sta-yeung的个人专页

難得同姊妹們想食好嘢，揀咗好多年無嚟嘅The Captain’s House，位置都係厚福街H8，講真呢幾年捱得住又有啲價位嘅餐廳，能夠生存到今日已經唔容易，值得一讚。嚟到就當然要食佢哋嘅signature dish - Seafood Platter，果日我哋揀咗最mild嘅牛油檸檬汁，同4款海鮮（蝦、扇貝、蜆同小龍蝦），highly recommended跟蒜茸包，蘸汁食一流，雖然跟餐得果幾條麵包，不過唔夠食可以再叫。😋另外我哋3位女士都係一般食量，所以都只係叫多2款菜式，分別係封門柳羽衣甘藍沙律，同埋黑松露燒菇risotto，已經食到8-9成飽，本身想叫埋甜品，不過最後大家又想行陣街先。😆印象中第一次嚟食有飲埋酒同食生蠔，係好高質嘅seafood night，今次重返舊地，同樣出色。👍🏻…查看更多

星期五夜晚繁忙時間，7:45pm左右入坐，眼見得2個staffs喺場，有個後生仔waiter落單，但疑似漏單，等咗20分鐘都未有嘢食，我哋先開始問係咪嚟緊，個waiter就話跟一跟（…即係依家先落單？），但等咗接近半個鐘都未有嘢食，剩返滿滿嘅餓感同一肚火🔥😠之後老公果碟羊架黃薑飯先到，我就仲係餓住睇佢食完，都未有嘢食，說好的海南雞飯呢？超過半個鐘都未有，想問隻雞係咪未孵出嚟？最後嬲到cancel order走人，我又嬲又餓咁即刻落咗樓下買外賣食。其實咁大間餐廳，人手同服務完全唔成比例，亦唔到位，非常唔掂同失望。…查看更多

以日本高級餐廳收千六蚊一位嘅 Omakase lunch，原來換來係呢啲服務? 劣評1: 餐廳經理無check清楚就帶位，結果入完去餐廳又出門口等再入，都算...劣評2: Omakase 頭兩道前菜，同廚師都無任何交流，有完全唔知食咗啲乜落肚嘅感覺，到第三道菜上，要我男友出聲問「係咩嚟?」，先開始介紹，原來要問先會介紹？唔問就一直唔出聲？印象中 Omakase 係廚師會主動介紹自己安排嘅食物俾客人，係服務嘅一種，感覺廚師唔係好專業，定係呢間餐廳無呢個習慣去介紹？劣評3: 開頭餐廳職員有問我地有無食物敏感同偏好，我有講到要走蔥，結果上到第六道菜，就有成堆蔥喺我個碗湯度...之後再三提醒，到最後上烏冬麵就有走返蔥。雖然我唔係食物敏感，但呢種大意喺日本高級餐廳嚟講，的確係唔合格。劣評4: 茶水飲完好耐，無職員察覺要refill，男友叫咗一次職員，但個職員又行開無即時斟茶，男友已經開始黑面話：點解好似去咗酒樓叫阿姐斟茶咁...劣評5: 我同男友兩份前菜（第二道）個擺盤唔太乾淨，一個碗底黏住一條疑似蘿蔔（唔多似裝飾，如圖），另一個碟邊有滴汁，又係感覺到唔太專業...總括嚟講，性格比好低，尤其服務上係遠低於預期，只係食物質素整體OK還好，比較滿意係和牛、牡丹蝦刺身同個蜜瓜甜品，但第二道前菜D橙色醃筍超鹹；埋單計返，呢個價錢我哋去酒店食個好D嘅 lunch，都可以食兩至三轉🌚。…查看更多

同老細(男友)慶生，有別於以往去啲高級fine dinning鋸扒紅酒配靚view，今年試吓去呢度俾啲新鮮感佢😆一坐低老細已經話唔客氣瘋狂點嘢食，由於我都肚餓同想老細盡興，就無節制地叫咗11-12道菜加兩杯嘢飲，諗住唔會太大份啦，點知有啲嚟到個份量又真係好足料喎😂尤其我哋叫咗薑蔥煎蠔、南蠻炸雞、同脆炸自家製牛肉餅，全部都超厚身又juicy又好味，雖然我哋有叫枝豆同燒菠蘿解滯，但老細都要再叫多杯綠茶消滯，細食嘅朋友記得一開始要忍下手唔好叫太多啦。至於個人認為最驚喜係佢哋個涼拌山葵牛脷！本來對呢款菜感覺一般般，結果我係清曬成碟！🙈佢用嘅豉油加山葵，好有食sashimi feel，下酒一流！而老細覺得最驚喜係烤豚肉葡萄卷，成粒提子爆汁而又解咗豚肉嘅肥膩，佢話好似食咗瀨尿牛丸咁，有初戀嘅感覺...😂其他菜式都好食，無一碟令人失望，最後兩個人食到個肚脹爆，埋單又比想像中平喎，不過係以我預算請食生日飯budget嚟去講，平時我哋就真係唔會咁捨得😬唯一一個地方無咁好就係餐廳地方比較細，如果唔係坐近牆邊，中間啲位都係窄同難放袋/褸，如果要我再去嘅話，盡量衣著打扮會輕便一啲。…查看更多

難得有朋友遠遠就我嚟荃灣食好嘢，當然要搵一間望落有質素嘅餐廳😋呢間Chef Stage Kitchen一直想試，終於都解鎖了！我同朋友分別order一份豬鞍扒配粗薯條同峴肉白酒意粉（個餐全名比較長，去餐牌度睇會見到），豬鞍扒會俾滿分，味道剛好而且肉質有texture得嚟唔黐牙；至於峴肉白酒意粉上枱果刻香到爆，但美中不足係峴肉鹹咗少少，如果可以減一減個鹹度其實就perfect！本來已經八九成飽，被服務生誠意推介下試埋佢哋個頭號甜品－Tiramisu，個人本身好鍾意Tiramisu唔係勁甜果類嘅甜品，而且口感層次豐富，加上甜品可以放喺第二個胃度，點都食埋啦😂，不過我期望可能有d高，放入口第一個感覺係酒味偏濃，少咗d咖啡香味，但除此之外整體都唔錯嘅。…查看更多

唔好賴經濟差所以飲食業出事，自己未做好無得怨人！星期六諗住快食個早餐，準備忙碌嘅一日，就腳去咗附近呢間蕃茄麵，第一次幫襯，門口睇落都ok乾淨，10:51am落單，過咗10分鐘連杯水同野飲都提供唔到，出菜慢都諗住由佢，點知嚟到碗火腿湯通粉，食咗兩啖就發現，佢哋嘅食物質素同衛生環境原來有好大嘅進步空間，然後黯然地放低枝匙羹同叉，未食飽就離開間餐廳；至於係咩問題，勇者們不妨可以自己親身去體驗一下，但我就唔會再去喇，Sayonara👋🏻👋🏻…查看更多

由以前係Starbucks, 到之後Deli and Wine, 再變成依家嘅Maxim’s Cafe，一直都好喜歡文化中心隔離呢個旺中帶靜，有d隱世嘅地方歇腳同醫肚，記得仲係Deli and Wine嘅時候，要搵個位坐都唔容易，依家Maxim’s Cafe格調係高咗，裝修同座位都比之前舒服，不過門庭相對冷清一點，對我呢種怕嘈又怕難搵位嘅人，又唔算係一件壞事；而意外地食物依然保持到水準，份量剛好兼唔會太油，加埋價錢同服務，算係尖沙咀區內性價比高嘅選擇。…查看更多

夜媽媽本來想食個甜品就滿足返屋企，朋友就介紹我去尖沙咀呢間甜品舖試下，見門口都有人排隊，都諗住OK啦，點知埋去問阿姐攞位，阿姐十問九唔應，淨係掛住收錢，門口果啲又唔知係等外賣定堂食，諗住排隊混亂都算，叫杏仁糊，阿姐拎到嚟係咁叫「杏汁」邊位，聽咗幾次先知佢噏乜，唔知幾時杏仁糊個名叫咗做「杏汁」，而個杏仁糊明顯好杰又超甜，一啲都無「汁」嘅質感。之後重點嚟喇，簡單叫一碗腐竹白果薏米糖水，竟然成碗大半白果都係爛嘅，朋友一食落口，又酸又臭，極度失望，以後都唔幫襯。朋友話上次去食合桃露係好食，無諗過今次咁差，可能「海記合桃坊甜品」只可以食合桃露，其他都唔駛諗。…查看更多