Yuen Choi Kum的個人專頁

兩小時揼波鐘雞煲火鍋放題，雞煲叫咗唔辣味道不過不失，但添加兩次雞份量都好少，小食麻辣雞腎再叫就話無貨，火鍋配料款式唔多都係大路嘢，送甜品係只限熟客，我家餓爸完全食唔飽要再去溝貨返屋企下半場，第一次食放題食得咁慘☹️…查看更多

今次領教到加咗又縮晒水到離晒譜，小食之前係用長方形盒，家陣轉左細一半既圓形盒仔，分量仲要1/3都無，碗粉啲餸俾少咗就唔再講，成碗都係湯，可唔可俾多少少粉等人食飽肚啊，都明白租金貴、人工貴、乜都貴，打開門口做生意錢係要賺嘅，但唔好食水咁深囉。…查看更多

未試過食西餐都食到火到嚟，餐廳得3枱客都無服務，態度又差，做推廣優惠既$10蚊隻生蠔瘦到好似係埃塞俄比亞嚟咁，ok！我地決定俾多次機會你，叫過其他當造季節既生蠔，點知當造既一樣咁瘦，最慘係啲主菜嘢難食呀嘛，仲衰過中學生家政課煮出嚟既味道，舊魚同柚子汁完全夾唔到味，個汁好係一堆漿糊咁，燒排骨又乾又嚡，上面一堆BBQ海鮮用既蒜蓉醬，簡直不知所謂，係咁既經濟環境底下，仲話要限時兩個鐘交枱，走嗰陣係門口𥄫到佢個訂位簿，得小貓三兩隻，好心就咪趕客啦…查看更多

近排某雜誌吹捧到天上有地下無嘅堅料煲仔飯，今晚有幸一試，滿心期待而去，點知失望『中伏』而回，首先講一下主角 飯～暖暖地、二人份都要叫多碗白飯先夠飽，因為得三碗仔唔滿嘅飯，連飯焦四碗仔都唔夠(是晚得我同朋友兩個正常飯量女子)，再講一下配角臘味 臘腸～得甜味，臘肉～普通，臘鴨～又咸又梗、完全無鴨嘅甘香，潤腸～四種臘味嚟講叫做最好食、肯定唔係一般街市平價貨，嗱！講到最重要嘅 飯焦～無焦香、薄薄一層un嘅，某雜誌話老闆會用茶幫客人煮飯焦粥，莫講呢個服務無之外水都唔比杯你飲啊，記得某雜誌有推介個限賣嘅老火靚湯(响螺頭 南北杏 蘋果 雪梨 豬骨)，無理由試㗎，Er！咁大個人第一次出面飲到例湯係乜湯渣都無、而且湯頭清甜色淡『心照不宣』，口渴返到屋企要狂灌水先掂。ps. 利申相片係我即場影無偷圖㗎，證明相片吸引唔代表一定好食…查看更多

天熱轉冷最好活動當然係三五知己打邊爐啦，我地一行8人兩日前訂左7點半，去到坐底就被要求轉一張細少少嘅枱，咁我地夠坐當然係無問題啦，到7點45分入單，跟住有個女經紀之類嘅服務員話本地手切牛賣淨兩碟，要叫就快手，吓，得半成入座率都咁快無牛賣，ok！照要，哈哈！8點就話賣淨一條章紅魚原價$580，你地要我平d比你地$430，心諗呢間火鍋店收零晨5點，咁快乜都賣晒點做生意啊，到12點大家都食飽飲醉（入座率8成），埋單$1950，佢居然夠膽開口話【俾多一舊水】貼士，嘩！當堂火都嚟，邊有問口要貼士，仲要指定俾幾錢㗎，係香港做左幾十年人都係第一次🤬…查看更多

見介紹講到呢間麵店係日本大有來頭，同阿囡揀咗黃昏人少少嘅時間探路，入門口無人招呼，ok我自己搵位坐，反正仲有好多位，坐底咗亦都無人理我地喎「其實係有3個店員見到我地入嚟搵位嘅」，咁咪叫人攞個餐牌睇睇有乜食囉，呢個時間先遞張點餐紙，原來點餐係要自己✔️嘅，終於點完餐坐定定滿心期待地等食，戲肉嚟喇， 先講碗沾麵先，麵質無乜特色，麵沾汁好香魚介味，咁呢個係賣點嚟，但係唔知點解碗麵同沾麵汁都係凍嘅，可能我大鄉里呱，呢間店特色係食凍沾麵，再嚟講下碟餃子喇，個餃子底唔脆，仲厚到好似薄撐咁添，還好無油淋淋啫，而餡料份量有d少，應該係即叫即煎，所以係熱辣辣嘅，不得不提當然係碗日式叉燒丼啦，真係火都滾埋，係人流少嘅時間都可以等咗成15分鐘，最後當然叫店員催下單，店員解釋得好奇怪，佢話碗飯就得㗎喇，厨房打埋個獻汁就得，最後都再等咗6、7分鐘後先送到，可惜成碗飯都係暖暖地，獻汁味道好淡，食唔出係乜野味，後尾要加豉油先叫做入得下口，嗱！我無寫錯字呀~係廣東式嘅生抽呀，叉燒無想像中入口即溶，無乜肉香味，可能唔熱呱，最失敗就係連飯都唔熱呀嘛，好似食緊一碗隔夜飯咁，仲要係叮唔夠熱嗰種喎，一句講晒【好睇唔好食】，今時今日咁嘅服務態度已經唔多掂，仲要連食物出品都毫無誠意，無下次就唔在講啦，就連試第一次我都覺好後悔囉…查看更多