艾得蒙的个人专页

初次幫襯定食 Doraya 係喺金馬倫道地下，都唔記得幾多年前、食咗啲乜。記得嘅係時食到從未食過咁好食嘅吞拿魚嘅嗰種震撼。呢種震撼，係好個人嘅，因為如果你未曾好似我咁，細個時被元Ｘ、百Ｘ嗰啲吞拿魚誤導，以為吞拿魚刺身就係嗰種冇味至腥嘅擦膠物體，未必有嗰種感受到天淵之別嘅共鳴。定食 Doraya 呢間餐廳我一食愛上。雖然無論地點、價錢都唔係可以成日 encore，但每年都總有好幾次特登出去幫襯。尤其佢畀我嘅印象係，雖然唔係平，但畀出嚟嘅價錢，同你得到嘅整體質素，你會覺得物有所值，食完一餐後，仍然感到回味。早兩個禮拜前又醒起，係喎，好耐冇去 Doraya，搵日去下先。終於今日扚起心肝，出去尖沙咀，重溫下令人懷念嘅味道。本來見到深海池魚刺身丼好想食，不過諗下諗下，不過今次食返好耐冇食過嘅自選丼啦，結果 order 咗個三文魚、燒吞拿魚、吞拿魚腩蓉，同埋深海池魚四款嘅四色丼。等於一陣，終於上菜。好坦白講，我見到眼前呢碗丼飯，我真係即刻呆咗，「差一點不敢相信自己的眼睛」：食 Doraya 我嘅印象係，碗飯擺上枱，啲餸係幾乎鋪滿晒個碗，即係你係幾乎見唔到白飯。所以第一樣嘢嚇到我嘅，就係嗰三分一嘅白飯。正當我心諗，幻覺嚟啫，嚇我唔到嘅，一轉個碗，仲有一幅更加震撼嘅畫面：我真係望住眼前呢碗飯目瞪口呆咗一陣，因為我從來未喺 Doraya 食過咁細塊嘅燒吞拿魚。而呢個只係比較顯而易見嘅例子，其他餸其實都一樣縮水。為咗證實我印象冇錯，我搵返啲相，例如：2014年7月2015年2月2015年7月2015年11月無論點睇，今次嘅料都係嚴重縮水。最不解嘅係，如果你話因為百物騰貴，佢仍然貼住張齋叫燒吞拿魚丼同蔥吞拿魚腩蓉丼加碼嘅海報，我叫自選，你唔加碼都冇所謂，反而要同我縮水，而且縮得咁誇張？可能正如我食過啲擦膠吞拿魚，先會被 Doraya 嘅吞拿魚味道震撼心靈；我唔知道，其他人見到呢碗飯，會唔會有我嗰種震驚。感覺同一個識咗好耐嘅老朋友忽然背叛你過你一棟冇乜分別。餐飯難唔難食？其實唔難，又或者我再冇乜心情去理。又或者如果我有心理準備，知道變成咁，見到真相時都冇咁難受。食完，愁緒久久不去。雖然不捨，但睇嚟係時候道別。…查看更多

第一次食洋一，係小學嘅時候。其時仲未有南角道舖，一開始間舖係開喺龍崗道（從門面嚟睇，似乎即係而家嘅泰禾美，嗰陣亦應該唔係叫居食屋），舖頭極細，都唔知有冇十張枱，依稀記得，一入去左手邊係擺漫畫嘅，然後就係收銀枱，之後係座位。近門口右手邊係隔籬大廈嘅樓梯底，只能擺雜物。嗰陣間舖啱啱開冇耐，亦應該係當時九龍城一帶唯一平民日式料理店（海裕已經喺度，但絕唔係一般人afford得起嘅level。元綠都應該係後來先開，先係喺福佬村道恒生對面，後搬去太子道西唔記得係惠康定再落一條街，當時仲叫示字部嘅元「祿」，英文亦唔係GO SUSHI，價錢則係十五蚊一碟起錶）。嗰陣時，佢嘅咖喱飯同燒餅係非一般好味，亦應該係我第一次食拉麵嘅地方（尤其記得站著吃拉麵呢個名），所以後來都不時 ENCORE。細個嘅我當時仲未知究竟燒餅上面嗰啲一塊塊郁嚟郁去嘅嘢究竟係咩東東，只係覺得好得意好好玩。而當然唔少得嘅係去到就會有好多都幾新嘅漫畫，同埋播啲聽唔明嘅日本節目。後來雖然搬咗屋，但中學時期仍然喺呢區返學，LUNCH TIME 有時都會去食，而南角道店，應該都係嗰陣，大約九十年代尾至二千年代頭開嘅。有一段時間兩間舖並存，而南角道下晝係休息嘅。嗰陣 MENU 都冇乜大變化，而壽司就仲未有。MENU 度有壽司一類食品同埋 LUNCH MENU（即可加配壽司或其他食物、唔加就九折），應該係龍崗道本店結業後嘅事。冇咗龍崗道舖後，南角道舖就全日營業。大學時期亦都曾經同班同學去食過。之後大學畢業，出嚟做嘢，去九龍城嘅日子少咗好多，係有時星期六日，如果得閒，都會走去食下。咁多年嚟，九龍城變化好大。細個住九龍城寨、小學時一路上堂一路聽飛機聲，到中學，城寨拆卸，機場搬走，之後慢慢見到越嚟越多高樓落成，而家就開始沙中線封路處處，而喺九龍城呢個舊區亦越嚟越多高級餐廳出現。香港喺呢十幾廿年開咗好多高檔日式料理，可以話係吊高晒香港人嘅胃口，而家食返佢啲咖喱飯、拉麵甚至壽司，我相信唔會話曳，但一定唔算頂級。但我有時都會選擇去呢度食，一來真係由細食到佢大有感情，二來佢嗰種「庶民」情懷係嗰啲高檔舖頭始終搵唔到，三來喺呢個冇加一嘅價錢，我覺得真係抵食，或者我見識少，喺九龍城我都見唔到有乜代替品喺「性價比」及得上佢。咁多年嚟，洋一冇乜大變化（講起上嚟佢張墊枱紙啲圖案真係始終如一），生意仍舊不俗，不過，漫畫書架就冇再update好耐（而家買漫畫嘅人亦都少咗），而嗰部由CRT後來變LCD、由播帶變成播碟嘅電視，都好似永遠長期LOOP住同一個節目。而我識得嗰位喺龍崗道做到南角道嘅阿姐，幾年前亦已經冇再做。「變幻才是永恒」，我當然明白：細個讀嗰間幼稚園，而家係麥當勞；而間幼稚園上面、屋企人曾經帶我鋸扒嗰間大家樂，而家變咗NEWAY。曾經喺洋一度等食飯前睇嘅 EX-am，已經停刊好耐。不過，喺今日心血來潮，想再去探呢位老朋友時，赫見已經落閘，連個招牌都唔見咗（差啲以為太耐冇去去錯第二條街），只見一個招租牌面，嗰種難以置信、要即刻拎起部電話search「洋一」然後見到google search嘅suggestion係「結業」嘅感覺，真係百般滋味。去 Openrice 見到「已結業」三字，諗起我冇從來寫過關於呢間餐廳嘅食評（上次寫已係仲接受guest review嘅年代），所以 reg 個 account，記低呢段可能有啲模糊嘅歷史，唔知會唔會再見，唔知佢咁多年嚟其實有冇轉過手，只想借借呢個地方，畀個笑面，並對餐廳老細同埋佢嘅伙記講聲多謝，並祝安好。…查看更多