亞里巴的个人专页

今年年初一好多親戚來我屋企團拜，外出酒樓食飯又嘈又多人又貴又難訂位，最後決定叫個盤菜返屋企與親友共聚一堂，腦海中立即浮現了沁沁麪個盤菜🤤拎咗個盤菜返屋企，一打開個盤菜立即就聞到香味，個盤菜仲係熱辣辣有煙出，材料極之豐富，鮑魚、海蔘、金蠔、日本大花菇大大隻又鮮味😋最愛就係茄汁蝦碌，味道剛剛好，蝦又新鮮👍🏻撩起個盤菜底仍然有驚喜，豬手腩肉入口即溶化，又入味，枝竹、蘿蔔、豬皮索晒汁好好味，個盤菜汁食得出無味精，食得出有南乳味但又唔係淨係南乳咁簡單，總之好惹味，最後我們用埋個汁淥生菜食，親戚們都大讚這個盤菜👍🏻將來再有機會一定會安歌☺️…查看更多

假日又同女朋友行街，今次主要目的係由中環行去西環，行吓舊香港建築物，而終點就係西環金興食舊打冷風味😋去到金興都已經無乜位，被安排坐在角落頭位又迫又窄的細枱，我與女朋友一心要食好多嘢，這張細枱食起來真的不方便😥我們點了很多嘢食，包括蠔餅、九肚魚、大眼雞、鵝片同埋鹵水拼盤🤩食物逐碟逐碟的到了，不可算是十分之好味，每樣食物都恰到其味😋，已算是不錯👍🏻其中鵝片在點菜時要$140覺得有點貴，上菜時見到得十餘片。。。但是一食就知道物有所值👍🏻鵝片夠嫩滑，鹵水非常入味，十分好食😋現在能夠品嘗到舊式潮州打冷已經很難能可貴，將來有機會一定會再嚟👍🏻…查看更多

天氣開始涼涼，又係秋風起，喺網上見到稻香一蚊雞羊腩煲廣告又真係十分吸引，一心一意就係諗住去幫襯一蚊🤪（當然知道加埋茶錢、醬芥、加一埋單就一定唔會一蚊啦）。上網睇咗最近分店在杏花邨，所以就去杏花邨順道行，波鞋店 outlet 💡由於一蚊雞羊腩煲只限宵夜優惠，由晚上八點半先開始，一早到達杏花邨，先到稻香問定入座安排與細節，以免專登過嚟食唔到羊腩煲，原來八點鐘開始可以取飛，取飛後就可以暫時離開，至八點半再回到酒樓門口才會安排入坐。我哋好聽話跟足指示去做，八點半就順利入坐，一坐低就用手機掃描稻香二維碼用手機點菜，就係想快人一步，以免無得食羊腩煲。喔？原來羊腩煲係唔可以單點，必須要跟餐，餐有三個選擇:1）安格斯肥牛$136 ；2）鮮活鮑魚$88；3）噴水象拔蚌$168⋯⋯有一些取巧☹️我選了最平的鮑魚，由於實在太肚餓，我哋驚唔夠食，所以再叫多一個濃湯花膠雞煲$168。羊腩煲就真係好不錯，羊腩都算幾多，拼羊腩煲的配菜都幾多幾豐富，味道亦都正常👍🏻。但係嗰四隻鮑魚就真係唔係好掂，完全冇鮑魚味外仲要實過石頭，口感就好似𡁻緊掃字膠一樣，相當古怪☹️最唔掂都總算係嗰個濃湯花膠雞煲，個湯極之鹹，鹹到飲唔到，花膠味道與口感又古怪，一定係最平價最低級的花膠☹️隻雞亦都麻麻地，真係一粥麵個花膠雞煲好食過佢😫雖然我哋都唔算好飽，但真係望住個雞煲都唔想食，埋單時食剩都幾多。根據這一餐經驗有一個人建議，就係只點$1羊腩煲，強迫加配揀肥牛，未加茶芥及加一收費合計$137，真係唔飽都唔好點其他，實在太過唔掂，寧可落樓下一粥麵食個七十零蚊嘅雲吞雞煲，慳返百幾蚊之餘仲有品質保證🤣…查看更多

有朋友喺 WhatsApp 群組推介呢間叫做沁沁麵，話路經西灣河、筲箕灣都一定要幫襯😮又話有個臘味飯好好味成日賣晒，仲有附帶要食到沁沁飯嘅攻略係午餐一點前要到達，晚餐要七點前才有機會食到，咁誇張？😱今日收工放低女朋友一於嚟個自私食😋今日我係專登去試，唔係路經，準時晚上六點半去到沁沁麵，入座率都幾滿，店員查詢我撘枱介唔介意？我話唔介意，其實要食就無得介意嫁啦🙄坐低睇吓個餐牌，好！就試沁沁飯，即係招牌臘味飯，於是由店員落單一個沁沁飯，店員回覆沁沁飯剛剛賣晒😨吓？我問宜家六點半喎咁快賣晒？店員回答剛剛最後一個沁沁飯都有客人點了，今晚唔會再有啦！咁睇多陣餐單，咁唯有沁沁麵啦！配菜加咗雲吞。沁沁麵即係招牌人蔘雞湯麵🍜坐咗一陣碗麵就到，但與此同時我撘枱的一對男女嘅嘢食都到，原來佢哋叫咗沁沁飯😳雖然食唔到沁沁飯，但都見到沁沁飯本尊🤭我先飲啖蔘湯，都幾好飲，人蔘雞湯味有啲澀澀哋，但煲得好鮮甜好易入口，麵條好爽滑，溯咗啲湯好好味，雲吞裏面隻蝦好大隻，碗麵配菜又有蔬菜又有木耳，都覺得好健康，肉絲滲有人蔘味，整體成碗麵都好高質素，難怪有咁多人幫襯👍🏻餐後感：我一邊食，一邊聽對面一對男女評論沁沁飯，又話啲臘味好味…又話啲飯好食….我認定係佢哋捷足先登食咗我個飯，所以有啲不是味兒😡…查看更多

今日又約咗女朋友行街，目的地係北角區，北角區對我嚟緊係完全唔會陌生，但係越係出解呢個社區就越難搵食，原因係北角區真心係無乜嘢好食或好味，就算我諗唔到食乜好都會去半島冰室門口排隊，但總不可能每次都半島呀😩真的有點厭倦😩行吓行吓搵食，見到呢一間食上海嘢💡👀其實呢間嘢都開咗好耐，但係總係未幫襯過，襯今日唔知食乜好就試吓佢啦💡我同女朋友都係想食多種類不想食太多，睇個餐牌都幾多嘢食，鍋貼好耐無食過就一定要食啦😋想食酸辣湯又想食韮菜餃子又唔想全份太多，就問店員可唔可以酸辣湯加韮菜餃，店員話得，正！又叫咗個甜點紅豆鍋餅加一杯豆漿。見到個餐牌有一樣野係從來都未食過，呢個就係咸豆腐花，真正好好奇，好👌🏻就叫嚟試吓😝酸辣湯料幾足，酸味辣味剛剛好，不錯👍🏻韮菜餃又幾足料，亦算不錯👍🏻豆沙鍋餅都同樣地足料，甜度適中👍🏻個咸豆腐花真係有啲驚喜😳豆腐花係正常豆腐花，都幾滑，豆味還可以，豆腐花面鋪上菜甫，再鋪上咸銀魚仔，竟然十分夾，仲要好惹味，呢個配搭竟然好味，真係唔錯👍🏻成餐兩人埋單$100都唔洗，夠晒抵👍🏻餐後感：可能有啲唔多起眼嘅食店，特別係小店，俾個機會人哋，可能最後得益係自己，呢一間舖頭仔有機會行過會再嚟，試吓其他嘢食😋…查看更多

女朋友成日都嘈生晒話好耐無食過燒鵝髀瀨粉🔊都嘈咗幾個星期好煩😡我唔係唔想同佢食，之不過屋企附近無燒鵝賣，如果要食燒鵝，我都想同佢食間好質素啲，畢竟我都想食𡃁燒鵝😋今日同女朋友去灣仔麥當勞領取 Mirror 紀念品，路經一間燒臘飯店，個門面相當之陳舊，個名叫再興，個名好熟好熟，就上網 Check 吓，原來係當年的米芝連推介😱勁👍🏻今日終於可以找數同女朋友食燒鵝瀨💪🏻我哋剛剛食咗麥當勞，雖然唔係好飽，但係又唔可以食到太多嘢，但係又為食想試好多種類，店員姐姐知道就俾意見我哋，叫個义燒瀨套餐再加四分一隻燒鵝要下莊，就可以滿足晒我哋要求，然後我再加碟白菜仔、例湯、燒雞潤，好豐富🥰我對食义燒有一個要求，在市面上有兩種义燒，一是橙色皮，無深淺色無燒燶的，這種义燒係絕對唔好食，在超市買到嘅就係這種义燒，我認定這種义燒係工場交貨，所以見到係唔會買🤢另一種紅色皮，會有部分位置燒燶咗，有深淺色，我認定呢種係人手燒，味道會好好多😋而再興嘅义燒就係好味的那一種。但雖然係好味的那一種，但係佢嘅味道都算麻麻地😞义燒皮不夠甜不夠蜜糖👎🏼肥肉口感不夠爽，瘦的位置又大鞋，真係有啲失望🙍燒鵝皮部分脆部分淋，只係不過不失，距離好味還差很遠🩸碟白菜仔用碗載住，賣相很差，見到都唔想食😞全部女朋友食晒，我掂都冇掂過，不能評論味道。反而，燒雞潤同例湯好有驚喜🥹燒雞潤味道好甘香，實實地口感好好👍🏻係好味👍🏻例湯應該落咗好多好多無限咁多嘅燒臘頭頭尾尾再加一啲疏菜嚟煲，好濃好濃，好甜好甜，又多湯料又好飲，勁好味👍🏻⋯⋯⋯⋯不過飲完個湯會好口渴，之後幾個鐘都要勁飲水😂餐後感:在香港老牌著名燒臘飯店所剩無幾，希望再興能夠保持水準，甚至提高現有水準，這一餐不是不好食，但係注意下燒鵝皮嘅脆，同埋义燒嘅肉質，應該可以成為更出名店同更多嘅食客。…查看更多

記得舊年差不多初夏，傍晚會去興東邨商場宜家家居提貨，一早已經預訂了呢一間屋邨酒樓，一心想要食片皮鴨😋後來因為要去康怡花園 Aron 百貨公司睇家電，所以取消預約，然後去咗康怡廣場一間幾有名氣食片皮鴨嘅酒家「金公館」開餐加食片皮鴨，點知又貴又中伏，所以一直都想再去呢間興東邨補返一次片皮鴨餐，今晚收工又要再去宜家家居提貨，但係今日喺公司食過下午茶飽飽地，所以無訂到位，諗住去到至算😔同女朋友提完貨之後，喺興東商場行吓街街，經過呢一間酒樓門口心大心細，我哋兩個都唔肚餓😔卒之入去就係想完成片皮鴨心願🙏🏻我哋叫咗一份片皮鴨兩食，第二食係薑蔥爆鴨，然後再加個冬瓜盅，我諗住應該會食剩要打包走，點知呢一間屋邨酒樓個片皮鴨好好味，又脆又香，粉皮皮薄不油膩，真係可以補返上年中伏片皮鴨條數，薑蔥爆鴨好惹味好好食，鴨肉淋又夠香，仲要好多鴨大大舊肉，只係加20蚊好抵食👍🏻最後冬瓜盅就正正常常，都幾足料，並並通通未見突出。餐後感:我哋如果想食到好嘢唔好只看裝修、門面、名氣同幾多食評好評，食評可以假做，裝修門面都係用錢來堆砌，名氣亦是宣傳技倆，食嘢，味道先係最重要👍🏻…查看更多

渝痴魚醉，早前新年做節時訂過佢哋個盤菜幾有好感，幾足料，味道也不錯，所以回復返晚市堂食約朋友聚餐就選擇咗佢😋當時係下午茶時段，餐廳不算太多人我同朋友被安排到窗邊卡位，我哋打算一邊打邊爐一邊談天，這個位置都算係唔錯。我同朋友一齊揀咗佢哋個烤魚，酸辣湯底走辣，天氣熱，唔想食辣食到成頭汗🥵嗰條唔知乜嘢魚店員話係越南冰鮮魚，我都未去過越南，所以就試吓越南嚟嘅魚係乜嘢味囉😜食咗當去咗嘛😜條魚都幾滑，味道都幾新鮮，又唔多骨，啱晒我哋呢啲唔係好識食魚揀骨嘅人，食魚之餘又可以打邊爐，外面自助區有十幾種不同的肉類同十種八種疏菜任食，仲有十多種飲品任飲，都有我最愛的可口可樂。醬料都有約十種，可以自己混醬，算係幾多選擇。我哋一邊食嘢一邊談天一邊又可以望吓銅鑼灣街景，都算食得幾寫意，時限有兩個半鐘都算食得幾自在。餐後感:兩人埋單二百蚊都唔洗，就坐足兩個鐘，任可以任食，老實說，自助區的食物比較普通，係條烤魚幾好味，呢個質素下次係可以安歌👍🏻…查看更多