JosieLeung0201的个人专页

餐廳近觀塘海濱，出面門口掛住啲燈飾，幾有浪漫氣氛。之前經過幾次都只係喺出面聽人live band，今次終於去試入面嘅嘢食。燒鴨胸🦆一上枱已經好吸引，鴨肉係粉紅色，咬落去嫩滑多汁，而且切得好厚比我哋。鴨肉配埋brown sauce味道更加豐富濃郁。配菜有好脆嘅薯格、豆角、南瓜同幾粒番茄仔，成個配搭幾balance。照燒牛小排墨西哥薄餅🌮餐牌寫住薄餅，但其實即係Taco。薄餅入面夾住牛小排，照燒醬汁偏甜少少，加埋酸酸辣辣嘅莎莎醬上面，口感、味道層次豐富。隔離沙律都係酸甜，好清新開胃。白酒忌廉青口青口新鮮彈牙，忌廉湯香濃帶蒜味，有淡淡哋白酒味，係喺依個轉涼嘅天氣適合點嘅食物🫢。Mango Fizz🥭飲品就叫咗杯mocktail, Mango Fizz，入面有Mango Puree, Fresh Mint, Fresh Lime Soda，出乎我意料嘅係佢唔甜，加埋薄荷葉同青檸梳打，冰冰涼涼，又refresh又解渴。最後值得一提嘅係餐廳係寵物友善，帶埋寵物嚟用餐有20%off 嘅優惠同埋寵物小食送。同埋餐廳出面有live band表演，臨走嗰陣仲比人叫我同男朋友點歌🤣總結係食物出色，環境好chill，拍拖諗唔到食咩可以考慮依間餐廳…查看更多

尋日去尖沙咀，見到依間餐廳串燒只係$10起，價錢好抵，決定同朋友一試。 餐廳嘅裝飾好有格調，內外都有霓虹燈牌可以打卡影相。環境幾適合拍拖／同朋友聚餐。 我哋嗌咗好多唔同串燒同小食，有五花肉、牛肋肉、雞心、麻雞腎、豆腐……咁多樣入面我覺得以下幾樣係我心目中嘅必食MVP(排名不分先後)。🔸汁燒金菇五花肉卷🐽：啲金菇吸咗五花肉嘅油脂，同埋金菇增加咗串燒口感，而且佢只係$10 ,食幾多條都得！🔸蜜糖燒菠蘿🍍：好甜好多汁，解辣又解膩，好refresh！🔸蜜味台灣腸：好粗大，甜甜地幾惹味🔸蒜蓉燒原條茄子🍆：大過塊臉，燒到好軟，而且蒜蓉鋪滿面，食完個口好臭好滿足🤣🔸蒜蓉燒珍寶生蠔🦪：勁大隻又juicy，仲要買一送一，平均只係廿幾蚊一隻！🔸汁燒原隻魷魚板🦑：彈牙唔靭，份量唔細🔸溶岩炸蝦球🍤：出面有啲脆脆係面，咬開有流心芝士，邪惡到極致🫨🔸唐揚魷魚鬚：炸得香脆，唔會油淋淋，偏鹹，適合重口味人士 甜品方面嗌咗A5和牛慕絲，扮到好似和牛嘅士多啤利慕絲🍓，上面有藍莓醬，幾有gimmick!飲品就試咗三款，分別係 獼猴跳動、Asahi Sour (Lychee)同Asahi Sour (Rose)。三杯入面最中意Rose，冇咁甜但又易入口。Lychee就偏甜少少，有果香都好飲。而獼猴跳動係奇異果特飲，酸酸甜甜咁。店員nice，環境chill，而且尖沙咀區好難得有貼地平民價串燒店，下次會再訪…查看更多

上個周末嚟到依間韓國餐廳食飯，店面好有特色，霓虹燈適合打卡。一坐低，店員就會提供三款前菜（泡菜、黑豆、魚糕），可以任添。今次嗌咗以下兩道菜：🔸原隻雞蔘雞湯：湯底清甜，湯比較濃淍，入面有啲細細粒飯粒。雞肉嫩滑，食完唔口渴，飽肚又暖胃。🔸泡菜煎餅：煎得金黃香脆，泡菜味冇想像中咁突出，味道剛好，食完一件又想食下一件。星期六夜晚去餐廳已經有啲full，店員提議我同朋友坐出面，但冇提及出面可以食煙；以致我哋食咗冇耐之後，隔離有枱食客食煙，我哋要吸二手煙。食物好食，不過覺得服務還有改善空間，而且價錢比較進取，可能以遊客生意為主。…查看更多

趁Resteraunt week有優惠，嚟到上環試依間地主打中海菜嘅餐廳。西班牙甜椒有芝士碎，味道溫和唔苦，幾開胃。椰菜花濃湯滑順細膩，帶有奶香同椰菜花鮮味，上面仲配有蒜蓉多士。布拉塔流心水牛芝士creamy，入口軟滑。意大利蘑菇寬扁意粉麵質好煙靭，出乎意料嘅好食， 菇味唔算濃厚，味道係剛剛好。炭烤海爐魚魚皮烤得香脆，但魚肉嫩滑一啲都唔乾，配埋羅勒麵包糠同埋蕃薯片增加成道菜嘅味道層次。紅桑子與百香果，百香果泡沫配紅桑子同焦糖杏仁，味道極酸，酸過杯薑汁檸檬特飲；而且個人麻麻哋泡沫口感。下次會未必會再嗌。Tiramisu甜度適中，入面有咖啡浸手指餅，甜苦平衡。環境方面好好坐，服務好周到，而且店面好靚好有特色，適合打卡。唯一美中不足係因為樓底高，所以少少聲音都會放大，即使餐廳內少人，都會感覺嘈雜。周末晏晝用餐限時一個半鐘。推薦！…查看更多

去開旺角又想食拉麵？依間一定係首選，唔洗過百，味道又高質。不過就係太出名，次次都要係出面排隊。食過幾次，都係覺得沾麵最正，麵份量夠多，湯夠香夠濃，食到一半仲可以加檸檬或醋，解膩之如又會變咗第二隻湯底，十分滿足。首先嚟個推薦既魚介豚骨，雖然菜單寫清湯底，但都夠晒濃，又有魚香。再嚟就海老，個湯底同豚骨差唔多，但好重蝦味，啲櫻花蝦又多，鍾意食蝦一定唔可以錯過。最後叫多碟餃子，普通豬肉餃子，冇咩特別又唔平，可以skip🫣…查看更多

又到Lunch 時間，想食米線，樓下就有三哥，不過位置少，外賣又會等好耐，咁就緊係用App 落定order，睇下有咩優惠先。嘩，有雞翼送喎，即刻用先，仲有個app 專用餐，3個餸加野飲，可以一張單過，total 56蚊，抵到爛，不過依間真係好多單要等好耐，半個鐘走唔甩。相信睇圖就知咩味啦土匪雞翼味道始終如一，好香孜然味得嚟又有其他香，今次米線硬度都正常，唔會好冧又斷晒，而番茄湯都係至愛，酸酸地好開胃，感覺又健康。…查看更多

觀塘收工近近地去鄰近MTR 既東廣場搵食，一樓嗰層類似food court咁樣中間好多位自己揀嚟坐。見到間舖頭幾多人等就試吓佢。叫咗一碗推薦花膠雞米線，同胡椒豬肚雞米線。一嚟梗係試吓個湯先啦，一飲個鮮味突出到，即刻飲多幾啖，係完全可以飲晒嘅Level，雞就正常料，嫩滑嘅，但連埋皮同脂肪一齊食個口感就麻麻哋，花膠同米線冇咩特別。仲有碗就都類似，同款湯底加咗胡椒咁，唔會好辣，都好飲既，前題唔好預佢好似出邊啲胡椒豬肚湯咁重味。其他配料就同上，冇咩特別。但最後為咗個湯都值得嚟試一試。…查看更多

一向都好鐘意食shari shari嘅刨冰，因為每一啖都有味，而且唔係死甜。今次試芒果椰子味配乳酪泡沫，椰子味淡淡哋，同芒果嘅味平衡得啱啱好。冰入面有啲花生碎，配埋乳酪泡沫，好多種口感！🍧每人最低消費$50，所以另外加配咗兩份甜品試吓。🍰日本柚子蛋糕清新又唔會太膩。焦糖燉蛋表面焦糖層薄薄哋，燉蛋滑嫩細膩。兩份甜品都好食，但未有刨冰咁出色。假日去都要排一陣隊，但食過唔同主打刨冰嘅甜品店，shari shari係我覺得一定要去食嘅其中一間。…查看更多

🔸美國西冷牛扒　配阿根廷青醬　薯條美國西冷牛扒嗌咗medium，外層有好靚嘅烤紋，肉質厚實嫩滑，配阿根廷青醬帶有清新草本香氣。美中不足係接近脂肪位置有筋，少少靭。薯條炸得香脆唔油膩，有啱啱炸起嘅熱氣。🔸意大利肉醬貓耳朵意粉肉醬味道濃郁帶香料味，好夠味又唔會過鹹。貓耳朵意粉口感煙韌有彈性，份量適中🔸墨西哥雞肉薄餅（Quesadilla）芝士同啲餡料好豐富，碟旁有酸忌廉同番茄辣醬，令味道更加多層次，食完好滿足。今次坐咗喺戶外，傍晚時分會提供有盞枱燈，更添氣氛。旁邊有風扇，唔算熱，用餐時亦冇遇到昆蟲。不過侍應唔多，請侍應斟水同埋單都叫咗兩次先serve到我哋，以依個價位嘅餐廳，覺得service有改善空間。…查看更多

🔸雞白湯拉麵 $148聽聞座銀雞白湯拉麵好出名，決定一試。🍜雞白湯拉麵面頭有一層雞湯奶泡，係幾特別，但味道上覺得有同無分別唔大。上面有炸牛蒡作為配菜，幾香口，份量都多到食唔晒。至於湯底本身，我個人覺得偏濃，食到最後會覺得鹹咗啲啲，不過第一啖入口嗰下都幾驚艷。拉麵軟硬適中，亦掛湯。雞肉片口感極好。整體成碗麵入面所有食物都配搭得好好。店面較細；服務幾好。朋友食沾麵，店員有主動offer話凍咗同佢哋講，可以幫我哋熱返個湯。星期六晏晝去都唔使排隊。推薦！…查看更多

🔸馬拉盞通菜脆口，馬拉盞味道帶啲鹹香，好惹味，餸到飯。🔸炸蝦餅皮脆，蝦味幾突出，唔油膩，同埋六件都好大舊。點埋甜辣醬食更加惹味🍤🔸金柚子沙律酸酸甜甜，柚子肉夠汁，配合花生、紫洋蔥同小魚乾脆，口感層次豐富同味道清爽，幾開胃🔸馬沙文咖喱雞柳味道濃郁，有少少椰香味，唔會太辣，雞柳肉質嫩滑。同埋好欣賞佢係一個煲，下面有火一直熱住煲咖喱👍🏻另外叫咗個蒜茸包點咖哩食都好夾環境方面，卡位幾好坐，但中間非卡位位置就麻麻地。餐廳有時會泰文歌，幾有feel🇹🇭…查看更多

🔸鹵水拼盤 $140有紅腸、豆腐、豬腸、鵝腸等，滷汁香味突出，每款食材都滷得入味，分量十足！🔸潮洲凍蟹(時價) $140蟹身色澤新鮮，蟹鉗同蟹腳都完整，蟹肉雪白彈牙，冇腥味。🔸白灼東風螺 $80螺肉爽口彈牙，份量唔少，每隻都肥美，簡單白灼已經帶出海鮮味。加埋甜醬、辣醬味道即刻昇華咗。🔸炒蜆 $80蜆肉好肥美，有鑊氣，又大大碟，極抵食，冇咩沙。環境方面，唔係咁好座，同埋衛生麻麻，張枱好油。但係老闆好好人，上菜又快手。依個價錢食到咁多好食海鮮，絕對值得再嚟。…查看更多

🔸煙三文魚菠菜煙肉忌廉意粉 $68有碎煙三文魚、菠菜、蘑菇同煙肉，配忌廉汁；意粉軟硬適中，但忌廉汁唔係好濃味，不過勝在大碟，睇落已經好有滿足感，食完真係夠飽。🔸鮮車厘子黑森林蛋糕(餐) +$35好食，蛋糕濕潤，唔會乾爭爭。夾層仲有新鮮車厘子，Cream唔會太膩或太甜。不過個人覺得外面層Cream厚咗少少。平日lunch去，店員會安排坐餐廳出面（商場中庭）嘅位置；QR Code落單，收加一服務費，埋單$113.3。意粉不過不失，CP值一般。…查看更多

🔸魯肉飯 $41魯肉飯每粒飯都可以沾上油香肉汁，飯同魯肉份量控制得恰到好處。魯肉肥瘦適中，入口鹹香，味道非常出色。🔸刈包 $37刈包配料有芫茜、花生碎、肉。肉油潤軟腍，三種味道融合得幾好；包皮入口鬆軟，層次豐富。🔸蚵仔煎 $40蚵仔煎蚵仔分量多，幾乎每啖都食到蚵仔。而且煎得啱啱好，外層粉漿唔太厚。加埋醬汁，甜中帶鹹，味道地道。🔸QQ紫薯地瓜球 $38最推薦！地瓜球上枱時仲係暖嘅，外皮炸到微脆，入面口感軟糯。餡料用真材實料蕃薯茸，每啖都有蕃薯甜味，食到食材本身味道，極推薦。🔸洛神烏梅汁 $23叫咗半糖版本，入口甜味偏重，酸味感覺唔明顯，如果鍾意酸味可能會覺得不夠突出。整體感覺偏甜解渴感一般。餐廳入面會播台灣歌曲，幾有feel。平日夜晚唔使等位，得閒經過都會去食👍🏻…查看更多

🔸湯酸辣炸醬紅薯粉條+芝士魚豆腐+煙鴨胸 $45紅薯粉條偏軟，有芫茜、酸菜同肉碎，成碗幾足料。酸味適中，落單時仲可以自選酸度，不過整體味道我覺得唔太出色。煙鴨胸比較好食，肉質嫩滑，份量十足，抵食！芝士魚豆腐味道都唔錯，加分！🔸尖椒皮蛋 $20皮蛋蛋黃質地比較實，味道同傳統皮蛋有啲唔同，未必適合每個人口味，賣相一般。下次會想試下其他小食。雖然味道個人覺得一般，但勝在價錢實惠，係平日食lunch好選擇。…查看更多