chupig1220的个人专页

終於有機會一嘗喺荃灣返工嘅朋友介紹味道不錯嘅居酒屋。簡單嘅小食、刺身、串燒、飯糰，飲下嘢，享受左溫暖又滿足嘅晚上☺️落order後即有前菜送上，係玉子豆腐，配以鹹香嘅醬汁都幾開胃，不錯！一向居酒屋都會點份秋葵。第一次試酒盜秋葵，酒盜係一種用鹽醃海鮮嘅漬物，好適合下酒。如果就咁食酒盜漬物會非常鹹，但配味道清淡嘅秋葵就剛好，而兩者都有黏稠嘅質地，非常夾，推介！食緊嘢時已聞到廚房有陣陣魚香，好快就上呢個烤半熟鰹魚，配上類似柚子醋的啫喱及香蔥碎和薑蓉，豐富左鰹魚嘅鮮味。雜錦海鮮米紙卷，日越fusion👍🏾煙韌嘅米紙包住好細嘅青瓜絲、吞拿魚、酒甘魚、蟹柳、上面加上蟹籽同藜麥。建議整個放入口咬，一次過感受新鮮魚生及清爽嘅配料帶嚟嘅豐富口感！墨魚刺身新鮮👍🏾份量適中！吉列九肚魚滿分👍🏾👍🏾👍🏾首先九肚魚新鮮肥美，第二外皮薄而酥脆，唔洗沾沙律醬都好夠味。感覺比起中式嘅椒鹽九肚魚炸得更鬆又乾身唔油膩。黑豚腩串和牛肋筋串，兩串都即燒熱辣辣，牛肋筋牛味不錯，雖然話係筋，但完全唔韌。飛魚子玉子燒，一樣熱辣辣，微甜嘅玉子中和剛才嘅各式鹹食。燒飯糰👍🏾👍🏾👍🏾另一推介！首先飯糰表面烤得焦香但唔會太硬，第二飯糰望落好簡單，有啲好細嘅蛋碎，芝麻，飯素，就已經好美味，滿足！青森蘋果SAWA & 白桃特飲都幾大杯，唔太甜~多樣食物有特色，有驚喜，質素屬中上，相信我地都會帶朋友再光顧！…查看更多

見網上介紹呢間日式燒肉做緊優惠，趁仲有優惠食返轉燒和牛😋霞餐做緊買一送一，而高一級嘅雨餐做緊半價。最後揀左包埋任食A4和牛嘅雨餐，120分鐘，主要係半價吸引。去到先知原來早三日whatsapp訂枱可以延長至4個鐘！晚市可以坐四個鐘仲要係放題嘅日式燒肉店應該唔多。一坐低已經會送上呢個餐頭盤，有和西冷、鮑魚、比目魚西京燒、韓風醬油牛肋肉、味淋魚干仲有一盆和牛拼盤。而和牛是可以無限追加的。其他食物就用qr code網上落單。頭盤中最喜歡嘅係A4黑毛和牛後腰肉同三角腩，呢兩個部位油脂特別多，入口即溶化，好美味！另外試左澳洲M5和牛，崩沙腩及外腿肉兩個部位都好食。另外點左一啲海鮮如虎蝦、青口、蜆、扇貝、廣島蠔，肉類有一口牛、豚拖羅及mozzarella 芝士雞腿肉，燒熟嘅雞腿肉再沾上錫紙兜內溶化嘅芝士拉絲，配搭超正！蔬菜及天婦羅都有多款。值得一讚係呢度嘅店員都會主動過嚟提你某啲肉類要用咩火燒，一見塊燒烤板少少燶就好主動幫你換，差唔多半個鐘就換一次，服務不錯。飲品甜品都係無限追加。30分鐘前last order，兩個鐘時間就食得急少少，但呢個餐包任食和牛，食兩轉都抵。下次再嚟一定早幾日book枱！…查看更多

好耐無食韓燒啦！每次見到都心郁郁，一於食返餐勁嘅！講緊嘅係喺兆萬中心嘅平昌，主打任食韓燒放題，咁就唔使就住就住啦。當日book左夜晚七點幾，一上到去已經好有氣氛，裝修風格似足韓國當地燒肉店，店員應該都係oppa黎，而且座無虛席，好熱鬧！我地揀左最平嘅大君御膳套餐，基本上已經包括左唔同野食，牛排、五花腩、甚至有回本位海鮮，仲有唔同料理、飲品甜品等等。一坐低職員已經好快送上兩碟泡菜同涼拌芽菜，天氣咁熱，食返兩啖真係透心涼。點少得仲有韓燒獨有嘅爐邊烤蛋。我地用QR code落單後，大約三十秒，燒肉材料就送到枱面啦，好有效率！而且份量唔會太多，放題當然要少食多款先係王道。平昌嘅烤爐火力好夠，而且唔容易黐底，牛排、牛肉、五花腩等等好快已經煮熟可以開餐啦！除咗燒肉醬汁外，餐廳仲提供左生菜比客人包住燒肉食，咁就唔會食兩舊就食膩啦。值得推介嘅係LA牛排-骨肉相連，口感軟稔，肉汁豐富；調味烤牛肉-啖啖肉，燒肉汁調味，配搭生菜包一流；雞翼-調味適中，大大隻，燒熟需時；半殼扇貝-有驚喜，高於放題質素；虎蝦-大隻新鮮，燒熟非常香，而且肉質彈牙。料理方面有醬油鵪鶉蛋、辣海鮮豆腐湯、肥牛大醬湯、辛辣麵等等。由於燒肉任食已經好滿足，我地淨係叫左辛辣麵作結尾，估唔到辛辣麵都有驚喜，一碗內居然有唔少蛋白花，誠意十足。希望下次有機會試埋其他熱食！最後千祈唔好唔記得去攞收銀旁邊凍櫃的雪條，食完熱辣辣嘅燒肉以甜而冰凍嘅雪條作結，簡直係完美！…查看更多

最近想食一餐可以看看夜景嘅西餐，同朋友選擇左位於旺角嘅Homeland。餐廳環境舒適寬敞，裝修上融合左唔少藝術元素，配上夜景可以好好享用晚餐。我地揀左Pizza二人套餐，包括左沙律、湯、10吋Pizza同主菜。蕃茄湯/法式鮮打龍蝦湯配蒜蓉包龍蝦湯醇厚濃郁，加上龍蝦肉粒帶來豐富嘅口感，湯上仲有精心裝飾嘅點綴。蒜蓉包搭配上濃郁嘅龍蝦湯，係唔錯嘅配搭。另外，蕃茄湯亦有蕃茄蓉的口感，味道酸酸甜甜。泰式柚子墨魚仔沙律以沙律菜同墨魚仔為主，墨魚仔肉質爽脆彈牙，清脆嘅蔬菜搭配酸甜的柚子味道清新開胃，非常適合夏日享用，味道亦十分驚喜。香草蒜香焗田螺拼薯蓉香草同蒜香散發出淡淡嘅香氣，田螺肉大粒令口感豐富，盤底鋪有一層薯蓉，質地細膩綿滑，田螺同薯蓉同時食，口感味道平衡十分好。秘製北京烤鴨薄餅10吋Pizza係厚批，配上北京烤鴨醬、烤鴨肉及青瓜絲，味道幾可亂真，雖然少了北京烤鴨脆皮香味，卻多左Pizza嘅口感，fusion上係一個唔錯嘅嘗試。波士頓龍蝦占米多黑松露闊麵闊麵嘅視覺效果非常出色。碟嘅中央擺放了半隻大大的波士頓龍蝦並散發住黑松露的香味。龍蝦占米多係將龍蝦切粒，配上忌廉、蝦子魚子，第一次品嚐龍蝦占米多，非常特別。而麵條嘅質地彈牙，搭配黑松露、龍蝦嘅香味同口感，係一個十分出色嘅主菜。整體嚟講，呢間餐廳食物高於水平，並且有夜景坐鎮，當日亦見幾對情侶慶祝生日，餐廳亦有提供生日畫碟蛋糕同送即影即有，聚餐慶祝都係一個唔錯嘅選擇。…查看更多

之前經過幾次，一直想試下呢間喺尖沙咀巷仔入面嘅泰菜餐廳，不過佢只開下午至凌晨，就搵左晚同朋友試下。食物高質又唔貴，晚上氣氛舒適，夜少少就會調整燈光變成bar feel，有多款酒精類飲品同戶外座位，之後都一定會再同其他朋友去😋。講下今次左我地叫左嘅嘢食：第一個係椰子雞湯，熱辣辣又濃郁嘅椰汁配上雞湯，內有雞肉及雞脾菇，加上泰式香料香甜惹味，好開胃。望落份量以為唔大，但竟然裝到四五個細碗。因為我戒緊凍飲，朋友只係叫左一杯飲品--芒果沙冰。嚟到啲沙冰係堆到好高，呢個份量之足，係食晒所有嘢都未飲完。前菜安格斯牛肉沙律，牛肉份量多，煮到裡面仲係嫩粉紅色，配上泰式酸辣汁，好淋好香牛肉味，係我最鍾意嘅一道菜。火山排骨聽過好多次，係泰國夜市名物，今次終於有機會食。排骨又係煮得好淋，配上一個類似點生蝦嘅汁，加上大量芫茜，味道有驚喜！我地都係食完一舊又一舊。餐牌明明寫住$248一份有12支骨，諗住我地兩人應該食得落。但我諗實際應該有18-20支骨😂超大份，兩個人冇可能食得晒，但真係好好食，所以都打包埋返去畀屋企人試。黃咖喱軟殼蟹配薄餅個咖喱唔錯，軟殼蟹稍為鹹同硬左少少。青咖喱雜菌意粉都係之前我未食過，輕微香辣嘅青咖喱係唔錯嘅意粉醬，配料有大量菇菌，份量同樣係大份。餐廳只有老闆同一個員工，兩位都好nice好有禮貌。當日見都有幾張枱嘅客人，老闆同員工好犀利，一樣一樣煮出嚟令到每枱客都有啲食物可以邊食邊傾。廚房用心，食物高質又唔貴，值得多多支持！…查看更多

慶祝終於忙完一輪工作，今次揀左間居酒屋主打串燒及清酒。近排有訂座套餐七折優惠，就在平日晚上試下佢地嘅set menu。整體食物質素滿意，環境氣氛良好，店員服務有禮，其中有啲食物味道頗有驚喜。Set Menu 有前菜、刺身、兩個set共12款自選串燒、main course及甜品，$880一位有7折另加服務費。前菜有三品︰右邊係蟹膏豆腐，嫩滑嘅豆腐有微蟹膏香，加上上面嘅蟹籽及蟹肉，係層次幾豐富嘅口感。左邊係蟹肉胡麻菠菜沙律，而我最鍾意中間嘅檸檬水母，彈牙嘅海蜇配以清新嘅檸檬汁酸得嚟好開胃！刺身有生蠔及池魚他他。生蠔新鮮，上有蔥花、蘿蔔蓉及一個啫喱狀醬汁，對我地嘅講都係幾新奇嘅食法。池魚切丁混合調味料，魚肉鮮嫩，入口清新，朋友最滿意。坐吧枱位可以見到師傅在爐上不停地燒串燒，最先燒好嘅係汁燒牛肋（上圖中間）及厚切牛脷芯（上圖下方），熱辣辣上枱。汁燒牛肋外面微焦，裡面肉質鮮嫩，加上甜甜嘅燒汁係幾惹味，牛脷芯好淋但有仍有彈牙口感，味道濃郁，鍾意食牛嘅揀呢兩樣都應該會好滿意。大漢燒羊皮：喺日式居酒屋食有孜然味嘅燒羊皮都係第一次！燒羊皮就唔係好似雞皮咁脆，不過好香羊脂味都係一試難忘。雞翼免治雞肉軟骨：居酒屋必點，每次一上枱已經流口水，而sakeh呢個免治雞肉與軟骨比例恰到好處，加上醬油及蛋黃混合嘅月見汁，口感香滑又爽脆。鹽燒野生馬友：馬友用簡單嘅鹽燒最食到原汁原味，燒到魚皮香脆，馬友濃郁嘅油脂香味亦被帶出，特別邊位燶燶地最好食。荔枝豚肉卷：創意十足，估唔到豚肉與甜甜嘅荔枝完美融合，有驚喜。雞皮紫蘇蝦卷：酥脆嘅雞皮包住蝦肉，中間搭配紫蘇的香氣，口感層次豐富。西蘭羊架：羊架好大件，燒得剛好，外皮香脆，裡面肉汁豐富。食完前菜及串燒其實都差不多飽，套餐最後嘅主食我地各揀左蝦味噌雜菜稻庭及三文魚茶漬飯，兩個湯頭都相較之前嘅串燒清淡，加上最後一件蘋果卷甜品，完美作結。…查看更多

平日Little Fresh Cafe & Bar晚市都好full booking，所以我地選擇左週末午市嚟。餐廳有不少落地玻璃窗，玻璃貼著一些香港電影及活動的海報，是一間好地道的西餐小店。我們選坐了窗邊的位置，中午有日光照明顯得開揚舒適。 法式洋葱湯配蒜蓉包 屬於比較清新的洋葱湯，不會太辣和太濃味，而且店員介紹湯用了牛肉煲煮而成，味道充滿住洋葱甜味及牛肉味，加上一片蒜蓉包，作為前菜剛剛好。 田園沙律 前菜沙律新鮮爽脆，值得一提的是餐廳選用的黑醋酸度平均，容易入口。 煙三文魚pizza 當天的Today Special，煙三文魚的份量十分多，三文魚與pizza之間配著蔬菜和橄欖，Pizza餅底中心軟熟，邊位脆脆的，加上挺特別甜甜酸酸的醬，無論味道抑或口感都非常配合同豐富。 黑魚子蕃茄忌廉汁配阿根廷赤蝦會意大利扁麵 以蕃茄忌廉汁意大利扁麵作底，大而又紅的阿根廷赤蝦作主角，加上少少青綠菜苗的點綴，此客精美擺盤的扁麵，賣相先聲奪人，萬分吸引。赤蝦不止大而且新鮮甜美，烹調的生熟度剛好使肉質口感好好。蕃茄忌廉汁應該亦有用上蝦殼，令扁麵都充滿赤蝦的鮮味。 雜果水果茶及曲奇朱古力沙冰 最後order了兩杯飲品作結，水果茶果香清新解膩，而曲奇朱古力沙冰則相反，有一舊大大的忌廉及朱古力曲奇，沙冰牛奶味較為豐富，邪惡之選。 點餐時覺得餐廳定價略高，原因週末中午與平日晚市的餐牌是一樣的，詢問店員後得知平日午市另有餐牌，價錢比較親民，豐儉由人。享用後我們都覺得餐廳食物完全符合定價，無論前菜主菜，質素都十分高，令我們回味。特別一提，當天的年輕男店員非常有禮同用心，值得欣賞！…查看更多

見過朋友打卡美照已一早bookmarked，今次輪到我地食呢間人氣bar and restaurant~門口打卡-able嘅等待位置，忍唔住都影返幾張相📸進入四月，晚上仍有微風唔太熱，我哋選擇戶外位置更加有氣氛。當日戶外位好full。可惜大霧，睇唔到平時人哋打卡嘅風景，不過坐位係梳化cushion、柔和嘅燈光配小枱燈，氣氛都幾chill幾滿意。份餐牌整到好似一本復古嘅書，配合餐廳名「Library」，幾有心思。每杯cocktail都以故事或者人物作靈感設計，menu上有故事嘅簡介，呢杯叫「半生緣」。以燒酒加上青檸、苦瓜、椰子製成。苦瓜味道回甘，青檸微酸增添清新口感。另一杯「四大美人」，以白酒做底，香甜且果味較重。頭盤白酒忌廉煮青口，先以多士沾上白酒忌廉，而青口大隻肉質鮮甜，約有十餘隻。肉醬芝士千層麵，一層層麵皮夾著微酸而開胃嘅肉醬，配上大量邪惡嘅芝士碎，香濃惹味，份量雖小仍幾飽肚。羊肉二重奏 烤羊鞍 燴羊肩呢個菜式有驚喜，上面嘅羊鞍烤得適中，而下面嘅燴羊肩好淋同入味，有似曾相識嘅味道！上菜時侍應有介紹呢一味係以羊腩煲為靈感，食到一半終於食出精髓應該來自腐乳汁及馬蹄碎，加埋個底有少量熟生菜就更加聯想到羊腩煲，有創意嘅fusion!呢餐飯整體味道滿意，氣氛舒適，無論約會或三五知己坐一晚都會推介！…查看更多

一梯之隔，尖沙咀街頭穿越日本，置身復古裝潢居酒屋：一直在香港尋找能令自己置身日本的居酒屋，今次來到樂酒場似乎有驚喜。進入餐廳需要上一條短短的樓梯，入口處有一個雜誌架，上面真的有一些懷舊的日本雜誌，樓梯兩旁及餐廳裏面都有不同的舊式日本海報，氣氛十足。坐低先點了兩杯飲品，分別係自家製海鹽檸檬highball同白桃梳打。麻醬牛油果豆腐沙律先來一客開胃前菜，牛油果的生熟度剛好，質地柔軟綿密，與麻醬豆腐及沙律菜混在一起食，豐富了沙律的口感。生牡蠣刺身盛精心製作和擺盤的刺身盛，有著不同刺身的色彩，視覺效果增添左不少食慾！除了生牡蠣，還有鮮嫩甜美的帶子，新鮮彈牙的大蝦，肥美厚厚的三文魚，肉質細緻的油甘魚。至於主角生牡蠣新鮮，天然海水的風味加上檸檬汁，入口帶有爽脆感，令人回味。清酒煮白蛤鍋白蛤鍋的清酒湯帶有挺濃的酒味及昆布鮮味，散發出濃郁的香味，而且白蛤肉質飽滿，享用每一隻時都充滿滿足感。明太子醬厚燒玉子甜而充滿蛋香的玉子燒配合鹹度適中的明太子醬，加上少許蘿蔔泥，適合愛吃明太子，口味又不太重的我們。吉列童星蝦(3隻)童星點心面係好多人的兒時回憶，餐廳居然想到將吉列蝦與童星點心面結合。吉列童星蝦比一般的吉列蝦更香口，而且啖啖交替著點心面與傳統炸蝦的味道，「玩」「味」十足。蟹味噌甲羅燒(加配薄餅)居酒屋當然唔少得甲羅燒，由於座位近廚房，聞到陣陣的燒烤香味已知道製作中。蟹味噌的鮮味與味噌醬的鹹香，先吃一口刺激味蕾，再將蟹味噌放上加配的薄餅，特別之處是樂酒場是選用了軟薄餅，口感新鮮有創意，亦能突顯蟹味噌的味道。日本甜醬牛肉鍋一直喜歡日式牛肉鍋，用gas爐加熱及煮熟鍋中的菜，各式菇類以，乾葛絲掛上濃郁醬油湯底，牛肉片沾上餐廳提供的生蛋。最後用上沾剩的生蛋加入鍋中煮成蛋花，完滿結束。充滿氣氛的居酒屋，享用豐富的日本美食，又一次在香港感到置身日本的感覺。推介生牡蠣刺身盛及日本甜醬牛肉鍋，一冷一熱，令味蕾留下深刻印象。…查看更多

而家好多火鍋放題都限時兩個鐘，加鐘要再加錢，竟然畀我見到旺角呢間火鍋放題冇限時😍即刻搵fd試下佢得唔得~放題有三個set包唔同部位牛肉，我地揀左中間價位嘅Set B($298一位)，肉類主要包左任食五個部位嘅牛肉、雞腿肉、豬五花、蝦等，用QR code落單，其餘配料及飲品就係自己出去拎。湯底有胡椒豬肚、清酒蜆、蕃茄、藥膳等五六款左右，我地就揀左日式壽喜燒。飲品嘅選擇多，汽水、茶、涼茶、啤酒都係任飲。旁邊仲有茶包熱水、薯條涼拌青瓜等熟食。調味區。其他火鍋配料有蔬菜、豆製品、菇類、腸丸類，款式都足夠有餘。呢張影得唔係幾好😂，被人拎到咁上下嘅配料轉頭都會有職員添加。有一款魚蛋係入面包住咖喱汁我覺得幾特別！我哋每款牛都點左一份試試，set b可以點澳洲M5和牛肩胛、牛背峰、牛板鍵、薄切門柳、牛五花腩。一份就係以上嘅份量，每人每款兩三片唔會太多，不妨第一round試下各款肉類。第一次食火鍋薄切封門柳，牛肉味係最濃，因為比較薄所以佢會偏細份，可以點多幾份。我地最鍾意食牛背峰，油花夠肉又嫩，完全唔韌好啱打邊爐。牛板腱都好食，有多啲咬口、肉味濃、唔韌。壽喜燒湯底越滾越甜。特別推介相中嘅牛滑，出面未見過，彈牙而且肉味鮮甜，有啲似牛肉丸，都係要QR code落單。充滿肉味濃郁湯底配上一個辛辣麵就係完美嘅邊爐。最後職員送上一人一個是日甜品雪糕。見之前有啲食評有時有蛋糕，可能每日唔同。今次搵到間好唔錯嘅火鍋，無限時嚟講唔貴，又啤酒任飲加食物質素不錯，下次可以約埋大班朋友encore！…查看更多

之前經過楓樹街球場都留意到有一家泰國餐廳並bookmark了，便是這次介紹的［馮濤泰菜］。餐廳佈局特別之處是有一個開放式的廚房，入座時看到泰國師父使用爐邊不同的香料製作炒金邊粉，香味已經非常吸引。天氣炎熱，我們坐下便下單了青檸蝶豆花茶和凍香茅茶，食物則叫了泰式船河金邊粉，蟹肉炒飯及泰式炒雜菜。青檸蝶豆花茶清新，帶有微微的酸甜青檸味，在熱天下感到舒爽。凍香茅茶味道特別，比市面的香茅飲品更帶有香茅的香氣。泰式船河金邊粉湯汁濃郁，帶有正宗的泰式風味。我享受著每一口，這道菜絕對沒有讓我失望。金邊粉掛著濃湯的味道，恰到好處，再配搭肉丸和口感嫩嫩的牛肉，使泰式船河更加豐富。店員更提供辣粉和魚露給我們自己調教合適的風味。接著是蟹肉炒飯，炒飯香口可口，混集著主角蟹肉，蛋碎，洋葱，辣椒，店員建議落數滴青檸汁及些少魚露，配料搭配得宜，讓我一口接一口。至於泰式炒雜菜，椰菜，芥蘭炒得爽脆，加上炸蒜片，紅蘿蔔，椰菜花及菇亦十分入味。整體調味適中，這道健康的炒雜菜中和了前兩菜式的濃香，是一道不錯的選擇。用餐體驗不錯，店員用心的建議不同菜式的食法。他們的泰式船河金邊粉、蟹肉炒飯都表現出色，味道豐富，充滿正宗的泰式風味。…查看更多

最近天氣開始轉涼，即刻想食返個熱焫焫嘅壽喜燒，決定去位於銅鑼灣後街謝斐道嘅本延鍋物，街頭遠遠望過去已經見到簡約又特別嘅鋪面設計。店員安排左我同朋友坐係窗口位，從設計特別嘅窗望出去凍冰冰嘅街食住熱焫焫嘅壽喜燒，特別有feel。晚市套餐首先要揀湯底，因為係一人一鍋，我哋兩個人揀左關東風壽喜燒同柚子胡椒湯，然後主食揀左極上A4黑毛和牛同埋A5黑毛和牛肉眼。每個套餐都會跟前菜沙律，野菜拼盤，生蛋同白飯，我同朋友各自加錢由白飯升級做拉麵同烏冬。A5黑毛和牛肉眼套餐更會多一個豆腐，可以加麻醬直接食用或者放入湯底。沙律配搭柚子啫喱非常醒胃，野菜拼盤有娃娃菜、金菇、本菇、油揚、年糕福袋等，最正係吸曬湯底嘅油揚同年糕福袋，福袋入面嘅年糕亦都好軟糯。之後當然輪到主角和牛！A5黑毛和牛肉眼有五片，和牛上豐富和均勻分布嘅油花，見到已經流口水，我哋立即各自夾一塊放入湯底，幾秒後變成帶有微微粉紅色嘅和牛，混和蛋漿後再一啖食落去！和牛肉味温和，入口即溶，牛味、油脂同蛋漿充滿住成個口腔，食和牛就係想食呢個感覺！配搭壽喜燒嘅係經典嘅日本味道，而柚子胡椒湯亦配有柚子醬油，柚子少少嘅酸味中和左和牛嘅油脂感，感覺好清新！至於極上A4黑毛和牛，應該有六至八片，我地覺得食味上同A5黑毛和牛肉眼差唔多，不過因為油花比較少所以食落會比較有口感，少左入口即溶嘅感覺，但依然出色。去到尾聲，我哋享用埋喺充滿精華嘅湯底入面煮熟嘅烏冬同拉麵，非常完滿完成呢一餐。…查看更多

與快要移民嘅朋友相聚，決定帶佢嚟我鍾意嘅日本餐廳食farewell 飯。呢間餐廳我已經食過一次，無論係環境定食物質素都令人有置身日本嘅感覺！今次揀左黑門鰻魚玉子燒 $98玉子燒十分嫩滑，外面同裡面都有惹味嘅鰻魚，鰻魚肉有口感。另外點了北海道蜜柑鯛薄切刺身 $238蜜柑鯛魚生片切得好透薄，鮮甜唔腥，仲隱約有淡淡嘅蜜柑味，感覺好新鮮。廣島吉列炸蠔4件 $98外脆內鮮，一啲都唔腥，每人兩隻好飽，性價比高。北海道本釣池魚 $288之前已經食過，佢有兩個食法。首先係厚切魚生片，可以品嚐到池魚嘅鮮味。另一部分魚生切粒加上牛蒡絲整成醬油漬，配上紫菜食，就係我更鍾意嘅食法。條魚骨同魚頭唔會嘥，可以同店員講加$60整豆腐魚頭湯。上次飲完之後好回味，今次當然都要畀朋友試下。奶白色嘅魚湯本身已鮮甜加上配料如冬菇豆腐更豐富。飲一碗熱湯，十分滿足。黑門令海膽櫻花蝦海鮮炒飯 $238海膽、蟹籽及櫻花蝦混和喺本身已經有八瓜魚魷魚等嘅海鮮飯入面，令到個海鮮味更加濃。食埋呢個炒飯就真係啱啱好，滿足。朋友都好滿意今餐farewell飯，希望佢去到外國唔會太思念香港嘅日本嘢食😋。…查看更多

朋友介紹這間居酒屋，說食物質素不錯，但價格不貴。早已訂枱周末來晚餐，六時多開始陸續有訂枱客入座，到七時就差不多滿座了，果然是間受歡迎小店！居酒屋多數都是貼滿日式海報，這間餐廳的裝潢反而像cafe， 較為西式及簡潔留白。喜歡飲酒的亦有bar枱位置可供選擇。安康魚肝 $76魚肝味甘香、加上淡淡魚肉味及稍酸的調味，不錯的開胃前菜！串燒︰蔥花牛肋肉 $48 &自選雞串燒 任選三款$98 (免治雞肉/雞皮/雞腎)到居酒屋必點雞肉棒，雞肉和軟骨比例適中，頗有口感，外面本身已經有甜甜的醬汁調味並燒至香脆，再沾上月見汁，配搭香濃的蛋黃吃很正！雞皮香脆，雞腎串與牛肋肉串亦燒得恰到好處，保留裡面肉質口感而不韌。玉子燒 $52份量不少，熱辣辣，裡面仍然半生非常滑嫩，並沒有煎得過熟，非常好食😋！蒜香牛柳粒黑醬油炒飯 $118份量又是比預期多而豐富，兩個人加上前面的小食也很夠。飯底粒粒分明，加入生蛋黃令飯粒更加香滑。朋友沒介紹錯，此居酒屋食物質素價格卻不高，且環境舒適，很適合三五知己邊吃邊聚👍…查看更多

朋友介紹來到呢間人氣餐廳午餐。星期六下午唔算多人。因為有大玻璃，室內環境都好光猛。餐廳掛住左唔同既名人肖像畫及海報，亦有啲懷舊復古擺設。假日午餐時段有Brunch Menu同7-course Chef’s Tasting Menu。Chef’s Tasting Menu 有齊餐湯、沙律、前菜、牛扒、主食、甜品及餐飲，非常吸引！二人點左一份share、加$88加大牛扒至12oz。另點左一份軟殼蟹漢堡brunch，送餐湯/沙律及餐飲。意大利雜菜湯質地較稀，充滿新鮮嘅既菇菌，感覺幾健康。餐湯配一塊多士，香脆。老海灣粟米周打湯個brunch就要左呢個較濃稠既白湯，都口感順滑。大蝦廚師沙律有兩隻大蝦，沙律新鮮，以簡單嘅沙律醋調味。海鮮拼盤 包括蝦、蜆、八爪魚、仲有腸仔、薯仔、粟米，配一個少辣既Cajun汁，惹味又開胃，一人份量算多。120穀飼阿根廷安格斯肉眼牛扒 (12安士)五成熟，牛肉質地鮮嫩多汁，口感豐富。呢塊肉眼一D筋位都冇，成塊都好香好淋。配上幾種芥末組成嘅cowboy mustard，令塊扒更加美味。$88加大4oz算抵食！黑松露意大利雲吞一人份量都有四粒雲吞，每人都分到兩粒，唔錯！法式焦糖燉蛋燉蛋甜度適中，焦糖面脆，作為7 course嘅甜品唔太膩。Brunch menu嘅軟殼蟹漢堡好大個，份量十足。首先個漢堡包烘到好似港式豬扒包咁脆，軟殼蟹亦炸得恰好，外脆內軟，而且好大隻！薯條仍抵讚，每條都夠熱又脆。兩個人share呢份chef’s tasting meunu可以每樣食少少，少人都可以食到咁多款食物，好滿足！我地都冇諗過食物咁大份，brunch下次可以叫份light啲。另外見其他客叫左brunch嘅牛扒都好大份。環境唔錯加上食物質素好，下次可以再約朋友嚟聚！…查看更多