悠閒的八月夏天的个人专页

因為疫情問題，真係好耐無見過朋友，所以係之前疫情平復果陣，專程約出黎食餐飯。由於我地一行3個人都好鐘意食火鍋，所以我搵左依間中日火鍋 – 火薈，有得食火鍋之餘，仲可以食埋刺身添，一次滿足2個願望。 火薈比較近太子地鐵站，門口裝修好顯眼，所以都好容易搵到。一上到去眼見座位都好闊落，店員安排我地坐窗口位，自成一角，而環境唔算嘈，同朋友傾計都好方便。 一坐底就有清茶飲，店員都會好熱情問下會唔會需要叫埋其他野飲，之後就放低埋調味盤，辣椒、生蒜蓉、葱等等都好新鮮，明顯係新鮮切，唔係放係雪櫃過夜。 黎到依到中日火鍋，梗係要叫下刺身食啦！係菜單見到有刺身拼盤，好吸引，一於叫黎試下！我地揀左刺身拼盤(松)，因為店員講刺身種類係會豐富啲，而且分量都係大啲架！ 刺身拼盤一上枱都好震撼，因為係大大大隻刺身船，影相打卡真係一流。帶子大大粒，厚肉又鮮甜。墨魚撈蟹子口感，墨魚既軟同蟹子既脆好夾，口感特別。鮑魚都好鮮嫰，甜蝦鮮美，！ 輪到食火鍋啦，火鍋湯底我地叫左海南椰子雞鍋，店員叮囑我地水滾先飲湯，因為湯底係用左純椰青水，所以會特別甜，零舍好飲，飲完湯同食埋雞之後再加湯打邊爐。 跟著到揀打邊爐嘅配料，我地揀左新鮮海魚、美國桶蠔、竹笙、即炸響鈴、菜心苗、萵荀件、安格斯牛頸脊、蟹子鮮蝦滑。 雖然店員話可以當刺身食，但我地都唔太敢，所以都係用黎打邊爐食，比較安心。新鮮海魚真係零舍唔同啲，嫩滑又鮮甜，師傅魚肉厚薄切得好適中。 桶蠔肥美鮮甜，大大啖肉，好滿足，而且分量亦唔少 竹笙爽脆，吸湯一流，真係好味又健康 肥瘦適中，肉質淋滑，肉味濃郁，令人一啖接一啖，好好味，食過唔停口呀！非常新鮮，上枱仲係熱辣辣，通常我會放係湯碌2-3秒就食，既有即炸既脆卜卜，亦吸收湯底既味道，好正 萵荀都幾新鮮，切得好靚，味道爽甜 菜心苗一樣咁新鮮，都好幼嫩，好甜又無渣 總括而言，環境闊落，坐得都好舒服，店員親切有禮，食物質素都唔錯。等遲下疫情好轉，解除限聚令，我會再約三五知己再食過:)！…查看更多

本身自己住係沙田，最近聽聞發哥海鮮火鍋係大圍顯徑邨開左分店，之前食過觀塘間分店，回味無窮，但因為最近都無去觀塘行街，所以都無再食過。今次發哥開左係大圍，對我黎講真係個好消息 我上OP睇過地址，搭鐵去大圍站，轉一程小巴，好快就去到顯徑邨，去到原來係同一間酒樓痴埋一齊，分開左2個地方，一個係酒樓食小菜，另一個就係發哥海鮮火鍋。 大圍依間發哥原來仲有得任食58款火鍋配料，不過我同朋友得2個人，任食都食唔到好多款，所以我地決定都係叫返海鮮套餐，而且仲可以對比返觀塘分店同大圍分店水準添。我同朋友各叫左龍蝦同海蟹餐:) 首先上左時令燉湯，當晚係響螺雞腳湯，燉湯夠曬熱，香氣撲鼻，飲落味道清甜，好潤喉！ 海鮮一眼望落去好新鮮，我地用筷子篤下隻鮑魚仲識喐，而且處理得好乾淨，龍蝦同海蟹我揀左龍蝦食，龍蝦厚肉又鮮甜，貝類無沙又鮮甜，最好味係聖子皇，大過我手掌，爽口又彈牙！ 顏色金黃，食落又軟又滑，魚味濃，又帶少少甘香。 安格斯牛肩肉牛肉呈雪花紋理，肥瘦適中，一d都唔肥膩，牛肉味重，食完返尋味！海蝦新鮮又彈牙，好好味 魚皮餃外皮好爽口，魚肉味重，餡料好結實，好有鮮味 雖然紋理無安格斯牛肩肉咁靚，但食落牛味都重，肉質軟淋，滿口油香！ 自家製墨魚滑爽口又彈牙，而且仲可以食到粒粒墨魚肉既口感！ 西班牙豬腩片肥瘦適中，切得好薄，淥一陣就好快食過，肉質軟淋，無雪味！ 發哥既火鍋配料依然係好新鮮，最後加埋個粥膽、粟米、芋頭，撈埋落打完邊爐既粥水，成碗粥都係各種配料既精華，好鮮味，又唔會過份鹹，食完一碗又一碗…查看更多

最近係某網發現左一間新派點心中菜館-名館，提供下午茶時段既點心放題，價錢都好相宜，連埋加一都係$120左右，感覺相當抵食。餐廳有2間分店，分別位於中環同銅鑼灣，而我就揀左銅鑼灣希慎廣場。 我同朋友決定星期六去食，當日14:30到達，店員好快就安排到入座，座位好闊落，餐具好精緻，個碗原來有隻小鯉魚，賞心閱目。茶水顏色金黃，飲得出淡淡玄米味，不過略厭茶味較淡。 落單店員只比左2張點心紙，可能預我地只點兩round，點心紙同買團購所見差唔多係一樣，不過最可惜係無左宮庭點心盤，但當初買團購個陣仲大大隻標題寫左有宮庭點心盤，當前感覺有D落差 作為前菜，味道清爽，一d都唔膩，最上層既水晶皮凍好爽口，一啖一粒，食得好方便！ 除左春卷皮較厚，比較難咬，勝在蝦肉彈牙，味道清爽，可以一試 賣相好鮮艷，但咬落口外面實在太厚，入面餡料紅菜頭都爽口，但豬肉味淡，鮮味一般 賣相好吸引，可惜凍左，酥皮唔脆，入面餡料好似係豆蓉，食落完全無味，真係食唔出係咩餡，睇得唔食得，只適合打卡用！ 香煎蘿蔔糕又係凍既，成舊糕都好多油，一夾就散，放入口一大陣油嗌味，好似食緊成個粉咁，蘿蔔味欠奉。真·菠蘿包只係微暖，雖然面頭層酥皮好散又唔脆，好在原來餡料係奶黃加菠蘿粒，味道層次好豐富，如果夠熱我諗仲好味～ 羊肉餅都係唔熱，導致餅皮淋曬，好韌好難咬，值得一提係羊肉無騷味，咖喱汁另上，咖喱汁惹味！ 雞翼煎到熱辣辣，入口雞肉好入味，有少少辣，不過入面既糯米，味道偏淡。甜品叫左糍粑，新鮮炸起，外脆內軟，配埋紅糖同黑糖漿，好香甜，今餐終於有個好結尾了總括而言，以放題價錢，食到咁多款點心，都尚算抵食，不過食點心最怕係凍，而依間大部份點心，除左係蒸既點心，好多都係整好攤凍曬，真係會好影響食物既味道，如果好似我咁由沙田專程出黎食，我覺得無需要，比我揀多次，我寜願係屋企附近飲茶算了…查看更多

放工同朋友去左APM買野，行得太開心，快樂不知時日過，行得晏得滯，決定一於搵下地鐵站附近有無好野食，食完方便搭車返屋企。 之後比我地身為海鮮火鍋控，搵到都好近觀塘站既發哥粥底海鮮鍋，入到去店員提醒晚市只係做火鍋，原來依間店鋪日頭係360冰室，晚市只供應火鍋。所以店內裝修都好有香港情懷，牆身都係貼滿香港街景。 睇下餐牌先，發哥豪華海鮮餐，主食可以3選1，唔洗成枱叫曬同一款夠曬彈性。我地2個人梗係分別叫左龍蝦餐同海蟹餐，然後揀新鮮鮑魚，最後仲可以自選8款配料添。我地仲發現多人仲可以揀雞煲同海鮮套餐，一次滿足2個願望。 首先上左竹蔗水，清甜又解渴，另外其他汽水都係任飲架。 之後店員推左架調味車，比我地潷自己鐘意既調味料，有蒜蓉、炸蒜、辣椒、芫荽等等。 涼拌青瓜同泡椒雞腳，青瓜爽口，雞腳入味，非常開胃。 酸酸甜甜，夠醒胃，食到唔夠喉。 姬松茸燉雞湯，我覺得係原樽蒸燉，因為湯既溫度好高，一啖飲落去有濃郁雞味，而且唔覺有添加味精，好有住家湯既感覺。 海鮮上先，一眼望落去非常新鮮，我用筷子一篤鮑魚立即收縮，放落粥底淥完好彈牙。貝同蜆類都好有驚喜，鮮味又無沙。 龍蝦好彈牙，食落啖啖肉。海蟹本來係每人半隻，侍應同我地解釋由於今日來貨既海蟹太細隻，所以比左1隻我地，無論隻蟹好唔好食，彈性處理，誠意搭夠，值得一讚! 當然隻蟹都無令我地失望，雖然係細隻左D，但蟹肉鮮嫩，蟹膏飽滿，一人一半岩岩好! 上面咁多款唔同種類嘅海鮮，樣樣都係好新鮮，自己去街市買都唔平啦！而且宜家仲已經處理好，方便又抵食！ 其餘8款配料都非常新鮮乾淨，我個人覺得最有特式係順德釀冬菇，一咬落去好Juicy，又食到冬菇濃郁香味。自家蝦滑亦十分推介，面層有蟹籽，咬落卜卜脆，增加口感，蝦味重得黎又彈牙。 最後食完所有配料，店員會拎埋白粥膽出黎，幫我地加入充滿海鮮精華既粥水到，碗粥好鮮甜，啖啖海鮮味，食完碗粥，飽到上心口。 總括而言，海鮮新鮮生猛，份量好足:)，服務都唔錯，下次一於搵埋一大班朋友一齊試埋個雞煲！！…查看更多

食完海底撈，諗住行去旺角東搭車，路過T.O.P咁岩見到老虎堂，又唔多人排隊，行下行下又口渴，一於決定買返杯黎飲。個個都知，係老虎堂梗係要飲最出名既黑糖鮮奶啦。 配料可以揀珍珠或者波霸，珍珠係細粒既粉圓，波霸係大粒既粉圓，兩種粉圓口感上都有好大分別。我地想一次過食曬兩種不同口感，所以我地叫左2杯虎虎生風厚鮮奶(奶霜)，甜度同冰度都係固定左，唔可以改。等左5分鐘就有得拎，真係好快。一拎上手，虎紋效果好靚，即刻影返幅相打下卡先。黑糖唔會過甜，因為加左大量冰塊去中和黑糖既甜味。但有個缺點就係飲到最後會變得好淡，所以整體感覺唔平衡，唔會由頭飲到落尾同一品質。 質素一般，係香港未必會再考慮老虎堂。…查看更多

海底撈係大陸就食過，眾所周知海底撈食物質素係無太大驚喜:(，重點係在於貼心的服務質素。 雖然香港海底撈都開左好耐，但一直都無機會試，咁岩有2個朋友都有興趣一齊去食，就睇下服務同食物質素同大陸有無分別先。 當晚一早大約6點到，其實早3日前已經打電話訂枱，但去現場職員搵唔返我地既訂位紀錄，好彩當時亦未有人等位，所以好快都安排到入座。 湯底揀左4格，決定1人揀1款湯底: 蕃茄湯、清油麻辣、菌湯，清水免費。 蕃茄湯同菌湯雖然都係揀左最濃味，但仍然比大陸分店味道較淡。 鵪鶉蛋味道正常，蛋味香濃，份量十足! 牛肉顔色望落都算新鮮，肥瘦適中，淥完都唔會太韌，不過略厭牛味不足。 羊肉卷有驚喜，入口肉質嫩滑，羊肉騷味唔算太重。 翡翠墨魚滑有驚喜，上碟外形好特別，翠綠色樹葉造型，入口彈牙，墨魚味重。 活蝦新鮮，上枱個陣仲見到D蝦腳仲識郁，服務員仲會主動幫手剝埋蝦，岩曬我地平時想食蝦，但懶得剝既人(^-^)～ 其他配料食落無太大特別之處，就唔逐一介紹了。 甜品我地叫左紅糖糍粑同炸饅頭，紅糖糍粑煙煙韌韌，食之前點少少黑糖漿，感覺養生又唔太甜。炸饅頭反而要等得比較耐，食落都熱辣辣，但唔太夠脆。所以我個人推薦紅糖糍粑，外面少有，夠特別又好味。 3個人埋單連加一服務費$719，雖然我地大部份既配料都係叫半份，但價錢都係比較貴，服務都唔錯，都會主動幫我地斟野飲，可以下次再黎食過。…查看更多

早排好好彩搶到某信用卡優惠，以$138可以嘆富豪九龍酒店的V bar & lounge既法國朱古力下午茶套餐(原價$348，另加一服務費)。酒店位置都好方便，鄰近紅磡站。首先講一講環境先，一入酒店側門，就會見到V bar & lounge。但坐位有點逼，尤其我同朋友坐係幾張2人位既中間，枱與枱之間只係相隔半隻手臂位，所以出入都有點唔方便。 然後下午茶套餐方面，分量可供兩位用，12款精緻鹹甜美點，另包兩杯 illy 咖啡或熱朱古力。 最上層及中層：鹹點及龍蝦湯，下層：甜點鹹點較甜點逊色，牛油果莎莎多士，牛油果香味十足，但由於多士係軟身，導致口感一般。煙三文魚辣根乳酪配多士亦有同樣的問題，我估係因為一早預先整定，放係雪櫃冷藏，所以多士變得好軟，而煙三文魚普通質素，有點腥味，辣根味道亦食唔出:(。最差係酥脆金文拔芝士伴紅莓，外層核桃炸得過火，有油膉味，亦唔香脆。最好味係海鮮酥皮盒，微暧，鬆脆外皮有牛油香，海鮮餡料夠惹味。 甜點方面，Dulcey 朱古力忌廉脆脆同64% 黑朱古力慕絲，帶點可可的苦澀味道，所以甜度適中，而朱古力忌廉同朱古力慕絲質感軟滑。最有驚喜係玫瑰金箔啫喱，一入口有濃郁花香味，感覺好清新，但唯一缺點係紅桑子太酸，破壞整體既味道平衡。櫻花蛋卷，蛋味十足，不過略厭無櫻花味，猶如普通的士多啤梨醬蛋卷一樣:(。最後英式鬆餅有段小插曲，因為當時都有5、6枱客人都有叫依款下午茶套餐，英式鬆餅係用碟另上的，但我地食下食下發現附近客人都有，懷疑係上漏左鬆餅比我地，我地即刻向待應反映，跟住隔左一陣待應先話會補上即焗嘅鬆餅，即係鬆餅數量係預少左啦！失望地方係在場幾位待應唔單只分發個陣無點齊數量，仲有亦無留意到每枱係米已經上齊餐點，要客人主動反映問題，先發現再補上返，由此可見服務細心度係一般。總括以言，以$138黎講，提供左不同款式既點心係超值價錢，但如果要原價，一般既食物及服務質素，就要再考慮了:(~…查看更多

以前中學時期係住係石籬，所以周圍環境都比較熟，最近去左石籬探下朋友，順便一齊食下晚飯，朋友就帶左我黎依間三門仔漁夫私房菜。一入到店裡裏，老闆就好熱情招呼，問幾多位，落單個陣老闆仲會推薦時令海鮮同邊種煮法最配合到海鮮添。睇左餐牌，發現有款驚喜靚湯，唔間間食店都有供應，無錯就係-杏汁白肺湯！眾所週知煮一碗白肺湯工序又多，又繁複，屋企都唔會煲，所以見到餐單有寫，梗係即係問下老闆仲有無得飲，好彩仲有！湯係用燉盅上，非常保暖，一上枱就聞到杏汁香味，平時最怕食內臟，因為處理得唔好會有陣腥味，難以入口，估唔到依個豬肺食落又無咩腥味，成個湯好清甜，滋潤又養顏！落單老闆好推介蕃薯蜆，依隻蜆之前未聽過，問左老闆，佢話蕃薯蜆大隻又好食架。 果然真係無推介錯，肉質飽滿又滑嫩，好有鮮味！黃金蝦係我最愛，濃郁嘅鹹蛋黃味，蝦殼又脆卜卜，肉質爽口又彈牙，成隻蝦連殻都可以食架！好食到停唔口！日式木魚花燒魚估唔到小店都有fusion菜食，上菜個陣老闆提一提要點埋沙律醬同木魚花一齊食。 不過我第一啖梗係要試下原味，燒鱲魚第一次見，估唔到燒完肉汁仲好豐富又嫩滑。第二啖配沙律醬同木魚花，好有日式風味，酸酸甜甜，連本身少少魚肉嘅腥味都掩蓋埋，最適合小朋友食:)！其實食完上面幾碟餸都已經好飽，但比傳媒訪問片中石鍋金銀蒜蟹飯吸引到，所以決定加單，一於食到飽上心口先！老闆一如既往都有細心提一提，如果想食飯焦就要等待5-10分鐘先好攪拌。 我同朋友都好鐘意食飯焦，就好乖咁等待⌛️。 蟹飯有一整隻嘅肉蟹，雖然唔係好大隻，但蟹肉好多，食到啖啖肉，味道鮮甜！飯底係用蒜蓉加蛋預先炒過，熱辣辣又香，飯焦脆卜卜。最值得一提係石鍋夠曬熱，由頭食到尾都無變凍，味道可以好好保持！最後仲好貼心送左一人一碗紅豆沙，煲到起曬沙，清甜解膩，真係一個圓滿嘅結束！…查看更多

今日係放完復活節長假期，返工的第一日，為左幫自己打氣，決定夜晚食返餐好，以美食作為工作既推動力。 即興約左朋友，商量左一輪決定去食雞煲，因為好耐都無食，心思思想食返個熱辣辣嘅雞煲先。 一坐低，店員就放左自助九宮格調味盤係枱面，自己鐘意邊樣就潷邊樣，好方便 餐牌係剔剔紙，自己鐘意食邊款就剔邊隻，夠曬清楚，又唔怕mark錯單! 首先梗係揀左雞煲先，有辣有唔辣，任均選擇，見到有款滋補螺片花膠雞煲，俗語都有話女人唔補好易老，梗係要食返個美顏雞煲補一補!我地諗左好耐叫半隻定1隻雞好，最後都係決定叫半隻，因為我地留意到肉類配料-鮮雞件(半隻)$98，比起叫1隻雞嘅雞煲只係貴$8，唔夠食又可以再叫，最重要係唔好浪費食物～ 雞煲一上枱，店員好貼心提醒話可以即刻食得，潷左1啖湯試下，湯係奶白色，一睇就知夠曬火候，入口香濃。雞件又滑，最正係花膠，厚身又軟滑，膠質豐富，! 象拔蚌片淥幾下就食得，清甜又爽嫩，有時失手淥得太耐，肉質就會韌到好似擦子膠一樣好難嚼，好考技術。 即叫即炸，食個時差D淥親條脷，提提大家如果想試下，記住要留意小心睇熱呀! 爆芝響鈴又香又脆，而且中間芝士係流心，好正又香濃，第一次食估唔到響鈴同芝士都可以咁夾! 牛肉顏色呈鮮紅，好新鮮，脂肪分佈平均，所以食起黎肉質夠曬嫩滑，而且肉汁豐富，食過唔停口! 叫左油麥菜，新鮮爽甜，均衡飲食！飲品方面，朋友叫左大檸茶，我就叫左大咸檸七，諗住食雞煲都好熱氣，飲杯咸檸七潤下喉，紓緩下熱氣。2杯飲品都好大杯，足夠飲足全餐飯，好抵飲。最後2個人都食到好飽好滿足，我地都無食剩野架:)!…查看更多

最近睇開團購網，見到品坊都有做團購，記得上次食過都唔錯，就一於再約上次陪我一齊食既朋友再去食。 6點幾去到餐廳外面，已經排左一條長長人龍，明顯比上次無做團購時更多人。 而且即開生蠔條隊keep住都係長龍，雖然等得耐左，但今晚生蠔好新鮮，係愛爾蘭石蠔，雖然較為薄身，但入口好甜，好岩生蠔初學者品嘗。全晚開蠔師父開足全場，食足全晚都有一兩隻太瘦，薄到無肉食，但太多數生蠔都係標準Size。 最令我失望係蟹腳，肉質好乾，味道唔新鮮，聞到勁大陣雪藏味，比上次食既蟹腳品質差左好多，食完依碟就無再拎過。瀨尿蝦味道正常，普普通通，好食過蟹腳:(。 熟食算普通，終於無遇到上次小家的女廚師，切西冷既男師父好友善，好多人叫佢切2件都無唔高興，照舊西冷有少少筋，比較難咬，肉味都算濃，可以再encore。特別係竟然有素天婦羅食，粉漿薄身，新鮮炸起，好脆身。 炸腐皮卷脆身，但味道較淡。豬手好乾，而且肉質太鞋:(。 最後甜品時間，質素麻麻，最差係綠茶紅豆糕，勁硬又無味，所以都係以Häagen-Dazs™雪糕作結尾，雪糕車有6格雪糕，但有2格雪糕藍苺味係重覆，最受歡迎係新出既茉莉花紅桑子石榴，好彩比我潷埋最後少少，之後refill都係重覆既朱古力味。 總括以言， CP值無之前咁高了，除左生蠔最好食之外，其他大部份的食物質素都有下降，尤其蟹腳真係唔好食! …查看更多

茶理史係位於尖沙咀厚褔街的小巷入面，環境同位置都唔太理想，企係到等野飲都成日比人撞到，因為條巷實在太窄又暗，而且又人來人往，d 人係通過巷仔穿對面街。 但之前聽朋友介紹都唔錯，所以都係決定買返屋企一試。題外話，原來膠袋係要+$0.5，第一次買凍台飲個袋係要收費，覺得好奇怪，唔太合理～今次叫左草苺鮮乳地瓜小芋圓，正常甜度同冰塊，見到店員製造途中，係冰箱拎出一盒士多啤梨，而且杯野飲都有一粒粒士多啤梨籽，我相信都係用真正生果整飲品的！ 依杯野飲好靚，有分層效果，第一層係士多啤梨汁第二層係牛奶，最底一層係地瓜小芋圓，飲落第一啖有淡淡士多啤梨既酸味，牛奶味比較弱，整杯飲品唔夠甜，反而作為配料的地瓜小芋圓有驚喜，原來係有2種味道，黃色係蕃薯同紫色係芋頭，粒粒都係軟硬適中又不失彈牙，有天然既蕃薯同芋頭味，好好食!! 真係名符奇實的妹仔大過主人婆~…查看更多

今日係情人節，我同朋友都無情人陪，所以放工一齊去食飯，食完飯10點左右，係街見到咁多成雙成對既情侶，突然想飲返杯台式飲品，慰藉下單身人士既心靈，甜返下。點知搵左幾間鋪頭，已經關左門，好彩最後比我地搵到田籽茶事仲營業緊。我就揀左芒果蒟厚鮮奶，朋友揀左黑糖厚奶茶，大概10分鐘左右就拎到手，店員仲好有心提提我地點樣飲先係最合適。 芒果蒟厚鮮奶店員教落要攪均先飲，一飲落去雖然有濃厚的鮮奶味，我望到鋪頭係用明治奶，唔怪之得奶味咁重，但亦都有陣香精的芒果味，珍珠就變左芒果味的蒟蒻珠，芒果味都係好假，應該都唔係天然芒果做的，芒果味有點敗筆。 黑糖厚奶茶(+仙草)我試飲一啖，奶味好重，掩蓋左茶味，我諗鐘意茶味濃的朋友應該唔太岩了，黑糖味都好重，仙草都好好食，整體依杯都好飲又順喉，真唔錯。 提提大家店外有幅打卡牆，最岩就係拎住杯野飲，打下卡，呃下LIKE。下次都係試返佢既招牌田籽波霸厚鮮奶先~…查看更多

最近係團購網站睇到依間金記冰室，介紹係主打懷舊風格，有成52年歷史，而且多分店選擇，好耐都未食過冰室了，所以就一於膽粗粗買左2張團購現金券去試試。 餐牌整得好靚，圖文並茂，好吸引，真係好難揀得落手，最後我同朋友一人叫左一款，可以2份Share，一次過試曬2款不同口味! 咖喱牛腩飯牛腩同牛筋分配比例，牛筋軟滑，不過略厭牛腩比較韌，亦痴牙，辣味適中，但係食唔出咖喱獨有的香濃味道，亦無香港普遍咖喱有既棷奶味，唔係我杯茶，有D失望。 鮮茄濃汁焗豬扒飯依款焗飯有驚喜，豬扒好細心幫客人切開，亦去左骨，啖啖肉，食過好爽又方便，飯面芝士好多，而且茄汁足夠，撈埋炒飯底食，好。不過食完好口喝，所以一定要飲野先得。 金記冰室出品分量十足，但食物味道一般，試過就算了，唔會刻意再黎了~…查看更多

是日2月17日係花旗銀行香港金盃2019賽馬日，一直以來爸爸對賽馬都好支持😂，所以就想陪爸爸去沙田馬場體驗賽馬氣氛。所以我就搵下馬場有無餐廳可以book，舒舒服服有位坐，又唔駛同人迫。跟住我就搵到全新賽馬主題時尚Café「出閘」。 訂位好簡單，不需要投注戶口，上返到馬會網站就可以book，當日係普通賽事$130，包括主菜、餐湯、甜品及餐飲。以馬場消費黎講，價錢合理，而且仲可以自助揀位，非常方便。 我同爸爸口味都好似，所以當日我地都揀左兩個一樣既set。 墨西哥海鮮雜豆湯雖然海鮮湯入面只得半隻青口，一粒蝦仁，但味道偏酸，好開胃! 韓式炆牛尾泡菜石碢配白飯套餐都好正式，有泡菜，辣醬。泡菜只得少少辣味，普通。牛尾雖然係用石碢裝住，但只係微暧:(。味道出乎意料唔差，牛炆得都入味，有D肉仲一夾就分得開，夠曬淋滑，分量亦唔少。 杏仁車厘子香草奶凍餅值得一提，甜品可以食完主菜，再拎飛去拎，夠細心。賣相都算精緻，入口好香杏仁味又滑，車厘子帶微酸，味道好balance。 總括以言，依間馬會餐廳食物水平唔錯，服務又快又好，食完好快就有職員清理枱面，有機會會再黎的~…查看更多

是日年初一 一早去左旺角飲茶，返親戚屋企途中，路過雞翼山，見唔洗排隊，見到menu上有多款口味的雞翼好吸引，就一於買返去當飯後小食😂!我地人多，所以叫左套餐，包2款口味雞翼同2杯飲品。濃味三重芝士流一打開盒有少少失望，好似比漏左芝士汁，食落雖然真係無芝士味，不過都好香口，鹹味適中，希望下次食返芝士味，今次食唔到有點可惜～鼠尾草鹹蛋黃哥店員好貼心，話定比我地知，依款雞翼製作會比較耐。不過我地本身勁鐘意食鹹蛋黃味，為左食等多少少時間都在所不惜😂。果然都無令我地失望，雞翼鹹香又惹味，一隻又一隻，真係食過返尋味！Mojito朋友叫嘅，佢話好清新，唔錯。 Peach Tea飲落好香水蜜桃味，而且仲有粒粒果肉，好有咬口，又唔太甜，岩我口味!無論係雞翼同飲品都好有水準，路過的美味真係不可放過！！…查看更多