Bruce_Wayne的個人專頁

今日同女朋友一齊嚟到呢間遙遠嘅壹小店，總共食咗兩個蛋餅，一個係素菜蛋餅，一個係煙三文魚蛋餅，而亦叫多咗個waffle以防唔夠飽，嘢飲就叫咗杯Earl grey on the cloud 。先講吓格局，啲枱凳安排混亂，大多都係木枱木凳，坐得唔係好舒服，因為位置有限亦十分逼，所以攞住背囊嘅朋友仔會冇咩位坐。除咗坐位，空氣都好唔流通，熱到我同女朋友一路食一路出晒汗，就算間鋪有風扇加持，都係熱到hihi。講完環境，不如講吓食物。兩個蛋餅都有兩個通病：1.啲蛋有少少太老，可以再少熟啲啲食材先落蛋，蛋亦可以加少少奶，令佢即使熟咗都唔會咁老。2.調味，大佬落少少鹽啦，真係一啲咸味都冇...Btw由於本人為蛋奶素者，所以三文魚嘅食評is not by me。回到正題，由於蛋餅係連餐一齊上，所以會有湯同埋沙律。湯就...湯一碗，正正常常，沙律反而令我好介懷。沙律嘅食材主要係生菜同埋半粒車厘茄，而沙律dressing就係黑醋。本人建議可以加少少麵包粒增加口感，而單單落黑醋亦可以加少少有甜味嘅蔬果，令食客唔會一路只有酸味同埋單薄嘅口感。最後就講吓waffle，佢嘅蛋漿開得好好，所以煮完出嚟嘅效果都唔錯。口感偏脆，味道都幾香，不過牛油用盒裝牛油令到食客會好難搽...完全融唔到...杯Earl grey on the cloud冇Master room咁好飲，冇比較冇傷害...最後講緊服務質素，店員服務態度十分良好，有禮貌亦盡量方便客人嘅需要，唔計沖嘢飲嗰位男士。至於上菜速度...你好得閒先好過去食，因為上菜至少要30-45分鐘，至少我食嗰次要咁耐，嘢飲甚至喺我食晒所有嘢先上到，所以大家自己諗啦。大概係咁多，完！…查看更多