熊貓喵的个人专页

餐廳開喺深水埗無咁多人流嘅元洲街，價錢相比其他同類型嘅餐廳抵食，而且仲唔收加一服務費，加上食物質素都幾好，店員都好殷勤咁斟水又好有笑容，希望會多啲人嚟幫襯下呢間小店啦~Menu上面除咗一般尼泊爾餃子、印度咖喱薄餅，仲有其他漢堡包薯條、牛扒意粉呢啲，其實都真係幾多選擇，同埋感覺到餐廳都想多元化啲。不過試異國菜餐廳，就當然係想試一啲地道嘅菜式，於是兩個人就點咗一份Set Dinner再加兩份小食。🍄Soup of the Day (included in Set Dinner~free)餐湯係西式新鮮蘑菇湯，熱辣辣嚟到，飲落有淡淡嘅菇味，加上有隔過渣，所以係好滑。🐔🥘Chicken Tikka Masala + Naan $98 (Set Dinner)呢款烤雞咖喱好香香料味，佢嘅辣唔會太辣，幾易入口。以印度烤雞嚟講，佢啲雞粒嘅肉質唔柴。不過肉喺呢道菜入面其實唔太重要，咖喱好味就得。Naan就同平時食開嘅有啲分別，無烘到好脆口，但就好軟熟唔油膩，用嚟點咖喱一流。🧆Pani Puri + Dahi Puri (8pcs) $58每次食唔同餐廳嘅印度波波都無令人失望。因為想兩款都試唔洗食死一款咁悶，就問下店員可唔可以雙拼，聽到佢話OK~勁開心！呢間個酥脆波個脆度爭咗啲啲，有酸奶嗰款比較快淋，但兩款嘅味道仍然係好好味嘅。Pani Puri個薯仔味會幾出，而Dahi Puri酸酸甜甜幾清新幾開胃。🐔🥟Chicken Momo $78餃子好似走咗湯汁嘅小籠包。外皮有小籠包嗰種煙煙韌韌嘅感覺，係個餡由豬肉變咗雞肉，但唔會食到一絲絲嘅雞肉，應該係搞碎晒先用嚟做個餡，就係好正常嘅餃子。用嚟點餃子嘅辣醬係帶有香料味，幾特別而味道都唔錯。🥭🍹Mango Lassi (Set Dinner +$18)原本set dinner係包free soft drink，但食印度嘢梗係要飲番杯Lassi！Mango Lassi嘅芒果同酸奶比例有平衡到，濃味得嚟又唔會太甜~尤其係食咖喱嗰陣個口辣辣地嘅時候，飲番啖就最爽！📜Menu: …查看更多

平時外出進餐喜歡嚐新，而異國菜總會帶嚟刺激味蕾嘅體驗。適逢聖誕佳節，女朋友挑選咗呢間位於中環嘅餐館，一齊體驗下葡萄牙嘅風味。 一開始送嚟嘅酸種麵包比較普通，質感過硬，但味道發揮正常嘅吞拿魚醬有為啲麵包加番分。前菜｜蒜蓉欖油八爪魚🧄🫒🐙八爪魚煮得好香好腍而仍然有嚼頭，一入口就已經好有葡式煮法嘅感覺，加上熱辣辣出晒煙咁上碟，食落暖笠笠。蒜頭嘅味道一早滲晒入欖油裏面，啲蒜配埋八爪魚一齊放入口，味道濃郁，喜歡蒜味嘅我哋就好喜歡呢道菜。沙律｜葡萄牙雜薈沙律🥗本來係見隔離枱有一碟貌似沙律嘅菜式幾吸引，但又唔敢開口問打擾人，所以就估估吓叫咗呢樣。沙律有番茄 、雜菜、紅蔥、青瓜配香醋~Um......蔬菜係幾fresh嘅，想有啲菜食都可以嘅，但醋嘅份量就落得少咗啲😂😂主菜｜香煎深海鱸魚🍋🐟鱸魚煎得好嫩滑，奶油汁有淡淡嘅檸檬香，食落就會平衡奶油原來嘅膩。鱸魚嘅下面有烤香咗嘅薯仔片，外皮因為烤過所以硬身啲啲，但裡面嘅部分軟軟，好帶出到薯仔嘅香味。主菜｜招牌焗鴨飯🦆🍚哇~一上枱見到就好有葡式煲仔飯嘅感覺。面頭係焗到脆卜卜嘅飯焦，上面再放上油光滿滿嘅五花腩同臘腸，香氣四溢。飯入面有唔少嘅鴨肉絲，每啖飯都可以食到有鴨肉同脆米，而每粒飯粒之間都散發住鴨油嘅香。呢款菜式確係值得一試嘅招牌菜。…查看更多

喺大圍周圍行下想搵間餐廳醫肚～經過見到套餐有雞有麵有湯好似幾吸引🤤叫咗個椒麻無骨口水雞套餐$69加$10轉雞脾🍗加$5轉雞醬蔥拌麵🍜加加埋埋結果埋單都$84 💸🐔椒麻無骨口水雞(轉雞脾)雞嘅份量適中 肉質嫩滑 有啲雞味個口水汁都算香辣 辣度合適不過個汁嘅香料味未算豐富雖然有成羹份量嘅花生碎但如果有埋芫荽蔥就應該再香啲🤔🍜雞醬蔥拌麵有溏心蛋🥚同幾片青瓜🥒有令賣相加咗分麵質有台式拌麵應有嘅嚼口醬料調味正常 鹹鹹地 但蔥味欠奉😅🥥椰子雞湯呢個湯味道清甜 幾夠椰子味但如果份量可以多番啲就好嚕🥣…查看更多

以食過嘅茶餐廳嚟講，美好嘅下午茶確係抵食！尤其係啲拼盤餐樣樣有啲，食完會有種滿足感☺️雞中翼拼盤餐配埋餐飲$40😱😱————————————————————————🐔2件炸雞中翼+1咖哩角+1件春卷炸嘢係熱辣辣上又夠脆🧇半份西多西多有花生醬夾心，食落仲有微微蛋香🍟薯條/🥗沙律沙律份量合理，味道正正常常————————————————————————如果覺得唔夠飽，仲可以加多$12再配碗🍅🥔🐷蕃茄薯仔肉碎通~個湯底有屋企煲嘅湯嘅感覺，有落足蕃茄同薯仔。雖然飲得出有落茄膏，但份量適宜，比起一般茶餐廳嘅蕃茄湯優勝👍🏼…查看更多