falav的个人专页

又約咗食力組組員食飯，佢話想食中菜，買完野就上咗黎呢間菜館。二樓差唔多坐滿，好彩仲有張細枱，食住花生望吓餐牌諗叫咩餸。晚餐想要點湯羹，有家的味道就是粟米魚肚羹 ($108)。例牌份量大約有4碗。侍應好貼心拎埋樽胡椒粉，食時加少少，增加香辣感，同時又食到香甜粟米粒味，魚肚切成粒狀，方便易食之餘又不失口感。趁熱飲一碗先開餐。今晚無叫蟹，改食豉椒炒蜆 ($108)，放底後已聞到豉椒嘅香味。差唔多每隻都有肉同開口嘅，食唔到沙，蜆肉鮮甜。鍾意食鷄嘅會係呢度有選擇困難症，脆皮/沙薑/蔥油/手撕鷄都有，我地叫咗菜膽走地鷄 ($178/半隻)。半隻份量對眼，鷄肉嫩滑，唔食皮嘅可輕易去皮。加埋個獻汁，整體味道唔咸，單食都唔錯。捉緊仍然食到合時勝瓜嘅時間，最適合嘅煮法莫過於浸湯或清蒸。蒜蓉蝦乾蒸勝瓜 ($108)就出現係我地呢張枱上。去皮去得夠，只食到入面最嫩部份，清甜多汁。再淋上豉油熟油，加上蒜蓉夠晒惹味，再有蝦乾增加鮮味及咬感，呢個組合相當唔錯。食食吓發現有粉絲墊底，索咗豉油熟油，但又唔會好咸同油，又多樣野食。見到有個軒尼詩X招牌避風塘辣蟹套餐，搵次同好酒人士黎食吓炒蟹。侍應主動有禮，不時換碟加水，無限用餐時間，可以慢慢享受食物。…查看更多

同媽媽行完街，通常都係食日本菜，今晚帶佢轉吓口味，食川菜。行到有D熱，即刻叫杯凍飲。唔想飲凍檸茶咁普通，就可以試呢杯百香果檸檬茶 ($36)，有埋柑桔仔助攻，甜中帶酸，清爽岩飲。今餐就由我發辦，有辣有唔辣，由大路款式開始。喜愛萵荀嘅清爽度，來一客清炒萵荀絲 ($68)。切成絲容易一注夾起，味道清甜。惹味之選就係呢客黃金蝦球 ($138)，成碟有成8隻蝦球，幾抵食。蝦球外披上一身炸漿，再淋上用咸蛋黃炒上嘅醬，咸香味滿滿; 蝦球爽口，再飲啖凍飲，正呀喂。壓軸出場有金湯酸菜魚 ($188)，辣度有得選擇，呢客係小辣。唔少魚相片浸於金湯內，頂上再有紅辣椒及芫茜，顏色配搭惹人胃口。魚片無細骨，入口相當嫩滑。另有酸菜，萵荀片，乾菌，鮮菇及紅薯粉，湯底酸辣度岩口味，用少少金湯撈飯都唔錯。媽媽想食甜品，就叫咗紅糖糍粑 ($58) 比佢試吓。兩啖一條岩岩好，外脆內有糯米嘅軟糯感，沾上紅糖漿食，有人食到一條接一條，哈哈…….呢餐川菜好合媽媽胃口，已經講定下次想食咩菜式。…查看更多

呢間韓食餐廳係商場food court位置，以橙色及木作為裝飾主題，侍應頭上帶住嘅柑橘帽好得意。有個2人餐，由沙律，主食到甜品都包埋，可以試到唔少野。前菜先有煙肉薯仔溏心蛋沙律，簡單材料但口感唔錯，唯唔係溏心蛋，偏向烚蛋。好耐無食過韓式豬手，有少少掛住，仲要唔駛另加錢。以木盤上菜，仲有生菜，韓式辣醬，青辣椒及蒜片包住食。豬手口感彈牙，包埋生菜一齊食，韓式辣醬嘅惹味都好夾豬手，亦可中和佢嘅膩感。澱粉質類要選兩款，其中之一係韓式燉牛肋骨配飯。牛肋骨與白飯份量係相同，上面再有D蛋絲，仲有紅白蘿蔔。醬汁味道係認識嘅韓式燉牛肋骨，配飯係好岩數; 肉質夠腍同入味。另一澱粉質擔當，玫瑰醬海鮮年糕，玫瑰醬係牛奶、茄汁、韓式辣醬三合一，變成淡紅色好似玫瑰色咁，味道香滑得黎有少少辛辣，掛汁程度可以令每條口感煙韌嘅年糕披上一身淡紅色上衫咁。而海鮮類就有蝦，青口及小章魚，整體味道覺得唔錯。包餐飲，都加$28轉飲濟州柑橘乳酪，呢杯絶對係呢度嘅招牌特飲，差唔多枱枱都有杯。外型吸睛，原個柑橘放係杯頂，乳酸味令人開胃，飲完仲可以食埋個柑橘，性價比高。呢客柑橘窩夫伴雪糕唔駛再另加錢，外型又係吸睛嘅。有4件窩夫，每塊都搽上忌廉，再倒少少柑橘醬汁，鬆脆又香甜口感，另有雲呢拿雪糕，橙白色配色令人感覺開心呢個二人餐份量相當對眼，3個人都絶對夠食，全部都係飽肚類，擺盤吸引，食物味道岩胃口，回頭率偏高。…查看更多

呢個商場有三期，要係度搵食開餐絶對無難度。不論菜式價錢定位都有唔同選擇。小資女平實之選就去咗呢間。呢客賣相咁靚嘅煙三文魚凱撒雜菜沙律拌脆炸巴馬火腿 ($68)，點估到係出自茶餐廳。成幾大塊煙三文魚，底層係大量雜菜沙律及煙肉脆粒，沙律醬可自由加配。份量都幾多，細食嘅都可以當一份主食。係諗緊食咩時，傳來後面枱嘅咖喱香味，咁就一於叫個咖喱做主菜。呢客係印度皇室咖喱牛筋腩 ($62)，可選跟飯/意粉。好多咖喱汁，絶對夠晒撈飯。味道偏甜，似加咗椰奶。牛筋腩炆得夠腍，喜歡牛筋嘅膠質感，滑嘟嘟送飯，兩種唔同口感。只有將軍澳店限定嘅經典鐵板西式餐叫咗客鐵板香煎美國極品T骨扒 ($128)，跟餐包埋餐湯，牛油多士。紅湯開吓個胃口。另加$9可轉特飲。炎夏日子飲杯果味又有氣嘅就岩晒，大大杯嘅荔枝梳打，香甜有原粒荔枝肉及椰果粒，好飲。熱辣辣嘅鐵板T骨扒上枱，醬汁選擇燒汁。自己倒醬汁落去，發出”滋滋”聲，食鐵板餐就係要有呢個儀式感。件扒唔算太厚切，但就好大塊，肉質幾鬆軟但無梳打粉味。選薯菜仲有個焗薯，性格比相當唔錯。壓軸出場叫咗客西多士作為另類”甜品”，未食糖漿及牛油香味已散出黎。中間夾住花生醬，甜中帶少咸，二人分享岩岩好。配埋杯餐飲熱奶茶，茶餐廳出品當然有返咁上下水準。成餐埋單都唔駛三百，由餐湯，沙律，主菜去到甜品都食埋，難怪得到街坊嘅支持。…查看更多

唔係見到呢間新餐廳，都唔知原來沖繩興起食蒸飯石鍋店內掛上好多色彩繽紛嘅獅莎畫，又有一大串日式紙燈籠，幾有沖繩風味。掃二維碼落單點選蕃茄泡菜石鍋鷄 ($87)，加上”小心燙手，不要觸摸”字咭，熱氣冒上。材料除咗有鷄件，泡菜外，仲有椰菜及粟米，配合蕃茄及泡菜汁，酸酸甜甜又帶點辣度，呢個味道配搭幾令人開胃口。鷄件反而味道偏淡口。熱鍋套餐可選烏冬或蒸飯，歡喜食溫泉蛋撈飯，咁就要個溫泉蛋蒸飯啦。飯量相當多，飯上灑上飯素，撈均隻蛋，入口有蛋汁嘅香滑度，又有飯素嘅加味，單食都好味。套餐免費送凍/熱烏龍茶，加錢可轉其他凍飲。凍熱都一樣咁大杯。提供多款日式小食，追加芝麻鷄軟骨($28)及大阪燒醬鷄軟骨餃子 ($20)，一客四隻。唧上大阪燒醬汁及鰹魚碎，夠熱度，餃子底部煎得香脆，餡料有鷄軟骨嘅脆度，少點油會仲好。仲有甜品架，呢客沖繩獅莎酥配雪糕唔駛再另加錢。得意嘅獅莎酥入口香脆，加埋雲呢拿雪糕一啖過仲好味，欣賞佢有焦糖醬配食，邪惡度再升級。加一服務費之後都相當抵食，下次要試下烏冬。…查看更多

友人話好耐無食過鷄煲，放工後就同佢上黎呢度。三款套餐都唔過每位三百，全日免收加一，咁就叫C餐，最多款式。多個凍櫃有齊特色罐裝飲品，連啤酒都有。入坐後即刻去拎罐凍飲爽爽先。根據佢教你嘅食鷄三部曲，首先食咗個至尊重慶雞煲，開細火滾返熱就食得，一路滾起，個鷄煲香味就開始散出黎。鷄件相當入味，個鷄煲醬汁夠晒惹味，辣度自選小辣，有大量香甜洋蔥及芹菜，就咁配個白飯都已經可以當一餐。跟住趁有呢個惹味鷄煲醬汁，就叫咗一系列掛汁尤物，有牛栢葉，水魷，豬皮，鵝腸，炸支竹及鴨血等。與醬汁一齊煮，好似食緊街邊小食檔D一串串咁，好食又過癮。食完就可以最後一部曲，掃二維碼落火鍋配料單。自製肉類拼盤，有澳洲牛肩肉眼，特上牛小排，羊肉片及黑豚梅花片。加湯就可以開始打邊爐，先烚片澳洲牛肩肉眼，肉味幾重，肉質幾嫩，烚幾秒就食得。之後就到特上牛小排，脂肪位多D，多一份油香及滑溜。又自製咗個海鮮拼盤，包括有蝦，沙白，魷魚仔，脆骨腩，青口及廣島蠔。歡喜隻蝦幾彈牙及有蝦味。丸類當然係火鍋中不能缺少，叫咗蒜味花枝丸及爆汁牛丸，仲有芝心丸。蔬菜已放好一碗碗於凍櫃，可出去自取。記住留肚食甜品，有啫喱，奶凍，桂花糕等仲有多款特色口味嘅雪糕杯當然唔客氣可以一次過試幾款味道。任飲任食2.5小時，就算一路食一路傾計時間都相當足夠。…查看更多

係呢條街有間以前食開嘅廣東大雲吞粉麵舖，本想幫襯，點不知發現隔幾個舖位有呢間上海餛飩店，就轉吓口味。要等下一張枱，可以係門口睇住餐牌諗定食咩。行到有點熱，叫杯凍檸茶 ($12)爽爽先。呢客香煎韮菜餛飩 ($53/10隻)，係侍應姐姐推介，果然無介紹錯。每隻外皮底面都煎到金黃色，未食都知道香脆; 咬開有滿滿嘅韮菜鮮肉餡，仍食到肉汁嘅香甜味，加少少醋汁及自家製辣椒醬食，要趁熱食呀。小餛飩套餐 ($60)可配飯/拌麵。二選一要咗蔥油肉絲拌麵配15隻小餛飩係小餛飩系列中可選擇口味，呢碗係全家福，應該係每款口味都有幾隻。皮薄餡料小D，呢隻應該係特色薺菜小餛飩，一啖一隻夠過癮。而客蔥油肉絲拌麵，一人份量岩岩好。拌麵沾上蔥油加醬汁，麵質幾彈牙，加少少肉絲一齊食都幾好味。想食蝦嘅就要點大餛飩系列，就好似呢碗蝦仁香菇鮮肉大餛飩 ($58)，另加麵底($10)及紫菜($10)。大餛飩皮較厚實，內有原隻蝦肉及香菇鮮肉餡，蝦肉幾彈牙，味道較煎韮菜餛飩淡口。湯底加埋紫菜，入口有紫菜嘅香甜味，夾住麵條食再飲啖湯，又另一種食法。小食方面，一致想食涼伴海帶絲 ($33)，份量都唔少，淋上惹味醬汁，加埋紅辣椒粒，帶點辣度，爽口好食。估計係老闆嘅姨姨親切熱情，無加一服務費，相當抵食。…查看更多

自從九龍城區開通咗港鐵後，過去搵食開餐都方便好多。想食泰菜話咁易，今晚同友人黎呢間。開胃口先食個柚子沙律 ($58)，簡單材料有柚子，蕃茄，蝦皮及花生。柚子一梳梳夠口感，入口爆汁唔太酸; 加上香脆花生及甜酸汁，食完都無咩負擔。如果唔係有英文，都唔知呢客泰式老虎笑($118)，原來係燒牛肉。燒好後切成一片片，有個香辣惹味醬汁點配食，帶有少少香草味，燒牛肉口感柔軟唔乾。海鮮類代表係泰式辣椒蒜蓉炒青口($88)，以青紅色甜椒，金不煥，芹菜及洋蔥作配菜，加入辣椒及蒜蓉快炒。無辣度惹味醬汁，青口飽滿無渣，呢口價，好抵食。炒菜方面，叫咗泰式咸魚芥蘭 ($68)。加入咸魚粒及薑絲一齊炒，芥蘭嫩脆，入口無渣。提供多款湯羹，冬蔭公就飲得多，呢客泰式北菇魚肚羹 ($68/小)就第一次試。材料有魚肚，鷄絲及北菇，煮成羹狀，幾濃味，口感同味道有D似食緊碗仔趐。成個蛋糕咁樣嘅係椰青焗飯 ($88)，原個椰青挖空再加入材料，完成後再淋上椰漿，肉鬆及香口腰果。成個焗飯內有蝦，青口，魷魚及椰青肉，滿滿的份量夠3-4人食。有椰漿嘅加持，除咗有陣椰子味外，仲有香甜味道，用黎撈飯食原來係好食架。想要解渴又清熱，椰青($32)及青檸梳打 ($22)成為今晚嘅餐飲。甜品時間點可以少，尤其係泰式甜品，老大哥芒果糯米飯 ($55)，經典黃白配。熱辣辣嘅軟糯糯米飯，淋上椰漿，再加上香甜芒果，雙重口感無得輸。食物味道相當泰式，份量相當對眼，無限用餐時間，可以慢慢食，慢慢傾，絶對要回頭。…查看更多

香港人放假時好多都會約埋飲茶，大多唔限時，一路食野，一路傾吓計。今日就約咗朋友上黎呢度。多款精美點心選擇，廚房小食類都有，連好耐無食過嘅懷舊點心都有得叫。飲茶都會叫D餃類，見到瑤柱帶子菜苗餃 ($33.8)，幾名貴嘅食材名字組合一起，有別於食開嘅蝦餃。外皮軟滑透薄，見到內裏嘅餡料，隻隻飽滿。內裏食到鮮甜帶子，亦有蝦肉，菜苗及冬菇粒，一隻餃有唔同口感。睇見呢度有灌湯餃食，名字唔陌生，但唔知幾多年無食過。仲要係花膠瑤柱灌湯餃 ($50.8)。以鮮甜上湯浸住隻餃，花膠係側邊。喜歡嘅可以加少少紅醋更令人開胃，入口食到有香菇，瑤柱絲，豬肉，蝦肉及大菜糕。餃皮已被上湯浸得軟滑，食吓食吓連連湯都飲晒。喜歡飲茶嘅原因之一，就係可以食到唔同種類嘅食物，煎炸香口類走唔甩。首先有香煎腐皮卷($33.8)，一條可剪成2件，方便易食。點喼汁食，皮脆內有芽菜，甘荀及菇絲及蝦肉等作餡料，一啖一件好輕鬆。另一香脆炸物係蜂巢炸芋角($29.8)，一碟3件列隊排好。唔係好多酒樓仲有得食，外面鬆化，咬入有芋蓉嘅綿滑感及惹味肉碎，無需點醬汁已經好好食。友人見到點心紙上有金牌炸乳鴿($52)，就話想食，心動不如行動。炸得顏色幾靚，鴿身適中，每人半隻岩岩好。滷得幾入味，皮香鴿肉唔乾，點少少喼汁食仲惹味。作為另類甜品有呢客原籠馬拉糕 ($33.8)，大大個圓圈切成八小件。入口夠熱又鬆軟，第一啖已食到熟悉嘅馬拉糕味道，飲啖茶，食件糕，正。茶位每位$11，叫咗壺鐵觀音，加咗幾兩次熱水都仍然咁香濃，二時後入座係下午茶時段，價錢下調，食得更開心。…查看更多

香港人幾時開始愛上食川菜，係呢條食街又多咗間，我地都忍唔住將今晚晚餐交比佢。望望餐牌有咩想食，掃二維碼落單，簡單方便天氣咁熱，叫款涼菜開下胃口。呢碟口水鷄 ($68)，份量何其多，有青瓜粒墊底，倍感清爽度。惹味醬汁辣度係輕量級，鷄肉嫩滑之餘亦食到醬汁味，令人開胃口預備迎接主菜。飲品方面，除咗有啤酒，仲有多款特色凍飲。我地就叫咗百香果梳打 ($28)及咸檸檬可樂 ($28)，兩款都係有氣飲品，一啜爽爆。見到有麻辣香鍋，選擇四款以上配菜，可選辣度，叫咗小辣試下先。呢鍋有牛肉 ($40)，黑毛肚 ($40)，四季豆 ($22)，萵荀片 ($22)及花菜 ($22)，炒好後再加上芫茜，芝麻及黃金豆，未食已聞到香味。小辣完全接受到，仲食到孜然粉，獨有香味引起食慾，整鍋味道都好好用黎送飯。壓軸出場有不二酸菜魚 ($168)，食川菜好多時都會叫嘅，酸酸地又有湯好易入口。呢度嘅酸菜魚材料比較簡單，除咗主角魚片外，有大量酸菜，亦有萵荀片。魚片口感滑溜，完全無細骨; 酸菜與萵荀片口感清爽; 湯底酸度適中，雖然見到有紅辣椒，但唔辣，用黎撈飯食都幾好味。驚喜位除咗呢度嘅食物份量超對眼外，白飯係免費架，對於鍾意食飯嘅我，內心係暗喜嘅。今餐有魚有鷄又有牛肉，白飯滿滿，超飽又滿足，想食糍粑做甜品，唯有下次。…查看更多

約咗朋友交收網購戰利品，順便食埋飯先散，就去附近呢間冰室。趕住下午茶時段的尾巴，叫咗個奶油脆豬($33)，跟餐加凍飲只需$3。成隻手掌咁大嘅奶油脆豬，香甜味道，外脆內鬆，成為呢餐嘅餐前小食之一。門口寫住厚豬扒專門店，一系列厚豬扒配搭，可以跟飯/脆豬等，我地就叫咗厚切豬扒拼沙律 ($54)。豬扒成隻手掌咁大，佔領咗半隻碟。炸至金黃色，已調好味道，無需其他醬汁跟配。切開更加睇清楚佢嘅厚度尤如一部iphone，入口鬆化，果然有料到呀。餐飲加$5可以轉飲紅豆冰，實在太耐無飲過，又係回憶殺。叫份特餐 ($49)，選擇沙嗲牛肉麵，加$3轉出前一丁，另跟蒜蓉牛油多士及炒蛋。聽見坐附近枱嘅客都叫沙嗲牛肉麵，轉一丁有埋包麻油增加麻油香。丁麵一食就知分別，牛肉食唔到梳打粉醃味，個沙嗲湯底味道適中，係港式味道，加埋粟米粒，又另一番口感。估唔到冰室食物已經升呢去到有燒乳鴿食，仲要係BB鴿。禾味燒BB鴿 ($53)，已斬成四件，另有淮鹽點食。話明係BB鴿，肉唔會有好多，炸得皮脆肉嫩，拍得住酒樓出品。炒碟正菜，就蒜蓉炒菜心 ($50)，蒜味滿滿，菜心無渣。港式炒粉麵乃係茶記冰室之”要員”之一，晚市黎一碟星洲炒米($70)，跟凍飲都係加$3，份量相當對眼，上枱後未食已聞到咖喱嘅香味。材料有蝦，叉燒，火腿，蛋塊，洋蔥及紅椒等。炒得唔算好油，味道唔會過咸同食完會一口油。啜啖凍檸茶，正。全日免收加一，大眾化之選。…查看更多

友人問我幾耐無黎過呢間美式餐廳?唔……….又好似真係好耐無黎過，今餐就黎個回憶殺。一入門口就有張吧枱，方便飲嘢; 兩邊設有卡位，昏暗燈光，同回憶都似。見到有個人自選套餐，由餐湯沙律主菜到甜品都有，一個價錢食幾樣野，由二百幾去到四百幾，想輕食至嘆牛扒都照顧到。尚未落單，侍應已送上餐前包籃，有硬/軟身包及合桃鬆餅，配上牛油及士多啤梨牛油醬，驚喜位係合桃鬆餅外脆內鬆軟，又有合桃碎嘅咬口，甜度剛剛好。Happy Hour去到七點半，趕得切黎一轉。呢杯咁靚嘅係Galaxy Five，加入蝶豆花茶，再有蘋果，檸檬及熱情果，入口有生果嘅酸甜味，幾清爽。見到有餐前包，就要客周打蜆肉湯配包。濃厚湯質，食到海鮮碎粒，包括魚肉及蜆肉，材料豐富，幾有口感。加點綠色，有招牌凱撒沙律做代表。材料簡單，配特色凱撒沙律醬，對佢嘅個人份量有點喜出望外，食多D菜都有益D。呢客德州大漢堡 ($258)，目測出鏡率都幾高。配黃金拍檔薯條，仲有菜絲沙律。切開一半與人開心些牙，就可一眼望晒每層有咩材料。除咗咬落唔散開嘅主角漢堡外，新成員包括烤醬辣紅椒，牛油果蓉，高達芝士及紫洋蔥。飽身鬆軟，整體高度應該可以一啖咬到底。另一主菜烤半鷄 ($268)，餐牌上寫住配薯條，唔知係咪見我地嘅漢堡已經有薯條，所以改為蕃薯條呢?!  配多個BBQ醬汁及菜絲沙律。半邊烤鷄搽上BBQ醬，入口甜酸鹹加微辣，外微焦肉嫩。甜品方面，有美式雪糕新地，賣相似睇美劇入面出現果D，但係迷李版。雲呢拿雪糕再唧上幾圈鮮忌廉，邪惡度倍升。仲試埋自家製布朗尼蛋糕朱古力士多啤梨，有埋焦糖醬襯底，增加濕潤度。入口微暖，無想像中咁甜，朱古力味幾香濃。有些東西要珍惜，尤其係呢D咁經典嘅美式餐廳，有機會再同友人回味一下。…查看更多

友人知道我喜歡食天婦羅，叫我經開呢區可以去試吓。店內面積精緻，似係以日式海產市場作主題裝飾，天花掛上魚網，牆上貼滿海產圖畫，座位多面壁而坐。架上提供多款調味料，食冷熱烏冬/蕎麥麵可自加調味。食厭咗普通煎餃子，又可以試吓雞皮餃子 ($48)。用鷄皮代替餃子皮，開初都擔心會否一咬就會好多油，其實經過炸後，本身嘅鷄油已經”迫”咗出黎。點埋個餃子汁食，入口係外脆中又帶點嚼口，而餡料就係餃子餡，夾住一條黎食都幾過癮。每款定食，都包埋龍蝦味噌湯及前菜主菜係蒲燒鰻魚丼 ($88)，份量相當大碗。半條蒲燒鰻魚，兩邊圍住蛋絲及幾片醃蘿蔔，賣相不俗。梗要將蛋絲，鰻魚及飯結合，一啖放入口先食到蒲燒汁嘅甜味，繼而係燒鰻魚嘅軟嫩，再有白飯嘅滿足，多少少蒲燒汁撈飯就好味。呢度仲有自選天婦羅定食 ($30)，可以選擇白飯/冷熱烏冬/蕎麥麵，加少少錢可另轉香蔥牛油飯/冷酢橘烏冬。可選食材主要為海產/鷄肉/牛肉餅及蔬菜類。每款都吸引，尤其係海產類，配以冷蕎麥麵，所以就叫咗廣島蠔 ($20)，鮮帶子 ($20)，黑虎蝦 ($13)，半熟蛋 ($13)，皇帝蟹棒 ($13)及四季豆 ($9)。趁熱食就由鮮帶子起動，唔算太大粒但幾厚身，無渣仲幾鮮甜。隻廣島蠔炸完都仲咁大隻，$20隻相當抵食，蠔身夠飽滿幾有蠔味。天婦羅蛋印象中比較少見，呢度仲要入口係半熟流心狀態，蛋黃汁好creamy。所有天婦羅嘅炸漿都夠薄身，唔會食到一口粉都未食到主角，仲要即叫即製，入口夠熱度同唔油。雖則佢呢度係有炸菠蘿伴雪糕呢客甜品，但就成日都將呢客芝士年糕 ($38)，由小食變為甜品。入口熱辣辣，炸至外香內軟，香甜軟滑嘅芝士配合煙韌嘅年糕外皮，食得快先可以食多一粒，哈哈………仲有其他特色天婦羅如龍蝦，九肚魚，花尾龍躉，活虎蝦等，有待下次。…查看更多

唔係友人要買氣槍配件，都唔為意附近有呢間泰菜館。餐廳面積一眼見晒，枱佔兩邊，裝潢以金木色為主，”泰”有感覺。望完餐牌可自行掃二維碼落單。泰式沙律都係建基於個沙律底，芹菜，洋蔥，辣椒再淋上酸辣汁，主材料嘅變化而有嘅。今餐試吓泰式扎肉沙律 ($79)。入口帶點酸辣度，呢D初夏天氣食涼伴酸辣食物，就算食多D扎肉都好有胃口。友人話想食鷄，咁就叫泰式海南鷄 (半隻/$135)，半隻份量相當對眼。入口係暖暖地，鷄皮下無多餘脂肪，肉質仍帶嫩滑，點埋個特色醬汁，唔錯。呢度嘅炒菜，煮法都有4款，照顧唔辣嘅有泰式蒜蓉炒。食泰菜當然選擇要椰菜苗，用馬拉盞炒法($89)。入口無渣，調味唔會過濃，單食都唔駛係咁飲水。成罐七喜比你，再加青檸冰杯同蘭花裝飾，就成為呢杯望落都透心涼嘅青檸七 ($35)。泰式炒河就食得多，青咖哩蟹肉炒米粉 ($115)應該第一次食。米粉以青咖哩炒，辣度輕微，炒得夠乾身，配以無細殼蟹肉，有點兒似”輕料”版嘅星洲炒米。仲有泰式串燒沙嗲 (半打/$98)，豬/牛/鷄各3串，沙嗲醬另上。燒至有些少焦香位，三樣肉都無燒到變嚡。個人歡喜鷄肉串，加埋沙嗲醬汁多一份香味，肉係嫩口嘅，容易由串支食到鷄肉。臨尾仲送上四款特色泰國甜品，甜度岩岩好，最歡喜食椰青糕，口感爽口又有椰青肉嘅清甜味。食物可要求少油少鹹，而出品真係做到，食完呢餐返屋企都無需飲好多水解渴。…查看更多

公司有位”韓小姐”，最喜歡食韓菜，網上介紹呢間韓國湯鍋店，專食嫩豆腐鍋，睇完已經想去會一會佢。門口有餐牌差唔多坐滿，好彩仲有少量枱，老闆係韓國人。自己掃二維碼落單，簡單方便。仲諗緊食咩時，侍應先送上泡菜，魚仔乾及辣炒年糕，仲有炒粉絲，可以添食，食住韓式小食等開餐。湯鍋熱辣辣，配返杯凍飲先，提供幾款特色飲品，叫咗呢2杯都係果味為主，柚子茶($30)及蘋果芒果阿德 ($30)，味道香甜。目測呢客烤牛小排套餐 ($198)，出鏡率都幾高。除咗有以鐵板上嘅美國牛小排，仲可以從A1-A6選擇嫩豆腐湯口味，另有客飯，有湯有肉又有飯。牛小排以鐵板上，可保持熱度。醃得相當入味，肉質柔軟及肉味幾出，而底部嘅洋蔥香甜，當然要食埋佢。對牛肉有偏愛，就點配埋呢客牛肉嫩豆腐湯鍋，上枱時仲見到滾住。每個湯鍋都有隻生鷄蛋，隨意加入熱湯鍋中，可自家製溫泉蛋。牛肉唔肥但唔係嚡，配埋嫩豆腐湯加飯，相當滿足。另一份套餐係小章魚五花腩 ($188)。亦係以鐵板上，見到橙紅色但唔辣架，五花腩片加爽彈小章魚，兩款食材都係韓菜經常出現。而湯鍋就點配泡菜嫩豆腐，湯質比較清，有泡菜嘅酸及微辣味道，係爽口嘅感覺，加埋豆腐花咁滑嘅嫩豆腐，簡簡單單都好好送飯。大愛韓國嘅餃子，呢度亦有($78/6隻)，隻隻飽滿。餃子餡料係豬肉蔬菜加入埋粉絲，餃皮係軟滑又帶少少煎香感，唔厚食完無負擔，個餃子汁超好味。無限用餐時間，上餐速度快，外籍店員招呼有禮，見到外面有人等位，食完都埋單交枱，好味食物不能夠只有我地食到。…查看更多