joeyhmc的个人专页

我細細個就嚟呢間餐廳食，每次跟屋企人都係嗌二人餐或者四人餐，都好食嘅，不過選擇少有啲悶。呢間餐廳真係非常家庭式經營，燈光有啲暗，裝修同埋服務梗係唔似高級餐廳咁樣啦。啲屋企人冇嘢做會坐喺度睇電視，仲有時有講有笑，所以好有街坊餐廳感覺。味道都幾正宗，唯一唔正宗嘅就係個辣度可以畀你揀，揀唔辣都得 🤣。平時我都好鐘意食印度菜，呢間餐廳嘅餐牌都有好多出面印度餐廳有嘅菜式。今日同男朋友去，終於可以試散叫。叫咗Chicken Tikka Masala, Lamb Korma, Naan, Rotti, Mango Lassi。最推介就係Chicken Tikka Masala，個雞肉有炭香味，同個creamy嘅汁好夾。我才疏學淺唔識印度香料嘅名，唔識得詳細啲形容。Lamb Korma個汁好味，可惜啲羊就細粒咗啲。不過印度菜最就要都係食個汁，冇所謂啦。個Naan同Rotti都係新鮮整，我鐘意Naan多啲。埋單總共$199，我覺得平過出面嘅餐廳。…查看更多

你會以為自己唔知做咗啲乜好似得罪咗佢。八點半，見舖空空，同三個朋友行入舖，侍應喝住我哋：「唔該你哋出返去先啊，有好重要嘅嘢要講。」咁我哋唯有全部人褪返出去舖外。然後佢講：「我哋得兩人枱，冇四人枱，你哋o唔ok先？哩樣嘢好重要。得唔得？」我哋ok，於是入舖。坐低填完紙仔，開始睇餐牌。未睇完，侍應揸住個箱行埋嚟，問：「你哋填好晒紙，咁不如擺咗落箱先啦。」當時我諗，冇咩嘢嘅，緊張查牌啫。可惜嗰時冇走到，結果買氣受。揀好個飯，剔埋鰹魚汁茄子，我就交紙。侍應畀返張紙我，態度惡咁同我講：「我哋9點鐘last order㗎，唔會有小食㗎啦。」朋友乙都忍唔住細細聲同我講：「9點鐘last order，同冇小食有咩關係？而家仲要八點半咋喎。」我雖然唔太順氣，但得饒人處且饒人。於是我再剔檸檬茶，再交。侍應再彈回頭話：「小食冇，茶啡都冇晒㗎啦，得返汽水。」我唔明冇小食點解就會知你冇茶啡。朋友都忍唔住問：「你不如一次過講埋冇咩？」佢話冇啦。咁我轉汽水啦，我淨係想交張紙。佢收咗，5秒後回頭，突然摀低身，指住枱角個號碼，喺我耳邊講：「其實先生麻煩你下次自己填枱號吖，唔該晒。」頭先朋友嬲，但到哩度佢已經笑咗。不過我慢半拍，哩下先到我嬲。我問我朋友：「佢係咪覺得我好蠢？」到送餐畀我朋友，侍應出咗兩下聲，但冇講嘢，又唔擺個盤落嚟。我朋友冇反應，於是我話：「佢應該係叫你唔好好橋腳啊」。朋友放返低隻腳，佢先擺個盤落嚟。我突然醒覺，我做乜要幫個侍應出聲？係斯德哥爾摩症候群？食到一半，有三個客行入嚟。侍應又喝住佢哋，大聲講：「小姐，我哋出面反咗牌啦，飯賣晒㗎啦，唔好意思。」嗰幾個人面懵懵咁轉身望望門口個木牌仔，頭dup dup行返出去。我好想跑出去同佢哋講：I feel you。我同朋友講，我下次唔想再嚟。佢哋同意，咁我去埋單，我以為完啦。我問佢收唔收信用卡。侍應小小大聲答：「現金、八達通、信用卡。」臨走，個侍應講咗句罐頭歡送嘅日文。我第一次覺得日文咁難聽。個飯不過不失。汁嘅份量足夠，就係正常嘅味道。…查看更多

今次點咗二天沾汁麵、山賊汁牛舌煎蛋飯、吉列廣島蠔、北海道芝士薯餅，用Food Panda外賣。話就話40分鐘送到，結果等咗一個鐘。以下逐項點評：沾汁麵（$88）個湯稀冷冷，冇特色；啲麵黐埋一餅。牛舌飯（$68）個山賊汁基本上就係茶記黑椒雞扒飯個黑椒汁。薯餅（$38）以為咁嘅價會有兩塊，點知真係成個盒裝得一塊，仲要凍咗。廣島蠔（$55）好彩凍食都正常，唯一下到口。總之哩間嘢不可一，不可再。總分3/10。…查看更多

跟著Openrice評分來到，雖然裝修新穎，但夜晚八點只見到空蕩蕩的店內兩個外賣客，有點擔心會否中了「打手」伏。加上餐牌上菜式的價錢都是$3x-4x，就沒抱太大期望（平嘢冇好的謬誤）。豈料食物質素喜出望外，味道細緻而有特色，真材實料吃不出味精，實為香港食肆少見！由於開頭以為求其食餐，有字冇圖，唯有齋噏 😂。同行四人嗌咗五樣嘢，冇嗌嘢飲，食到飽飽，總共$20x，平均$50一位，晚餐嚟講我覺得價錢公道，甚至算平。午餐餐牌好似好抵，但未食過唔知質素係咪一樣。* 清湯韮菜豬肉雲吞湯底同饀料稍稍偏鹹，但我個人口味一向比較清淡，所以朋友覺得啱啱好。皮薄煙韌，湯底似乎冇落味精，蔬菜湯底清新但不普通，椰菜和微微的蕃茄味竟然沒有互相掩過了對方，實在十分出色。*檸辣撈雲吞落單時半抱chok怪嘢心態，但原來青檸夾雲吞異常合理。朋友們得出結論，因為餃子有時也沾醋來吃，所以青檸的味道也吃得很舒服。*五寶麵, 麻辣湯第一啖差啲哽親，因為辣得好認真，同檸辣雲吞兩個level，而且麵條好入味，所以攤涼咗一陣先敢再戰。配料腩肉，雞扒，墨丸同蘿蔔，每一樣都煮得好好食，唔似係同時間求其烚熟撈埋一碗嘅水準。湯底攤凍很有種深遂嘅藥材味，竟然令人諗起某台灣火鍋湯底，臨收碗前大喝了幾口。*麻醬雞絲青瓜撈麵味道是能預料到的，但麻醬稍為調淡了，所以不會成口「漿」住。麵條很Q彈，就已經很安份地好吃。*炸韮菜餅即係炸雲吞，唯一覺得冇咩特別嘅小食，不特別推薦。利申：住附近，長沙灣太多餐廳，好味嘅小店好易畀人走漏眼，怕佢會執笠。睇完有興趣去試下，幫手留住有質素嘅食物。…查看更多