hkmonkichibb的个人专页

平時閒日嚟呢度都食套餐，因為真係好抵食。今次星期六嚟，自然無套餐啦。今晚點左雞肉、豬肉、和牛串燒。雞肉、豬肉串燒，大大粒肉，肉粒燒到香噴噴，又唔會韌，上碟時係落埋沙嗲醬，沙爹醬有粒粒花生，好食。和牛串燒落左泰式香草汁，不過和牛粒就細粒左啲，個香草汁無特別。蝦餅，兩次都有食，好彈牙👍🏻泰式咖喱雞，係用雞件整，雖然唔係同咖喱醬一齊煮，但又唔會好似出面餐廳咁有一陣雪氣味，呢個雞係滑但唔入味，好在個醬汁好食，有蛋加入嘅咖喱醬，正宗泰式做法嘅醬汁，唔似出面係用豆粉打茨。泰式炒椰菜苗，用豆醬加辣椒炒，好惹味，菜炒得剛剛好。豬頸肉，上次食套餐時整到柴左，今次食就軟熟番啲，整體嚟講不過不失。蒜蓉包，呢個一定要試，蒜蓉加少少牛油，唔點咖喱就咁食都好食，唔會膩。薄餅，應該係用現成薄餅加牛油再煎，卜卜脆，但略嫌油左啲。食飽仲有西米糕送，呢個唔太甜，掂。不過唔知係咪成日有得送，最好問下店員。…查看更多

中秋晚一早預訂左3人座，去到唔使等就可入座。不過越坐越多人，如果唔訂位應該要等位。冬蔭功湯-有5隻大蝦仁，湯頭偏甜，但都好好味。蝦餅-有有細細粒蝦肉、粟米粒，小心燙嘴，擺左一陣都熱辣辣。飛天通菜-一般味道，好中碟。和牛船河-好多牛肉，好嫩滑，有牛丸，好多炸豬皮，味道跟足泰國風味。如果侍應主動比辣粉、炸蒜調味料架就更好。咖喱軟殼蟹蟹肉-咖喱味濃，一隻大軟殼蟹分4件，蟹肉又多，一啲都唔孤寒材料。蒜蓉包-好香蒜蓉味，包鬆軟。薄餅-一般貨色，可以唔叫。雪糕-點左班蘭味同泰國奶茶兩款。內有焦糖香蕉、燒粟米、亞塔子伴碟，原來雪糕底仲有糯米飯，好好食，應該要列入必點之選。泰式青檸檸檬茶-一般菠蘿沙冰-新鮮菠蘿打冰，有幾粒新鮮菠蘿，如果鍾意食菠蘿，應該都要點一杯試下。仲有，如果佢地啲音響細聲少少會好啲，因為有時講嘢真係聽唔到朋友講咩🤣…查看更多

尋晚去左K-11間火土燒肉，入座時講明90分鐘都算啦，18:45-20:15，到19:45就話last order有無嘢加，我明可能驚再叫會唔夠時間燒烤，咁咪唔叫囉。隔5分鐘19:50就叫我地賣單，好啦，即刻比錢囉，個刨冰食淨幾啖都唔食喇，你咁趕客咪無下次囉☹️4個人食左$1300☹️…查看更多

幫襯起碼5次，韭菜豬紅個汁可以撈飯食。薯仔牛柳粒唔太韌，不過細粒啲仲好。鹵水拼墨魚，雖然唔係染左色嘅墨魚，起碼唔會硬掘掘。豉油王鵝腸，要趁熱食。魚皮好爽脆。炸大腸無乜肥膏，啱晒我唔鍾意食肥膏嘅人。最敗筆個蠔餅，第一次食好脆、乾身、蠔大大粒；第二次食，啲蠔喺晒中間，啲粉一舊舊，食左1/4唔食，個姐姐問我地點解唔食，講左個情況比佢知，佢話會反映喎；第三次食，啲蠔分散左啲，無一舊舊，好左。個蝦米粉絲煲太冧，麻麻地。…查看更多

一行7人，都食左好多嘢，以為細細碟會食唔飽又唔係喎。基本上幾款菜色唔太濃味，對於要求濃味嘅朋友應該會少少失望。飯店走中價路線，每款幾十至佰零蚊，最貴都係羊腩煲。…查看更多

午餐$128+10%，有湯、沙律、主菜、甜品、餐飲，非常抵食。叫左個烤紐西蘭牛扒餐（需加$10），藜麥沙律菜，都幾大碟；牛扒5成熟，唔會過火；由於本人細食，所以無要餐湯；甜品菠蘿蛋糕，唔太甜，食落好香菠蘿味，唔係藥水味；凍檸茶，茶葉有少少花香味，應該唔無普通貨式。…查看更多

已經幫襯泰苑好多次，每次必食嘅蝦餅（彈牙）、魷魚（有啲咸）、冬蔭功（本人認為好過同區咁多間）、泰式肉碎炒飯（如果再少啲油更加好）、紅咖喱雞或青咖喱雞（不過啲雞有雪藏味）、泰式鳳爪同串燒（一般般啦）、沙冰（好大杯）、蒜蓉包薄餅（一般嘢）、泰式豬手（好冧）、柚子蝦沙律（好食）…查看更多

買三碗粉面比一盒仔辣椒油，我話三碗嘢喎，咁佢話比盒大嘅我，大嘅原來都係多少少，咁如果我分開三個地方食，我點分盒辣椒油呢？佢就叫我買樽辣椒油，咁唔通人地做地盆嘅帶埋樽辣椒油開工咩？…查看更多

用OpenRice訂位有9折。一行4人食左幾度點心，有啲原本得3件，可以再加$20有多一件，雖然價錢偏貴，但味道、賣相一流，尤其Bailey蛋撻，蛋香之餘仲有一陣Bailey酒香，唔會搶左大家嘅味👍🏻紫薯角，係甜甜地嘅咸水角，好特別👍🏻XO醬蘿蔔糕，其實主角係XO醬，蝦米、瑤柱，正😋…查看更多

上星期去呢間嘢訂左個牛油蛋糕，今日14:30去攞，佢叫我晏啲，我話約左3點攞喎，跟住佢話個整餅師父今日唔舒服，又叫我今晚去攞，我話住屯門喎，點專登今晚出嚟，點知個肥師奶爆響口，今朝賣左個比人，唔係就有得比你啦。明白晒，原來你賣左我嗰個比人🤬🤬🤬…查看更多

蕃茄鮮蝦意大利飯 - 有2隻大蝦, 而且D辣, 點餐時侍應已講明飯粒唔係軟身同有D硬,不過如果唔辣就仲好, 因為辣味搶晒蕃茄味!泡菜米pizza - 泡菜味濃, D飯好燶, 不過豬肉好韌同好大塊, 唔用刀切係食得好麻煩, 八爪魚粒又係好大粒同好韌, 係食淨左八爪魚粒係碟度! 整體來講只係食到燶味同泡菜味!, 芝麻新地 - 有芝麻汁, 不過軟雪糕好快溶, 以咁既價錢來講真係唔值!草莓巴菲 - 有軟雪糕同士多啤梨雪糕, 要同佢鬥快, 唔係溶晒無得食!…查看更多

黃油芥末牛柳粒定食($128.8) - 梅子飯好香, 食落有一陣陣既梅子香味, 好醒胃. 另外有4碟配菜(有蓮藕, 菇粒,關東煮,沙律薯容), 都係唔錯既口味, 出色既反而係薯容. 而主菜牛柳粒, 有舊牛油同wasabi的係側面, 等食客可以點或撈均食. 本人先試下無點牛油或wasabi, 第二舊先再點, 發覺點晒2隻先好食, 當然唔點就試到本身牛肉味, 但點左就好似好味好多, 不過牛肉好韌,  希望佢地日後可以留意下啦!大蝦天婦($78.8)- 好油, 希望下次再食時無咁油!白玉芒果冰淇淋甜點($55.8) - 用芒果打成既汁, 唔酸, 側面有白玉, 有芒果雪糕, 下層有紅豆, 如果用軟雪糕, 一定更好味!抹茶雙淇淋芭菲($62.8) - 有軟雪糕, 有抹茶雪糕, 有mochi, 什果, 寒天, 紅豆. 好豐富既組合, 如果食完正餐再食呢個甜品, 個胃真係少D容量都唔得!…查看更多

之前見到羅麥記既雜誌攻勢, 食物有好多款, 不過價錢都唔平! 開張時好多人所以隔左幾日先去, 而vcity又有電話攞籌, 所以用下新野又試新野!入到去見到裝修好懷舊, 墊枱紙好得意, 最特別係本MENU, 成本手冊咁, 真係好搞鬼!本來想叫佢地個紅豆冰, 但係好失望, 因為侍應話之前一日打風,所以送唔切貨, 跟住想叫菠蘿冰又係無, 最後叫左杯雜果賓治! 再加佢地個招牌之一既羅麥記辣雞翼撈面, 同叫多一個雪花西多!羅麥記辣雞翼撈面($50)--無辣味, 以為比錯野, 點知隔離枱既又係無辣味! 4隻雞翼剛剛好熟,唔冧! 豉油雞翼只係得甜味!雜果賓治($25)--多雜果, 有d橙汁味!雪花西多士($28)--麵包中間搽左d咖映醬, 但係得好少, 唔夠味, 雪花只係有少少糖霜同椰絲!總括來講, 以貴價食d無水準既食物, 真係無下次!…查看更多

銅貓咖啡既賣點, 係麝香貓咖啡, 咁第一時間就試下先啦! 之前, 我都有係不同地方飲過麝香貓咖啡(即係貓屎咖啡), 不過呢杯就無一般麝香貓咖啡咁, 飲完之後個口有種歷久不散嘅回甘味道,反而有少少苦澀, 真係差左少少! ($68)拖肥芝士蛋糕-- 裡面有好香既芝士味道, 仲有一粒粒既拖肥糖粒,味道好夾! ($32)隔左2日, 我又走去買左杯-士多啤梨朱古力咖啡!朱古力味好淡, 感覺唔到朱古力味；士多啤梨醬好少, 攪拌完忌廉同士多啤梨醬都唔覺有士多啤梨味；整體來講只係一杯凍咖啡加忌廉! ($36)…查看更多

今晚去左新開既黑福多拉麵, 此店是百佳咖啡同一集團, 食品應該都有保証!先來一個炸腐皮蝦卷, 不過一來就見到非常多油, 我地用紙巾索左D油先食, 味道都唔錯, 外面係腐皮, 內裡有肉碎同蝦, 不過可唔可以唔好咁多油?失望! 食左幾舊, 碟上既油好恐佈!失敗!跟住就係照燒魷魚, 如果個魷魚身可以再燶D, 醬汁多D就好喇!主角--叉燒拼豬軟骨赤拉麵, 叉燒軟冧, 不過薄D仲好! 豬軟骨味道同質地OK, 不太差! 辣湯可以揀大,中,小辣! 今晚試左小辣, 不過原來唔係好辣, 而且可以飲到湯底既豬骨味,唔會比辣味蓋過, 下次可以試中辣! 甜品--黑糖XX 丸子(唔好意思, 個名又唔記得左), 裡面有黑糖, 芝麻丸子, 涼粉, 蕃薯蓉, 紅豆, 同雪米糍,內容豐富! 如果將雪米糍換左係雪糕球就好喇! …查看更多