joycejojo's Profile

見網上介紹呢間韓國菜，就趁住放假去食個lunch！地方細細唔係容納到好多座位，我一點半去到都等咗陣先入到座。🥤Lunch time (1200-1500)有飲品優惠，沙冰+$15，罐裝飲品就+$5，其他時間就正價。我加咗杯士多啤梨牛奶沙冰，都幾足料，飲到最後都唔會水汪汪，仲係冰🍧🍚韓式吞拿魚拌飯 $88啲小菜可以免費refill一次，之後每次再加就$18/碟。因為啲小菜都係拌飯啲料，所以我加埋落去一齊食，refill咗一次。老闆話個吞拿魚係魚肉自己整碎再加調味，唔係就咁開個罐頭加落去。食落都幾綿密，唔會有嗰啲硬嘅魚絲🐟👍🏻唯一美中不足係無咩麻油，如果加多啲落去就更好！不過飯量都幾多，我一個女仔食完都超級飽！😹呢度職員都好好禮貌，會每枱問下啲食物O唔OK，有咩意見咁。呢度價錢唔算平，但都希望生意會越做越好啦！👐🏻…Read More

因為朋友生日想食韓國菜所以前3日已經book定，但估唔到星期四晚8點半依然座無虛席，真係人氣餐廳！一行四人被安排坐長枱，但見到後面有啲靠牆嘅二人枱好得意，好似以前啲校園枱凳咁，有盞燈同有好多小裝飾，如果兩個人嚟食應該幾有氣氛！海鮮煎餅每台都會嗌嘅海鮮煎餅，用料十足，唔似出面嗰啲得漿無餡。但係煎得比較鬆散，一夾就會散開一半。個汁少少辣，十分惹味，一定要點黎食！泡菜豬肉湯個湯都頗辣，應該有中辣，唔太食得辣嘅人就唔好嗌喇。入邊有啲豬肉片、洋蔥、年糕、薯粉同葱。薯粉吸晒味好好食，但整體份量唔算多。呢個湯啲食材係生嘅，下面有個火煲熟佢。但個火都好細，煲咗好耐先食得。安東燉雞懷疑係咪呢度每樣餸都會有年糕同薯粉😂 呢個燉雞份量比泡菜豬肉湯多，有薯粉、年糕、幾片薯仔、洋蔥同椰菜。薯仔係最好食，因為好入味。雞都入味同埋嫩滑，係個椰菜咸咗啲。卡邦尼年糕呢個又係有年糕同面喺入邊，真係每個餸嘅必備配料😂😂😂 但呢個食落好漏，最後我哋都食唔晒，要拎走留返第日食。藍莓奶昔可能太多人啲杯洗唔切，所以就用啤酒杯裝啲奶昔俾我哋。個奶昔入邊應該有益力多或者乳酪，飲落酸酸甜甜咁幾開胃。但係份量比較少，一下就飲晒嚕😂💦總括而言，雖然價錢比坊間嘅韓國菜貴，但食物質素不錯，怪唔知咁多人黎食！…Read More

以前大角咀舊店都食過幾次，店舖細細食客坐得比較埋，但幾有家常店嘅氣氛。今日去新店，感覺變咗連鎖舖頭咁。🥢因為得兩個人食，根據以往經驗係半隻鴨再加個菜已經好夠。所以今日嗌咗半隻鴨、清炒萵筍，加兩個高力豆沙。🥢🥢其實兩個人食半隻鴨都真係好夠，因為呢度嘅片皮鴨係好似平時燒味店啲燒鴨咁厚。好大可能係啲鴨片好晒，所以上枱係凍嘅。鴨皮唔酥脆，啲鴨肉都無乜味。半隻鴨先百幾蚊真係唔會要求啲咩，但燒隻鴨前可以醃吓有啲味就更好，因為你會驚訝點解一餐飯之後嗰碟醬會俾你食晒。啲皮因為冇嘢蓋住而冷氣不停吹，所以係極速變凍同變乾，乾咗嘅餅皮係好硬好難食。感覺自己買盒燒鴨返黎再自己加餅皮同配料已經係呢道菜。🥢清炒萵筍真係清炒，連一丁點蒜蓉都冇，感覺係卓熟之後落油同鹽炒下就上碟。不過茼蒿幾鮮嫩，就算無乜味都幾清幾好食，配合食醬片皮鴨叫做平衡返。🥢最後嗌咗兩個高力豆沙，係即嗌即炸。質地好鬆軟，紅豆沙餡都唔會好甜好漏，本日最佳。🔥我book咗2點然後食到2點45分左右啲職員就開始不停收嘢。又推車又放餐具。每個位都有個櫃桶，入邊放咗紙巾同餐具。啲職員就不停放新餐具入黎但重點係我都未食完，佢就直接打開我個櫃桶放筷子連唔該都無聲！我條腰同櫃桶幾乎得10cm距離，我真係覺得好離譜！！！！而後個職員講咗句：「無辦法喎小姐，3點閂門。」首先我入門口嗰時無任何職員提醒我3點閂門(落場)，就算你3點閂，我係客人我仲食緊嘢無理由你一下就要開我個櫃桶？！你點都要等我食完或者問準我先？今日嘅用餐經驗極差，唔會再嚟幫襯。…Read More

三星嘅唐閣真係趁零房價先捨得黎食，所以都好期待！計過數個房價($1500)怕唔足以俾兩個人食晚餐😢所以決定翌日中午黎食😋選擇困難症發作唔知食乜好，就嗌佢個lunch set加其他出名嘅點心同菜品！🥢海蜇同叉燒都有啲咸，但叉燒應該係用梅頭所以肉質好軟腍。🥢點心拼盆方面蝦餃十分普通，本身一籠4件要成百蚊，好彩無嗌😥 燒賣比蝦餃好，春卷炸得好酥脆！🥢杏汁豬肺湯好味！豬肺好乾淨，飲完唔會頸渴🥢白灼螺片雖然得兩片，但超級無敵好食！又脆又鮮！🥢鮮蝦炒飯上面有炸過嘅nuts，好香口，飯身都炒得好乾，唔油，蝦都好彈牙！🥢甜品係杏汁蛋白茶，我本身係唔飲杏汁杏霜嘅，但呢個無嗰種接受唔到嘅味道，所以我有飲晒！🍽🍽🍽🍽🍽🍽🍽🍽🍽🍽🍽🍽咁個lunch set都係800蚊，仲有credits淨就當然嗌下其他！🥢XO醬炒腸粉食得出夠鑊氣，擺耐咗都唔會腍，但略嫌單食唔夠惹味，好彩有麻醬甜醬！🥢鵝肝荔芋珍盒！好好食！是日黑馬！本來不抱期望但好香好好食！唐閣嘅炸物火喉控制得十分好，唔會炸到好硬，真正嘅酥脆👍🏻🥢是日重點！唐閣名物！釀焗鮮蟹蓋！其實係高級可樂餅，忌廉+蟹肉+洋蔥😂 但入面全部都係阿拉斯加蟹肉，好滿足！兩個人分一個啱啱好，因為都幾漏😂🥢因為男友唔飲杏仁茶，所以就嗌咗蛋撻同木糠布甸俾佢。蛋撻就一般，但木糠布甸好奶好creamy😋整個用餐時間歷時兩個幾鐘，逐樣逐樣上，好似食緊法國菜咁😂原來世界上僅有五間米芝蓮三星嘅中菜館，而Langham group就有兩間，都好犀利！唐閣裝修氣派，價錢來講其實唔算好貴，話晒都三星，服務又好好，所以都好值得一試！👍🏻…Read More

因為之前經過蜜瓜爺爺，所以都想去試吓喺隔離嘅花膠湯米。座位算舒適，因為2個人坐4人枱。嗌嘅嘢食都好快上枱，可能因為唔係太多人。———————————————嗌咗花膠湯米同牛肉湯米。花膠有兩片，都紋得幾淋，但所謂嘅雞湯湯底一啲味道都無，令人失望。牛肉質感幾好，食得出係鮮牛，但完全無牛味，配上好似清水咁嘅湯底真係搞唔掂，要狂加辣椒油先叫有返啲味道。自問唔算重口味但真係清水咁嘅湯底真係搞唔掂，應該唔會再黎。嗌咗兩碗米加兩杯豆漿埋單就$122，CP值唔高，有好大嘅進步空間。…Read More

利申 係11月26號去食，仲有晚市。放工想搵間冰室食，就求其google map入咗去。嗌咗 「金磚豆腐拼椒鹽墨魚嘴 」🥢個豆腐都嫩滑，唔會因為係炸嘅就用啲硬豆腐無咁易散。但墨魚嘴就無乜味，所以雪味好出。再嗌咗 「黑松露沙拉一字骨」🥢黑松露無乜味，啲沙律醬都太多，個骨都okay👌🏻加9蚊轉飲飲做燉湯，係松草花姫蟲茸燉烏雞，都幾抵飲都好足粒。整體感覺不過不失，都無期望好高😹不過啲姐姐幾好人，好熱心介紹😹…Read More

利申: 11月27號嗰時去嘅，仲有得食晚餐。我好鍾意食蜆，所以就嗌左「香辣白胡椒 白味噌煮紐西蘭鑽石蜆及粉絲」($168)😌啲蜆肉好大隻！完全冇沙，又嫩，啲粉絲好索味，真係連湯都飲埋！再嗌咗「先炆後煮和牛臉頰 芥蘭粒配擔擔風味煎腸粉」($182) 😌呢個和牛臉頰炆得好淋！而且充滿骨膠原，食落係痴牙嘅😂 個煎腸粉都幾惹味，有啲麻醬一齊食都幾正。總體都偏辣，唔食得辣嘅朋友要慎選😂呢個份量有啲少，可能個和牛臉頰係比較少見嘅部位。估唔到是日之最係薯條！薯條到瓦煲裝都好得意，啱啱炸起好香口，但又唔會炸過龍搞到好乾，係外脆內軟！配上個蒜味沙律醬真係好好食！配啤酒一流，而且份量出奇地唔細！整體環境都好配合嗰種玩味老香港嘅感覺，職員服務態度都好好👏🏻…Read More

好開心屋企附近終於開咗間咖啡店，所以即刻去試下！啲面好細，得兩個座位。店主一對夫婦打理，感覺好cozy。我嗌咗Bagel switch Cream Cheese set ($52)Bagel揀咗芝麻罌粟粉，老闆娘同我講佢哋翻熱Bagel係蒸熱佢，唔似坊間咁用焗爐，咁樣可以保留返Begel個口感，唔會太乾。而且個Cream cheese係自家配方，會甜少少，因為本身Bagel係無乜味。我覺得蒸呢個做法令到個飽口感好好，好煙韌，真心好正！咖啡方面要咗Dirty轉Oat Milk(+$4)略嫌個奶唔夠凍。因為Begal好好食，之後聖誕節嗰時都有特登返黎買多6個比同事做聖誕禮物，仲新出咗竹炭味！難得一間又💛又有心機又有人情味嘅Cafe！現時疫情期間希望大家多多支持！唔好齋去大南街，幫襯下其他良心小店！👏🏻…Read More

喺ssp人谷見到麗閣商場新開嘅黃店cafe，今日放假特登去試。但果然不能期望太多。我嗌咗杯Flat White同牛油果醬莎莎熱狗。首先個牛油果醬莎莎熱狗上先。熱狗呢啲應該難食極有限，但個首先個包係唔脆，食落似超市買到嗰隻嘉頓熱狗包咁。條腸本身係無乜味，食落好淋，無乜口感。個牛油醬簡直無存在過咁。成個熱狗得茄汁味。講真，ikea熱狗都好食過。呢個熱狗單買好似要30幾蚊。。。我嗌flat white結果上咗latte，咁我都算無話要換返啱。因為知道咖啡要重新沖過咁我見係黃店就算。但認真個咖啡好唔掂，味道好單薄，得個苦字。好彩無嗌其他嘢食同飲品，呢度要40幾蚊唔係話貴但真係唔好食。希望食物同咖啡質素可以再提升。…Read More

平時比較少嚟元朗食嘢，但朋友介紹呢間餐廳係泰式Fusion菜，所以決定一試！因為天氣比較熱，所以一坐低就想嗌啲特別嘅凍飲cool down下。我嗌左呢個「香蕉士多啤梨沙冰」($38)，平時好少飲有士多啤梨嘅凍飲，因為我好怕酸😖 但呢個飲落有好香嘅士多啤梨味，加上有香蕉一齊，所以感覺好清新又唔會好酸🍹朋友就嗌咗「奶蓋泰式奶茶」($30)，個奶蓋可能為咗配合泰式奶茶所以係比較甜，但我自己就偏愛鹹跌嘅奶蓋。但我朋友好嗜甜，所以覺得okay。本來係為咗餐飯有啲蔬菜所以嗌個凱撒沙律🥗，點知係本日嘅highlight！😍個雞肉一啲都唔鞋，仲幾嫩滑，我同朋友都搶住食😂 個醬汁都好夠，比較杰身嗰種，所以掛晒喺啲菜度，每一啖都有味！啲麵包碎都好脆，而且有好多芝士粉，真係好正！主菜方面就揀咗「大葱鴨肉薄餅」($92)，呢個薄餅就一般，只係食到有醬汁味，鴨肉就唔太明顯，啲大葱都無咩葱香。而且個薄餅底係好似餅乾嗰種，食完都有少少喉嚨痛，個人黎講都係中意傳統嘅餅底多啲。話明係食泰式fusion，所以都嗌咗個「冬陰功海鮮意大利粉」($95)🍝。呢個比起薄餅就比較好食，冬陰功味都好出，海鮮有魷魚、蝦同埋青口。如果加啲羅勒葉或者九層塔，應該會更加好食！可能因為我同朋友比較早到，6點半到就可以Walkin入去。但見到啲梳化枱已經俾人book咗。食完飯大約八點出面已經好多人等，建議大家可以早少少度或者book定先！總括而言，嘢食味道中上，服務態度良好，好適合同朋友聚會✨…Read More

其實一早已經畢咗業，不過IG見到其他中大同學介紹呢間新店，睇落好吸引又好文青，佢嘅營業時間係星期一至六，所以就同朋友決定星期六返去食個靚lunch！💛因為好耐冇返過去，平時又少去研究生宿舍嗰邊，都研究咗一陣先至決定搭3號巴士。其實舖頭位置於新研究生宿舍三座及四座嗰邊，落咗車行少少樓梯落去左手邊就係！入到去覺得好驚喜，因為係中大少見嘅文青裝修，佔地真係好大，好似有5000呎！最特別係有一個靠窗嘅位置，要除鞋先可以入去但係可以對住個窗食嘢感覺好好，出面就係一片山林，感覺好舒服🌳🍃心思思乜嘢都想試，最後都係嗌左「醬油太陽蛋雞扒定食套餐」($56)，仲加咗一個「黑糖奶蓋炭焙烏龍」($17)🍹最鍾意個飯係醬油另上，可以自己控制落幾多，細心加分✨小食方面我揀咗麻辣青瓜同埋花枝丸，朋友就揀咗滷水雞翼同埋麻辣皮蛋。覺得個青瓜好酸，應該落咗好多黑醋，但係唔太麻辣，朋友個皮蛋就辣啲。覺得花枝丸唔算好特別，但個滷水雞翼就好出色，甜甜地得黎又唔係普通嘅滷水味道，好有驚喜！定食套餐都會送迷你茶碗蒸，就係蒸蛋上面有啲台式滷肉飯嘅汁。呢個蒸蛋都好好食，蛋好滑，醬好食😋台式飲品如果跟餐加配嘅話，就可以減$5。「黑糖奶蓋炭焙烏龍」聽落好邪惡，就二話不說同朋友一齊揀咗呢個😂個奶蓋一啲都唔輸蝕比出面嘅台式飲品店，而且個烏龍係冷泡茶，只係加咗$17，真係好抵！總括一句，I will be back！💛✨環境舒服一啲都唔擁擠，而且嘢食飲品高質，價錢合理，絕對會再次光顧！💛 見到入邊嘅職員大多數都係年青女性，真係好佩服可以將餐廳打理得井井有條👍🏻…Read More

喺深水埗人 社交平台 group見到新開左呢間漢堡包店，今日夜晚經過就決定試一試！宜家新開張仲有88折！外賣同堂食都有👍🏻個素食餐好抵食，包一個素食漢堡配薯條，同嘢飲。加沙律同小食都係$9！巨菇芝士漢堡配薯條 $55 (原價)素牛扒漢堡配薯條 $55 (原價)個巨菇芝士漢堡入邊有大啡菇同埋雞髀菇，大啡菇冇草腥味都有肉汁，個包唔算烘得唔太脆。而同伴嘅素牛扒漢堡就一般，個素扒食落唔似牛，反而似豬，我哋都一致認同個巨菇芝士漢堡比較好食。但值得一讚嘅係薯條即叫即炸🍟👍🏻另外我哋都加咗沙律同埋洋蔥圈，各$9。洋蔥圈都係即叫即炸，但有啲可惜冇醬附上，食落比較寡。而沙律都係普通嘅芝麻汁沙律，同漢堡餐嘅伴碟沙律一樣。總括嚟講，嘢食唔算好有驚喜，但CP值極高，就算冇88折都好抵食！💛…Read More

因為喺附近返工就決定Happy Friday嚟打邊爐！咁啱上網見到有個<胡椒豬肚包住雞>嘅套餐，每人只需要$98位，就即刻打電話book放工食！位置喺世貿附近，都算易搵。樓梯位有啲投影，感覺幾有design幾靚。因為唔算多人加book咗枱，一去到就直入坐低，職員都好貼心話幫我哋準備個胡椒雞先場內好多周傑倫嘅畫同海報，仲有個大mon播MV。聽講老闆同周傑倫係朋友，因為周傑倫去邊都想打邊爐，所以就inspire咗佢開間火鍋店🧐個鍋、筷子座、墊碗嘅布同調味料嘅羹都係音樂相關😂職員話要飲咗頭啖湯先，然後等個豬肚煲半個鐘之後先至食。據稱個湯係冇落味精，飲落都真係好有雞味，冬天飲胡椒豬肚湯個人就好暖笠笠！正啊！原來豬肚入邊有隻雞髀，等佢煲半個鐘之後就可以剪開嚟食！豬肚洗得好乾淨都好厚肉，雞髀煲得咁耐啲肉都唔算鞋口，有驚喜！而且refill湯底嘅係雞湯唔係水，我哋都不停飲湯！個set包咗個自家手打丸，有芝士牛丸、蝦丸同鵝肝醬丸。丸類都好彈牙，好食過一般火鍋店嘅丸！不過每款按人頭得一粒，有啲意悠未盡。是日最正就係set嘅牛舌！只需要焯一焯就已經食得，勁好食！又大盤！推薦！Set包嘅呢個手切牛都唔錯，有厚度，唔會食完好似無食咁。Set仲包咗呢個七色蔬菜盤同烏冬，蔬菜盤排得好靚，無因為呢個係平set就擺得好hea。個蘿蔔同茼蒿都好好食，放落雞湯度一流！個set就包咗以上嘅食物，雖然份量唔算多，個烏冬仲好似得一人份咁，但啲食物質素係食得出嘅高質，而且職員都好殷勤，態度好好。其實齋食個set係唔飽，我哋再散嗌咗嘢食。聽講個手打牛丸好出名，所以我哋都想試吓，覺得都彈牙但係牛味唔算好出。反而覺得個set嘅丸類拼盤比較有驚喜。另外仲嗌咗羊肉片，因為鍋底有雞，而且都食咗牛，就打算嗌羊。但價錢都算貴一碟百幾蚊得8塊。。。羊肉片唔算好羶但都普通。火鍋必備嘅老油條！上面有啲蝦滑同蟹子，職員同我哋講煮2至3分鐘就OK。呢個真係老油條煮左2至3分鐘都完全唔諗，仲係好脆口打邊爐就梗係要嗌嘢飲啦！聽講呢度嘅台式奶蓋飲品好出名，但打邊爐都係想飲啲冇咁heavy嘅飲品。最後嗌咗個Red Bon Bon，入面有火龍果冰、雪葩、青檸，好fresh！雖然最後埋單四個人食咗$1100，但呢度環境好坐、食物質素高、職員服務態度好殷勤，所以都係一次滿意嘅dinner🙌🏻…Read More