D_CHEE的个人专页

秋風好似到左，但個個都知香港既秋天，係會話冇就冇，之後仲好快咁熱烈慶祝回歸夏天既懷抱。但為左感謝依陣風，都應該要認認真真咁打個邊爐或食返個有質素既煲仔飯。由於潛意識係覺得邊爐係要人多食，咁今次先黎煲仔飯，遠指西環煲仔區，探索下嗰啲米字好食推介。初嚐嚐囍，第一道菜係椒鹽九肚魚，外脆內滑。至於出名既煲仔飯，真係值得佢出名。今次叫左兩個煲，整體感覺係超級滿意，就算兩個煲係唔同內容，但佢地都控制到個餸熟，飯焦脆而不燶。或者咁講會係神化左佢地，但我諗佢地係有計埋上枱焗多陣嗰一下，焗一焗就啱啱18歲。臘味飯油香滿滿，臘腸潤腸同臘肉都係好野黎。另一個白鱔排骨都好衝擊，佢完全唔會因為頭幾啖食左個重口味既臘味飯而比下去，佢冇咁油膩之途，個飯多左種白鱔既清香同時又享用到白鱔既肥肥美美。等待煲仔飯既時間，對住佢張印滿字既點心紙….. 令人好多幻想。…查看更多

年，又過年，每365日就會有一次生日，願望都係世界和平同身體健康，而今年就一定會「心想事成」。重陽前差點第一次相遇，但由於朝早打風驚左晚間會仲大風大雨而臨時變陣，咁多謝個變陣先有咁有意思既一晚。「世間所有相遇，都係久別重逢」，當日一完成「永恆」就直接去開飯，入門口先知又係嗰個「喜愛集團」，即對佢信心滿滿。咁今次就繼續過往慣例 - 唔用腦唔諗野直接試佢地「 抵食勁飽套餐」 同感激地加埋嗰個「 對應飲野」。開心時間過得特別快，所以食完都唔太記得食左幾多道菜，總之好多。而印象最深係佢地個 “Tuna & Watermelon Tartare” 同“ “Ki-mo-Chi” Fried Chicken“。個吞拿魚西瓜幾啱開胃，Ki-mo-Chi 又真係超級 Ki-mo-Chi。成餐真係好好好好食，個Grilled Cod 都會係必食，最後飽到要打包當第二晚餐。 可以一晚聽超過十X幾次生日歌，真係好持別既一晚。咁，真係好多天蠍座。…查看更多

每年總會有啲時間好想食Frites 既青口同薯條，掛住嗰種放肆咁食放縱咁飲既Moment。 之前幾年都係去鰂魚涌，今年就發覺中環鋪都好正，嗰到都俾到人放工要放鬆既感覺，Happy Hour真係要Happy。 野食方便同另一間都一樣，好有質素。雖然戰友們戰力普通，但今次食得晒所有口味，而大家一致覺得House Mussels係最正最肥最淫賤既。Marinière 都唔錯，個白酒帶出到青口既甜美。至於印象中，之前係未食過Laksa，但今次食完，肯定下次會再會佢。…查看更多

九月一開始就計劃月尾個星期日去東涌行山，慣例行完都會去食下好野開心下，但當地點係東涌就唔容易，雖然佢地Outlet大左，但係特別吸引既餐廳仲未有。最後決定去遠少少，去新開酒店既中餐廳試一試。去前已經大概諗好食乜，但睇到佢既Recommend之後，最後係叫多左幾個餸。佢個例湯好好飲，運動完後飲返碗有種舒暢感。個燒味拼盤既乳豬脆卜卜，叉燒個肥瘦揀得好好，係口感同油膩之間搵到個平衡。其他餸都唔差，雖然未去到「嘩」一聲，但都係質素之作。位置係遠左啲，但餐廳坐落舒服，附近環境店舖更有種去左異地既感覺….. 依個時期，有依種感覺已經好好…..…查看更多

今時今日，「旅行」一詞都準備放入歴史書，當年計劃既一季一遊更係難過攞Nobel Prize。冇去酒店扮去旅行，就用食物去放低一下香港既繁忙。作為係香港第一次既「阿媽家姐」Omakase，「海」的確俾到我一種享受既感覺，食材夠新鮮，由淡到濃，乾到濕，咸到甜，睇得出有設計過處理既方法，好尊重食材同時令客人都有被尊重既感覺。可能知道夜晚再食大餐，個人覺得份量算係啱啱好。初嘗之後先發現，香港太多臥虎藏龍， 下次要記得早啲Book位。…查看更多

情鐘炸物，吉列系列係每次去日本必食菜式。店雖然細細，但裝飾環境都好居酒屋既感覺，就算當晚落大雨，人客依然不斷，就算到Last Order 前都十分熱鬧，氣氛一流。當晚叫左個招牌Porker定食同燉煮豬雜，先講豬雜，好入味，煮得好軟腍腍，餸飯真係一流。至於定食，分別有豚西冷同豬柳，炸的好好，個脆皮好薄好脆，而肉又唔岩岩好，唔會過熟。而個人比較鐘情西冷，雖豬柳都好食，但西冷肥少少，多左陣油香。…查看更多

成日聽人講La Vache!好正，可惜同時有book位既限制，晚餐只接受5人或以上既booking。今日終於得嘗所願，book左lunch時間去試下。餐牌唔洗睇，因為La Vache!獨沽一味只有一個牛扒set選擇，客人只需要揀幾多成熟就可以啦！第一樣先黎個沙律開下胃先 之後就係薯條，新鮮熱辣仲可以瘋狂refill，不過要忍住，留肚食主角！2人份量，賣相都幾吸引，medium rare剛剛好。第一舊咩都冇點食左原味先，牛味豐富好juicy，外面嗰層煎得幾香。之後再試下點醬，um... 好食到講唔到野，下次會再黎食…查看更多

為左唔想去Hong Kong Art Centre之前趕頭趕命，嗰晚目標都係揀係灣仔附近既餐廳。位置可能未係最佳，金鐘同灣仔之間，但餐廳既設計好吸引，主打黑白，清楚簡單。而Menu 更簡單，只有三種麵加兩種野飲可以揀。但可能係專心，先做到動心。先講蝦麵，個湯不得了，又香又濃，飲完都係到諗老闆為左依個湯底殺死左幾多隻蝦。至於叻沙，高水準之作，差D飲晒成碗湯。有Surprise，有Memory..... 至少係音樂會中，仲回味緊個靚湯。…查看更多

明明嗰日食完午餐，諗住順路未買定下午茶既包點，但點知去到門口就已經俾佢入面既麵包香味吸引住，加上見到大排長龍就上網Check Check，原來大有來頭 ，搞到本來既飽肚感又一次消失。雖然要等一個鐘，但佢地既Croissant真係值得等，可能係啱啱出爐，D牛油香氣香到傻，加上外脆內軟。極級享受，極級淫賤。如果，下次要再等一個鐘，實會等..... 只係要記住要買多個。…查看更多

有次係Lunch既時段經過，已見到大排長龍，心諗依間餐廳差極有個限度。點知過左冇耐又係網上見有介紹，最後都忍唔住要黎試下佢地既意粉。黎之前上網做曬功課，早餐都唔食，全因睇中左佢地既Weekend And Holiday Brunch，可以好好試下佢地唔同既菜式。本身我係勁鐘意食Lasagna，佢地都做得好好，有期待既情況下都感覺好滿意，超級欣賞佢個茄底。每個菜式份量好足，食完Starter同Mains都夠飽，但佢地個Tiramisu好誇張，幾飽都要食埋。下次黎，好大機會都係為左再食佢。…查看更多

晚飯前又口㾗㾗想咬D野，係美食橫行既觀塘區，緣份帶領下，就同朋友行下行下撞下撞下咁黎左「西班牙小食坊」。有好野食，一定要埋好野飲，佢既House Wine好鬼抵飲，而且質素唔差。基於晏D有大餐，所以只係叫左D小食試下先。佢地既48個月既純橡果黑毛豬火腿好鬼正，可能我鐘意油香啦。見隔離枱介紹，叫左佢地既Pan Cristal黎配海鮮一齊食。本身個包就已經夠好脆夠食，加埋吞拿魚腩就更搶。今次時間關係，試左少少，下次一定試下佢地既主菜先。…查看更多