大為食鮮茄的个人专页

Hotel Icon嘅餐廳好評如潮，所以決定一試。一早去到天外天，西式嘅裝修的確頗特別，但若以酒店嘅準則衡量的話，未免有點過迫。我與肥肥點了壽眉，味道是可以的。是日點了：馬拉糕海膽蟹肉小籠包腿茸蝦餃XO醬煎腸粉第一樣選擇了吃小籠包，其實看見小籠包時已有點失望，因為看得出小籠包嘅皮係厚厚的。果然，吃時頓覺小籠包嘅皮是如此煙靱，實在要花點時間及功夫才可解決那塊皮。裡頭嘅肉是鮮甜的，有湯但不算多，餡料特意加了些海膽，若細心的話，也可吃出其味，但沒感覺令整個小籠包增加多少分。:(馬拉糕確是保留著古法傳統的味道，質地鬆軟，當中有著少許瓜子，增加口感，算是最好吃的一道點心。:)蝦餃 -- 早已看見其他食家在網頁嘅評價是一般，但都決意一試，結果：不是皮薄餡靚，皮依然是厚厚的，並不是酒店嘅級數；而裡頭嘅蝦亦只有爽感，但沒有絲毫半點鮮蝦味，又一失望之作……:(最後嘅XO醬煎腸粉亦都教人失去信心，因為腸粉皮不夠滑漏，亦嫌過厚，食落也覺相當糊口，XO醬的味道也不濃烈、不夠香，只是像豉油皇腸粉一樣……唉……$78一碟腸粉也只是言個質素，實在有點兒那過……總括而言，以食物質素來說，一點也不值。但若要感受一吓這裡嘅環境，也可以一試，但不建議叫太多點心！…查看更多

見到雜誌介紹喜來登蠔吧嘅超豪自助早午餐，所以立即決定要同豬仔一齊試試，因為我哋兩個都係愛蠔之人！早咗少少到，不過唔緊要，侍應好有禮貌咁請我哋稍候一陣。不久，侍應端上麫包，但係即使麫包幾好食都好，我哋都唔能夠食得多，因為要留肚食生蠔嘛！開始時，我同豬仔分頭行事，我去攞生蠔，佢就去攞刺身。是日嘅生蠔有五款，三款來自美國，其餘兩款來自澳洲，分別為：Eld Inlet (USA)、Barron Point (USA)、Eagle Rock (USA)、Port Douglass (Australia)同埋Tasmania Pacific (Australia)。先講刺身，品質新鮮，吞拿魚刺身入口即溶，而油甘魚嘅甘味亦都非常強烈。相當靚嘅刺身，可惜嚟呢度主打唔係佢！唯一唔好嘅就係wasabi同豉油嘅擺放令到客人好唔就手，所以希望酒店可以作出改善。至於生蠔，一食落去，好明顯食得出澳洲蠔同美國蠔嘅分別，大致嚟講澳洲嘅會比較重海水味，而美國嘅就比較creamy。而我哋對每種蠔嘅評價詳見下文：- Eld Inlet (USA)：淡淡海水味、較creamy、味道濃郁、帶甜味，而且有少少漿口- Barron Point (USA)：Creamy得嚟亦有啲啲海水味- Eagle Rock (USA)：真正見識到乜嘢係creamy，因為呢種蠔係最creamy嘅一種，食 落仲有輕微鐡味- Port Douglass (Australia)：有少少鹹味、較爽口、味道鮮且有海水味- Tasmania Pacific (Australia)：最勁海水味，鐡味也較重除此之外，我哋仲order咗龍蝦湯伴鮮蝦雲吞。龍蝦湯用料好堅，味道好濃，亦都好少見到咁大粒雲吞，用嚟包雲吞嘅蝦好靚，好鮮味！另外，我哋亦都叫咗幾round嘅鵝肝，鵝肝本身好靚，可以做到入口即溶，但略嫌煎得個皮唔夠脆，如果再脆啲會更加香！食咗咁耐，終於輪到主菜羊架出場，喺無特別吩咐嘅情況下，送嚟嘅羊架嘅生熟程度竟然可以啱啱好，好鮮嫩，一啲都唔鞋口，絕對係控制得好好，羊架嘅味道亦都好出。值得一提嘅係伴羊架嘅薯蓉都做得相當出息，有牛油味得嚟又唔會好肥，最衰已經食到飽一飽，所以想叫多一份都唔可以。甜品方面，唔算好多選擇，梳乎里可以有四款味道：Vanilla、Grand Marnier、Kahlua同Ginger味，各有特式。但一定要推介嘅就係棉花糖，因為係細細個好鍾意食嘅嘢，但係大咗又唔會有好多地方有得食，難得喺呢度可以無限order，梗係要食番夠！特別推介選擇飲香檳個package，因為呢度係用Piper-Heidsieck Champagne，超易入口兼且仲要係超靚嘅貨色，所以飲到的話，飲多嘅杯一定可以回本！此外，呢度供應嘅紅、白酒亦算不俗。呢度所有侍應嘅服務都好好，食物亦都好吸引，所以雖然唔係成個價錢都有折(只有食物嗰$300有折，而另外歸飲品嘅$328則無折)，但係都食得好暢快！如果枱與枱之間嘅距離可以再闊啲就好喇！因為坐落都比較迫，而且會嘈咗少少！…查看更多

之前同友人嚟過，覺得唔錯，所以成日都想帶肥面嚟試一試，終於等到今日喇！可能今日係星期一嘅關係，客人唔算多，所以無上次咁嘈、咁焗聲。記得上次嚟好似有花生做前菜，但係今次已經無咗，即係變相已經加咗價。我哋今次叫咗：香辣口水雞夫妻肺片沸騰水煮魚泡椒嫩牛肉辣子肥腸先嚟兩個涼菜，口水雞嘅味道都幾濃，而且雞本身好滑。整碟雞香得嚟帶點點辣，非常易入口。但係可惜嘅係所有嘅雞件都係細細嚿嘅，比人感覺好似將啲頭頭尾尾混埋一碟咁就算，份量頗小兼夾食得唔個引。相比口水雞，夫妻肺片就仲無咁辣，而且紅油好香，加上少少嘅芝麻、芹菜，令到成碟涼菜好吸引。輕輕嘅麻味，配上上乘嘅用料，口感一流，而且仲好入味，有食到停唔到口嘅感覺。伴菜嘅花生亦都好香口，好脆！主菜先嚟水煮魚，一放低時的確相當沸騰，賣相好好，感覺正宗:)。此店用上桂花魚，魚質的確嫩滑可口，帶出少少嘅麻辣味道，不算十分濃烈。嗜辣嘅朋友可能會略嫌味道不夠辣。個人認為，相較上次嘅嚟食水煮魚嘅味道，今次麻辣味的確減咗。此外，魚片嘅數量其實少嘅可憐，只有一堆大豆芽同茨粉墊高整兜魚，幸好，大豆芽加茨粉索咗啲味，食落都幾好味，同時又可以順便當填肚。再嚟就係泡椒嫩牛肉，呢個菜同口水雞一樣有同一通病，就係啲牛肉好似碎上咁，食落時真係一粒都不能少，因為份量實在太少……但係味道係好嘅，唔算好辣，牛肉都確係鮮嫩。埋尾食埋個辣子肥腸，其實係將啲大腸炸到乾咗咁，食落好香又唔會搞到成口油淋淋。肥面就一路都嫌呢個辣子肥腸一啲都唔辣，唔係幾入到味；但係我就覺得如果嗒真都會覺得有少少辣味入咗啲大腸度。最神奇嘅就係當食晒呢碟肥腸時，好似完全同你洗口咁，連口中之前嘅少少辣味都吸走埋！整體成餐晚飯嘅餸菜味道其實係唔錯嘅，不過比起上次，所有菜式嘅辣味好似減淡咗咁。而且到埋單時先知原來已經加價加到$180一位，即係加咗$12，但係份量就比之前少咗好多，有少少唔夠食嘅感覺。服務方面，絕對唔會係殷勤，總之有餸就拎比你，你要茶就會斟比你，但唔會係臉帶笑容嗰隻架喇:(！如果仲係收$168我就會覺得抵啲，但係宜家加咗價而份量又咁的骰，咁可能無咁快返轉頭喇！…查看更多

之前無意中發現原來黃竹坑度開咗間新酒店，當然第一時間睇吓有無咩嘢啱食啦！適逢得知酒店嘅自助餐原來做緊七折，所以死搵爛搵終於搵到個期去試一試。 其實有好大期望，因為好多介紹都話呢度主打係海鮮，而我又相信酒店本身真係有地理優勢，會提供靚海鮮，所以一開始時，我同Birdie就分頭行事，我負責攞刺身，佢就負責掃海鮮。先嚟食刺身，值得一讚嘅係平時真係好少見酒店會有咁多刺身供應，分別有三文魚、吞拿魚、鯖魚、櫻花魷魚、墨魚、八爪魚、鱆紅魚、油甘魚、希靈魚、北寄貝同甜蝦。嗰個刺身櫃的確好吸引，而刺身嘅質責亦相當高，款款都鮮甜味美，絕對係靚貨。唯一唔好嘅就係如果想要刺身的話，就麻煩排一排隊，因為要等師傅切比你嘅，所以都嘥咗啲時間！:(之後，滿心歡喜咁迎接我哋啲海鮮，是晚嘅海鮮有麫包蟹、花蟹、長蟹腳、蝦、翡翠螺同青口。Birdie第一時間試翡翠螺，食咗之後已經大叫無味，跟住我都試試時，發覺除咗有咬口外，真係一啲鮮味或甜味都無，勁失望！之後再試麫包蟹，一開時發覺啲肉奇削，而且無乜肉食，感覺有啲唔新鮮。其後到食長蟹腳時，情況完全一樣，唔知係咪溶雪溶得太犀利，連蟹本身嘅味道都無埋。席間我哋聽到有人話青口得，咁我哋當然唔會放過試吓嘅機會啦，誰不知一擺落口之後，完全唔覺得有咩特別，都係屬於淡而無味嘅一族。成晚最好嘅海鮮我諗係蝦喇，雖然無膏，但係叫做最似樣！因為見到雜誌話呢度啲咖喱好食，於是乎平日食自助餐唔會試熱食嘅我都攞咗少少嚟試，咖喱主要有三款：泰國青咖喱雞、越式咖喱海鮮同埋印度咖喱羊。其實三款咖喱真係各有特式，亦頗正宗，但係可惜嘅係只得微溫，感覺有啲嘥咗！:(是晚贈送嘅主菜有蒸野生海斑同埋阿拉斯加蟹，念著出面好少食到野生海斑，我同Birdie都選擇咗佢。條魚比我哋想像中大，其實肉質的確唔錯，但係唔知點解都係唔夠熱，都未食到一半已經凍晒咁濟。配襯嘅豉油其實帶甜，理應可以帶出魚嘅鮮味，但係唔知點解放咗落條魚度時，啲豉油變得好淡。咁好嘅食材，但係就係比旁邊嘅嘢影響咗，確實係要扣分。成晚另一樣比較深刻嘅就係爐端燒，我揀咗牛同銀鱈魚。牛扒本身係靚嘢，所以食起嚟時有肉味得嚟又唔會乾身，肉汁都幾澎湃，抵讚。而銀鱈魚嘅魚皮就燒得卜卜脆，不過銀鱈魚本身帶膩，不能多食。 我諗唔少人嚟LIS度試都有啲因為佢出名多甜品，無疑，甜品嘅選擇的確唔少，但係當然無八十幾款咁多啦！不過並唔係款款甜品都做得咁出色，試過牛奶布甸、芒果布甸、杏加栗子奶凍、乳酪雪糕，梳乎里……其實好多都無乜味，例如芒果布甸實得嚟味道又唔吸引、牛奶布甸都不及坊間上買到嘅幼滑香口。唯獨如果鍾意食栗子嘅，就一定會鍾意杏加栗子奶凍，因為用咗好多栗子蓉外，味道亦幾濃。至於服務方面，除咗有位四眼哥哥做嘢有啲熱誠外，全間餐廳(包括負責攞甜品嘅師傳、爐端燒嘅廚、切刺身嘅哥哥仔、所有樓面……)嘅職員個個都係口黑面黑，好奇怪！雖然今次有七折優惠，但係折咗之後都要約$320一位，如果以咁嘅質素同服務嚟講，確係偏貴。所以應該都唔會再嚟呢度食自助餐！…查看更多

好耐都無試過同肥面二人世界lu，所以就突登揀咗惠比壽食佢嘅和風三文魚冷麪。惠比壽嘅和風三文魚冷麪嘅配料就梗係唔少得三文魚魚生啦！另外仲會有墨魚刺身做點綴。食嘅時候加埋沙律醬同冷麪豉油，確實好好味，只可惜三文魚冷麪嘅價錢雖然無乜點樣加到，但係份量就好似一次比一次少咁，無咗以前一嚟到好澎湃嘅感覺。宜家整個冷麪嘅三文魚刺身同墨魚刺身好似好唔夠咁，好彩食材方面算幾新鮮，而且亦都好夠凍。是晚除咗點咗冷麪外，仲叫咗個推介嘅串燒黑豚肉。嚟嘅時候見到啲肉肉白雪雪咁，但係食落又出奇哋夠味，而且肉質真係好靚，好滑，相當有驚喜！可以encore嘅！另外仲叫咗串燒鹽燒牛舌，雖然望落去有好多黑椒同鹽，但係食落唔會覺得好鹹，牛舌本身亦相當出色，味道非常濃郁。唯一不足嘅可能係比較薄切，所以係送到嚟嘅時候如果唔快手啲食，就會好快凍晒！最後，我哋仲叫咗款牛肉炒北海道拉麪。拉麪嚟到時我哋先知原來係鐡板上嘅，不過係怕有少少熱氣之外，都無乜問題。拉麪嘅份量比預期中為多，惹味得嚟又頗為香，牛肉嘅質地亦都唔錯，唔會太老身。整個拉麪可謂色香味俱全。是晚晚飯大體都為滿意嘅，唯獨店內嘅所有員工都好似啱啱瞓醒咁，無一個係好笑容啲嘅！…查看更多

早排成日見到介紹民聲冰室，所以好想一試佢成座山咁高嘅咸蛋蒸肉餅。由於睇唔到戲，所以就同肉肉熊嚟試試。招牌菜式咸蛋蒸肉餅當然唔可以唔叫，我哋另外叫咗呢度幾出名嘅口水雞同埋紅酒炆牛筋條。最先嚟嘅咸蛋蒸肉餅真係好吸引同埋覺得佢嘅賣相好掂。好心急咁試咗第一啖，真係覺得好滑，好香口。但係要整到咁滑，個肉餅入面一定會有肥，不過，好彩食落口唔會覺得油膩。而隻咸蛋亦算多油，唔會乾身。成碟餸用嚟配飯食簡直一流，抵佢收$45！:(到第二樣嚟嘅係紅酒炆牛筋條，一嚟到時，就有噗鼻嘅香氣，好有期望。但係可惜，一放入口時，雖然牛筋條整得好稔，但係完全唔入味，完全覺得嘥咗個sauce。食時嘅感覺就係個sauce有個sauce煮，而牛筋條有牛筋條煮，食唔到係炆出嚟嘅味道，好失望。再嚟口水雞，賣相唔錯，仲伴以粉皮添。食第一嚿時，唔見得好有驚喜，因為啲sauce上唔到去件雞到，所以好似只有食普通雞嘅感覺，無香辣味可言。正正因為有啲粉皮墊底，啲sauce嘅味就比啲粉皮就會吸晒，再加上個sauce本身真係唔算好濃味，所以只覺得不過不失。對我嚟講，做唔到呢度嘅招牌菜。由於碟咸蛋蒸肉餅係有coupon再加$6換，所以成餐唔算太貴。…查看更多

由於薑餅人放假，故特意帶安排在Herpa Café午飯。其實已不只一次與同事嚟呢度食飯，感覺都唔太差，但係今日的確有啲失望。我哋叫咗：兩客黑椒牛扒，一客跟意粉，一客跟薯菜。落單時已經同經理清楚講明牛扒唔要咁熟(五成或以下)，同埋要多汁。經理仲好似好好咁問我有咩要求，我話無。(另有餐湯同啫喱做甜品)餐湯 – 無特別，普通西餐廳都會做到嘅嗰個效果。但當兩客主菜送到嚟時，見到兩塊牛扒都熟晒咁濟，試過食一啖，簡直咬唔到，而且有一刻仲懷疑過係豬扒嚟，所以要求換過晒。等咗十數分鐘，終於換番兩份餐嚟，可惜，我要嘅薯菜已經變埋意粉，但係由於時間緊迫，所以算數，惟有照食。今次塊牛扒生啲，所以腍啲，肉味一般啦，但係其實個樣仍然好似豬扒。但係以咁嘅價錢，唔可以要求咁多。不過，第二次嚟嘅時候，當然已經符合唔到我多汁嘅要求。但係最搞笑嘅就係當我食食吓時，個經理又突然間懶好咁行嚟問我今次塊扒會唔會好啲，我話起碼可以咀嚼到，而且同佢表明其實我要嘅係薯菜，並唔係意粉，佢聽到時即刻講咗一句唔好意思，然後掉頭走。起初我以為佢會主動送番啲薯仔嚟，但係佢無咁做到，令到我都幾失望。再加上我哋差唔多食完(但係其實未食完)時，啲侍應就急不及待咁嚟幫我哋收碟，認真比佢哋嚇親。至於甜品方面，啫喱一杯，唔會令你有咩驚喜。好彩有VIP card，所以兩個人加埋都只不過係$78。但係如果以咁嘅service，即使得個平字都無用。希望有關方面可以作出適當嘅改善。…查看更多

因為要慶祝，所以美菲同我一齊去我哋都未去過嘅橋底辣蟹都試試。時間尚早，所以唔算好多人。為咗唔想全部嘢食一齊嚟，我哋先嚟叫咗一隻唔太大嘅避風塘炒辣蟹(中辣)，其實都係梗咗小嘅就$280隻嗰啲。一嚟到，嗰股撲鼻嘅香味已經好吸引，蒜香加埋輕微嘅辣味，的確令人垂涎三尺。我哋急不及待食隻爪，嘩，一咬落去真係覺得美味無窮，原因係除咗嗰啲避風塘嘅味道之外，蟹肉鮮甜，而且仲相當嫩滑，好明顯係師傅功夫到家，控制得時間啱啱好！！同時，雖然係蟹爪，但係都好多肉，加埋嘅蒜粒，真係惹味到不得了！至於個辣度，如果以平時食開辣嘢嘅人嚟講，佢唔算十分辣。蟹爪都已經咁得人鍾意，咁樣啖啖肉嘅蟹鉗就更加出色。蟹肉厚之餘，亦唔會覺得老，咬落啖啖肉嘅感覺，真係令人再三回味！食完蟹，再叫咗魚湯浸蜆。原本以為好細份，但係嚟到原來有成一大窩，我哋得兩個人，都有啲擔心有啲難度。見到啲蜆覺得好驚喜，因為好大隻，而且因為用魚湯浸，所以蜆嘅所有鮮味唔會比任何其他味道蓋過，好甜。至於個魚湯，因為加咗胡椒，所以根本唔會腥。入面仲有啲粉絲，啲粉絲都好滑，連埋啲魚湯一齊食，好好味。我哋兩個人每人都飲咗3、4碗先至可以解決咗成個湯。最後加多咗個辣酒煮花螺。由於先前兩樣超水準，所以呢個花螺即刻比下去。同魚湯浸蜆相反，因為我哋兩個都以為啲花螺會係大隻啲嗰啲，但係點知原來係細細隻嘅。第一啖食落去時，唔係我預期中嘅味道，可能有期望，所以未至於嘩嘩聲嗰隻，但係都食得出個辣酒汁係好有心機烹調出嚟，同埋美菲都食得出佢有好輕好輕嘅麻辣味。可能略嫌啲花螺太細，再加上呢碟無之前嗰啲咁得，所以覺得只係比出面鋪頭嘅做得好。成晚啲服務一啲都唔差，因為不斷有人幫我哋換碟，而且一見你用咗包濕紙巾就會毫不吝嗇咁比過一包新嘅你，而且個個侍應都好客氣，實在難得。兩個人加埋茶同小食都係食咗$432，仲要有咁嘅質素，真係好抵咯！…查看更多

見到城市花園酒店有以西葡為主題嘅自助餐，當然把握機會啦！成日聽人講話城市花園酒店裝修過之後，環境好咗好多，而佢嘅自助餐亦好好，所以我同鬆鬆熊特意山長水又遠去大拆一餐。去到時覺得環境都幾新淨，一入到去就已經見到隻風乾火腿喺度喇，一路轉入去就會見到冷盤，包括有蝦、翡翠螺、龍蝦仔、蟹腳等，而另一端就會見到魚生，再行就可以見到cold cut同沙律，接著嚟嘅就有一啲熱燻，麪部，雪糕櫃，生果，甜品，朱古力噴泉及其配料等等。驟眼看，可以選擇嘅食物都唔少，所以即刻開動。首先第一樣攞嘅係西班牙火腿，有少少失望，因為之前睇宣傳介紹時，明明話星期六、日係會有Jamón Ibérico嘅，但係嚟到時就發現其實只不過係Jamón Serrano，都無辦法，惟有照食。可惜嘅係食時無咗好濃兼且係Jamón Ibérico獨有嘅味，只有一般嘅風乾火腿味。再加上唔覺得場內有好多人選擇食佢，所以未到中間部分，所以食落比較硬，又唔夠滑，的確有啲失望。唔緊要啦，試吓其他。凍蝦反而幾好，翡翠螺都好厚肉，龍蝦仔就不過不失啦！魚生方面，最好食嘅係三文魚，夠肥又夠甜，有腩嘅效果。八爪魚都唔錯，但係吞拿魚就好一般，食唔到吞拿魚嗰啲甘甘哋嘅味。Cold Cut同沙律方面，唔算試咗好多，但係覺得佢嘅薄切牛扒幾滑，可以一試。另外比較感到意外嘅係佢哋嘅魚春沙律好好味，因為啲魚春整成一粒粒細細的立方體，同啲沙律一齊食幾特別。我突登試吓佢哋嘅薯仔絲炒馬介休，味道特別，馬介休脆脆的，好香口。可惜嘅就係烤乳豬好似出過一隻就無再出，所以我無試到。但係鬆鬆熊試過都話幾嫩口，唔錯。另外，我仲攞咗一塊羊肉嚟食，肉味夠，又唔會太熟，所以唔會太老，唔錯。同時，成晚有兩個品牌嘅雪糕供應，一個係Dreyers，另一個係Haagen-Dazs。好彩第一輪出Haagen-Dazs時，我同鬆鬆熊都有食到Strawberry味，事關第二輪再出直到完場時，已經變咗Cookies & Cream，再見唔到Strawberry味。我都有攞Cookies & Cream嚟試，但係唔知係咪之前酒店方面處理得唔係幾好，攪到啲雪糕溶溶哋，所以無食到。甜品方面，試咗西班牙燉蛋同埋葡萄牙嘅木糠布甸，兩樣都整得唔錯。但係鬆鬆熊就稍嫌木糠布甸嘅cream同木糠比例唔係太好，若果cream多啲會好啲！與此同時，我哋都有試佢嘅朱古力噴泉，但係當然啦，呢樣嘢無好唔好食，娛樂吓自己成分居多。我第一次喺食自助餐時食刨冰，但係啲冰可能唔夠冰，keep得唔耐，食到未夠一半就已經溶咗一大半。最後，成晚比你飲沖檸茶檸水，都算唔話得。整體上，自助餐嘅食物唔錯，最好嘅係當晚嚟食自助餐嘅人全部都好有秩序，絕對無爭嘢嘅情況出現，就連平時極受歡迎嘅Haagen-Dazs雪糕亦都有相當嘅存貨喺度，所以可以慢慢嘆。唯獨係由book位到現場嘅staff態度/處事方式就認真麻麻，實在有待改進。…查看更多

見到愉景灣個「秋日浪漫」宣傳咁勁，所以決定同蕃茄蛋入去睇睇加食嘢。一早已經預訂咗Zaks，同埋要求要睇到煙花嘅枱。去到時，都頗多人。我哋被安排坐喺室外，由於天氣唔係太熱，所以幾舒服。我哋叫咗：- Zaks Nachos with Chilli Beef - Fettucini Carbonara 飲品方面，我哋就叫咗：- Cappuccino - Ginger Ale - Orange Squash (後加) 兩杯飲品先上，據蕃茄蛋講，杯Cappuccino唔係太甜(曾經懷疑過係佢哋唔記得落糖)，好彩蕃茄蛋平時飲開齋啡，所以絕對啱晒佢口味。而我杯Ginger Ale，根本好難唔好飲。兩款Main Course好快送到嚟，見到啲portion真係大得好緊要，連我同蕃茄蛋兩個唔係細食嘅人都有少少壓力。為咗唔想啲Fettucini凍咗之後會變到一嚿嚿，所以我哋先食Fettucini。出面好少見到有Fettucini配Carbonara嘅組合，但係食落一啲都唔錯。首先個蛋汁好香先，Creamy得嚟又唔會太稠，煙肉碎亦唔會過少，所以覺得好好味。同埋成碟Fettucini都整得好均勻，唔會有啲麪條索唔到味。到個Zaks Nachos with Chilli Beef，呢個嘅份量仲誇張，實在大得過份。啲Nachos又香又脆，第一啖擺落口時，真係好驚喜。同埋加咗Chilli Beef同少少cheese，令到成碟好惹味，簡直停唔到口。慢慢一路嘆住海風、一路食住啲Nachos，真係覺得好寫意。最後加嗰杯Orange Squash，係因為見到好多人都有提及過而評價又唔錯，所以專登叫嚟一試。入口的確好新鮮，而且，以呢個價錢真係好抵。其實原本諗住試Zaks嘅Pizza，但係無辦法，佢啲嘢實在太大碟，根本無可能再食嘢落去，所以惟有下次再試。而且，兩個人都只不過係食咗$300左右，食物有質素的同時，又可以食到飽飽，仲有對岸煙花比你欣賞，真係可以過一個好愉快嘅晚上。一定會再嚟！…查看更多

咁啱薑餅人要去太子，所以我哋就一齊到名寶石餐廳一試。我哋分別叫咗：紐西蘭空運牛柳伴炸蠔配意粉 (五成熟) :)紐西蘭空運西冷牛扒配薯菜 (五成熟):)餐包 – 雖然個樣唔似唔似牛油千層，但係食落味道簡直係一樣，而且仲係熱辣辣，搽完牛油就即刻溶晒，好好味。好欣賞用呢款做餐包，因為好少地方會用呢隻包。羅宋湯 – 一見到時真係有啲嚇親，因為料極多，絕對唔係馬馬虎虎，而且飲落味道好有懷舊餐廳feel，味道極濃郁，好滿足。忌廉湯 – 同樣都係勁多料，仲有少少冬菇絲，每一啖湯都有好多咬口，好夠誠意。紐西蘭空運牛柳伴炸蠔配意粉雖然叫咗五成熟，但係嚟到時硬係覺得件牛柳有少少overcooked，但係都唔緊要，因為都無太大影響塊牛柳嘅質素。一擺件牛柳落口時，並無預期中咁稔，但係肉味超濃，而且都幾滑。至於隻炸蠔，我都無諗過會係咁大隻，好誇張。當然，咁大隻蠔食落去唔會話超甜，但係真係好肥，而且好少有機會食咁大隻蠔。加上佢哋炸粉唔會太厚，脆得嚟又唔會搶晒隻蠔嘅味，非常美味！由於淨食牛柳同隻蠔已經可以好飽，所以只係食咗三四啖意粉，反而啲翠玉瓜同粟米就清晒！紐西蘭空運西冷牛扒配薯菜雖然都覺得件西冷牛扒唔只五成熟，但係相比起牛柳仍然稔啲，但係肉味就無咁重。同時，亦都食得出食材本身唔差，再加上送到嚟時仲熱辣辣，都好好味。薯角唔算出色，但相當穩陣。芒果布甸 – 叫完有啲後悔，因為通常喺呢啲餐廳食嘅芒果布甸都唔會太好食。事實亦都證明係咁，雖然佢比起一般嘅好啲，但係食落個味都係好假，更加唔好奢望會有芒果肉粒啦！涼粉 – 反而涼粉就好好味，好爽口，糖水又唔會太甜。凍檸茶 :(–我同薑餅人都覺得杯凍檸茶唔係好得，茶底唔好再加上可能檸檬唔係太靚，所以飲第一啖時都ok，但係再飲落去就淨係覺得好濁。最得意係成晚keep住有人入嚟，人流好旺！…查看更多

之前已經有朋友推介過，但係無機會嚟試，所以突登揀咗個星期日同蕃茄蛋到Stonegrill一試佢同Citibank拍嘅優惠午餐。先講講個午餐有咩先：西瓜汁麫包:)餐湯:)石燒美國上等牛肩扒 + 1/4蕃茄 + 半個薯仔 + 一片青瓜Haagen-Dazs (士多啤梨味)餐飲 (熱檸水 & 咖啡)個餐附送西瓜汁，真係好新鮮，同埋覺得佢哋真係好細心，因為咁樣用熱石grill食物無疑係有啲熱氣，但係佢就送你西瓜汁，等你解熱。一路食住個餐，一路用西瓜汁送口，真係好舒服！麫包有兩款，一款係香草包，另一款係普通嗰啲白包，味道雖然唔錯，但係可惜只係得微溫，配以Olive Oil & Vinegar都可以；如果搽牛油的話，牛油唔會即係溶，但係嚿牛油本身就好香。湯似忌廉湯，相比其他食物，ok啦。至於到個主菜牛肩扒，送嚟時雖然侍應有教點樣整，但係比較細聲，所以都唔係聽得好清楚，不過唔緊要，都係咁食嘅啫。見到好多枱都係食緊呢個優惠餐，份量的確唔少，因為係有兩條窄身厚切嘅牛肩扒。因為唔想食太熟，所以好快將啲牛肩扒夾到白碟度，情願到要食時再將佢放落熱石度grill，務求趁熱食。件牛肩扒唔會太肥或太瘦，都算好均勻。一擺入口，覺得牛肉味都幾夠，而且最重要係件扒真係好滑，好易嘴嚼，同埋好juicy。侍應好體貼比咗啲mustard我哋，而本身個餐就跟燒汁，枱上又有鹽同胡椒，所以有好多搭配。樣樣我哋都試過，mustard好能帶出牛肩扒嘅味道；燒汁嘅味道好濃郁，雖然好味，但係偶爾會覺得佢搶咗啲牛肉味；鹽同胡椒就帶少少辣味，簡單啲。食完兩件牛肩扒，感覺好滿足，而且覺得係超值，但係千祈唔好忘記啲配菜。我同蕃茄蛋都有將啲蕃茄、薯仔同青瓜grill埋，蘸少少燒汁，簡直一流。尤其嚿蕃茄好甜！雪糕，因為係Haagen-Dazs嘅出品，所以不用多提，大家亦都知道味道如何。餐飲方面，我就叫咗熱檸水，蕃茄蛋就叫咗熱咖啡。檸水嘅檸檬好香，因為一送到嚟，坐對面嘅蕃茄蛋都聞到，飲落的而且確唔澀；而蕃茄蛋杯熱咖啡都唔錯，好香！成個餐真係超值，雖然要正價加一，但係都唔駛$120一個人。講真，自己淨係出去買料都唔得。鮮茄蛋話，上至牛肩扒，下至嚿蕃茄都係靚料，絕對無將貨就價，真係抵到暈，有機會一定會再試，強烈推介！！P.S. 雖然訂枱時，姐姐話要1:30 p.m. 交枱，但係當日可能係中秋翌日，所以唔多人，我見有啲人都係就咁walk-in都得，我哋根本無需急住交枱，可以慢慢坐，而且亦唔覺得有好多油煙呢個問題。…查看更多

近期突然見到氾濫地介紹呢間新記芝士撈丁，所以決定一試……但係，試完嘅感覺除咗覺得好貴之外，便無其他。我同美菲一嚟到時感覺已經唔好，唔係因為地方問題，而係啲侍應全部黑口黑面，好唔友善。我哋望住個menu諗咗一陣，都係叫咗招牌芝心丸芝士撈丁、豬頸肉芝士撈丁同埋蜜汁龍鬚。本來想試埋瑞士汁雞翼，但係見$32先得嗰5隻，實在太少，所以無叫到。兩碗丁先嚟，見到時都咪話唔驚，因為個份量實在少得驚人，令人難以置信。抱住滿心歡喜嚟試，但係一食落，真係唔覺得有咩特別。芝士味又唔係特別濃郁，又唔夠多，要撈晒成丁根本唔夠用，唉……想要真正感受到芝士味，要好靜心咁去食，再要加少少幻想先至得，好失望……餸方面，豬頸肉味道係可以，但係唔值係精選推介或者係呢間鋪嘅名作，因為好食過呢度嘅大把，再加上一碗$35嘅豬頸肉撈丁，都只係得6片豬頸肉，未免過少；芝心丸就相對特別啲，不過如果凍咗就無咁好食，同樣啦，一碗丁得5粒芝心丸，完全覺得overpriced得離譜。蜜汁龍鬚勉強可以，不過一嚟到感覺極之寒酸，好的骰。食完成餐嘢，都要$103，好彩有報紙coupon，可以減$10，咁先無覺得咁搵笨。事關美菲食完成餐後，完全無飽嘅感覺，仲好快想再搵嘢食添！呢度係有好多名星介紹，但我深信明星嚟食時啲嘢嘅份量∕質素∕服務態度可能會好啲，如果唔係，唔會有咁多明星光臨。總的來說，我覺得呢度嘅芝士撈丁，不值一試，同埋試完之後令人相當失望。…查看更多

見到有promotion，而且其他人嘅評價又唔錯，所以突登嚟試吓。入到去，環境真係唔錯，簡簡單單而且又靜靜哋，同樓下蘭桂芳一帶相差甚遠，而且感覺啲staff嘅服務態度都唔差，所以一個字 --> 好！嘢食方面，我哋選擇咗個海鮮餐，包括：忌廉湯:)麪包:)Seafood Platter (翡翠螺、三文魚刺身、生蠔、牡丹蝦刺身、蝦)沙律主菜：Seabass Risotto同蜆肉意粉:)因為做promotion，所以可以任飲紅、白酒或者sparkling wine我哋仲額外加咗個心太軟麪包唔多講，沙律嘅菜好fresh，湯亦好穩陣。至於個seafood platter，真係好出色。雖然個seafood platter一出現時，望落啲三文魚唔係腩位，但係估唔到一放入口都有溶嘅感覺，而且都幾肥美，真係睇佢唔出，而且仲要係厚切，食完印象難忘。蝦同牡丹蝦兩者都好吸引，因為食得出好新鮮，有甜味，而且唔削，靚到暈。由於食材本身優秀，所以啲翡翠螺都一定唔執輸，除咗肥大肉厚之外，食完仲會令你感覺好滿足。講真，一路食個seafood platter，一路覺得好幸福，因為感覺到好有誠意。到嚟主菜時，因為怕risotto凍咗會唔好食，所以先食risotto。Seabass整到外面少少脆，醃得剛剛好，又唔會蓋過鱸魚本身嘅魚味，再配埋risotto，簡直一流。而且用嚟搭配risotto嘅汁味道好特別，所以食完呢個已經覺得100分。之後到食蜆肉意粉，由於risotto做得太好，比較之下，意粉較為遜色。如果係食蜆肉意粉先的話，應該會覺得佢好味啲。皆因宜家食落就好似喺其他西餐廳食到嘅一樣，唔會話太深刻，但係材料都係靚嘢嚟嘅。我哋另外加HK$28要多個心太軟。心太軟做得幾好，又唔話太甜，入面啲朱古力又可以流出嚟，好好。是晚可以任飲紅酒、白酒或者係sparkling wine (當然係指定咗架啦！)。白酒同埋sparkling wine都好好，而且可以任你飲，真係抵到爛。雖然宜家可能無咗呢個promotion，但係憑住個餐可以知道餐廳絕對唔求其，所以好有信心佢其他食物都會唔錯。P.S. 餐廳成晚都係得幾枱客，而且播住啲jazz，感覺好舒服。所以如果想約朋友去中環搵個靜靜地嘅地方，而且啲食物又食得吓嘅，呢度係一個唔錯嘅選擇。 …查看更多

因為要解決晚飯問題，而咁啱又經過春園街，見到有間食日本嘢嘅小鋪，所以走咗入去試試。臨入座時都已經差唔多七點，但係問過侍應姨姨，佢話比埋我哋當優惠時段(至到七點)，真係好。今晚，我同蕃茄蛋叫咗以下嘅特大壽司：三文魚x 2 ($5@)鮮帶子x 2 ($7@)鎗魷魚 x 2 ($5@)海膽軍艦x 2 ($9@)赤貝 x 2 ($9@)油甘魚 x 2 ($13@)希靈魚籽 x 2 ($7@):)另外，我哋仲叫咗：無頭甜蝦刺身 x 10隻 (下午茶) ($18):)辣酒煮翡翠螺 x 6隻 (下午茶) ($28)鰻魚 x 1條 (下午茶) ($16)首先嚟咗10隻甜蝦刺身，一食落去，味道的確麻麻，唔夠鮮甜，但係只係$18，所以好難有好高要求。根住到啲壽司嚟時，真係嚇一跳，因為真係特大壽司，魚生大之餘，嚿飯都唔弱，黏得好實，唔會散。魚生方面，三文魚略嫌切得薄咗啲，但係勝在夠厚，所以如果將件三文魚包住成嚿飯嚟食的話，都會有豐富嘅口感。另外，帶子亦都幾鮮甜，鎗魷魚嘅膠質好重，好黏口。海膽軍艦亦都做得好有誠意，因為雖然只係收$9一件，但係唔會因為咁而偷工減料。由於即整關係，食落去塊紫菜仲脆脆咁，放咗落口就會滿口都感受到啲海膽嘅味道。赤貝壽司都令我留下好深嘅印象，因為呢度嘅赤貝壽司係有兩大片嘅，出面真係好少有，而且仲係好厚肉嘅，唔係薄薄一片就當交代咗就算，非常足料，味道亦相當不俗。最令我喜愛嘅就係油甘魚壽司，因為呢度嘅油甘魚魚生又係長長一條嘅，食落時油甘魚獨特嘅甘味即刻湧晒出嚟，嗰個感覺好滿足，到宜家到令人好懷念。今次係我哋第一次食希靈魚籽壽司，有少少爽口，都幾得意。鰻魚方面，雖然只係$16，但係都有成8吋長，而且都好厚肉，味道亦唔錯，好食之餘仲要係好抵食。成晚最令我哋意外嘅就係辣酒煮翡翠螺。凍食翡翠螺就試得多，過火煮嘅我哋都係第一次食。翡翠螺本身肥大肉厚不在話下，而且第一口嘅感覺係好正，因為啲辣酒唔會話太辣，有少少甜味的同時，又帶輕微嘅辣，同啲翡翠螺嘅肉好夾，好惹味。而且仲要係$28有6隻，抵到爛！最初其實諗住留肚食生蠔，但係食完啲特大壽司之後，實在無辦法食得落，所以惟有下次再試。不時我同蕃茄蛋根本唔會咁早收手，但係呢度啲壽司真係會食到你飽！食完呢餐覺得好開心，因為唔單止啲嘢好食，而且仲要好抵食，因為總共只要$172，已經打算會再嚟。但係一上open rice見到呢度啲評價唔係咁好，都有啲驚訝，所以決定要寫個食評，幫魚一心平反。仲有一樣嘢想補充嘅，就係呢度嘅人對我哋嘅服務好好。…查看更多