好去處搵食。由於經常過澳門，每次都住同一間hotel，同hotel嘅staff都熟落晒，今次佢地都推介左d地道好味道。朝早游完水，係時候出動，去到「檀香山」一入門口，所有都係地道澳門人，無遊客(haha~I like it)，開放式廚房，好家庭式經營好warm，坐下翻開餐牌，咖啡種類繁多，有啡中黃金之稱嘅Kopi Luwak-麝香貓咖啡(mop120)，其實我地真係唔太識欣賞-屎喎haha~，有Blue Mountain、牙買家、印尼等等，起碼有十幾種，不過我地聽hotel staff講試左最平最基本嘅咖啡(mop16)，咖啡上檯香味唔太濃，附上一小杯cream，係cream唔係奶，成杯咖啡立即生猛晒，我自己好鍾意用cream沖咖啡，記得以前海港城間San Francisco都係用cream。另外叫左一杯Iced Mocha(mop20)，好普通。呢到食物都幾好食，我地叫左一個辣魚包(mop18)好好味，個辣魚無「安記」咁濕，bf叫左牛尾通粉(mop26)，蕃茄湯底好味，我叫左咖哩牛腩公仔面(mop26)，個牛腩同牛根好入味，個咖哩底用左好多薑，公仔面係「出前一丁」，唯一唔明點解要將「出前」個麻油同味粉加入去，怪怪地!可能用得唔好浪費啦~整體都幾好，臨走見有客叫辣魚炒飯，下次一定要試下。…查看更多