moman123的个人专页

同事講開小伊甸裝修完，即刻去試一試！一入到去耳目一新！成個格局好舒服，適合忙碌嘅工作之中食餐好嘅同朋友嚟傾吓計😍餐牌照舊係台灣嘢為主，仲有得飲珍珠奶茶，但係多咗一啲西式選擇！我叫咗一個西式嘅意粉～流心蛋煮得啱啱好，意粉亦都軟硬適中。其實我好怕出街叫意粉食，因為自己有研究過點樣煮，所以我覺得呢個意粉算係好高質！朋友叫咗一個新竹湯米粉配豬軟骨，同以前一樣水準依舊，好食！整體價錢貴咗，但係選擇多咗，環境又舒服，抵唔抵就見仁見智啦！…查看更多

觀塘區返工返得耐，好似乜都試過晒。而家又要配合防疫新措施，堂食冇乜得選擇，唯有考慮外賣。得知好叉好味開咗喺附近，終於的起心肝去試！本身見到佢啲宣傳，叉燒飯盒個橫切面已經好吸引！佢唔係港式嘅叉燒煎蛋飯，感覺似係fusion，雖然有港式叉燒，但仲有溫泉蛋，又有菜飯。三樣嘢夾埋有幾襯喎！同同事揀咗兩個飯盒，一個叉燒，一個燒雞，一個雞翼小食，份量好多，飽到要分比其他同事食！（金魚肚的我倆⋯⋯）其他人都讚好好食！我諗係個汁，撈埋落個飯度好惹味！其次就係，瑞士汁雞翼都神奇地好好食，普通餸但係好入味！如果嗰日做嘢做到攰攰地，「好叉好味」一定係想食濃味野之選！推介！下次再買！…查看更多

自從冇咗晚市堂食之後，夜晚食嘢嘅選擇真係少咗好多。以前最簡單去一間日本餐廳食嘢當享受都冇埋⋯⋯咁我哋呢pair飲食男女一於搵吓有咩外賣日本嘢好揀 ！行經大埔超級城，呢一間日本餐廳superdon，望落好有日本快餐感覺，外觀簡潔日風路線! 似乎係外賣之選！我哋揀咗「藍鯨吞拿魚腩蓉·溫泉蛋·牛油果丼」，同「火炙海鮮丼」（見唔到有個Super嗰隻海鮮丼，早知叫嗰個）！拎到返屋企，開出嚟每一個餐清楚見到有前菜（中華沙律）、麵豉湯和主食，令係屋企食都覺得好豐富。（如果堂食嘅話前菜會係茶碗蒸，好似仲好食啲添！ ）我覺得藍鯨吞拿魚蓉丼好食啲，因為配埋溫泉蛋同牛油果，口感食物好豐富，亦好濃味。對於我來講白飯有啲多，但對我男朋友來講就啱啱好。火炙海鮮丼始終冇喺堂食嗰種一燒出嚟就可以即刻食嘅感覺咁好，返到又已經凍咗少少，硬係爭咁啲～ 不過時勢艱難，又想食好食嘅刺身丼，又冇得堂食，呢間都算係咁啦。下次我會想試吓佢個superdon，同火灸牛嗰啲丼飯！但係，最好係恢復返堂食啦…查看更多

疫情稍為放緩，我同男朋友好似放監咁，搵到呢間平民美食， 一黎俾佢店裏面坐滿晒人吸引，二來覺得裝修好靚，一於入去試吓。入到去，因為店舖樓底好高，加上有一幅直身植物裝飾牆，我以為自己去咗Hotel ICON。真係一個好靚嘅打卡位！我同男朋友，叫咗一個季節海鮮鍋配龍蝦湯、火炙海膽帶子黑松露意大利飯、邪惡炸薯條，和炸香草北海道南瓜餅。其中一個主菜仲轉左餐，多咗一碟小刺身同麵豉湯。首先係，你冇諗過一個海鮮鍋都只係$88 ，仲要有齊海蝦、冰蝦肉、青口、蜆肉、帶子和三文魚柳。火鍋配料本身已經有蔬菜同鳴門卷，吸晒龍蝦湯嘅香味，好香！我男友就想佢再咸啲，就自己再加咗豉油，點知又好發揮到個海鮮鮮味，佢真係廚神！不過食開海鮮鮮味同清淡嘅朋友就直接食鋪頭嘅湯底調味就好了。然後喺個意大利飯真係好驚喜，好濃郁嘅黑松露味道，應該再加左芝士。海膽燒左之後多咗一份炙燒味道，反而令海膽冇咁膩口。我覺得呢個配搭好好，但食咗半個就已經覺得好飽。另外值得推介嘅係個南瓜餅，好滑同埋南瓜同香草嘅味好夾，炸得來又覺得係蔬菜所以冇咁邪惡。幾值得試！下次嚟一定要食佢個吉列牛！…查看更多

逼不得已一定要喺街食飯的話，我推介「博多拉麵別天神」！（拜託，強制險疫的人不要進來！）一進舖頭，發現它的座位像日本拉面店般，食客平排單向的，一臉朝着吧台坐。（沒有面對面與其他食客接觸，比較放心）用日本最常用的自助售賣券機，我們叫了一個別天神套餐（有一豚骨拉面，一小龍蝦蟹子沙律，一餃子），另外就叫了蝦味噌豚骨拉面，賣相一流之餘，味道實在物超所值！小龍蝦蟹子沙律很開胃，蟹子的粒粒脆口感配上蝦肉和沙拉醬，是前菜必選！（配埋卜卜脆紫菜食無得壇）我和男友分別試了不同湯底的拉面，豚骨湯很滑，白色湯底不膩不油；蝦味噌湯底則比較濃郁，喜歡蝦的人必試～ 我特別欣賞這店的豚肉，別家的店豚肉叉燒有時肥得要緊，有時卻瘦得像柴皮；但別天神的豚肉卻是肥瘦適中，配上湯底實在是絕配！…查看更多

留意返，呢篇係我寫得最有心機食評⋯⋯🤩因為真係好好食！😍😍😍平時去食日本野，第一時間就係諗啲連鎖壽司店。我自問都幾鍾意日本野，但去完呢間鋪頭，發現自己以前都係太狹窄膚淺了🙈😝☺️我地叫左最吸睛嘅「浜燒蟹甲羅」（其實都係因為睇左個menu覺得呢個好吸引先行入去），「活貝盛合」（即燒海鮮拼盤）～ 「海膽蟹肉反卷」，同「樂·五點刺身」⋯⋯飽到呢⋯⋯⋯ 紀念日係咁㗎啦🥰原來係有專人幫我地燒㗎！！（如果唔係見到有人幫我地燒，要我地兩個自己燒真係懶到唔想叫～🙈）平時仲有歌舞表演添！！真係好似去左日本！特別點評：1️⃣「浜燒蟹甲羅」：除左蟹膏之外，呢間舖頭仲加左蟹肉，蟹籽，鵪鶉蛋，蔥花，自己嘅調味料！完全令個蟹蓋更有層次感！一路燒，仲聽到個蟹蓋加熱裂開嘅聲，蟹膏由開始偏薄身，慢慢變「傑」，厚身，淨望都知道十分濃郁！食落口味道一流！好味度：🌟🌟🌟🌟🌟2️⃣「活貝盛合」：豐富嘅燒海鮮拼盤，有鮑魚，蜆（好大隻！），蠔，扇貝，原條魷魚！鍾意食海鮮嘅岩哂！原來燒海鮮係咁講究，一時用清酒，一時用昆布汁，務求要夾返海鮮嘅味又不掩蓋原本海鮮嘅鮮味！（好在有Peter哥幫我地）鮑魚收水個程度啱啱好，鮑魚咬落煙韌有口感；蜆用清酒煮，一熟即刻拎起，仲啱啱好保留返蜆本身嘅海水咸香，汁同鮮味；扇貝用昆布汁，又幾夾！最後條原隻魷魚真係賣相十分滿意，燒到個汁入哂味又上到色！好味度：🌟🌟🌟🌟🌟3️⃣海膽蟹肉反卷我真係好鍾意食海膽⋯⋯ 呢舊反卷嘅海膽十分有誠意，啖啖肉，仲齒夾留香⋯⋯ （好食過我喺日本黑門市場食到嘅）好味度：🌟🌟🌟🌟最後一提，如果第日大家都有機會去食，記得叫Peter哥，佢係店入邊我覺得燒得幾好手勢嘅師傅，又細心解釋俾你聽每一項食材嘅最好食法。好開心呀，紀念日有完美嘅一餐！🥰🥰🥰…查看更多

秋風起，最想食邊爐🤤～ 俾我地發現左一間新開嘅邊爐「點鍋」，一坐入去，聽到佢播緊「天空之城」music，就知呢間餐廳同其他要嘈要大排檔feel嘅唔同，佢係另類路線的。一坐低，就俾佢枱上嘅木架吸引，佢可以俾店員逐碟逐碟邊爐料放上去。心諗，岩哂銛意打卡嘅朋友仔！邊個話打邊爐無得打卡po靚相？而家有啦！我地叫左個特別啲湯底—喇沙海鮮湯，裡面本身已經有好多蜆肉，有蝦又有青口～ 平時啲平平邊爐，蜆肉有沙又細隻！但呢個湯底蜆肉鮮甜，絕對無沙！好開心搵到用靚料嘅湯底！如果要我介紹必食之選，有兩樣！1: 牛頸脊；2:星海斑！牛頸脊嫩身，牛味又重，好食！星海斑已經係平時平平邊爐無得食嘅野，有得食之餘，仲要係厚切。有口感得黎，連皮食嗰啲位仲煙煙韌韌（好似好多骨膠原嘅質地咁）不過第一次食先知原來「點鍋」係食靚料，所以我打算下次唔叫咁濃味嘅湯底啦，費事阻住我品嘗鮮味！…查看更多

又係我嘗試喺銅鑼灣搵平嘢食，今次比我搵到間台灣野！佢價錢喺銅鑼灣來講算係平！我同朋友叫咗金莎杏鮑菇，三杯雞，牛肉麵，仲有個小雲吞⋯⋯（兩個食咁多，其實係咪想嚇死隔離枱）😅我想讚下個小雲吞，因為係一口小雲吞，size啱啱好，一啖一隻。加埋少少醋，其實係幾開胃嘅小食，雲吞嘅涵味道恰到好處！牛肉麵牛肉幾林身，好似炆左好耐咁，個面又厚身，好有咬口。味道都幾濃，同埋蘿蔔幾入味！抵食！但係美中不足，就係個金莎杏鮑菇⋯⋯佢個鹹蛋黃味雖然好出，但係成碟餸好油，食到最尾幾舊，好似啲油浸住個菇咁，巧驚驚～…查看更多

好姊妹要出嫁啦，趁佢未做人妻，想搵間餐廳放工近近地，又可以chill下，又可以放心啤一啤⋯⋯ 我即刻諗起德國咸豬手配啤酒！睇openrice搵到呢間城市綠州嘅 Das Bier! 位於Mikiki，又係downtown, 唔駛去到西貢赤柱都可以Chill～兩個女仔諗住都主要係飲酒傾計，所以冇嗌到好多嘢。最後我哋叫咗一個香蔥芝士薄餅，加德國鹹豬手配酸菜及薯仔沙律！再加一杯Hoegaarden兩份飲（一睇就知唔係飲開走但又想Chill下）我哋本身以為都唔係叫咗好多，但嚟到就開始擔心了。因為原來份量都幾多，薄餅有成八九塊，可能因為有埋芝士所以更加「漏」，但我個人覺得好好食，所以我食到停唔到口。不過我唔係好鍾意個醬，覺得唔係幾夾，所以我都係空口食件芝士薄餅，就咁食都覺得好好食。香蔥味幾濃㗎 ！另外個德國豬手真係不得了，因為原來真係好大份，食到三份一嘅時候，我哋有諗係咪要打包返屋企。啱晒大食嘅人！豬手都幾好食，個皮基本上好脆身，不過有啲位就有啲太煙韌啦～ 肉又唔係好乾身喎，幾好食！酸菜又未到人哋Table 18嗰啲咁酸（好易入口）！呢個組合都夠晒我哋傾足一晚，配埋啤酒坐低傾計都幾舒服，店員有冇趕住要你食完就走。呢晚都食得幾開心。…查看更多

知道九龍灣有一間以teddy bear為主題的餐廳，我硬要男朋友陪我試試！入到去，好開心可以坐係一隻大嘅熊啤啤旁邊，影相打卡一流！我哋叫左一個墨魚汁意粉，一個炸魚薯條，一個煮蜆，一個蛋黃汁蘆筍。墨魚汁意粉看上來很濃味，但原來吃下去有一點淡，所以我們也自行加了點鹽來吃。反而個煮蜆果個汁就好濃，好啱「送」飯或意粉，所以最尾我們自創了新菜式：墨魚汁意粉撈煮蜆汁，味道一流。炸魚薯條見得多但係好食嘅就好少，啤酒「章」炸粉係最好食嘅，但呢間餐廳我就食唔出佢係唔係啤酒「章」，但係就一定唔係普通最cheap嘅炸粉。佢食起嚟個感覺好特別，好似酒樓蘿蔔絲酥餅嗰個酥。其實係好香口，好脆身，好惹味。最後令人大失所望嘅係蛋黃汁蘆筍，因為蘆筍係好細條好幼嘅品種，咬起嚟冇一般粗身蘆筍嘅口感。而且個蛋黃汁亦都唔係我想像中嘅蛋黃汁，有一點失望😞⋯⋯整體都係值得推介大家嚟打下卡嘅！…查看更多

有人請食生日飯，我就唔客氣揀咗銅鑼灣呢間專食吉列牛嘅鋪頭。叫得Steak Bar，如果我入到去都唔叫份牛扒，就真係好唔俾面啦⋯⋯ 所以我哋兩個女仔（真係好大食🤤🤦🏻‍♀️）一人叫咗一份定食：分別係吉列炸和牛扒，同埋澳洲黑毛安格斯西冷。食牛最緊要係可以控制到牛肉本身熟嘅程度，而佢個餐牌啱晒兩款人：一款係懶到出汁，最好唔使自己燒；另一款係專業食家，最好係比佢自己燒。我同我個朋友就咁岩中哂兩款人，各執一個極端。所以揀大西冷係唔使燒，吉列炸和牛就自己燒。先講吉列炸和牛扒，個賣相真係一流。（完全係相機先食！😍）因為見到炸粉仲係脆身、乾身，而和牛嘅肉身仲係呈紅色生嘅狀態，比你燒幾成熟都得。我同我朋友都食得幾生下，所以我哋輕輕燙左一燙個面就放入口，熟嘅程度啱啱好！食到面嗰層有少少脆香，裡面仲係好嫩口多汁。真係幾好食！因為「香口野」（炸野）牛肉配白飯珍珠米，加埋白飯上面嘅味素，係幾好送飯嘅。另外安格斯西冷好明顯係牛味重一點。因為我同店員講我要五成熟，所以佢真係燒熟面嗰層，保留到肉心仲係粉紅色半年嘅狀態。賣相又係好打卡，但我發覺原來我都鍾意食幾生嘅，所以如果下次再叫我就會叫佢係三成熟就夠了！…查看更多

而家有好多食burger嘅舖頭，平嘅廿幾，貴嘅百幾二百都有。今次就試咗間感覺唔係好貴，但環境同氣氛都唔錯嘅鋪頭。初初去到，見到室外嘅座位氣氛好似好好咁，都有心動想坐，但因為怕熱最後都係揀咗室內嘅位置。每張枱上面都有一盞小燈，感覺唔錯。同男朋友兩個人唔算好餓，所以叫咗一人一個burger ，分別係熱帶芝士漢堡同鹹蛋黃雞堡，再加個忌廉蘑菇雞翼。鹹蛋黃雞堡，雞好大塊好足料，但生菜就比較少，所以味道有點偏鹹（都可能係因為鹹蛋黃既緣故：p）熱帶芝士漢堡原本係男朋友嘅，雖然外表平凡但食落好有驚喜，煎得好香嘅牛肉，加上醬汁同燒菠蘿，感覺好清新！所以食到一半就順利成章地同男朋友交換咗。忌廉蘑菇雞翼，原本以為忌廉蘑菇係汁，但原來係將兩者釀入去骨既雞翼到，勁有心機！見到有蘑菇，但食唔到有蘑菇味，反而忌廉味好出，令雞肉質感更滑。…查看更多

平時食好少少嘅西餐，都總會覺得格格不入，可能都係去唔慣高級地方。所以今次同男朋友去呢一間上樓西餐廳，試吓新意思新感覺！初初去到，真係有啲擔心，因為門口同埋𨋢都係比較簡陋。不過到咗之後，都有煥然一新嘅感覺。餐廳係簡簡單單好溫暖好舒服嘅西餐私房菜嘅裝飾。地方唔算大，但都坐得舒服。餐廳有二人餐，亦都有唔同形式嘅散叫。因為我哋唔算大食所以簡簡單單兩個Main 一個前菜應該好夠了！我哋嗌左火炙半熟吞拿魚伴柚子味噌醬、蟹肉意大利麵伴松葉蟹羔忌廉汁、原隻蒲燒魷魚鰻魚汁意大利飯。未上菜之前，餐廳送咗一碟麵包，牛角包好鬆軟好好食！等我逐樣菜式介紹啦：火炙半熟吞拿魚伴柚子味噌醬特別嘅配搭，吞拿魚肉配搭酸酸甜甜嘅柚子醬幾清新，亦都幾開胃！份量啱啱好蟹肉意大利麵伴松葉蟹羔忌廉汁睇相已經睇到意粉上面有好足料嘅蟹膏！入邊嘅蟹柳並唔係平時打邊爐食嗰啲用魚肉整嘅假蟹柳，而係真嘅蟹肉！鍾意食汁嘅要注意！呢個意粉啱晒你～味道濃郁，而且意大利粉煮得啱啱好，唔會太林原隻蒲燒魷魚鰻魚汁意大利飯最期待亦都最特別嘅菜式，魷魚煮得啱啱好，我男朋友就嫌佢稍微硬身左少少。至於味道方面，對我來講就太過重味；但我男朋友就食到舔舔脷！魷魚上面嘅鰻魚汁有少少鹹得滯，不過真係見仁見智！整體：以呢個價錢，我覺得都係值得嘅！未試過可以試吓！…查看更多

銅鑼灣區喎，人均消費如果係上樓食嘅話，分分鐘係百零$200先落到樓。 今日，就比我同我朋友搵到銅鑼灣區一間隱世美食。呢條巷望入去，就剩係得一間鋪頭要排長龍，唔使問，梗係試嗰間啦。排排下先知原來呢間鋪頭一啲都唔貴㗎喎， 50呢蚊就可以食到一個飯或者麵。原來呢間鋪頭主要嘅菜式都係食豬嘅，入得去嘅人都要食人哋全家，慘慘。我哋兩個人，叫咗話梅花雕豬手撈幼麵，同滷水雞翼。佢份量非常足，兩個女仔食一個面都已經好飽。講返豬手，我最憎好林嗰啲豬手，點知呢間鋪頭嘅豬手好爽口，仲有煙煙韌韌嘅筋位，完全就係我鍾意嘅豬手啦！另外佢個面上面加咗好多炸蒜俾你撈，個幼面又好食，撈埋一齊真係好邪惡！ （食咗先講，減肥後話）另外就係佢個滷水雞翼，好大隻，好入味。不過如果我真係要挑剔嘅話，我想佢滷嘅時候，落多少少糖咁就更啱我口味。事關我都係煮嘢食㗎，哈哈哈。不過其實佢啲滷水雞翼已經比出面好多餐廳好食好多。你間鋪頭真心會返嚟再食，下次再食其他嘢。…查看更多

朋友住大埔，廣福道嗰邊出名多野食，於是我哋就地揀左間好精緻，有風味嘅日本料理叫「一鳴」。佢有日本地道拉麵嘅小店格局，最近廚師嘅Bar枱唔少得之飾，連拉麵嘅餐牌都係好細心有好多選擇俾你：湯底有四款，因為第一次食就叫左佢「招牌一鳴豬骨湯」麵料：直麵/太麵（曲）麵質：軟/普通/硬餸：叉燒/豬軟骨蔥：少/普通/多/走蔥上面嘅你任揀都唔怕錯，但以下選項，我好想建議你：一定要試！！就係 「唐辛醬：辣椒🌶️/🌶🌶/🌶🌶🌶」！！我同朋友都揀左兩隻🌶🌶，我哋都覺得岩岩好，好惹味，尷尬的說，我地成個湯飲哂🙈。另外我地仲叫左，「海鮮五品御好燒」同「明太子章魚燒」。御好燒個軟硬程度岩岩好，醬汁恰到好處，不太甜（我最怕好甜）。章魚燒勁嘅位係，佢個皮熱辣辣，脆脆的，但入面係軟心，口感好好。明太子醬惹味當然同章魚燒係絕配，大家真心要試！…查看更多