DUCK DUCK PIG的个人专页

好多卡位，俾客人有舒服、寧靜的空間。不過店內既姐姐態度極之差，尤其是收銀姐姐，說話語氣差，敷衍，落單只會企在櫃面落唔願行過黎，要你大大聲在個位度落單。經常黎呢度食咖哩，不過食物既質素好飄忽。有時薯仔極之硬未熟透，一時就極之淋。今日因爲是閒日下午，有特價餐$59就有飯有野飲。特價餐份量是少了一點，不過正常。呢度既咖哩少少辣，打溶左洋蔥令咖哩口感同味道都更佳，牛脷處理得幾好，不會有內臟味道，稍為太薄沒有𡁻口。幾好質素既食物，但食得唔舒服都把鬼。…查看更多

同家人補返做節慶祝，中菜又好平常，日式西式佢地又麻麻，想去d有圓枱既餐廳，於是在openrice搵左呢間特別的台灣料理。結果沒令人失望。先黎台式三併，可以任選3款小食。鹽水鴨最好食，肉質沒有因為凍食而過硬，少少咸但配合醬汁酸酸地，好match!蛋黃小卷齋食味道唔算好出，有淡淡咸蛋黃味，加上沙律醬更match!麻油雞湯好重薑味，湯頭濃郁，而雞油不多，感覺上不膩口。溫室南瓜炒鮮鮑雖然不便宜，但是我最喜歡的一款菜色。平時好少食南瓜，但佢同生抽老抽去炒，外表乾身但裡面能保持到南瓜的濕度，少少的醬油味提味，很好。鮮鮑魚因爲醬汁調得好而更入味。秘制蜜番薯🍠很特別的甜點，用蜜糖去淆番薯，甜得黎不會掩蓋番薯味，很有口感。…查看更多

開店以來，黎過十幾次，一直好捧場，亦會介紹同事去食，但感覺刺身質素越來越差。宵夜時間比下午貴，每款刺身不同價錢，最少選3款，加$10配白飯或壽司飯。我今次點左三文魚（$9）、三文魚腩、油甘魚腩（$24）。點解特別指明價錢是因爲餐牌有寫油甘魚同油甘魚腩價錢上有差別，初時上枱不是這一張相，是兩件暗紅色既油甘魚腩，魚身位置同色澤完全唔合格，擺明唔應該俾客食，我即時向女侍應反映，侍應亦都即刻拿走碗刺身，仲送左個「妙咀」樣俾我，嘩大佬呀～食咁多年刺身，一睇就知有問題，同你反映想換姐。結果就有趣，換左個平價既普通油甘魚，我忍唔住問呢個係油甘魚腩嗎？ 個侍應話：「哦，我睇睇單先......幫你改返普通油甘魚價錢喇！」多謝了，食之前真係要睇清楚。蟹籽沙津大大碗，價錢不算便宜但很滿足。…查看更多

口痕想食件鮮牛油多士，諗住兩個人share食，點知一上枱，得果兩舊仔咁大把！多士尚算脆身但壓得太扁，而且多士剛烘完就夾鮮牛油，令到舊牛油好快就溶😭😭常餐大拿拿$46未計凍飲加錢。依家在旺角求其一間餐廳都要$4x，好貴。牛餐肉凍而且太乾身，炒蛋質素算中上，沒有過熟有少少雞香。多士太乾太薄，沒有口感。凍檸茶有4片檸檬，茶色勉強，不算清澈不算混濁，甜度過多不夠茶味。茶餐廳中少數有卡位的地方。雖然偏窄但好過無啦。…查看更多

去得m記食都真係無咩要求，但真係忍唔住俾個劣評佢！點了火腿扒漢堡包加一杯汽水，依家已經加價到$15杯汽水係完全無氣！d冰融左一大半，連在杯邊既小氣泡都沒有，味道梗係難飲，係淡左既糖漿味火腿扒漢堡正常，麵包保持到鬆軟度，火腿扒稍稍咸，但可接受。其實價就加左唔少，但食物質素更差了，依家加大餐都要$4.5。平日早上都唔算多客人，但好多吉位都無人執野，張枱亦有倒瀉野既痕跡，一坐低就有小蚊芝埋黎........感覺好差。…查看更多

匯豐信用卡無論是儲分還是折扣優惠都做得幾好。outback在2018年12月前都有呢個幾抵食既套餐優惠。會計婆那數的我，特登選了星期四的晚上去^^今次點了D餐（美國牛扒為主菜）有餐湯、黑糖包、凱薩沙律、美國牛扒、在12款選擇裡選一款，我們點了雞肉拼燒蝦寬麵，最後配一件甜品和飲品。餐湯.......完全唔掂。勁水，勁淡，多油。USA牛扒層次分明的燒網紋，剛好5成熟成度。牛味濃郁肉質有口感而不算過un.白汁濃稠程度剛好，但建議盡快食，凍了會變得過黏。芝士片味濃能發揮好好的點綴。雞肉比以前嫩，但仍有改善空間。整體來說雖然有改善空間，但性價比已很不錯。唯一真的不滿是一個2人餐，竟然只有一份甜品，如果2人不是情侶不是家人，分著食好奇怪而且感覺寒酸，大扣分。旺角東店侍應非常禮貌，亦會問客人意見。欣賞。…查看更多

作為常餐熱愛者，由華星食到新康年再黎近日常去的民華餐廳。無論幾點都可以食到常餐，而且配搭豐富，不會悶。話雖如此，但我每天都是點同一樣組合。鮮茄火腿米粉+餐肉炒蛋+牛油多士+凍檸茶鮮茄湯底茄膏比例多，加上鮮茄蓉，稍為偏酸。火腿份量多，滿足。炒蛋質素中上，份量不算多，但完全做到半熟效果，蛋香又滑溜。牛油多士每次牛油份量適中，麵包烘得好平均，而且很脆。凍檸茶就一般般，檸檬有4片合格。但沒有茶香，而且過甜。埋單：$46 一般價錢，但質素俾足。…查看更多

葵廣-出名美食林立的地方，如果想坐下來食飯的話，我一般都會選擇小雨天食泡飯。今日12:15左右，未算人多，自由揀位。一貫作風點了骨湯蠔仔肉碎泡飯加凍檸茶。可是.....實在太失望了，食物質素差了很多。蠔仔明顯少了很多很多，骨湯味唔夠濃，裡面大量菜及飯。而且泡飯一上枱，碗邊勁多變熟了的肉血水定係肉類污穢物，影響外觀。無黎一段時間，沒想到變差左咁多....需要有個自助區，要水、要碗仔全都要自己拿。當日下午12:15，4個姐姐企在門口吹水，但都要客人自己拿。其實如果多客人時，自取無所謂。但不是那麼多客人時而且如果單獨黎的話，又要拿齊行裝去拿碗比較不合適。…查看更多

適逢Sogo thankful week血併過後已經係晚上11點，為左好好慰勞陪我購物的男朋友，今晚陪佢食佢一直想食既蛇王宴～～點了蛇羹餐和另點了一碗菊花會五蛇羹。非常想食糯米飯，但可惜沒有。一直想點燉湯，可是男朋友強烈推介食蛇羹，說來蛇店梗係食蛇羹啦！好啦～聽你話🤦🏻‍♀️如果一人食呢個套餐真係幾飽。蛇羹溫度夠，絕對加分。以多種蛇肉絲為主要材料的羹，配以雞肉/豬肉、蛇骨、冬菇絲、薑絲、杞子、花椒、八角等，伴以蛋散薄脆、檸檬葉、白菊花瓣、白胡椒粉食用。別小看幾片白菊花，是真的聞到淡淡的菊花味。雞絲份量特別多，老雞火喉夠，有口感。蛇王薄切配湯羹合適。潤腸非常脆口，很特別，令本身不太好潤腸的我也忍不住吃了一條。潤腸表層少少泛油，不會很乾。…查看更多

在旺角通菜街裡面，通常都是小店經營，而且經常轉手，教難經營。眼見呢間貴州羊肉專門店開業多年，而且門面好大，今晚忍不住試一試。腳一步進去就聞到濃濃的羊羶味，期待。餐單非常有特色，基本上你說得出的羊部位基本上都有。單點羊部位算便宜，但一碗羊肉粉叫價$42，感覺有點貴。點餐是可選擇辣度，小辣適合一般大眾。外表像米線的粉，但咬落意外地Q，很有趣，好味，這次點了羊雜，裡面有羊肺、羊心、羊柏業、羊潤，同埋唔知係羊鞭定羊腸的東西。羊份量多，好味。檯上的調味架有花椒、辣椒和味精，另外還有生蒜頭和老陳醋。$5一串羊心，咁平價錢當然明白只有一小舊，可惜太乾太硬，沒什麼味道。扣分。湯底算重味道，容易令人有印象，可是離開之後口非常癢，需要多喝水。只能說：重味精！…查看更多

路德圍荃灣區食店集中地，鋪租貴，無返咁上下實力都難以立足。假日晚上成條街都排滿人等候心儀既食店。今次黎呢間山西刀削麵皇。寫食評之前稍稍看到其他食評，心裡很想為它平反。有人說呢間刀削麵麵質奇怪，一邊薄一邊粗，唔夠彈牙奇怪。但人地山西刀削面全憑刀削得名。用刀削出的面，中厚邊薄。麵體本身特色就係咁。麻辣豬脷每次食多數都係點呢款，因為佢係少數有賣豬脷既餐廳，而且處理得好好，薄切但有口感，沒有內臟味道。叫多蒜真係好多蒜。唯一要彈既係，所謂麻辣根本一點麻味麻香都沒有，只有辣。湯底清，一般食法是把蒜和麻辣醬放部分落湯起提味功效。另一特色是套餐加$4就可以轉檸樂，大快朵頤！…查看更多

舊同事回公司派餅，買了美心西餅。實在太耐無食美心了，依家即刻試一試先😝以賣相評價：坦白說實在一般，果撻沒有足夠的透明果凍鋪面，缺乏光澤，而且造型亦沒有大驚喜。我最喜歡的栗子撻賣相更加麻麻，栗子蓉擠到像一粒粒咁樣....沒有美感。味道來說：要讚一下撻皮，放了一段時間仍然脆身，完全不濕。裡面忌廉份量不算多，不會搶左鮮果的味道。芒果新鮮，栗子蓉甜度適中，不錯！奇異果放太久有點乾，影響口感。至於蛋糕類的西餅，過濕過多cream ，好一般。…查看更多

平日午餐時段竟然可以同男朋友一齊食lunch，未食已經好開心^^男朋友一直想再黎鐵火堂食自選魚生飯，但因為平價自選只可在下午時間出現，所以一直都沒機會再黎幫襯。旺角店位於酒麻地和旺角交界的登打士街，地點方便，環境乾淨。自選4款魚生$59三文魚紋理分別，肥美程度一般，但夠大塊新餐牌加左油甘魚腩，正！刺身沒根，肉質鮮美。帆立貝，有兩粒完整。size偏小，無咩味道。三文魚籽，份量極多！！！絕對可以兩人開心share ~魚籽脆口，魚籽味夠濃～同各位介紹，呢度既魚生飯，飯是可以無限任加的。另外，讚一下這裡的員工，由開業之今都很有笑容，服務態度好，有禮貌。上餐速度亦快！👍🏼…查看更多

11月期間透過openrice訂位可免費送火鍋湯底（人均消費要過$200）。聽聞呢間麻辣好食所以放棄最貴既龍蝦湯點了麻辣及杏汁豬肺湯雙併。結果湯底係令人失望的。先講麻辣湯底，有麻味但沒麻香，到中後期時更加沒有什麼味道。裡面有豬皮可食。習慣煮火鍋配料前先飲一啖湯試味，飲完一啖我同個朋友對望........嗯...好淡好淡的杏仁味而且不像是熬出來的杏汁豬肺湯底，但亦需要讚下，豬肺份量足夠，而且夠腍，亦沒有內臟味。8款配料任均選擇，餐具乾淨大氣。冰豆腐很好，大大舊。能完全吸收麻辣湯的精華，價錢合理。這個炸鮮魷，炸漿太厚，唔夠熱，沒味道。不食也罷。坐成晚果壺茶只有一個茶包，去到中期時已經沒有茶色、茶香，更別說味道。整體來說，價單屬中高消費，但環境、食物質素和細心程度都有待改善。暫時是可一不可再。…查看更多

做了會員之後第一次用app拿籌，不用企在門口排隊，超正！星期六徬晚，需要提早大約1小時拿飛，大約5個號碼左右就會電話通知你差不多有位。男朋友熱愛元氣，有時工作忙碌都會去食餐盡慶的，特別會選高速線，電腦落單，5分鐘內就會有食物。這次沒有拍照，只能用文字表達食評：三文魚壽司、煙三文魚壽司🍣魚生新鮮平價而不欺場，有油光。帆立貝壽司帆立貝大舊，食到裡面的條紋，不像一般放題咁「膠」。軟殼蟹手卷這次放了大約5分鐘先食，紫菜立即變軟，非常影響口感，建議各位立即食用。軟殼蟹份量剛好，亦夠酥脆，配上沙律醬可去油膩感。稍有建議，壽司飯有時過於鬆散，只有一個師傅做，好急。欣賞元氣集團式經營，有系統之餘亦不斷進步。以青瓜沙律來說，永遠青瓜切的厚度和大小均一樣，而且亦越來越電子化。…查看更多