qiuq的个人专页

哈哈～我竟然係第一個食評 🙈呢間前身係Around Wellington，雖然冇幫襯過但聽聞係唔錯，最近喺荔枝角開咗外賣店，所以就試下啦。Lunch time係送飲品嘅，不過佢哋可能落錯單俾錯我，我話返佢哋知，佢哋都即時換返俾我，仲會特登提返我加返少少糖水會好飲啲呀～😌跟住返到去望真個樣就覺得係外貌會啦，成個設計都好正，打卡非常好😂我總共叫過兩次外賣，一次叫咗花雕去骨雞腿冷烏冬，一揭開望落都幾豐富，啲雞腿都好多下，食落仲要幾好食添！🥹啲雞髀入味，好有花雕酒味，好足料仲要一啲都唔苦，啲雞髀真係食極都仲有咁🙈🙈🙈第二次叫嘅就係最貴嗰款，蟹肉蟹籽甲羅燒蓋飯，本人太鍾意食甲羅燒所以想試試佢，甲羅燒係好食嘅，蟹肉同蟹籽都多，不過個飯就唔夠汁有少少乾，建議可以俾多少少汁，又或者調個蟹膏、蟹味嘅汁落去就完美喇！😂😂😂雖然以外賣嚟講價錢唔叫平，但真係高質，製作好有誠意，絕對值得一試！！🤤🤤🤤🤤…查看更多

呢間餐廳本身有食開，由佢兩年前開張已經覺得質素有返咁上下，早期見似乎係老闆嘅人喺度都幾有禮貌，諗住食生日飯都適合就揀咗呢度食，點知服務愈來愈差，真係好失望。😩如果大家想坐得舒舒服服真係唔好揀呢間🫣事原我訂枱後已經WhatsApp咗佢哋慶祝生日，同時又話咗佢知會叫佢哋嘅甜品，希望可以喺碟上寫返「Happy birthday」，佢哋話要另加$10，雖然我覺得唔值，但為咗身邊人開心都唔緊要啦～但一去到佢哋要我哋三個人坐張二人枱，我即時同佢哋嘅同事講咗「張枱咁細我哋叫多少少嘢都放唔到喎，可唔可以換另一張枱？」當時同事答我「因為今日好Full，換唔到，如果唔夠位放我哋會幫你hold一hold啲食物」其實我唔係好想hold囉…hold到啲嘢凍晒先俾我哋食咩？仲有佢哋得90分鐘食㗎咋🤦🏻‍♀️我最後費事煩就由佢先，跟住我哋叫咗4個小食同主食、兩杯飲品、兩個甜品(甜品我已經叫咗後上)，當時淨係小食同飲品到咗，但其實完全唔夠位放，而啲職員都係格硬隊埋嚟，我哋三個食嘢都有啲困難😓點知食完晒小食，等咗好耐都唔見有其他嘢嚟，見佢哋忙我都費事催佢哋，最後我哋係等咗半個鐘啲主菜先到齊，我哋食咗唔夠15分鐘，又有職員嚟催我哋上甜品，我之前咪話咗後上囉，同埋明明就係佢哋出餐出得慢，成枱嘢食唔係諗住層層疊咁放上嚟呀？正常都知道要清咗枱上嘅嘢先上甜品啦，更何況張枱已經冇位。好啦，我哋唯有快啲食埋啲主菜叫佢上甜品，我一早已經話兩個甜品可以一齊上，後尾佢先話我知另一個又要製作需時喎，跟住又要我哋等過，我真係百思不得其解，又係佢哋啲職員催我哋快啲。🤦🏻‍♀️我知佢依家做緊優惠多咗人，但我並唔係join到優惠嗰個，為咗翻多幾轉枱就要啲客坐得咁屈質，態度又唔好，出餐慢仲要催客食快啲，咁樣搵錢法真係冇咩良心，希望佢哋之後服務會有改善啦～🙂‍↕️…查看更多

想喺香港想搵間日式餐廳要好食又有質數的確好難，一係就好貴，但貴又未必一定好食，自己唔係港島人都唔常喺港島區搵食，但聽人講銅鑼灣食日本嘢會比較好，咁啱又放假就book咗呢間，早少少開餐。一入到去安排咗個榻榻米位置我哋坐，環境相當好，位置夠闊落，又唔嘈喔 ，另外仲有啲打卡位添，就係覺得啲冷氣凍咗少少咁🥶。因為一至四浜燒盛有優惠，我哋叫咗一set $648，有海鮮燒(自己選擇嘅)，跟一個飯＋刺身＋沙律＋雪糕。跟住我哋再叫多碟壽司同啲小食，如果唔大食，兩個人叫一個set加少少野都夠飯喔🤭～海鮮類都好新鮮又好大隻😱😱，我哋淨係燒嘢都玩咗個幾鐘。set跟埋嗰個飯上面嘅魚唔太清楚係咩魚，但又意外地好食。個芝麻雪糕好濃芝麻味，好好食🤤！ 另外散叫嘅小食一般都有水準！不過有個小插曲就係當時有位女侍應幫我哋落單，態度已一般般，後來仲俾我哋發現落錯單，因為我哋燒完晒啲海鮮，但刺身同飯都仲未到，好奇怪...我哋就問一問另一個侍應，佢就幫我哋跟返。不過好彩其他員工都好好，有問必答仲要好詳細，我哋燒緊嘅時候又會主動走過嚟幫我哋，同教我哋點燒先最好，仲要好細心，所以之後都感覺良好🥰。以呢間餐廳嘅裝潢加上食物質素，大部份員工嘅待客態度，人均消費$500-$600， 絕對唔貴喔～…查看更多

我哋本身約一堆朋友大約6-8人，之前搵過好幾間餐廳都難book位，有啲想試嘅都冇大枱，咁啱望到呢間環境好似唔錯又任坐，又可以book到多人我哋就book咗呢間餐廳。一入去店員安排咗張長枱我哋坐，位置都OK，但後來啲食物到咗後發覺原來張枱都幾細下🥲，我哋已經分開幾次叫，但啲食物都係唔太夠位放，不過可能因為舖面細嘅關係吧。一開始我哋有叫pizza、雞翼、飯同意粉，再叫set for two，set for two係意料之外多嘢食，另外水牛城雞翼比明太子雞翼好食一啲，洋蔥圈唔係粗身嗰種所以就失色啲，pizza偏向港式一點。因為有啲朋友又未咁早到，我哋都分開咗幾次叫，跟住我哋望到menu有啲唔明，都請問返店員，但店員就有點唔耐煩咁😓。跟住我哋每食完一碟嘢，佢哋都會好快手咁收，直頭好似搶住嚟收咁，不過呢個都唔緊要，但佢哋連上面個公叉公匙羹都收埋，搞到我哋唔好意又問返佢哋拎過新🥲。到8點幾，我哋仲想叫多一樣食物同啲甜品，咁個女店員就催我哋快啲叫埋，因為佢哋last order，咁好啦...我哋叫咗一個主菜加5個甜品，指位話佢知係呢5款甜品，但佢自己把口就話「係呢4個甜品吖嘛？」🤨，咁我哋再提多次「係5個喎...」，佢面口已經唔太高興咁...我哋真係嚇親，自問我哋問每樣嘢都唔該前唔該後嘅，在座都有朋友做服務行業所以我哋都好明白好多嘢唔係老奉，問人嘢一定要有禮貌，但冇諗過都會受到啲咁嘅回應，其實都幾失望。後尾，我哋啲食物同甜品都未到但店員已經拎咗張單叫我哋埋咗佢，亦冇講任何嘢，我哋感覺好confuse，過咗陣店員再走嚟叫我哋埋單，我哋就問「咦，我哋仲有嘢未到喎」，佢先同我哋講「整緊」，其實佢哋可以俾張單我哋時講句「我哋要埋數，麻煩你哋埋咗張單先，啲食物整緊轉頭會嚟」。其實呢間餐廳食物係唔錯，價錢亦合理，甜品直頭好好食添！我哋成班食完啲甜品真係嘩嘩聲。唯一真係服務態度非常之大空間改善，作為小店我都希望你哋可以做得更好，希望下次嚟你哋會有改善。順帶一提，有個甜品叫鐵板brownie配雪糕係好驚喜😱！完全冇諗過咁配搭係咁好食。(可惜後尾食得太急大部份甜品係冇影相)…查看更多

好可能係最豐富嘅all day breakfast，哈哈餐廳地點的確有啲格攝，之前如果唔係同事帶我嚟，我都唔會知呢度會有間比較有質素嘅餐廳～lunch時段嚟一般都要等一陣，因為都幾full，一定要早預少少嚟先得～deluxe all day breakfast我係呢度九成都係食all day breakfast，因為真係好大份、好豐富，我每次同同事講lunch想食豐富早餐，佢哋都知我係想嚟呢度～菇好香、煙肉都唔錯，係個人認為個蛋煮得老咗少少咁，整體嚟講幾好嘅～最緊要係跟埋杯柚子茶，都係70幾蚊～絕對係抵食嘅，因為我次次都食唔晒，一定要分啲俾同事～😂😂😂…查看更多

一行八人要搵個地方夠大，又好坐，又任坐的確幾難。最終揀咗呢度，因為見佢新開，又有少少因為100毛豬欣所以慕名而來，同時間亦有朋友推介好食！！一入到嚟個感覺好好，可能佢只係做夜市同做到好夜，一般啲人都唔會太早嚟，個環境好，好坐舒服。我比其他朋友遲少少到，但我一入到嚟店員就即介紹飲品俾我～呢款有少少似益力多味嘅cocktail好好飲，易入口，感覺好creamy～呢款煙肉串好好食，啲腩位雖然肥，但好爽口，啲味又唔太濃～呢款雪魚個味都好特別，細細碟一開始食唔會太滯，仲好開胃呢個類似牛肋骨嘅東西，我覺得咁多款菜式係最出色嘅，啲肉好林，肥瘦位分布平均。可以夾菜食，又可以夾泡菜食。兩個汁各有不同，一款甜一款酸，兩款都好味！燒雞一樣做得好好，好香好入味。店員又好用心介紹，同埋會問我哋啲肉會唔會太老等等 😂888豬！！豬肩肉位置，超巨形！一嚟到真係嚇親，好似打芒亨個燒肉咁款！外面個汁偏濃，但因為個肉極厚所以入面又唔會太咸，啱啱好。唯一我覺得有啲位置嘅肉可能太熟，或者係太瘦，啲肉老咗少少，有少少難咬咁，但整體嚟講係合格嘅，但可以再好少少呀～呢間餐廳真係好有心思，我係極之推介！店員店主服務好，招乎又周到，不時會提點我哋呢款菜要點食，每一款菜式都會細心介紹，會不停問我哋意見，表示想再做得更好！真係好有誠意！💕💕…查看更多

同屋企人係禾輋商場買少少嘢，之後去搵食，佢哋推介我食呢間～😂龍蝦汁海鮮焗飯以佢價錢嚟講，真係好出色架喇！啲海鮮雖然係急凍嘢，但勝在夠多。個味都好好、汁好香。焗飯唔會太乾，飯嘅份量唔多唔少，啱啱好，我幾有驚喜～😂跟住兩老叫左海鮮湯麵，同海鮮湯意粉。我食左少少，都不錯，個海鮮湯意粉比較好食。芝士焗西蘭花呢個就好失色喇，不過佢啲嘢咁平就原諒佢啦～😆本身個西蘭花係白烚，之後淋啲芝士上面再拎去焗，所以啲芝士根本唔會入味～其實附近係屋邨，所以啲價位都係比較平，本身我都冇乜預期，諗住平平哋食一餐算啦～但佢主菜類都好唔錯，幾十蚊真係算好出色，仲要佢有好多唔同種類揀，平日嚟食係幾不錯選擇～…查看更多

難得放假，又好耐冇入西貢行下，落住大雨都阻唔到我食好嘢嘅決心！之前朋友係網上度睇到有人介紹過，見隻髀咁大隻，好似好正咁，所以就要入嚟試試佢！見到隻髀個真樣，發覺一個人應該唔晒，所放棄了…最後揀左呢兩款，炸花枝丸同咸蛋黃單骨雞翼！個花枝丸我就覺得一般，個粉比較厚，油膩咗少少，好滯。但個單骨雞翼就真係好好食，夠咸香，又唔覺好油，同埋佢切開細細舊好方便食，下次再嚟一定會再買～😆😆😆我估計佢整雞類嘅嘢係比較出色，下次真係要留肚試下個炸髀呀～不過係度買嘢食就要等得耐少少，你可以係度落order後，行去第二度買吓嘢飲，之後先再返去拎喔～…查看更多

是日睇完戲，諗住搵下西餐食，想飲杯啡咁。朋友就好想食All day breakfast，行左幾間都唔太啱咁，就上網睇下啦，見過兩個街口有呢間，所以就入嚟試試佢。最初睇到佢menu見好似好多野咁，仲怕食唔晒，但個set一嚟到，我同朋友都即講左句「一定食得晒…」😂😂😂望到個樣時的確有少少失望，再食落去其實都唔太覺有咩特別。個炒蛋聲稱係芝士炒蛋，但食落去冇芝士味，更加冇奶味，同埋好似有點overdone，乾身左少少。煙肉都一樣，煎得太乾，好硬…不過啲菇就幾好食，應該唔係平價菇~但價錢要成99蚊，真心唔值。朋友食左個deluxe all day breakfast，佢個豬扒就不錯，整得幾林~呢間餐廳最值讚係店員服務好、有禮貌、反應都快~仲有一樣係佢主打嘅果醬，真係有好多款可以選擇，都幾特別。咁啱佢嚟緊想出隻新果醬，仲會俾客人去試下！如果佢煮野食技巧再好啲就更加好喇！…查看更多

話說有朋友話想嚟呢度食野嘢，咁我見到個環境又幾特別咁，就嚟左試下~去到時係樓下排隊等左好耐先入到lift，如果book左位，最好預早十幾分鐘嚟等lift喇，咁唔係一定會遲…😂一入到黎已經俾店內環境吸引左，裝修好特別、好靚，好有嘉年華feel，好繽紛，個感覺好開心。(〃'▽'〃) 焗大啡菇好香好好食，唔會焗得太乾，食嘅時候仲有好多水份係入面。明太子天使麵口感好creamy，係有少少膩，唔可以食太多，同人share就啱晒喇！小食拼盤炸得啱啱好，炸粉唔太厚，每一款口感都好好。半份豬肋骨呢個豬肋骨真心讚，個味道ok。但最想讚係佢可以叫半份，如果兩個人嚟食，但又想食多幾樣嘢，呢個叫半份就真係啱啱好，餐廳有呢個安排係非常貼心，同好加分！我諗呢度比較扣分，係樓下等lift等得比較耐，同店員反應比較遲緩咁，唔似特別醒目嗰種。同埋樓底矮，一多人時就會好嘈。so far其他都不錯。價錢呢，以香港區嚟講算係比較便宜，每一款菜式都唔算好貴，絕對值得一試。…查看更多

剛好同朋友黎到九龍城，好日都唔黎下，就梗係搵啲泰國野食下。之前見有人講過呢間泰國菜幾好食，所以就一試了。泰式生蝦好肥美，好好食，係咁多樣野最好食，冇雪味，都幾新鮮！！！pad thai我個人認為都唔太差，咁當然係泰國街邊食果啲好食好多啦，但呢個炒得唔太濕都幾好，但我朋友又話覺得唔夠味喎，我自己就覺得都ok啦～馬拉盞炒椰菜苗最初食就覺得都唔錯，唔會炒到好硬，但食食下就覺得太咸，太濃味……雜錦小食拼盤唔…呢個就有啲失望囉，係個炸皮蛋少見啲咁，其他唔特別之餘，仲炸得唔太好食，感覺太多炸粉，同埋啲餡料都唔太好食，最後都食唔晒…整體黎講冇想像中咁好食，不過佢個價錢係偏平的，都可以一試嘅～…查看更多

最近因為減肥都少左出街食飯，咁啱呢日做完瑜伽又想搵啲清清地野食下咁，但又唔想食凍冰冰嘅沙律，所以就黎左呢度…《Green Breakfast》呢個素早餐幾啱我，本人其實好喜歡食早餐，因為又好鍾意食蛋～😂本身唔太鍾意食番茄嘅我，但整熱左再加啲醬上去又有另一番風味，我有竟然幾鍾意食。個牛角包好鬆軟，又唔油。炒蛋好好食，好香牛奶味，炒得好滑仲要好大份。🤤沙律菜仲要有藜麥超健康呢～💪成份早餐好抵，仲要食得飽又唔會肥～聽聞店主返左焙茶，可能會出新品，好期待～🙃…查看更多

第二次黎食樂天皇朝，因為見佢平日都唔算多人，直接Walk-in都唔需要等好耐，所以又再黎食過~基本上每次食上海野我必定叫醉雞，今次呢度佢排得好靚，仲要好厚肉咁，真係好大份咁~抵食！呢個賽螃蟹我個人最喜歡佢有隻蛋黃係中間，唔係間間都有架！！但係呢佢個蛋白就做得唔夠碎同細粒，唔夠賽螃蟹嘅感覺了……因為上次食過蟹粉小龍包，所以今次試下普通版嘅小龍包，都唔錯吖，好多肉汁，係淡左少少咁囉~反而呢度好多人食嘅七彩小龍包我就唔大興趣了，見到啲餡料，我諗得兩三個我會食囉~哈哈🤣以上海菜黎講，價錢係相對實惠的，質素都不錯。…查看更多

「生活是要享受的，心血來潮的，沒有計劃的，悄悄到來，靜靜感受。」原來平日葵芳牧羊少年都唔太多人，呢個香草醬青口意粉個味好好，係油左少少，食到底太多油留係度，同埋個意粉煮得林左少少，個人黎講好喜歡綠綠地色嘅香草汁，好香好滑。見到有愛爾蘭咖啡好想試，但我怕會瞓著左，所以最後都係叫左杯榛子Latte，榛子Latte都好好飲，唔會太甜，剛剛好。第二次黎呢度，環境不錯，自己一個人黎好舒服，有outdoor可以坐，價錢又唔貴~睇戲前過黎呢度食野幾好~…查看更多

咁啱黎到中環，就想搵間Cafe試下咁，就俾我係Openrice見到有呢間Cafe，好特別呀～佢樓上係Salon，樓下係Cafe！呢個煙鴨胸意粉真係好好食，啲鴨胸好厚、好大舊、好香，唔係平時出面食果啲cheap cheap鴨胸，但條蘆筍就好似未熟得透咁😂但整體都好滿意，個汁少少酸咁，但又唔會太勁茄味，價錢唔算貴。呢個抹茶Latte係特飲來的，只要叫左特飲都會送一個飲品水泡仔~個抹茶味好夠，我好喜歡~呢度食物黎講都幾有水準，不過就太多人，佢地好似有少少亂同整唔切咁。同埋近馬路有啲嘈咁囉，入面啲位壓迫感大啲，同埋因為佢地太多人訂左位，所以唔坐可以得太耐呀～…查看更多