Hungry Cry的个人专页

見到呢度新開咗呢間，所以就黎搶先試下啦。呢日想食咖喱飯，而呢間都有幾款揀：椰汁咖哩、青咖哩、紅咖哩。據聞辣度都係跟呢個次序。因為本人唔係好食得辣，所以就試吓個椰汁咖喱飯試吓水溫先。呢個辣度對於本人係可以接受到，但配埋野飲就會更容易入口，但咖喱唔辣就冇個感覺，所以呢個辣度係OK嘅。一開始聞到幾香嘅椰汁味，但食落就一般，唔算太特別。買飯會送野飲，可以揀特飲或者雞湯。但特飲其實就係得薏米水（細）揀，其他特飲係無得送嘅。夏天太熱所以就揀咗薏米水，佢真係落咗好多薏米，佔咗差唔多成三分一，所以唔係太多水。另外，朋友試過呢間嘅青咖喱，香料味真係幾重下，如果鍾意香料味重嘅人，可以試吓～…查看更多

呢間係真點隱世小店，如果唔係特登去搵，一定唔會發現到呢間鋪嘅存在。鋪面好細，所以如果去食一定要book位先。雖然位置少，但都唔會坐得唔舒服，同埋個裝修令人有好warm嘅感覺，所以環境都唔算太差。lunch time去有送柚子蜜，如果咖啡就要另外加錢。今次嗌咗巴馬風乾火腿忌廉白酒意粉(Parma Ham Pasta), 意粉嘅份量唔算太多，對女仔黎講應該啱啱好。雖然係忌廉汁，但就算食晒都唔會覺得好漏，一黎可能係因為份量問題，二黎就係個白酒香消除嘅濟嘅感覺。最後，俾錢方法可以用payme，咁就算帶唔夠cash都好方便！…查看更多

主要做外賣生意的小店，原本見佢好似主要做手搖飲品，所以以為啲主食會差啲，但令人好有驚喜！今次嗌咗 椒鹽雞排配滷肉飯。對於女仔黎講份量都好夠，同埋餸同飯嘅比例係餸比較多，適合啲唔中意食咁多碳水化合物嘅人，但又夠飽肚。買套餐仲送買野飲，今次係送四季春（細杯），不嬲對跟餐嘅飲品都無乜期待，但真係唔錯，配埋啲嘢食仲可以消除滷肉飯油膩嘅油膩感。另外包裝都好有心思，有張紙仔同啲配圖，令個飯都有啲高級嘅感覺。不過要留意嘅係如果lunch買可以事先call定去，如果唔係都幾多人下，都要有排等。…查看更多

之前喺酸奶君試過類似嘅酸奶飲品，真係一試難忘，最衰係有啲貴。今次行過見到呢間做緊優惠：買中送細，就算唔做優惠價錢都係會平過酸奶君，所以諗住試吓，如果好味下次就再買。原本想嗌半糖，但店員推薦三分糖，同埋話多數人都係嗌無糖。跟咗店員推薦揀三分糖，覺得個甜度都可以。另外呢間主打無糖精，無奶精，所以感覺上比較健康。右邊係中size嘅上古酸奶，入面有紫米。酸奶君咁出名都真係有原因，對比之下真係差咗啲，紫米同酸奶兩者好唔夾，但啲紫米都算有咬口左邊細杯嘅係燕麥酸奶相對黎講好好多，好易入口，個配搭都比較match…查看更多

呢間其實如果只係計野食就普普通通，如果要再食都冇問題，但如果講到服務質素，咁就不了，如果唔係心情好都會俾佢搞到燥晒底。首先一去到，已經過咗兩點，但餐牌仲未show出嚟，所以就想問吓職員有冇下午茶餐。個侍應姐姐就話：「而家好忙，我地午餐都做唔切，我問吓廚房先啦。」呢個回應已經搞到我同友人覺得古古怪怪，但因為有少少趕時間，所以都入咗去坐，諗住冇下午茶就照食午餐啦。坐到入去，問咗另一位職員，係有下午茶餐牌。餐牌係過咗膠嘅，可以用蠟筆寫完再擦，都幾環保。但為咗避免漏單嘅情況出現，本人通常都會同侍應覆一次單，但個侍應姐姐就話：「唔使㗎喇！你圈左就得㗎啦！」跟住開始就黎料啦，由個侍應俾返張電子單我地開始，佢就開始將任何野都pat落我哋張枱度，包括啲飯、餐碟、飲管都係pat落張枱，不過都好彩杯嘢飲係擺落嚟嘅😅跟住落黎終於可以講野食。我嗌咗下午茶餐嘅台式滷肉大排飯，啲肉有小小筋，都幾有口感，份量係下午茶份量黎講都算幾多飯，如果滷肉多啲就更好啦。飲品係送嘅，有得配呢種普通餐廳嘅特飲都唔洗加錢，所以都算幾抵。仲要如果嗌珍珠奶茶，大食嘅都一定夠飽！但建議唔好嗌珍珠奶茶，奶茶偏甜，啲珍珠好硬，完全冇咬口。同埋唔知係咪飲管嘅原因，好難吸到啲珍珠上黎，搞到要用支飲管撩吓撩吓，飲到好辛苦。友人嗌左午餐set嘅雞絲冷麵，佢話味道都可以，但略嫌唔夠個冷麵可以再凍少少，咁會更加好。午餐set係附送小菜，聽聞每次都唔同，今次就配半隻蛋同青瓜茄子，搭配住黎食都幾清爽開胃。另外佢配嘅嘢飲就係金桔鮮檸綠茶，甘得來帶甜，味道唔錯，飲到後期先知入面有少少椰果🤣…查看更多