KoKobee的个人专页

呢間酒吧餐廳位於麗豪酒店附近，絕對推介俾各位黎staycation嘅人。內部裝修突顯高尚格調，而且地方寬敞，又有不同的娛樂設備。一大班人黎玩又得，兩三個人黎chill下都得，同出面嗰啲好嘈雜嘅酒吧完全唔同，最緊要係佢哋嘅食物同埋飲品都高質。又有得玩Beer Pong, 又可以掟標，絕對唔會悶親你。飲品方面，我同朋友總共叫咗四杯野飲。全部都各有特色，可以望到調酒師真係用心調較。串燒要耐心等候，雞翼好食。燒蒜蓉雜菇，可以一試。雞扒烏冬正常發揮，啲烏冬好似採用稻庭烏冬，麵質較軟身。燒金菇肥牛卷，略嫌啲金菇偏乾身，有待改善。又點可能唔試吓個燒茄子呢？你睇吓俾我手掌仲要大，我同朋友清得一乾二淨就知道有幾好食。整體來講，餐廳乾淨企理，地方闊落，無論係食物定係飲品，都絕對滿足到你喺一般酒吧嘅基本要求。…查看更多

同朋友放工嚟食，哩到嘅門面就好似普通日式小店，雖然就咁睇店舖地方唔大，但係都坐得舒服，起碼枱面夠大放我哋嘅嘢食。野食唔單止好食，餐牌都係精心設計，單看畫風都看到餐廳的心思先黎嘅係刺身、壽司。海膽食少少唔係好夠喉，味道甘甜，口感綿密細滑。芥末八爪魚壽司新鮮爽口，我鍾意就個芥末刺激得黎又唔會食得好辛苦，芥末份量岩岩好！煎雞軟骨餃子係人氣之選！皮薄天氣上嚟有少少脆口，入面嘅肉餡多汁，再加上肉餡有雞軟骨，豐富左個口感層次。好鬆脆嘅咖喱薯餅好適合叫比小朋友食！香濃嘅日式咖喱味，甜而不漏。燒河豚乾係一流嘅送酒小食，雖然冇叫酒飲，但係依然食唔停口。串燒嘅代表有雞肉京蔥燒，京蔥鮮甜多汁，雞肉份量充足，啖啖肉！翠玉瓜燒到又甜又多汁，連翠玉瓜面都有柴魚，真係相當有誠意！跟住重頭戲要介紹就係芝士明太子玉子燒，柴魚舖滿係玉子燒上面，明太子醬為玉子燒帶出鹹香味，而且雞蛋非常之嫩滑，最重要係有拉絲嘅芝士。一定會返嚟再食呢個！…查看更多

哩到係樓底好高嘅餐廳酒吧，環境舒適。「意式咸牛肉沙津」令我對咸牛肉產生左新思維，一開頭我以為嘅咸牛肉係咸牛肉三文治果隻，但原來佢嘅口感好似火腿/煙肉，身一道菜就令我好有驚喜。配埋黑醋，黑胡椒，同沙津菜一齊食，成件事好和諧。芝士墨西哥脆片「Nachos」，熱辣辣嘅芝士我鋪滿脆片上面，一拎起就有拉絲，好治癒。肉醬同埋芝士令到脆片有額外嘅咸香味，好想即刻嗌杯啤酒嚟飲。「英式啤酒炸魚薯條」一黎到，我忍唔住「哇」一聲，因為佢嘅炸魚好大塊，大過我隻手，炸魚已經醃好咗，好夠味。「Apple Fruit Tea」味道清甜，就好似平時我哋飲嘅蘋果綠茶。「Apple Mojito」有蘋果、青瓜、薄荷味，呢一個冇酒精飲品，可以令唔飲得酒嘅我過下口癮。如果你飲得酒，我會推薦你飲呢個生啤優惠，我哋今日用$98就可以有2杯啤酒，真係好抵好抵！雖然埋單係六百幾蚊。但係我哋總共飲咗4杯嘢飲，價錢都算合理。…查看更多

返工咁辛苦，放左工梗係想搵個地方輕鬆吓，我同妹妹嚟到大埔哩間酒吧，志在有個氣氛唔錯嘅地方吹下水。估唔到我地黎酒吧竟然唔嗌酒飲，淨係叫小食。我哋叫咗「墨西哥粟米片」，一嚟到嘅時候忍唔住「哇」左聲，因為個份量好多，即刻失咗預算（個胃嘅容量），脆脆嘅墨西哥粟米片上面有牛油果醬同埋酸忌廉任你配搭，你可以先配肉醬，再點醬食。個人比較喜歡牛油果醬，牛油果醬好滑，味唔濃，配埋肉醬就覺得好有層次。食食吓你會發現，有啲粟米片場會有芝士添。跟住再嚟就係重頭戲，「Noc Noc 摩天輪」，摩天輪上面有五款不同嘅小食。有炸雞、炸春卷、炸芝士條、炸魚柳同埋炸薯條。好開心有炸芝士條食，咬落去仲有得拉絲添。炸薯條炸得夠乾，又夠脆，另外炸雞都好好食，雖然本身炸雞冇乜調味，但係因為佢俾咗三個醬汁我哋可以自己配搭：有他他汁、是拉差醬、蜜糖芥末醬。可以根據返個人口味，作出不同的搭配。…查看更多

喺屯門建生邨停車場隔離有間隱世高質Cafe。內外裝修主要以木材同植物為主，入到去有種好舒服嘅覺，想坐耐啲消磨時間。我地兩個人叫左一個意粉，一個熱狗，一個小食，一杯嘢飲，份量岩岩好。大概$210，雖然價錢唔係好抵，但係食物質素好高。絕對推廌比大家！「自家制焦糖鮮奶咖啡」有別於出面嘅焦糖咖啡，佢有幾塊焦糖餅係面，建議大家先咬左一塊焦糖餅先，然後可以將剩低嘅焦糖餅溶喺咖啡入面，啱晒怕苦又想試吓飲咖啡嘅人，因為好易入口。薯條夠熱，而且完全唔會吝嗇，放左好多黑松露，配搭埋沙律醬，成件事好和諧。絕對推介俾大家！哩個溫泉蛋卡邦尼煙肉意粉係我食過最好食嘅！首先，個汁有足夠芝士味，就算加埋溫泉蛋汁都唔會稀，令每一條意粉都掛到佢嘅汁，而且你唔會食到好濟嘅感覺。意粉相對茶餐廳果款較幼身，而且有咬口。再加上煙肉、蘑菇、芝士咁足嘅配料，下次一定會再食。哩個芝士鹹牛肉熱狗相當吸睛，因為佢嘅餡多到迫爆個麵包。麵包外脆內軟，整體口感偏軟，比較單調，但有味道搭救。佢嘅蛋炒得好滑，而且鹹牛肉嘅鹹香味令你有繼續食落去嘅衝動。建議可以加少少脆煙肉，令整個口感層次更豐富。…查看更多

見到門面裝修唔錯就走入去試吓，畢竟元朗係美食天堂，所以都唔係好驚中伏。入面嘅裝修主要係黑白灰同綠色，裝修簡單得黎又舒適，而且張枱嘅空間好足夠，可以放到好多嘢食，唔使驚冇位擺。Brunch Menu都有唔同款式嘅西餐，迎合大眾口味。餐飲方面，我叫左杯「熱情果梳打」，甜甜酸酸又夠汽，絕對係少女嘅口味。朋友話嚟到Cafe冇理由唔飲番杯咖啡，所以就點左杯「Iced Americano」，有粒冰球係中間，相當吸睛。佢所用嘅咖啡豆偏向果味重，下次一定要試埋其他咖啡特飲，例如手沖咖啡豆，試真啲咖啡味。餐湯係忌廉南瓜湯，又滑又甜。餐包係出面比較少見嘅款式，入面軟熟，外層又唔會好似法包咁硬。咁嘅質素都只係加$25 ，好抵俾！「明太子軟殼蟹意粉」軟殼蟹原隻上👍🏼👍🏼 我好欣賞佢嘅汁，唔會太稀，又帶點鹹香味，令每一條意粉都掛滿明太子，難怪有咁多人叫黎食。「安格斯牛肉芝士漢堡配薯條」牛肉夠厚又充滿肉汁，雖然調味冇乜驚喜，但佢嘅粗薯條幫佢加返分。建議可以搭配唔同醬汁或者調味粉令粗薯條更有特色。…查看更多

男朋友同完屋企人食之後，同我推廌哩間餐廳，所以入到黎元朗食lunch。哩到地方雖然唔大，但係裝修好有心機。裝修風格係法式田園風，用左好多綠色植物同白玫瑰做裝飾，加上吊燈，感覺舒服得來又好高格調，可以話係港女打卡嘅好去處。午餐嘅價錢同連鎖西餐廳差唔多，一個餐跟埋餐湯同飲品。（餐牌嘅插圖都好搞笑）個蘑菇湯做得好出色，佢將蘑菇打得好碎好碎，令個湯厚身得黎又做到好滑，滑到只係食到香草嘅口感，佢再喺湯嘅面頭加咗啲忌廉，香味同口感配合得非常好。餐飲方面，我同男朋友各自嗌左一杯奶昔，「香蕉朱古力奶昔」同「士多啤梨藍莓奶昔」。呢度嘅奶昔比較稀身，奶味唔算重，但係水果味好出。「香蕉朱古力奶昔」嘅香蕉味好重，男朋友喺個餐未到之前就已經飲晒，睇嚟好好飲。而「士多啤梨藍莓奶昔」嘅士多啤梨同藍莓嘅比例恰到好處，兩種水果各自發揮到果香，又唔會太甜或太酸。All Day Breakfast 就單憑個煙三文魚班尼蛋鬆餅已經夠曬吸引。切開蛋中間，流心嘅蛋黃睇到佢嘅生熟程度啱啱好。配埋煙三文魚，蛋黃醬，同埋又鬆又脆嘅包，即刻感到非常滿足。其他嘅配料都發揮水準，就連哈密瓜都好甜。「烤洋蔥野菌牛肉芝士漢堡」個包又脆又鬆軟。薯條落咗特製調味粉，薯條咬落唔油，薯肉都好鬆軟，呢個餐唯一失色嘅係個牛肉偏乾，希望下次識到一個跟住juicy 嘅漢堡。…查看更多

睇到OpenRice介紹，所以book咗呢度同男朋友慶祝生日。環境好grand 好靜，好舒服。服務態度更加唔洗講有幾好。呢度嘅每一碟菜，包括甜品，都好精緻，係可以攞嚟欣賞嘅藝術品。就連佢嘅餐包都做得好仔細，淨係講呢個餐包上面嘅鹽，就係一啲好薄嘅晶體，配埋牛油，佢嘅鹹香就有兩種層次。哩碟三文魚沙律一上，仲以為主菜到。淨係個頭盤就已經被驚艷到。我嘅主菜叫咗魚（冇影餐牌所以唔記得咗佢叫咩名）。魚唔腥，肉夠林但唔散，加埋舖係面脆卜卜嘅炸蒜，令食落去嘅口感更加豐富，如果配埋醃紅菜頭，又會有另一種好清新嘅感覺。男朋友就叫左碟羊，好林又唔會覺得羶，上面配左啲芝士。但係中間個薯餅就一般般。中意酒嘅人可以試下哩個甜品，佢嘅蛋糕吸滿晒冧酒，咬落去啲冧酒出曬黎，都好重酒味，配上橙汁又有種好清甜嘅感覺。另一款甜品賣相都係好吸引，中間有蘋果肉，加訂脆餅，好啱小朋友食。…查看更多

返工chur左成日，難得早放，入咗大美督嘆吓下午茶。位置就係大美督燒烤場附近，喺龍尾村轉入去靠左有個好明顯嘅招牌叫「名 料理」。呢度地方空曠，感覺放鬆，餐廳門口有得泊車，非常方便。熱辣辣嘅「燒雞泡魚干」作為頭盤簡直一流，又香又有咬口，食落甜甜地，好岩小朋友食。「蟹味噌甲羅燒」齋睇賣相就已經100分。佢加左生鵪鶉蛋，撈埋落蟹柳，蟹子，蔥花，蟹膏，唔單止只令味道更鮮甜，仲豐富左成個口感，而且你唔會覺得個鮮味被蓋過，因為有蟹味噌同酒吊返個蟹膏味出黎。「炸日式芝麻雞翼」大人細路都一定好中意。外皮加左芝麻，香口得黎又夠脆，仲帶點甜味！咬落去肉質嫩滑，想encore!!另一款，「燒明太子雞翼」嘅口感同味道就好唔同，雞翼入面釀左啲明太子，有啲啲辣味。「清酒煮蜆」最岩天氣涼涼地食，好香清酒味，食到有種熱血沸騰嘅感覺，仲令蜆肉嘅鮮味大大提升。「燒牛俐串」灑上粗胡椒，配上鮮檸檬汁，非常開胃。最後食埋個「黃金海膽炒飯」作結尾，你見佢咁足料，就知我食得有幾滿足啦。配埋啤酒絕對係人生一大樂事。佢嘅價錢都好親自，都推廌比大家黎哩到食下野，放鬆下。…查看更多

一開頭仲以為火炭係美食沙漠，但係食完呢一餐之後發現原來火炭都有啲幾高質素嘅野食。見到間Cafe嘅門面同裝修咁有格調，令食客對餐廳嘅質素信心大增。果然！入到去就有一個好nice好有禮貌嘅侍應黎招呼我哋。我同媽媽兩個人分別叫咗兩個lunch set。就連餐包都睇得出落咗啲心機。一開頭以為啡色嗰個芝麻包會好硬，但原來好軟熟。蒜蓉包嘅牛油好香，好開胃。佢嘅沙律都唔hea，又有羽衣甘藍，又有三色椒…… 都落咗好多材料。打頭陣嘅係「水牛城雞翼」，原本侍應介紹呢個小食係辣，但我同呀媽都唔覺得辣。哩個汁係用蕃茄做主角，酸酸甜甜，好開胃。再連埋啲三色椒碎一齊食，口感有好多層次。最緊要嘅係雞翼肉質夠嫩。至於「扒自然豬柳配紅酒燒汁」賣相吸引。豬柳厚度適中，佢嘅汁同啲豬柳好夾，配上挺身嘅意粉，什菌，豆角，翠玉瓜哩啲有口感嘅材料，更顯得豬柳肉質夠淋。「印度咖喱雞配烤餅」係用秘製嘅印度咖喱配上五隻雞鎚，可以啖啖肉咁食。雖然佢呢隻咖喱嘅味道好獨特，但係個人來講冇話特別鍾意。美中不足嘅係烤餅偏硬，希望下次有所改善，增加用烤餅點汁食嘅意欲。原本入嚟之前諗住食埋甜品先走，但係好飽所以埋單走人。連埋服務費都只係$300，價錢合理。唯有下次先再試你嘅甜品！…查看更多

嚟到新蒲崗見到有間日本野就走入去試下。入面嘅裝修唔單止有日本風情，仲有好多隻千與千尋嗰隻無面人，好得意，忍唔住要打個卡。叫得做海膽仔，相信餐廳入面同海膽相關嘅嘢食都唔會差。所以我哋叫咗一碟「海膽蟹肉炒飯」，炒飯嘅味道偏淡，但係喺面嘅海膽好鮮甜。「熔岩海膽魚餅」係必食嘅小食！黑忟忟嘅魚餅外形似足海膽嘅樣。咬落去熱辣辣加小小脆嘅外皮，入面係鮮黃色嘅海膽，好甜好好味。黎到串燒嘅代表就有「七味五花腩」，肥瘦均等嘅熱辣辣五花腩灑上七味粉，再加啲檸檬汁真係十分惹味。下次黎一定encore!!卷物就叫左「牛油果軟殼蟹卷」同埋「三文魚香芒加洲卷」。令我印象深刻嘅係，香甜嘅芒果搭住三文魚一齊食，感覺好清新，食多幾舊都唔會濟嘅感覺。兩個人食，叫左五樣野，埋單都只係$270。價錢相當大眾化。下次嚟想試吓佢嘅季節限定，睇吓仲會帶到啲咩驚喜俾我，同埋要叫多啲海膽食！…查看更多

冬天食煲仔飯是必須的！所以選擇嚟到老字號「四季煲仔飯」。一如既往，都係要排好長條隊。等咗大概半個鐘就有得入去食。我哋兩個人叫咗五樣嘢，一人一個煲仔飯，一個菜，一個蠔餅，一個湯。好彩我對面大食，如果唔係都食唔晒。「臘腸滑雞飯加牛肉」啲臘腸原條上，唔算多汁，臘腸嘅味都冇滲入啲飯到，不過飯算乾身。「田雞滑雞飯」嘅田雞好乾身，唔好食，哩間整體嘅肉嘅質素都係好一般。唔好期望會食到好嫩口嘅肉。腐乳通菜衰左係啲菜唔夠靚。蠔餅食落好鬆，但唔脆，似啲油煮得唔夠滾就落去炸咁。最後，芥菜湯就係我最愛。芥菜夠淋又甜，啲湯唔咸，有鹹蛋吊味，所以我每次都會叫黎飲。加埋兩罐汽水，最後埋單要二百幾差唔多$300。食完出黎見到仲係好長龍，感想係係咪真係多人排隊就等於好食？…查看更多

賣相吸引，但係味道一般。同朋友嚟食晏，我自己叫咗一個鐵板三色芝士照燒雞扒煎飯，雞扒得過且過，雞肉唔算嫩，芝士同醬汁味道唔係好夾。至於照燒雞扒軟殼蟹丼定食，睇落好豐富，仲有埋西瓜食tim…查看更多

有廚師發板，挑選新鮮食材，絕對可以食到刺身嘅鮮味。特別係大拖羅，油脂均勻，入口即溶。魚刺身都有兩種食法，除咗刺身，炙燒，一次過試晒兩種口感。燒物都唔錯，個人黎講幾鍾意食佢嘅雞翼，外皮脆得黎肉質都嫩，味道都唔會太咸。最後，佢嘅海膽係我食過最鮮甜嘅，一定會再嚟食。…查看更多

第一次食唐宮小聚，我覺得呢度冇茶樓咁嘈，環境舒適得來，食物賣相同質素都吸引，可以作為家庭假日小聚嘅地方。特別要同大家介紹，佢嘅冰鎮咕嚕肉好好食，佢冰凍嘅甜酸醬汁，包住炸左嘅豬肉，唔影響佢脆口嘅外皮得黎，又有新鮮感。另外，乳鴿都好好食，皮脆嫩肉，啲油唔會多到流出黎，味道都啱啱好，唔需要點其他野都好夠味。…查看更多