烏DEE的个人专页

週年紀念，見呢度近公司，收工過嚟都方便、outdoor位得幾張枱兼且view唔錯應該會可以靜靜哋享受下個晚餐。誰不知outdoor坐滿之後勁嘈。嘈都算喇唔關餐廳事，係食客問題，當自己倒楣。叫左個二人餐，食前菜、湯都未話好出事，不過其實要嚟送湯果條餅都有少少潮左，淋兼有陣益益地咁嘅味，但未至於擺唔到入口。蘑菇湯算係全晚最好果樣嘢。個拼盤，蜆係好食，個白汁幾濃郁。另外嗰三款，即係吉列蠔、炸魷魚鬚同埋炸飯球，都似係放題食材質素，不過未至於難食，好彩係熱嘅。到個明太子三文魚子扇貝意粉，除咗粒扇貝仲有魷魚，但係食唔到應有鮮味，完全好似冇調過味咁款，意粉個汁完全食唔到嘅明太子嘅味道，三文魚子都係正常發揮，唯一覺得意粉幾滑唔錯，係我鍾意嘅質感。Main course揀咗加錢要肉眼，落單時店員問要幾多成熟，我哋話要五成，結果嚟到枱面成塊牛扒係全熟，仲要塊扒唔覺得熱，即刻叫店員換過，然後餐廳做過碟出嚟，嗰塊肉眼都唔係五成，三成熟都唔知有冇，但就同我講佢哋用慢煮法去煮，真係聽到我呆咗喺度，自己都嘗試過食咗塊扒佢，唔好咁嘥嘢，但最終都係頂唔住，真係過份地生。下面第一張肉眼嘅相係全熟嗰塊，第二張係三成都熟都唔知有無果塊，求其辣左兩邊就拎出嚟。肉眼換咗過一次又一次之後都已經唔想再影相，最終同餐廳協議左換豬鞍，上枱果刻staff都係話豬同牛一樣都係用慢煮，所以見到粉紅色係正常，哇。。。咁仲驚，係咪生嘅話都要焗食？大佬豬肉嚟喎，如果佢真係生，我諗我哋反枱都似，好在最後切開佢今次全熟，喇喇林食完埋單走人算，好地地一個週年紀念晚餐攪到無晒癮。個二人set之外，我好想食八爪魚，仲加咗一個Dish，個八爪魚味道普普通通，但係醬汁完全唔夾食材，呢點可能係我自己唔啱口味啫，但個人覺得，希望餐廳可以再做好啲。…查看更多

忽然降温咁ad hoc，最好梗係出街打邊爐，乾手淨腳唔使攪一大輪。好想食手打丸，喺開飯見呢度有手打丸，兼且即場開個椰青响你面前倒落鍋咁新鮮，就決定試下。點左個椰子雞鍋(半隻)，湯都幾甜，雞就唔係鮮雞喇，不過會起埋椰肉比你一齊煲，幾好反正我鍾清甜湯。撞正12月份生日優惠，送牛肉一小碟，今次送吊龍。牛肉正喎😋😋😋，可惜今晚得2個人食，否則一定追加！另外叫咗手打丸，蝦同墨魚，感覺一般，無乜味又唔夠彈，有啲失望本想食手打丸先打邊爐。😩仲叫左個三拼水餃，紫菜、白菜、韮菜。紫菜出色！白菜遜色，韮菜正常發揮，唔好意思唔記得咗影相😂😂另外仲叫左個菜籃同竹笙，正常味道。個菜籃幾好好新鮮，仲有5款蔬菜。仲有叫咗個老公要食嘅貢丸，叫貨嘅唔係自家，又係無影相因無乜特別。埋單$800左右，整體嚟講還可以😌如果佢哋多啲魚嘅種類就好喇，好似淨係得脆肉鯇，我都唔食嘅想叫魚都無得叫。…查看更多

發覺對Expresso Tonic成癮就好想近近哋喺屯門揾到間可以長期幫襯，之前記憶中佢仲係叫隱啡，後來唔知係咪改咗名叫樂啡。呢間樂啡其實都幾唔掂，先嚟前日响開飯訂咗琴日嘅位，明明訂咗位但去到無位，諗深一層都可以理解，疫情下有生意無理由拒絕兼同錢作對推其他客，對方安排到位比我坐低就算，無謂打擾到假期好心情。到去落order，Mention左3次ADB上面的菜走黑醋汁完全唔要！竟然嚟到仍然有汁仲好似唔使錢咁大大撻！🙄都算，照啃！到最期待嘅咖啡喇，Menu上面寫係Lemon soda coffee但點解一飲係薑味氣水加咖啡😑😑😑，如果係無Lemon soda其實可以出聲我會直接轉black coffee，唔好夾硬整出嚟成件事都無咁崩壞。否則就係挑戰客人味覺、挑戰商品説明條例同埋個咖啡師味覺有問題喇，不過唔知做乜琴日我又忍左無出聲嗌換嘢喎，可能心情比平時好抵銷左😂？亦都可能係見到疑似店主收藏兼Cafe內嘅deco都有啲九唔搭八，無信心換過會令我滿意而直接放棄😅咖啡同黑膠唔緊要，但海龜。。。即係點？我link up唔到件事，可能係風水陣！？…查看更多

我唔敢講呢度係唔係正宗，因為自己未去過四川食川菜，但係呢度嘅水煮牛肉味道係夠花椒香，另外我幾欣賞呢度個牛肉唔知出邊用鬆肉粉”乸”過晒，咁樣比我有一份住家嘅感覺。尖椒回鍋肉飯，爆炒得好有鑊氣，個人覺得比水煮牛肉飯仲更加好食，雖然佢係辣但係唔會覺得佢係得個辣字佢仲好香，好好送飯。不過呢度飲品就好少選擇，都係冰紅茶、可樂好普通嘅飲品，都係一啲現成可以買到嘅貨。食物質素唔差，最蝕底嘅地方就係唔算好就腳，整體來講，一個人想食個快飯呢度係一個好選擇。…查看更多

我自己就揀7:30前離座價錢$199一位，先講刺身同埋海鮮，味道都唔錯，係新鮮而且有鮮味。另外手打丸都好推介，大細適中又彈牙，亦都係食到蝦同埋墨魚嘅原味同埋鮮味，其實淨係食過刺身同埋個海鮮盤已經都飽得7788，啲牛我覺得都唔錯，有肉味唔會黑，豚肉唔太肥亦都夠嫩滑，至於水煮魚同埋酸菜魚，個人就覺得一般，都係去返食四川嘢嘅地方食會比較好，就算以正價$275 +10%來講，可以火鍋又過到川菜口引都算好抵㗎啦！鑊仔雞我冇叫到因為自己冇興趣，提供唔到資料俾大家喇，飲品方面都好多嘢揀，餐前四小食就一般啦，試吓就OK，主打食返火鍋會比較好。…查看更多

開張半個月左右我去咗兩次，兩次都感覺唔好，兩次個食物區都係長期唔夠refill，又有啲食物有名牌但未見過影，而且種類同款式亦都比其他分店少好多，初時以為我同朋友太早到，員工同餐廳未準備得切，但食到我哋埋單起身走人果刻食物區都係一樣情況。兩次光顧都係咁到第二次去食，食物區依舊係咁樣都算，最離譜係店員幫我哋加湯嘅時候，係我個蕃茄湯底嗰度加錯豉油湯，成煲野即刻唔使食，同一時間有另外一個店員埋嚟要我哋埋單，佢見到咁嘅情況就拉開加錯湯嗰個員工，然後成件事當乜事都冇發生過冇交代過，真心過分左！咁你要我即刻起身走定會換過個湯比我吖？你都要講清楚我知嘛？仲要果時未夠鐘嫁喎！本身仲諗住一個月內儲單儲夠$1500，衝一個會員返嚟，而家唔使諗啦！…查看更多

食物係比普通大喜屋同極尚大喜屋多幾款貴啲嘅食材，但味道就唔覺得特別好，尤其是刺身真係失望，帶子一開四、Toro有血同食落有筋🤦🏻‍♀️比較好嘅刺身係赤貝，唔腥食到落肚。但都有好食嘅嘢，海膽手卷同埋醉飽魚都有返頭食多次，海膽食到甘甜味，紫菜脆！醉鮑魚夠入味同淋，温度唔會過凍，係唔錯！之不過有一樣好唔掂嘅係勁漏單，明顯唔夠人手做嘢，啲軍艦整好曬無人送餐都算，價錢來講，放題中唔係平，如果咁嘅服務同食物質素，我唔會再回頭幫襯lu。…查看更多

招牌菜燒春雞真心正，隻雞夠味剛剛好，唔會太重味，仲係即叫即燒，嚟到都仲好熱又夠juicy，連啲雞胸肉都好嫩。鮮蝦青木瓜沙律，夠晒泰國風味，有啲椰子肉碎，但staff話可以小辣，個人覺得仍然係比較辣。西西里肉丸意粉，味道正正常常，肉丸應該係自家製。Ribs都做得唔錯呀，有啲𡁻頭，唔係某大型餐廳咁燒到離晒骨好梅嘅肉質，而醬汁亦唔會太濃，我至怕濃到淨係食到醬汁味，呢個食到肉味，好啱口味🤤飲品都係正常味道，又有歌手咁啱唱左兩首我好鍾意嘅歌…查看更多

好想幫哈佬寫食評，嚟左兩次食物同人情味我都好鍾意。依家出面好多時都係大集團就算係小店都好少有互動，例如問吓食客對店同食物嘅質素、感覺如何。呢點哈佬做得好好，為求改進等自己可以做得更好。我同老友隔左一個月多啲第二次去，店員都仲認得我同朋友之前幫襯過，感覺上好像見到朋友咁，真心有heart！我哋真係好欣賞佢哋嘅熱誠呀！再睇埋呢張白飯相，就知哈佬幾勁人情味食物當然亦唔講得笑，全部都好夠鑊氣，味道又正，香氣仲勁，好印象深刻嘅係，隔離兩台點左一道辣子菜式，伙計上菜時行過遺留果陣香味幾震撼！用料真係好足，大家請落去下面睇下相！陳醋雲耳，甜酸中帶點孜然味醉鴨舌魔鬼炒蜆，超好味辣得嚟又有層次，非一般的辣水煮毛血旺，配料有豬腸、豬紅、栢葉、水土魷、豆卜等等。。。太多濃味食個清炒鍋筍都唔錯爆椒鴛鴦雞，一個煲滿足兩個願望，本身菜單無嘅，想試就問吓落單個哥哥仔可唔可以，相信人情味濃厚嘅哈佬應該會盡量滿足食客嘅要求！…查看更多

今日專登落元朗嘅，3點幾仲未食晏要揾食咯，想快有得食唔使等位，想起平靚正之選。。。回味館！天氣熱當然係要補充水分流失，所以點湯飯跟中湯蠔仔肉碎湯泡飯搭個青紅蘿蔔菜乾湯第一時間飲啖個中湯先，嗯。。。其實正常味，無乜特別。再來就開波啦，呷一啖蠔仔湯，出事囉！好鮮味呀！湯底好濃郁，好勁蠔鮮味，覺得疑似用魚湯托底！加埋少許冬菜、唐芹、薑片，個湯嘅味道即時Rich爆，蠔仔同肉碎都份量唔少，仲有幾粒杞子做點綴，大廚真心有heart！…查看更多

呢排窮但又想食buffet，平平地塭左呢度，一來有生蠔，二來交通又方便，三來訂枱又超容易經Openrice訂位撳幾下就攪掂！星期六價錢折後$422.4/位，有咁多款都算ok啦！平時我會食嘅items都有齊，冷盤同熱盤相比，熱嘅少款啲，要特別提一提嘅係羊架、栗子mousse cake、翡翠螺。羊架好軟、調味又好，千祈唔好點sauce，原汁原味至正！栗子蛋糕好香但絕對唔漏！翡翠螺size一般，但係勁鮮，唔會硬去相啦…查看更多

呢間聽過好多人去，亦唔少朋友話好抵食，今次有機會去，仲要一大班人去，可以試到好多款蟹幾好食，點左佢個醋再提下鮮甜翡翠螺Size唔細，甜，無雪味亦唔會un，正！生蠔同焗蠔，好大隻但唔重味，無乜特別感覺燉花膠雞湯，係幾好味嘅，但飲到最後疑似有小強喺入面龍蝦湯飯，呢個湯味道真心唔錯，但我覺得加埋啲料同飯一齊太多太滯蟶子、東星斑、單骨雞翼椒鹽鮑魚，個人唔太欣賞，海鮮我都係鍾意蒸，椒鹽太重味蓋過左鮑魚味籠仔蒸菜，白菜仔同芥蘭，好好味，必叫！…查看更多

:)近排好想食燒章魚丸，知道蝴蝶開左分店即刻過來食，仲嚟左連續兩星期。食左蟹籽、明太子、餃子蟹籽份量好似唔使錢咁，好多，照燒汁加肥仔醬、木魚絲，好香呀但食起嚟比較濕，我自己比較鍾意明太子果款，明太子食落較蟹籽香同埋乾身，外皮脆餡內軟，熱辣辣好難會唔好食囉另外佢餃子都有驚喜喎，皮薄料足，平時我唔鍾意點汁，不過佢個餃子汁少少酸係會令隻餃子更提升…查看更多

好耐之前已發現呢間泰式火鍋，但實在太少會經過九龍灣喇，所以依家過開嚟至有機會試。每人188蚊，叫左冬蔭公湯底，加20蚊雙拼左個椰汁雞湯，好香椰汁味，兩邊都好正。一坐低先嚟每人送兩隻生蝦，食物種類都算多，肥牛、五花腩片、海鮮、丸、菜。。。乜都有，大蜆一定要攞落冬蔭公果邊淥，十級惹味佢有廿級！除左火鍋配料，仲有好多泰式熟食同甜品，炒通菜好正夾左兩碟，去相先！要提一提係呢度個芒果糯米飯，真係唔錯椰漿同飯仲微暖加埋芒果香甜，一出即刻個個去排隊攞。…查看更多

我會返轉頭原因其實好簡單，因為The Food Gallery無乜大陸人無大陸人呢點好重要，起碼環境清靜啲、可以慢慢享受食物！先嚟飲左個熱辣辣燉湯開吓個胃先，呢度嘅燉湯係必飲嘅，好正嘅，上次響螺雞，今次蘋果雞，同樣好果一。然後開始食沙律，呢度嘅煙三文魚，火腿同沙律菜亦係一定要食！煙三文魚同火腿夠味耐唔會太咸，我前後食左3轉再嚟就開始食海鮮，蟹鉗最好味！今次無琵琶蝦我唔制呀，上次食係超好味囉，食過咁多間dinner buffet除左洲際有之外我未撞過第二度有，但人地收緊個價錢貴呢度一截。翡翠螺都好好食，唔硬又有鮮味，good！龍蝦就正常，不過無雪味都應該係基本要求，佢做到。凍蝦好食呀，好鮮好甜，但我驚太飽就無瘋狂食啦。然後生蠔出場，今次有兩款。一款大隻啲較淡味，另一款就重海水味少少亦較為Creamy，兩者之間我寧願揀大隻，因個人來講麻麻哋Creamy:)燒牛扒我都係覺得要必食，呢個生熟程度啱我，啲鮮味肉汁一入口充斥住，實在係好開心…查看更多