tgiamrmyy的个人专页

本人後知後覺，近年先鍾意食米線，而3哥已可滿足自己既慾望，所以絕少周圍試唔同米線。呢間食過兩次，個蕃茄蛋湯底一試愛上！好似粟米羹咁既質地，有蕃茄粒同蛋絲，加上米線本身既發漲能力好飽肚，食完d麵會發覺湯底都冇晒咁滯😅另一推介係手拉奶茶，本身好鍾意飲奶茶，呢樽絕對冇令人失望。見佢預先沖好都知冇得少甜，但佢甜度適中，而且口感順滑，仲厚滑過太興/其他樽裝凍奶茶，讚👍🏻餸方面蜂巢豆腐ok、蒜蜜豬扒可能浸左湯冇滿滿既蜜糖味，肉質偏硬而薄身、豬頸肉就普通，甚有d成塊肥膏。小食口水雞翼係凍食，連我唔食得辣都覺得唔辣，d汁入唔到雞翼，肉都偏鞋。佢既米線比出面貴，不過睇番餐牌不少食物都有心思/較特別，會繼續幫襯發掘最好味既組合。…查看更多

（未食過前身玉子先生）小店入面4個、外面4個位，好快坐晒。有兩個姐姐負責整野食，即叫即整要等一陣。麵包烘到脆卜卜，有點楓糖(?)味，好有心機。第1款三重芝士 - 食唔到唔同既芝士，應該話芝士根本唔多。第2款牛油果只得4小片，上面有d沙律汁。睇相以為會食到爆漿，但d餸落唔到中間，搞到有d唔夠送麵包。食到底有d蜜糖芥末醬幾好味。如果叫番普通蛋治之類$1x蚊會開心好多，但我地冇升級都要$3-40一份就唔值。飲品選擇不多，熱飲柑桔檸檬茶冇咩柑桔味。香港吐司店好少，蛋都係好吸引既主題，希望佢愈做愈好吧。…查看更多

星期日人多正常，樓上樓下都坐滿，店員做到有d燥底，唔比人上去等位，但又冇安排大家排隊之類，搞到眾人都有d不知所措。見佢地態度咁唔ok其實想走，但Dear好長龍，10點幾屋子又未開，最後冇骨氣地幫襯左。終於有位可以點野食，面前個男人話佢要換menu，居然慢慢貼新餐牌都唔幫客落左單先，隔左陣先叫隔離個同事落單，又聽錯枱號。Full house野食野飲都等幾耐，見佢地用明治奶，咖啡聞落都有香味，但White coffee飲落好普通, Green tea latte都麻麻。野食選擇極少，叫左好Basic既煙三文魚牛油果多士+慢煮豬肉Bagel，樣唔特別討好，食落亦冇好味既感覺，$80一份包咁既質素好唔抵！呢間野係環境幾chill但我估好多人中伏一次都唔會回頭！…查看更多

多士- 半片連皮厚多士，好硬，唔會想就咁食。炒蛋 - 蛋味道淡，連埋大片火腿送多士食就balance番。叉燒意 - 叉燒會收埋o係麵底，有4-5片，意粉淋淋地剛剛好，係成個餐最好既部分。奶茶 - 茶偏澀、好稀身果款。…查看更多

之前去銅鑼灣店食常餐幾失望，今次南昌店挽回不少分數。多士 - 歐式軟包，味道同普通多士冇大分別，包邊薄薄的，唔會好似平時果d硬到想切走。炒蛋 - 可以再稍為炒杰身少少就perfect火腿通 - 個湯偏油，火腿係深粉紅易斷果款。奶茶 - 水準一樣keep到👍🏻好飲…查看更多

唔好比門口條龍嚇親，就算你前面有2-30人拎完籌都唔駛等好耐。應該因為近來太好生意，餐具係膠，用晒都冇refill，同埋坐得好迫。亦唔知係咪太忙所以水準下降定本來都係咁既質素。餐廳真係好有心，門口免費派飲品，食物選擇非常多，不過近來競爭太大，同一條街都有好幾間冰室，所以支持還支持，未必會回頭。多士(走油) - 唔夠脆，還可以。炒蛋 - Menu寫住玉子燒，睇其他食評都見係條狀卷蛋，但上枱果碟只係好普通既蘑菇奄列，冇咩黑松露味，更加冇3.6牛乳既味道！叉燒意粉 - 肉份量偏多，唔係霉舊叉燒，但都係硬身兼頗碎，口感麻麻(朋友點既飯都係呢款叉燒)，意粉份量則偏少，而且個湯好油。奶茶 - 又係聲稱落左3.6牛奶，飲落冇咩特別，茶底/奶茶比例都唔合格。…查看更多

忽然發現了棋哥的存在，剛好又想吃常餐，順道試試燒味如何。多士 - 生命麵包質地，烘得唔夠金黃，而且用左”cheap”牛油，麻麻地。炒蛋 - 不過不失叉燒意粉 - 成個餐既重點，唔係用平時常餐果種下欄霉舊叉燒，一碗有6件、食到蜜糖味，係唔錯既。奶茶 - 見到姐姐放低「香港情懷」包糖便心知不妙，個人偏好黑白淡奶沖既奶茶，呢杯勉強合格。…查看更多

因為要過海，所以我自稱好鍾意呢間小店但竟然只係黎過三次，實在慚愧！！第一次同朋友幫襯當然要飲熱奶茶，一杯預先落左糖一杯冇，覺得師父調得啱啱好，甜果杯好味d! 冇耐再去變左要自己落糖，個人飲開走甜，幾次去都保持高水準，即沖夠熱、奶同茶比例拿捏準確，好滿意！食物方面全部都係同奶茶好夾既茶餐廳小食，試過沙嗲牛蛋治，冇咩沙嗲味但都ok既。另外就係唔知邊個天才發明將咸既蛋同甜既菠蘿包放埋一齊，簡直係天作之合！(都唔係間間茶記有賣) 打開店員預先切開既兩瓣包，覺得個畫面好治癒。而且見佢不斷研發新口味，好似黯然銷魂脆豬、咸蛋黃口味甚至有仙草麵、又不時搞d工作坊請奶茶師傅黎表演、整左個app比客落單等等，覺得我杯茶真係好有heart! 講番點解鍾意，係因為創辦人做左自己想做既野！一直都諗奶茶作為港人既神枱級飲品，咁冇理由咖啡、手搖飲品店遍地開花，連涼茶鋪都周街係，竟然冇一間奶茶鋪！希望佢長做長有，最好o係新界開間分店啦～…查看更多

多士 - 要加$2先可以餐包轉多士，如圖燶左d兼且過薄，冇左厚多士外脆內軟既口感。炒蛋 - 普普通通冇咩花巧，如果可炒到半熟更好。茄牛通 - 名副其實蕃茄湯底很濃郁，牛肉和茄粒不算多，通粉就有成碗半，成個餐最高分係佢。奶茶 - 顏色較淡，一飲落去亦覺太稀，奶多茶少，而且不是濃茶，飲左幾啖就放棄。仲有塊火腿比左朋友，其實咁豐富$40幾抵，係$2多士唔值。而家可能係香港有史以來，冰室/茶記最鼎盛既時期，新店花多眼亂，有得揀（食常餐）未必會回頭皇冠。…查看更多

近年大陸遊客有增冇減，而佢地似乎特別喜歡茶餐廳，相信呢個係愈黎愈多冰室出現既原故。以前冇諗過食個早餐都要排隊，當然門口既一大堆人亦包括準備入大澳、去行山或露營等朋友。火腿/炒蛋/多士 - 都keep到同旺角分店一樣既水準。蕃茄叉燒通粉 - 上次冇留意細字，原來可以轉米粉/麵，如果有埋意粉就好lu。奶茶 - 偏稀身，茶葉味太突出，而且係個人唔太好既味，唔合格。雖然獲安排卡位，但坐既係木櫈，又迫迫地，坐得唔算舒服。…查看更多

本來諗住幫襯同一條街既永泰，但途中比呢間舊式冰室既門面吸引住，改變主意病發作下就入左去。多士 - 食得出用左冇咁靚既牛油同麵包，口感爭d炒蛋 - 偏油/乾身，食落一般沙嗲牛意粉 - 望落淺色，其實好濃味，偏咸，沙嗲味不足，而且係凍既！奶茶 - 用得黑白淡奶都冇死，但奶、茶比例唔係間間拿捏得好，好似呢杯太稀、奶味不足呢種門口賣自家製麵包既真·冰室買少見少，旺區/大集團茶記又比大陸人佔領，佢既常餐唔算高質，但價錢合理，可以安靜咁食一餐，就算唔會回頭，都開心支持左半地小店。…查看更多

一唔留神就會將「文華」同「民華」撈亂，前者係前排試左認為麻麻(仲改左名叫「敏華」?!)，後者睇相已覺唔錯，食完已經諗緊下次幾時encore。多士 - 靚仔、火腿有誠意地煎過。炒蛋 - 蛋既鮮黃色、味同「濕度」都同太興一樣，喜歡，係份量爭少少唔夠送多士。茄牛通 - 茄粒得幾舊，牛就慷慨既，而且唔會un到每啖都咬唔開。奶茶 - 味道可以但偏稀身。雖然常餐黎黎去去都係果幾款野，不過呢間選擇稍為多dd，有時就係呢少少令人想再幫襯，如「粉麵」可揀蕃茄湯底，若果加埋意粉/米粉既話更完美！餐牌既設計亦值得一讚，連圖好清楚比客人知道有咩揀/要揀幾多樣野，落單都順暢d。…查看更多

香港人外食實在有太多選擇，要客人回頭不是易事。大圍不乏茶記，總有些經過100次也沒有意慾推門進內，嚐過大利、68、三洋、源記、燉奶佬、金龍等常餐，始終沒有一家稱心滿意，要不是奶茶不濟便是炒蛋出事...(太興除外，但又怕悶) 這次於早上入座，衛生方面依舊很有問題，座椅和地板滿佈食物碎或污垢，貌似一夜未有清潔。餐具亦同樣不乾淨，見圖二茶匙的水漬，開張數月便如此，實在很難接受。另外，服務方面亦未見改進。不是付幾十塊便想得到五星級待遇，但你就是感受不到「歡迎光臨」。個人認為食物、環境和服務是一間餐廳能否繼續經營最重要的三大元素，平心而論食物是ok的，可另外兩項都不合格！…查看更多

一坐低就發覺自己好似去左蘭芳園咁，入面有好多譚校長既相......鋪頭位置好「格攝」，上左順德中心要再入一個叫澳門廣場尾，爭d搵唔到，但平日都幾多人幫襯。多士 - 烘得剛好的厚白麵包，個人最鍾意呢款配炒蛋。炒蛋 - 食落淡左dd但賣相同蛋漿份量都控制得好。火腿通 - 火腿太少，應該得半片，唔夠送通粉。奶茶 - 偏澀，不夠厚滑但合格既。呢個地段、份量同質素既常餐都仲賣緊$3x唔過4字頭算難得，唯一挑剔係食物上枱有少少唔夠熱。…查看更多

叫左個常餐(基本野)試試水溫。多士 - 厚切，始終覺得唔連皮好味d。牛油未溶晒就上枱，感覺更油膩/趕時間。炒蛋 - 跟餐一定係配牛奶炒蛋，眼見隔離叫一樣既餐但蛋色澤係深黃色吸引好多...冇深究原因。茄牛通 - 第一啖係濃濃既羅宋湯味，有蕃茄蓉賣相口感都好，味道就普通。奶茶 - 一入口就ok，唯一冇咩意見。Lunch hour幫襯，差唔多滿座，有三個樓面呀姐，未至於好忙但冇咩服務可言，冇比餐牌、pat張單上枱同亂放野。唔知係繁忙時段定全日都係咁，奶茶跟膠匙，通粉用紙兜裝住，一來唔環保，二來感覺要食得更快，餐具都可以好影響飲食心情。衛生方面，櫃桶入面用品唔齊全、餐具有污漬，牆上面有唔少既烏繩/蚊滋。…查看更多