HammerChui1052的个人专页

接近兩點去完朋友屋企準備打道回府，心血來潮想食壽司，去番之前食過嘅立鮨，直入餐廳唔駛等位，眼見「我推的壽司」大排長龍。坐低望師父嘅bar台位，QR code落單，點咗六件壽司，火炙三文魚、火炙帆立貝、火炙左口魚、鰻魚、海膽蟹肉、劍魚腩，上菜速度合理，味道一流。食完唔夠滿足點多三件，包括兩件火炙鯛魚同鰻魚，咁就真係大滿足啦，滿口火炙後嘅魚油，價錢就唔可以同連鎖果啲比，不過食材用料分別都食得出，個人同時偏好醋米同好討厭排隊，一定好評。…查看更多

放工八點幾想食壽司，路經立鮨原來大埔都開咗分店，之前試過荃灣分店果時感覺唔錯，一於獎勵下自己。入到去店最入位置坐低，第一時間點杯啤酒先，似番日本人咁放工飲番杯，唔想諗太多就點咗個精選十件。叫精選十件冇圖就等於抽盲盒咁，嚟到果時有啲要睇番餐牌個樣先知係咩，有海膽/火炙蟹腳/帆立貝/三文魚/赤身/牡丹蝦/真鯛/火炙本鮪赤/火炙左口魚裙邊/火炙中吞拿魚腩。味道保持一貫水準，絕對唔係迴轉壽司嘅level，性價比高，最後忍唔住點多兩件三文魚子結尾，見到佢滿瀉嘅魚子，完全滿足晒自己嘅味覺，滿足度十分！！大滿足！！…查看更多

午飯時間，路過觀塘又想食雞飯，決定到中海日升行一轉，中心前面街舖紅茶依然條人龍都係咁長，不過目標今次唔係佢，而係地下要推門行入少少嘅粉紅水門雞。已經唔係第一次食呢間水門雞，不過今次一個人嚟終於唔駛面壁食飯。要用手機落單，但係信號依然超差，唔知係我個台問題定個個台一樣，不過佢有另一個選擇就係先響收銀order後搵位。照舊order水門雞飯，不過今次收銀靚姐問我要配雞軟骨定配湯，原來餐牌改咗水門雞飯變咗套餐。我對冬瓜湯嘅愛不及雞軟骨，所以選擇雞軟骨再配泰式奶茶。雞軟骨嚟到食完都唔記得影相，簡單描述下，有六粒，大小不一，有一層炸漿包住，有少少椒鹽調味，入口唔知食緊炸漿定軟骨，突然間我覺得我還是愛冬瓜湯多啲。水門雞飯每次都有驚喜，驚嘅係油飯嘅質感，試過硬嘅又有軟嘅又試過軟到黏埋一舊嘅，咁同一個飯煲煮出嚟嘅飯處於唔同位置都有分別，我都明嘅。今次嚟到嘅係我鍾情果隻中性嘅口感，飯嘅調味始終保持到水準，油飯油味唔重似香茅飯多少少香口美味。水門雞依然都係果隻硬度同乾爽程度，唔好拎佢同皮同肉中間有層啫喱果隻海南雞比較，肉質都唔係水嫩果隻，泰國地道水門雞都唔係賣呢兩點架啦。喜嘅又係我嚟呢度個原因-雞醬，佢配雞，令到雞昇華，佢配飯，可以食多碗飯果隻，酸蒜辣調配洽到好處。用膠袋裝嘅泰色奶茶相對仿間賣緊嘅冇咁甜，可以一試，茶香奶濃，不過下一次我都係選擇其他飲品試下，唔好飲嚟飲去都係泰奶先得。…查看更多

放工時間路過勝利道，又想食海鮮丼飯類，雖然兄弟幫唔係勝利道唯一選擇，但相對其他選擇比較相宜，當日雖然係平日夜晚都要等位。餐牌海鮮丼飯選擇由六十幾到過百都有，視乎海鮮嘅選擇。當晚選擇咗香蔥拖羅茸丼飯，上菜見到賣相都唔錯，有麻醬沙律菜同麵豉湯隨丼飯附上。先飲啖麵豉湯，唔似其他日式菜餐廳豉豉湯內有昆布、豆腐、魚肉等，湯比較清澈，味道似用即沖包裝麵豉湯一樣。再試試麻醬沙律，沙律菜顏色唔算新鮮，麻醬落得太多，不太特別。到主菜香蔥拖羅茸丼飯，拖羅茸入口味道相對淡，吞拿魚味油脂味唔係好突出，需要日本醬油提升味道。…查看更多

晚飯時間，隨便找一間餐廳解決。見門外Menu有大根豬軟骨定食 ，見佢價錢又唔算太貴，決定一試。店入面坐位寬敞，侍應服務態度非常好，上菜速度都快。上菜再睇下賣相，都好似日式嘅擺盤，望落去都幾吸引，點知一起筷就出事。1. 味增湯，淡淡嘅味道，屬於清湯嘅類別，飲前都攪一攪番勻先飲，都係冇咩味道。2. 跟餐室溫餃子，味道就普普通通，就算熱都唔會好加分果隻。3. 主菜大根豬軟骨算係加分位，不過都係唔夠熱，肉質係腍嘅，味道都夠，但最大問題都唔係響肉果方面，係白蘿蔔出晒事，狀態係硬，筷子都要好用力先分得開佢哋，咁諗都唔駛諗都知道唔會入味得去邊，完美演繹一舊冇味硬生生嘅蘿蔔。呢間餐廳係我覺得同場最失望餐廳，我相信暫時未搵到對手，希望下次幫襯果時有所改善，如果再有下次的話。…查看更多

葵芳難得一間拉麵店，冇睇Menu就入店，坐低後見到Menu果刻，我睇到一個位，思考咗好耐都唔係好明，真叉燒？點分真叉燒同叉燒，基於好奇點了丸京拉麵$100配小蝦干醬油清湯另加$12。拉麵到咗果時我第一眼完全分唔出真叉燒同叉燒外觀上有咩分別，唔講咁多肚餓，試試個湯底，湯底有蝦味，起初以為就咁蝦油去帶出蝦味，點知原來湯底下有大量櫻花蝦，咁有誠意加分。麵冇得選擇硬度，食落似平時「普通」口感，對於偏好「硬」嘅我都可以接受。真叉燒與叉燒係有分別嘅，真叉燒屬於慢煮叉燒，唔似叉燒有火炙過嘅黑色邊，食落味道分別唔算好大，不過肉嘅份量就好大，menu寫每樣有三塊，但上碗時見到又唔止呢個數，定係佢計重量？唔理啦，總知啱晒食肉獸嘅我，叉燒因為薄切關係，口感唔會話有肉汁鎖住嘅感覺，肉面都偏乾身，浸湯再食會好味啲。賽後檢討：如果唔係太大食，叫一個豚骨拉麵就夠，份量都偏大碗，性價比就見人見智。食緊同食完我都飲咗唔少水，可能個湯底都有少少濃要沖番淡，響葵芳呢個地方有間拉麵店算唔錯，個價錢就進取咗少少，如果唔一定要食拉麵的話，我都會過番隔離葵廣掃街。…查看更多

夜晚一家入三聖邨楊合利買海鮮再搵嘉彩代工慶生。海鮮類：- 清蒸大海斑蒸嘅火喉控制得啱啱好，魚肉唔會話太鞋，可能魚本身邊大條，近魚骨中心位置有少少未完全熟，不過可以接受。- 陳皮蒸澳洲鮑魚鮑魚本身厚身偏大隻，酒樓代工時已經將內臟除掉，值得一讚，鮑魚肉厚爽，少少陳皮配豉油味，主要食材料本身味道。- 台灣蠔兩食炸蠔，粉漿應該只加少鹽同胡椒粉做調味，炸完都唔覺得好鹹，炸完蠔身唔會好乾身，蠔入面仲有少少海水味道，桶蠔嚟計算唔錯。薑蔥蠔，配煲仔上，保持蠔嘅溫度，調味適中，因為人數上關係，放棄咗蠔嘅大小，不過廚房處理得唔錯，冇影響到整體感覺。- 蒜蓉蒸扇貝/蒜蓉開邊蒸蝦廚房簡單處理，材料新鮮，所以味道一流，值得留意開邊蒸蝦係見唔到蝦腸，即刻Like。- 豉椒炒聖子蘇格蘭聖子響海鮮檔時已經非常生猛，煮出嚟都冇縮水，都有番咁上下Size，質感爽口彈牙，煎米粉底先係重點。- 焗蟹遲來的焗蟹，開邊果時發現都非常多膏，有一隻更有流心效果，打開蟹嘅一刻更發現四隻都係重皮蟹，實屬靚嘅品質。- 龍蝦湯飯南澳龍蝦一隻煮一個湯飯，配以脆米，湯鮮甜，冇再額外調味都夠味，更有多種口感。海鮮湯- 海鮮大雜燴配，有驚喜，湯底係有多種魚配瀨尿蝦嘅味道，瀨尿蝦肉記得唔好浪費，煲完湯都仲係好夠味。酒樓提供：燒鵝半隻、南瓜炆芋頭、清炒白菜、炸芝麻包、壽包酒樓環境尚算唔錯，就算十三人一圍都尚有空間，服務員態度不錯，一直有跟進換碟。十三人埋單不用五千，絕對有機會要再嚟。…查看更多

平日嘅夜晚，經過長沙灣，搵下有咩抵食嘅地方叫小菜食，發現呢間冰室小菜館，招牌光猛，非常吸睛。- 冰室白灼蝦（半斤）$48大約有十六隻，體型屬中等偏細，肉質尚算飽滿彈牙，味道新鮮，配上辣椒豉油更惹味。- 清蒸盲鰽$56 跟餐有白飯餐飲蒸嘅時間剛剛好，肉質新鮮可口，口感一流，配薑蔥蒸腩部位置都唔太腥，骨都唔算多，同埋骨肉分明，唔識食魚/唔識lun骨嘅朋友都可以一試。- 紅燒火腩豆腐煲$96上菜時熱辣辣，個煲發出滋滋聲響，聽聲都知有幾熱，除咗字面嘅材料外，都會有蔥條蒜子同埋菇，增加味道層次同口感，醬汁調味適中，唔會太鹹。- XO醬楊洲炒飯$42 跟餐飲菜如其名楊洲炒飯配XO醬，有三隻蝦落鑊一齊炒，份量相當大碟，飯粒都分明唔會一舊舊，細食嘅朋友記得少飯，咪做大晒鬼。- 冰室咕嚕肉$42平時咕嚕肉係用肉排，呢度似係用豬柳做嘅，點解？因為真係啖啖肉無骨，有三色椒同洋蔥做點綴，份量都相當大份，失色嘅可能係佢上菜嘅溫度，真心唔夠鑊氣唔夠熱。賽後檢討：服務都冇咩特別，記得用手機下單可享$2優惠。飯同小菜份量相當大碟，味道屬於中等，但睇埋價錢絕對係糧尾恩物，細食少少嘅呢度一個飯絕對可以分兩餐，想食海鮮而又唔想花大錢呢度係好選擇，餐牌上都好多種類選擇例如炒蜆、蒸扇貝、炒青口等等，都係每樣唔過百，真係抵食，附近有老有嫩，佢哋都有共通點就係都會點一兩款平價海鮮過口癮。睇餐牌果時比我發現到下午茶都吸引，有機會再嚟呢度或其他分店試下。埋單唔好唔Check單，因為佢有Coupon留番下次用，咁就更優惠，今次我收到嘅係九點後入座可以$25享用蒸魚餐，你冇睇錯係$25，有時放工收晏咗，$25好過去食牛肉飯。…查看更多

簡單。味道。湯麵篇是日Order:養生花膠雲南姬松茸肉排湯 $43 - 味道比椰子濃味松茸味非常突出，配肉排粒大約有六粒，Size偏小，有配軟骨/硬骨，質感偏嫩，肉味偏淡似後加再翻熱的感覺，有兩顆姬松茸，再配三塊花膠。配珍珠米，非常推薦跟湯一齊食，味道一流，分開食冇呢個效果。清潤印度椰子皇 花膠圓肉肉排湯 $33- 味道清甜椰子味都好出有些少肉味，肉排粒大約有六粒，Size偏小，有配軟骨/硬骨，質感偏嫩，肉味偏淡相信味道已經出晒落湯底，再配三塊花膠。配米線 ，米線另上，食法似沾麵，但湯可以再熱一點，否則落米線後湯溫度會急速下降。吉仔水（凱米諾吉子汽水） $6- 內地汽水出品，玻璃樽裝汽水，好夠汽，包裝似日式飲品路過比個餐牌價錢吸引咗，突然想飲湯。餐廳應該開咗無幾耐，裝修新淨，座位闊落。落單到上菜，唔需要等太耐，冇漏單情況，服務員落單有禮貌覆單。賽後檢討：清清地一餐，有飯/麵有湯，性價比超高，可以再去。記得留意番個地址跟OpenRice有些少出入荃灣西樓角街202-216號昌寧樓一樓52&55號舖…查看更多

睇咗某YouTuber介紹呢間位於大角咀大型商場Food Court入面嘅沾麵店，抱住一試無妨的心態去試，行到店前果段路一直觀察其他食客有冇享用呢間店嘅出品，沿途不乏支持者，有拉麵有沾麵，估唔到仲有丼飯選擇，平日下午時間都有咁多人幫襯，質素應該有保證，我都放下心頭大石。到店前睇吓餐牌，價錢相對其他拉麵店相宜，六十零至八十零蚊已經有個沾麵，由於唔肚餓關係，隨便點咗個豚肉魚介沾麵試下，店員落單果時都冇其他師兄所講咁差，都有問有答，咁唔好要求佢可以選擇咩麵條，咩湯底濃厚度果啲，呢度係一一欠奉，對拉麵或沾麵有要求嘅都係去番其他店啦。落完order比左個取餐器我，搵一搵位，坐低櫈都未坐暖，取餐器話都冇咁快響，心諗有冇咁快呀，見個餐正正常常，沾麵湯底用石頭窩裝滾住上菜，湯底上面有大量魚介粉，麵嘅份量都唔少，配三塊叉燒、兩條筍、半隻流心蛋、蔥花同紫菜，望落賣相唔錯。石頭窩上可以保持湯嘅溫度，不高有冇諗過會減低咗湯底水份，再加上大量魚介粉，另到湯底更濃同時更鹹，湯底撈起果時入面有角豚粒，算係有驚喜，不過冇驚喜嘅係都係好鹹，補充一句我食完飲咗成支蒸餾水。配菜流心蛋、筍果啲問題都不大，問題在於主菜叉燒，調味同口感出咗事，薄切，調味偏甜，帶有火炙過嘅焦香味，有種似層相識嘅感覺，冇錯，係啦，就係日本杯麵附上嘅叉燒感覺。麵就屬於偏粗，要夾起都有難度（利申：本人非正宗揸筷子），未落湯前試一試，溫度係凍嘅可能過咗冷河關係，食落都有咬口感覺，不過拉麵落湯再拎上嚟唔會係熱嘅感覺，掛唔掛湯都係其次，掛咗又真係好鹹。賽後檢討：環境冇問題，廚房店面乾淨，服務員態度Food Court我冇要求，只求效率，快真係好快，落order到出餐應該冇五分鐘，呢間店真係行過心血來潮想平食拉麵/沾麵而又唔想排隊的選擇，始終附近有更好選擇，專登去食就唔會啦。…查看更多