Drinkie_Foodie_Lok的个人专页

呢間喺西環、香港大學站附近的coffee shop，環境好大好舒服，環境走簡約風，咖啡質素亦不俗。重點係開得夜，由早餐到晚餐都有得食，有時夜晚想飲咖啡、想喺西環搵地方hea都係個好好的選擇👍…查看更多

無雞不歡的我，日日都可以食雞，但對食雞都好講究。坊間有好多間食藥膳雞湯米線嘅鋪頭，不過質素都好參差。食過呢間之後，其他真係比唔上。灣仔盈記呢度有好多藥膳養生農場雞米線選擇，有醉雞、麻油、蟲草花、花膠、山藥等等，唔鐘意藥膳湯底可以要鮮茄湯底。今日我叫咗個藥膳農場醉雞養生湯米線。先飲一啖湯，藥材味道同酒香濃味足夠，好味到我不停飲。食雞麵重點當然係雞，唔好睇好似剩係得幾件雞咁，件件都好大件而且啖啖肉，唔似其他餐廳有啲勁多骨又少肉。餐牌寫話農場雞係三黃雞，食得出同普通急凍雞好唔同，雞件咬落好滑好腍雞味濃郁，無得輸！米線加埋碟藥膳湯底時菜再加埋野飲先係$76，啲雞又咁好味，性格比咁高，值得支持灣仔小店！💪😊…查看更多

大學住宿舍時成日會去祥香食下午茶，估唔到十幾年後佢竟然就快光榮結業😭。呢度嘅奶茶、蛋撻及港式麵包都是全港數一數二的好食。今日難得順路去堅尼地城食lunch，即刻決定要要去祥香食飯，希望喺佢執之前點都要食一次。一個簡單的常餐、一個菠蘿油、一杯凍奶茶，都充滿著傳統的味道。而樓上雅座的閣樓亦非常有傳統特色，呀姐落單時大叫食物簡稱尤其親切☺️。最初坐低未有蛋撻，食到最後突然呀姐話蛋撻出爐，仲要係我至愛嘅曲奇皮，即叫一個！熱辣辣的蛋撻皮脆餡滑蛋香豐富，邊有得輸！輸在時代巨輪下，傳統老店被迫結業😢。希望祥香會喺第二個地方再續，延續這傳統的香港味道。…查看更多

銅鑼灣有唔少拉麵店可以選擇，但唔係每一間都好食，有啲湯底太油，有啲麵質欠佳。而我在銅的拉麵首選就是這間拉麵凪，因為佢隱藏咗喺渣甸坊排檔後面，唔係特登去都未必會經過入去食。之前我已經食過幾次，每次都係食佢嘅招牌「豚骨」，湯底係濃郁的豬骨湯，而拉麵的硬度、湯的濃厚度等都有得揀，非常好味有保證👍，絕非其他拉麵店可媲美。其他恆常拉麵仲有「黑骨」、「赤骨」同「綠骨」，梗有一款啱你口味。最特別係佢有一款限定拉麵，一段時間後又會轉吓，之前試過有赤蝦拉麵、胡椒拉麵等等，全部都好好味😋，所以得閒都會睇吓佢IG呢排限定拉麵係咩。呢輪嘅限定係凪牛肉拌麵，勁鐘意食牛肉嘅我梗係要去試吓。首先剩係睇碗麵嘅擺位都已經夠晒靚。日本雞蛋加秘製拌麵汁撈落啲麵度非常好味道，有少少似食緊Carbonara的感覺。麵質彈牙有咬口，牛小排牛味濃郁又唔韌，加埋啲蔥同紫洋蔥一齊食令整體香味及口感更豐富。另外，呢度店員同老闆服務態度都非常好！不過要提提大家有時都要排隊等一陣先入都去食，仲有如果佢啲湯底賣晒就會早啲收鋪，所以想食就記住趁早！…查看更多

在上環吃完lunch還有少少時間，多辛苦都要行上這間位於太平山街街頭的咖啡店飲杯回魂啡才夠精神繼續工作。這間咖啡店的特色是它每天都有新鮮烘焙的咖啡豆。所以，一入門口，即使隔著口罩也聞到香到不得了的咖啡香氣。我照常點了一杯flat white，入口是比較nutty的味道，當然和牛奶非常夾。如果試完咖啡覺得好飲還可以即買一包已經炒好好的咖啡豆返去自己沖！在這裡坐半個鐘飲杯啡就好像在城市綠洲與世隔絕的感覺，極度享受這份在忙碌工作中難得的寧靜。最近它與Cole Haan聯乘期間限定展覽，有好啡飲之餘仲有靚鞋睇，簡直是周末必去的打卡景點。…查看更多

好耐以前去過鰂魚涌嗰間海街丼食lunch，今晚去開北角匯又諗唔到食咩好，就去佢哋喺商場地下最新間分店試吓。星期六晚大約8點鐘去到都唔使等位。我叫咗海寶丼（上），上菜時好有驚喜！店員好細心介紹：左邊的一碟是醋啫喱，左上角的保暖瓶裝著的是可以加在飯上變茶漬飯的湯。只係諗住好簡單咁食個魚生飯的我，覺得非常新奇😃。吞拿魚、油甘魚同蟹肉本身都好新鮮有好鮮味，醋啫喱酸酸哋加落啲魚生度一齊食又幾夾，不過我有一下吞得唔小心酸親個喉嚨😝只係，有啲奇怪係啲飯比較暖…🤔按店員建議最後留返啲飯同蟹肉加湯做茶漬飯，仲有少少芝麻、紫菜可以加埋落去。白白哋色嘅湯應該係魚湯，入口好香鰹魚味。整體來講食完魚生飯再食茶漬飯呢個體驗都好得意。要讚一讚店內所有店員服務態度都非常好，有禮貌又殷勤，最後食飽仲會好似啲西餐廳咁問我滿唔滿意、有冇意見，令我有啲受寵若驚☺️我都有講番飯暖的問題，店員都好禮貌咁話會跟進。👍👍…查看更多

諗住出開旺角就去食由上水開到出來的米線名店鳳鳴居，想試好耐😋星期六大約12點15分嚟到，可能一開鋪放晒第一輪啲人入去，我攞飛二人枱第二張飛，但最後都等咗半個鐘先入到去。不過發現我入去之後就好似唔使點等都入到🤦🏻‍♂️所以，如果大家嚟食可以試吓1245呢啲時間到都好快有位。我叫咗個招牌醉香雞湯米線，原來只係$52！另外再加$10加埋芥末沙律球。個湯好香勁有酒味，我差唔多飲晒啲湯，下次試吓加$8加酒再濃啲酒味先！米線份量就有啲少，女仔食應該啱啱好，男仔食就未必夠飽。啲雞都幾滑，不過有一半雞件都比較多骨，最驚係有少少碎骨，差啲哽親。至於個芥末沙律球就有啲失望，上到嚟先知之來係類似打邊爐芝心丸咁，味道正常唔難食嘅。另外，我叫咗個黃金魚皮。我就覺得$40嚟講都算幾香口幾好味，不過朋友就覺得油膱味好勁唔好食。整體來講鳳鳴居米線喺同類型藥膳米線之中性價比都好高，算比較抵食。值得一提的是呢度Keep住播廣東歌，仲播得幾大聲，最正係d staff會跟住大聲唱，勁high咁😂我就覺得呢個vibe好正！…查看更多

今日約friend喺上環搵地方食lunch，行行吓見呢間cafe啲佈置好靚，個menu 啲選擇有啲好似好健康咁，所以有位就衝咗入去。入到去原來樓上有好多位，亦有好多好靚嘅異國風擺設。因為我想食健康啲，就叫咗個羽衣甘藍牛油果雞扒沙律🥗，雞扒剛剛熟唔會老，有牛油果又令個沙律唔會咁dry，羽衣甘藍份量亦好多，果然係健康之選嘅首選！朋友叫咗個lunch set的黑松露野菌risotto，望落都好靚份量又夠。我哋兩個見熱熱地都各先叫一杯Dirty飲，入口非常順滑，咖啡味亦唔會太酸同奶好夾。估唔到嘢食好味之餘咖啡都咁好飲！下次想剩飲咖啡嚟呢度都可以👍…查看更多

Hashtag coffee一向是我在西營盤最愛的coffee shop。一來位於高街較靜的一邊，很有悠閒小店的感覺；二來每次也很期待咖啡拉花是什麼花款，因為店長的拉花技術出神入化，每次都別出心裁的拉出不同花款。今次是中秋限定的月光兔兔🐰。朝早飲到一杯咁可愛的咖啡寧舍開心☺️…查看更多

A very convenient wine bar with cozy atmosphere in the heart of Central! Broad and nice selection of French wines. We sat at the bar and were served by the polite and pleasant sommelier. To pair with the wines, we ordered some delicacies to eat. Heirloom Tomato Salad was refreshing and the starting dish. Exploring taste of umami!The LQV Croque Monsieur 2.0 was similar to French toast but with fillings of ham and cheese. Quite a heavy dish but good to pair with full body red wines.Pissaladiere was a very surprising dish! The anchovies and olives baked on dough were extraordinary. A must-try dish to pair with white wines.👍The Dry Aged Beef Striploin was rather disappointing. The taste was fine but it was just too stiff….pretty much like chewing gum that cannot be swallowed. 🤢…查看更多

今日去西營盤做嘢搵地方食晏，喺高街見fish & chick有位就衝咗入去。其實set lunch都幾抵，有湯/沙律、有主菜仲包飲品。諗住今餐食清少少所以無叫最出名的烤雞或者炸魚薯條，所以揀咗pan-fried sea bass配薯蓉。頭盤我揀咗粟米湯，有好香濃粟米味好好飲。主菜個sea bass比想像中大塊，擺盤亦好靚；因為係每日鮮魚，入口味道勁新鮮質感又爽嫩，外皮亦煎得香脆。重點係新鮮魚得嚟又無骨，啱晒我呢啲怕魚骨的懶人。餐飲唔好誤會唔係啤酒，係凍檸茶，勁大杯！整體來講呢個lunch我覺得呢個價錢有鮮魚食好抵食！…查看更多

這間位於西環後街的小店，要吃真的要講緣份，我之前經過兩次它都沒有開門，第三次終於吃到。門口並不起眼，一走進店內是另一個世界。店內的裝潢擺設很有心思，有點山系加上懷舊玩具店的感覺。店內只有店長一個，廚師、樓面、水吧全都是他一腳踢，所以來這裡吃飯要預留多點時間，餐牌也有提到因一人運作，客人請耐心等候。簡單叫了一個西京雞肉飯及一支山浪奶茶作午餐。西京雞肉飯就像一個高級版的親子丼，店長加入很多調味及配料，味道複雜但加起來又超好味，簡直不能相信在這後街小店能吃到如此美食，還有只是$75！如果在正式的日本餐廳吃同樣質素的丼飯我估收$200也可以。至於那支山浪，小弟孤陋寡聞，原來是很有名的手工港式奶茶。一共有四款口味可以選擇。這次我飲的是最不甜的比賽拼配，入口果然不甜而且茶香濃郁。…查看更多

自小已非常喜歡食炸雞髀，儘管極度邪惡，但偶爾總要對自己好啲放肆一下。出長水遠入到柴灣半山屋邨搵呢間小店食炸雞髀。蔥油生炸雞髀炸得非常出色，沒有沾粉生炸的雞髀十分香口，雞肉不會炸的太乾，再加上蔥油簡直就是點睛。除了食雞髀，特登走檢是為了感一下老香港的人情味，看到很多屋邨的街坊走下來買外賣、和老闆吹水，此情此景在香港市區已很少見。再順道在興華邨走一走，那舊式屋邨的情景仍然依舊，尚有幾間士多、餐廳、診所仍然存在。也許這就是，香港的味道。…查看更多