bonnie.yung的个人专页

前嗰排病完，加上天氣好凍，所以好想打邊爐。朋友搵咗呢間，見到咁多好評，大家都未試過就試吓啦！首先呢度地方好細好狹窄，坐得一啲都唔舒服！成個場由頭到尾都係得兩個服務員，人手極度唔夠，有啲嘢order咗好耐前後催咗三次先有！重點嚟啦，食物質量+份量同價錢完全唔成正比！當晚沒有點任何海鮮，四個女仔正常食量，買單$2800! 人均$700打邊爐，大把其他打邊爐嘅地方象拔蚌都食到啦🙂臨走先聽到隔籬枱原來係嚟試食嘅hahaha唔怪之得咁多好評! …查看更多

之前見到網上有好多人喺呢度打卡，見到咁靚，一場黎到澳門梗係要來試吓啦。當晚嚟到已經比較夜所以冇乜人，由於之前已經好飽所以一人一個甜品就算，主要都係打下卡影吓相。不過比較令人失望嘅係呢度連一杯水都要額外比錢點，我覺得做生意要賺錢人之常情，不過都唔係做得咁肉酸嘅，一間甜品店客人嚟到幾乎個個都食甜品，講緊百幾二百蚊食一個甜品，你連一杯水都唔俾人係咩玩法? 食物方面係真係好靚，presentation 100分，打卡一流，而且唔係得個樣，係真係好味嘅。不過來一次就夠啦。…查看更多

呢度係我去過最靚最抵最好嘅bar! 到目前為止我去過咁多地方呢度嘅happy hour is #1 of my list! 如果你鍾意飲酒，而且飲得，來澳門一定要嚟呢度，仲要係weekend嚟! 因為呢度weekend sunset hour只需要$248 for unlimited free flow and unlimited tapas tray! 星期一至四價錢平啲$198但係食物唔係unlimited. 係五星級酒店頂樓呢個環境同質素真係抵到冇得再抵! 平時喺酒店飲杯野閑閑哋都百幾二百，呢度你飲幾多杯都得! 再講食物，唔好以為任食就普普通通，成個tapas tray每一件食物都好好味完全食得出係精心炮製。佢哋嘅串燒仲好味過喺泰國餐廳食嘅，而且其他鹹點好特別超好食! 真係唔好錯過! 我第一日去完其實已經book咗第二日再去，但係前一晚飲得實在太醉所以最後取消咗好可惜！希望可以快啲再去澳門再嚟呢度。…查看更多

我好鍾意食咖喱，呢間Michelin one star印度餐廳價格相宜，本來第一日已經想試但係佢哋中午淨係做buffet, 我同朋友都唔想食buffet, 所以嚟到澳門最後一晚先決定去試。之前上網都睇過推介，大概知道自己會食啲乜，服務員都好細心推介，仲介紹新出嘅cocktails. 我成日都眼闊肚窄，成日以為會唔夠食結果食唔晒打包。因為印度野始終都比較重口味，愈食就覺得越膩，所以叫適量就夠啦。Avocado salad同dessert賣相真係一百分，salad食落都幾特別幾好味。咖喱方面好惹味，真係應該叫碗飯撈咖喱汁。但係cocktails方面比較令人失望，唔好飲。…查看更多

朋友即將要結婚，一行六人嚟澳門開bachelorette party, 梗係唔少得要食好嘢啦，所以其中一餐就訂咗呢度食dinner. 我特登打長途電話黎book位同埋要stage前面嘅枱，不過嚟到嘅時候我哋唔係被安排到原本訂嘅枱而係一張離stage較遠嘅sofa位，但由於我哋都好滿意個位所以冇轉枱。服務員好細心為我地推介starter and main course, 最值得讚嘅係原本我哋仲想叫多個steak, 但專業嘅服務員衡量過我哋已經叫咗嘅食物覺得我哋會點得太多食唔晒，所以我哋就聽咗佢嘅建議。呢餐飯食得好開心，所有嘢我都幾乎比滿分，呢個餐前麵包係我食過最好食嘅，係我心目中同香港Grand Hyatt嘅Grissini餐前麵包都係排第一位。仲有呢度嘅steak tartare is the best I’ve ever had!!! 真係好好味好想食多份。仲有個steak比我咁多年係北美洲食過嘅都要好食。好鍾意嚟澳門因為喺呢度有好多高質素嘅餐廳，最重要係you get what you pay! 我哋開咗支紅酒，叫咗咁多starters, steak, 仲一早預訂咗個蛋糕慶祝朋友結婚，呢個蛋糕又靚又抵，如果去呢度慶祝真係唔使自己帶蛋糕，因為呢個蛋糕我印象之中好似先至$3XX! 我哋六個人買單每人先至600幾蚊一位真係好抵! 我已經急不及待想快啲再去食啦! 希望有時間再去澳門啦! …查看更多

我係呢度嘅常客，去得最多飲嘢嘅地方幾乎喺呢度。自己好鍾意坐露台，冬暖夏涼! 佢哋嘅staffs好高效率，服務又好又有禮貌，所以每次飲完野咩煩惱都冇晒。雖然好多地方都有呢間分店但係由於地點關係我淨係去過呢間，有機會會試吓其他分店。除咗alcoholic drinks, 佢哋嘅non-alcoholic drinks 都好有特色。記得有次我一位內地嘅朋友喺外國返嚟，我就帶咗佢嚟呢度飲嘢，佢好鍾意呢度，話呢度嘅cocktail好特別，佢都未見過。…查看更多

坐完高鐵返嚟，入圓方行左一陣好想食啲甜品所以經過就買杯雪糕食。之前聽朋友講佢好鍾意食京林屋，覺得係咁多間日本甜品店最好食，所以一開始抱好大期望覺得應該係會好好食。唔知係主打matcha先好食定點，我嗰日點左牛奶士多啤梨雪糕，普通到冇得再普通，我個人覺得icremeria同tsujiri都好食過佢。而且仲等左好耐因為得一個店員做嘢。下次有機會會試吓佢matcha flavour, hopefully it’s good.…查看更多

之前因為朋友介紹嚟過呢度食晚餐，除咗嘢食得呢度嘅吧真係好正，呢度有成個酒櫃放滿全部由日本帶返黎嘅whisky, 得一支飲完就冇。雖然地方細細，但呢度嘅燈光同氣氛都好好，令人好舒服。值得一題係呢間係太子大廈裏面嘅bar平時竟然仲有Happy Hour, 所以真係好值得去。我點解呢杯酒係bartender介紹嘅，好好味，係有sake嘅champagne. 最重要係呢度嘅refreshment係佢哋釀咗明太子嘅olives! 我係一個超級無敵鍾意食olives嘅人，釀咗明太子嘅olives真係好好味食唔停口。…查看更多

留咗喺酒店成日冇嘢做，夜麻麻到到都閂左門就上去26樓飲嘢。當晚落好大雨，所以好可惜冇睇到出面嘅夜景，而且到處都係防暴警察當晚其實得好少人。呢杯嘢飲好得意當時，bartender當時同我講話呢杯野過幾日就冇㗎啦，會轉企鵝! 唔知係咪呢? 可能遲啲要再去飲先至知啦。呢度環境一流坐得好舒服，我個人都係比較鍾意喺酒店坐得舒服安安靜靜飲嘢傾計。下次有機會想日頭嚟試吓佢哋嘅brunch, 希望佢哋嘅食物都唔會令我失望。…查看更多

之前嚟過呢度一次飲嘢，咁岩要約客飲嘢而原本想去嘅地方又有private event, 所以就轉咗嚟呢度。呢度地方好細，之前都係坐吧枱，因為今次5:00一開即入所以可以坐到sofa. 呢度氣氛輕鬆，服務員親切，會耐心推介cocktail. 一開始未有人嚟嗰陣時好靜有少少音樂好適合傾計，但係後來放工時間六點之後人開始多變得好嘈好嘈，因為size始終都係好似一間private room. 所以以後如果係同客飲嘢都係prefer 坐返mo bar. 食物方面不過不失，個熱狗又未去到話好好味，不過佢哋好細心會幫你切好bite size, 好方便。…查看更多

之前有聽過朋友話呢度幾好食，既然要同客食lunch就試吓呢度啦，早一個星期book位，服務員好有禮貌喺電話問我需唔需要private room, minimum charge $3000, 我哋一共六位，不過我打算causal啲就話唔使啦，不過嚟到我就後悔啦! 因為環境真係幾嘈，lunch好多人加上鐵板燒渣渣聲，呢度講緊一個lunch set都$5-6-700所以我哋六個人真係應該坐private room可以靜少少。同枱嘅所有人全部都係點鐵板燒set lunch $620，得我點咗懷石料理bento $720。先來係普通到冇得再普通嘅沙律，之後starter係食落又似豆腐又似蛋加上ikura，然後就係兩種sashimi，食落都算新鮮，不過我個人鍾意食啲肥美啲嘅魚生。Bento終於黎啦，賣相都唔錯，四樣嘢係右上格嘅牛柳最好味，入口即溶，食完其實我都已經後悔點解自己唔食鐵板燒。其他嘢唔差，但又未去到好好味。呢個$800嘅lunch 喺中環食日本野已經可以食到好好食嘅omakase。總體來講呢度性價比低，只係食地點，係同客食飯我先至會嚟食。…查看更多

之前食過佢哋嘅手卷幾好，有一日咁岩經過又未食嘢所以就入咗去諗住試吓其他嘢食。見到menu有好多don，咁就試吓啦，點知真係不敢恭維。叫海膽屋但係啲海膽完全唔得，個飯我食咗三份一都冇，好耐都冇食過咁難食嘅飯。好彩再叫多咗個軟殼蟹手卷先至覺得有食過嘢。我當然知道一分錢一分貨，三隻蝦加海膽don盛惠$148，講真呢個價錢其實都有好多選擇，加埋手卷都食咗成兩舊水，所以真係可一不可再。不過佢哋嘅手卷真係ok嘅，行過路過就買個手卷試吓啦。值得一提係收銀姐姐嘅服務非常殷勤細心。…查看更多

之前上網見到半島酒店birthday rewards - $508 set dinner buy 3 get 1 free 再送一個生日蛋糕，咁啱有朋友生日所以就一行四人去慶祝生日。其實大堂嘅音樂真係有啲嘈，嘈到講嘢要好大聲先聽到，個人唔係好鍾意。服務員好細心俾咗幾杯溫水我哋，再介紹menu今日soup of the day係咩湯，加多$60就可以飲house wine，真係好抵。點完餐先來麵包，由於太肚餓所以食咗三個包，普普通通冇咩特別。頭盤我要左Parma ham，又係普普通通冇乜特別。唯一有少少驚喜係main course，牛柳我點咗medium，我唔鍾意食太生所以啱啱好，好味。嚟到甜品，sorbet幾清新又唔太甜，其實我想食sorbet多過chocolate dome。最後係酒店送嘅生日蛋糕，本身我對呢個蛋糕抱最大期望，但係今日嘅蛋糕竟然係我最唔鍾意嘅cinnamon......我個人真係好唔鍾意cinnamon所以食咗冇幾多啖真係食唔落，牙縫最後仲有啲橙皮添......點解唔係正正常常嘅朱古力蛋糕喎😩總體來講呢個offer係好抵性價比極高比起下午茶更加值得去!…查看更多

因為遊行關係附近嘅鋪頭好多一早已經收咗，夜媽媽冇嘢好做所以落去lobby飲杯野。佢哋lobby嘅景色一流，喺呢度飲嘢真係好relax。可惜當晚我後面坐咗一枱大陸人，講嘢超級無敵大聲，仲要大大聲講電話，仲要行來行去真係影響晒成個觀感。再加上live band, 講真我真係覺得好嘈一D都唔enjoy. 其實都11點幾夜闌人靜冇live band咪仲好。仲有呢個lobby嘅洗手間女廁係得一格，可能想避免非住客人入嚟借廁所？不過始終係五星級大酒店就算下午茶時間人流都唔少啦，一格廁所咪有排等？…查看更多

舊同事話嚟呢度食飯，我完全都唔知呢度basement有間餐廳，入到去先知原來12:45前買單或者1:30後入座仲有八五折，不過我哋唔等啦，爭幾分鐘都入咗去。我本身對呢度都冇乜期望，但係佢哋個餐包一上我就改觀，個餐包熱辣辣非常好食。主菜我叫咗西冷牛扒，啖啖肉，好大塊我成塊食晒! 仲配埋薯角食得好滿足。其他人叫嘅珍寶腸配雞扒同魚睇落都好唔錯。人均100左右，我覺得好OK, 可惜地點唔近我啦我唔係一定會成日嚟。…查看更多