喵喵喵的个人专页

今晚行過長發街市, 見到呢檔個門口竟然有幾個人等緊外賣!好少見街市入面賣漢堡, 一於試下"四重芝士牛肉"同"至尊牛肉"先。揀左餐, 分別跟炸洋蔥圈同炸雞翼。拎到番屋企, 老公一見到個包已經話唔係cheap 野。哈哈! 跟住佢已急不及待食洋蔥圈。買完外賣我仲要搭車先番到去, 但因為食物係即叫即整既關係, 拎到番屋企洋蔥圈仲脆! 炸雞翼好鬼香, 香到我搭車時都覺得好大陣炸雞翼味, 外面夠脆, 入面夠味。跟住講兩個漢堡包, 個包唔係平時快餐店用嘉頓果隻芝麻漢堡包, 係大隻好多同鬆軟既。牛肉幾厚下, 食落去係近乎全熟而有d 肉汁既! 見到塊肉, 已經覺得值回票價!"四重芝士"係一大pat 芝士醬, 其實我分唔到係邊隻芝士, 只係覺得有好濃既cheddar cheese 咋, 哈! 呢個芝士醬, 隻味好似當年哈迪斯個牛仔芝堡呀! (唔小心出賣年齡系列)"至尊"係我同老公既favorite! 入面有香口既煙肉, 炸洋蔥圈, 蕃茄, 生菜, 蜜糖芥末醬, 加埋夠份量既牛肉, 好好味! 係一口入面食到有唔同既口感! 我同老公都覺得呢個包好正!呢間值得encore 呀!…查看更多

同兩位朋友一齊去食, 我點左"酸辣湯海鮮黑粉絲"同"椰汁冰"。飲品同朋友既食物一早已經送到, 我果碗粉絲一直未到。之後其中一位朋友已經食完仲收埋碟, 我地就搵一個女店員講爭個粉絲未到。個女店員不屑望我地一眼講左句"整緊呀, 粉絲係要耐d 架啦!", 然後走左!然後朋友再幫我搵番落單個哥哥仔, 呢個哥哥仔態度較好, "今日d 單唔知點解去晒麵果邊呀, 我地都唔敢催佢地!" (我心諗樓面都唔敢催? 咁我自己入廚房催? )過左一陣個哥哥仔番黎, 話見到廚房畢緊粉絲, 呢度想讚下果位哥哥仔有交帶。等左近半個鐘卒之有得食, 滿心期待夾起一撮粉絲, 竟然……發現入面有一條零舍黑既膠線物體!但我再唔食就遲到, 怕佢再換又等半個鐘, 最後都係照食算。食物方面, 湯底的確有輕微酸辣, 幾開胃。入面有一大隻帶子, 一大隻蝦, 兩粒青口仔同埋有幾舊好細塊既魷魚。粉絲加酸辣的確好夾。椰汁冰都好香椰汁味。食物味道係ok, 可惜效率方面同衛生方面太差, lunch 得一個鐘左右食, 呢碗麵等左近半個鐘。而且呢條膠線已經唔係普通頭髮咁簡單…… 我唔敢再食了。…查看更多

之前都有黎呢間餐廳食lunch, 本身認為不過不失, 只係價位略貴。今日行過見到有$38 喇沙雞扒飯 包野飲, 中湯或沙律, 於是就入去試下。唔知道廚師點煮呢塊雞扒, 個樣睇落似白洽, 上菜時明顯睇到汁同雞扒分開。呢個價錢, 我都明白一定係雪藏雞扒, 好合理, 但係好似完全無醃過咁, 塊扒食落無味, 已經開始失望。點知食食下, 發現塊雞扒竟然係未熟, 中間有d 位好淋好軟身, 仲係透明, 唔係實色架! 好明顯雞扒係未熟既!店家得悉後有即時換一份俾我, 但我應該唔敢再去了………查看更多

未試過等位已經等到想走!門口有位阿姐, 態度極之惡劣。行近少少睇佢張紙仲有幾多個number 先有位 -> 阿姐:"你唔好阻住我啦"俾張點心紙無板墊住, 借佢門口張檯側邊墊住畫點心紙 -> 阿姐:"你唔好阻住我啦! 企開d 呀, 你宜家阻住我呀!"叫到個number 有客人出黎想入座 -> 阿姐:"你地人齊未呀三位?" 客:"齊架啦, 仲有一個泊緊車黎緊" 阿姐:"唔得架喎! 你唔齊人唔俾你入呀! 爭一個都唔得呀!"大陸遊客想睇下仲有幾耐先有位 -> 阿姐: (指住側邊幾個人) 佢地都未有位啦, 幾時到你呀!你見唔見到我好忙呀!"基本上每幾分鐘就聽到佢呼喝一次! 仲要廣東話唔正架!!!最後我同同行既人等左25分鐘, 都決定走人! 未試過咁嬲等到想走人!…查看更多

八個人來食lunch, 被安排坐一間廂房, 但係入面好熱, 冷氣唔夠, 食到一額汗。先講食物, 今次叫左一客餃子拉麵, 質素算係過得去、對得起價格。基本0既紫菜、粟米、雞蛋、一片嗚門卷形0既魚蛋都有齊。當然呢間係街坊鋪, 我對食物要求都唔會高, 蛋黃全熟0既雞蛋我接受。主角餃子係無煎過炸過, 直接煮熟, 層皮其實幾易爛, 不過勝在餡料夠味, 我都接受。湯底, 拉麵同出面幾十蚊貨色相若, 所以食物質素都係可以接受。但係鋪頭0既侍應態度就令我汗顏喇!我地一點幾入到去, 三四個字後其中四個人就有0野食,其餘四人點0左0既食物, 等0左半個鐘都未到, 之後其中一人出去問侍應過多兩個字都仲未有0野食0黎!最後未有0野食0既四個人因為趕住返工走0左, 然後一個侍應好緊張入0黎,點返有乜0野食物0黎左,但過程中一句「唔好意思」都無講過!之後另一個侍應直接拎張單入0黎,叫我0地埋單,但依然無講過一句「唔好意思」!八個人0既0野食你竟然漏0左四份,竟然連表示一0的歉意都無,係咪你0地午市生意太好,已經唔憂做呢?…查看更多

今日買左一盒羅漢齋、齋滷味返屋企加餸。阿姐雖然態度好一般, 但手腳好快, 仲會問我羅漢齋需唔需要加熱同埋要唔要筷子。齋滷味有分大中細, 我要左盒細, 可以揀三款, 揀左齋鴨腎、甜酸齋同豉油齋。講返食物。齋滷味 (圖左$20)無咁濃味甜酸齋: 甜酸適中, 顏色算係無咁似螢光色, 感覺上人造色素比出面買到既甜酸齋較少豉油齋: 少少咸, 無乜特別齋鴨腎: 表面醬汁甜甜地, 食落好似有d 五香粉之類既香料味, 亦夠煙韌羅漢齋 (圖右$35): 有紅蘿蔔、紹菜、雪耳、雲耳、冬菇、豆卜、腐竹等等, 有d 素蠔油味, 味道比較咸, 比較適合撈飯食!食物質素算唔錯。…查看更多

之前有一日趁lunch time 有時間去銀行處理私務, 因手續繁複, 搞完只剩15分鐘時間食飯。行過鋪頭門口見到蒸飯, 就打算快手買個蒸飯堂食。我話想要肉餅飯, 阿姐問我要牛肉餅定豬肉餅。揀左豬肉餅飯, 之後阿姐竟然問我要乜野菜, 原來蒸飯仲有得跟一個送! 我揀左翠玉瓜炒雞肉。當時人唔算多, 我坐埋一邊食, 翠玉瓜同雞肉都比較腍, 亦都夠味, 仲加埋火腿片入去炒。豬肉餅同蒸飯都比較硬, 但以二十蚊有找既價錢, 絕對抵食, 味道亦唔差。一路食一路睇牆上既相, 先知自己原來入左明哥既鋪頭, 哈哈!地下的確係有d 污糟, 但係呢間係草根食堂呀, 同區茶餐廳都有唔少係咁。咁既價錢, 同時要維持多種選擇(估唔到蒸肉餅飯都有得揀牛肉定豬肉), 又要請人幫手, 又要面對通脹係好困難既事, 明哥加油!…查看更多

天時熱, 午飯時間唔想出街食飯, 今日同事帶我黎呢度買外賣。同事已經幫襯幾次, 同檔入面一腳踢既哥仔有兩句。同事叫左個豬軟骨拉麵, 我叫左淨菜肉雲吞。等待時我地響檔口面前吹水, 哥仔竟然主動問我同事d 麵係咪想幼d。原來佢d 麵係即場拉架! 同事等緊佢廿幾蚊一碗麵既時間竟然睇到哥仔即場拉麵! 講番食物先, 我碗淨菜肉雲吞有八大隻雲吞, 算幾大隻用佢隻膠匙羹唔係好畢到。佢落左蕃茄湯做湯底。初時以為食落好怪, 但佢個蕃茄湯好清, 入面仲有d 切到好碎既紅蘿蔔同薯仔。湯底又唔係好重蕃茄味, 比較清甜, 但唔覺得有味精, 湯底味道唔會覺得同菜肉雲吞唔夾。另外試食左同事一件豬軟骨, 入口夠晒腍但夠味! 拉麵同樣係蕃茄湯底。無論服務同食物都感覺到呢檔既誠意, 會再幫襯。:)…查看更多

午飯時一大班同事去食, 我地十個人, 有個好人既姐姐, 細細粒, 戴眼鏡, 扎辮, 把聲算幾溫柔(茶餐廳阿姐多數都係大聲, 甚至無乜禮貌, 呢位姐姐完全唔似呀!!!), 佢五分鐘內已幫我地搵晒位! 之後佢見我地人多, 仲幫我地浸好晒筷子叉匙羹, 擺響隻碟俾我地添, 無諗過茶餐廳咁好服務, 讚!!!我細食, 叫叉燒飯用碗上。叉燒好多, 覆蓋左碗面三份之二, 叉燒上面仲好有蜜糖既光澤, 又唔韌, 好味。三十幾蚊既價錢有咁既質素同服務, 一定再黎!…查看更多

這次和友人點了冬蔭功湯扎肉米線, 蕃茄蟹肉蛋包飯和蒸粉包。冬蔭功湯扎肉米線 - 扎肉較少係意料中事, 但湯底亦不夠酸蕃茄蟹肉蛋包飯 - 不錯, 都有少少蟹肉既蒸粉包 - 本來應該不錯, 但凍左夾粉皮就容易斷開, 餡料好味第二三項保持水準, 但第一項感覺一般。…查看更多

突然好想食薯仔沙律, 咁岩又響附近行街就諗起"開花結果"! 香港實在太少呢d 經濟少少又有得揀唔同款沙律既鋪頭仔。雖然openrice 好少食評, 鋪頭又細, 但次次星期六下晝兩點幾都總有人響門口等位。今次食左薯仔沙律+日式餃子茶餐。餃子應該係買出面既番黎炸, 不過不失。但係薯仔沙律真係好味, 有薯仔, 薯仔切得比較細粒, 每一啖都食到咬落軟身既薯仔, 仲有切到好幼既西芹粒同少少乾既煙肉碎。除左薯仔沙律, 呢度仲有吞拿魚沙律, 菠蘿粟米蛋沙律, 雜果沙律等, 每個茶餐都有得揀要邊種沙律。餐飲揀左台式奶茶, 埋單三十蚊左右, 一定會再黎!…查看更多

今晚同三位朋友黎呢度食野, 其實有位朋友出黎前兩三個鐘先食完野, 佢好飽唔多想食野, 咁我地三個女仔胃口細, 三個人叫三個餐又好似太多, 但係其中一位朋友又話聽人講呢間好食想黎呢間食。我地七點左右黎到, 果陣其實睇到仲有入面四個位, 出面門口六個位無人坐, 但係得門口有四人檯, 就去果度坐, 咁岩有個座地既牌棟左響門口頂住張檯, 於是就入唔到去坐, 呢個時間, 個女店員即刻幫我地拉開個牌等我地坐入去再拉番埋個牌。於是我地叫左兩個 $128 既餐喇, 女店員初初落單果陣無講乜野……之後又多左人入黎, 但係間鋪未 full 仲有門口一張二人檯。好喇, 又有兩個人黎喇, 見到女店員好似同佢落左電話同人數, 同佢講 "陣間有位打俾你啦" 唔知係咪生意難做啦, 呢個時候, 女店員無啦啦走過黎, 好有禮貌咁話佢地有最低消費, 話我地四個人唔可以叫咁少野, 又係咁話 "我地間鋪得廿個位咋, 每一個位對我地既生意黎講都好重要架, 希望你地體諒。" 咁我地初時都唔覺得有問題, 於是又叫多個湯啦, 點知再叫佢落單佢又再話唔夠要再加野, 我地問佢最低消費幾多, 佢就話每人最低消費 $48 , 指住鋪頭入面張告示話"入面果張野有寫, 只係俾條野(聖誕裝飾)遮住咋嘛"! 咁我地自己計數, $48x4 = $192, 而我地根本就叫左 $128x2 = $256 既野, 之後仲要叫多左個湯喎!!! 個湯都 $20 啦! 根本我地就過左佢所謂既最低消費啦! 之後女店員又再黎問我地想點乜, 佢講左句野我覺得係自相矛盾, "我地間鋪得廿個位, 我地又唔想迫d 客俾錢架, 咁……你地四個成年人無理由淨係叫兩個餐架!!!" 講咁耐, 根本就唔係我地唔夠最低消費law, 響呢個時間, 我地見到間鋪又已經有d 人走左, 間鋪又多番d 位出黎喇, 係咪我地阻住佢地做人地幾百萬生意呢?? 最後我地叫多一個湯(埋單三百蚊), 之後女店員態度已經無之前咁熱情喇, 埋單我地擺低d 錢佢過左一陣先拎, 找完錢又番去入面忙, 完全無諗過我地俾佢地門口個牌頂住左出唔番黎走唔到law, 惟有自己大力地推開個牌先行到出去喇……食物唔係唔好食既, 但係店員一而再、再而三強調佢地間鋪得果廿個位, 又三番四次用唔同既理由去迫我地order 多d 野食, 呢下令到我地整次用餐唔太開心。明明兩個餐已經夠四個人既最低消費價錢都迫我地再點野食, 真係唔多老實。 最低消費咁重要既野, 響門口個位坐低真係睇唔到入面張野寫左每人$48 law, 點解唔寫響menu 上面呢?我決定以後唔再去了。…查看更多

之前響尖沙咀食, 覺得好好食架! 岩岩見佢開左分店就去試下啦! 叫左個海南雞飯, 煎珍珠雞, 鍋貼, 糖醋小排骨。海南雞飯有三種醬俾人點, 但係覺得辣醬唔係咁掂, 如果係泰式果隻會好d, d 飯有味既, 雞就一般啦!煎珍珠雞好多餡, 其實個面煎左同無煎食落無乜分別! 但係真係好充料好夠味, 係一樣唔錯既小食!鍋貼味道有d 奇怪……唔識形容。糖醋小排骨賣相比上次食果陣差! 好似骨同肉散開晒咁……不過依然開胃!!!同埋個menu 好似少左好多野食咁……總算不過不失咁啦!…查看更多

有d 人成日講到burger king 有幾好……又成日講到麥記好差好頹廢咁, 好啦, 見到佢響尖沙咀開左就黎見識下!首先, 價錢已經係偏貴! 但係佢薯條份量唔見得比麥記多……叫左蘑菇芝士漢堡包餐, 都要成$28! 仲要係勁少蘑菇! 記得以前哈廸斯果個係一咬落去就食到有蘑菇汁架……其實如果響麥記, 呢個質素一定唔使$28 !!! 惟一係薯條比較新鮮d ……sorry, 我真係唔明點解d 人要以朝聖既心態去幫襯burger king law……同埋個地下都幾污糟, 完全見唔到有人拖地! 我好同意之前果幾位所講, 呢間野完全唔掂!…查看更多

今日兩個人去左呢間食晚飯, 叫左個自選煲仔飯(臘肉+ 馬拉盞鮮雞), 同埋一碗牛肉麵(唔係清湯果隻)。我地揀左出面坐, 幾好, 可以望到商場其他地方。牛肉麵係牛展黎, 不過不失啦。d 湯都幾夠味。煲仔飯送既例湯好好飲! 好濃! 又無乜味精! 係啡色架! 個煲仔飯d 雞有d 味幾好食! d 飯岩岩好, 有少少焦, d 飯索到d 臘肉油, 好香, 但係又睇到係一粒粒架! 我第一次食煲仔飯覺得唔落豉油都夠味! 比起宜家響廟街食到果d 好好多!兩個人都係食左一百蚊多d 咋! 響機場食, 又唔係太多人, 服務質素都ok, 呢個價錢算幾抵架啦!^^…查看更多