Awan Wan的个人专页

唔掂！諗住媽咪雞蛋仔個名都唔錯，平時經過又一大班人企喺度等緊，應該唔會差得去邊。口痕痕嗌咗個綠茶雞蛋仔，等咗十分鐘到，到手個包裝都熱辣辣嘅，急急腳行返公司3分鐘，一拎黎食，嘩咁硬嘅？咬第一粒已經咬損哂個上顎。味道就正常抹茶粉味，無咩特別。諗住29蚊無理由就咁掉咗佢，食多幾粒，最多「練」吓佢軟化佢再慢慢咬，未食完半包，成個口已經損哂，不得已掉咗佢。早知買行返去路德圍嗰邊買個12蚊一底嘅雞蛋仔算。難食。…查看更多

本身排緊隔離間野，但因為要等4張枱，呢間初見等左無幾分鐘就有位，於是就食佢啦。之前係OR睇過佢既食評知道佢有好多讚，諗住都唔會太差。一行四人我地嗌左鍋物，鐵板牛。個鐵板牛由落單到上枱等左差唔多25分鐘，好啦，諗住等得有價值都抵既。點知一上枱，已經見到啲牛肉粒好乾，又凍，啲蒜片係淋既，牛肉粒食落去勁難嚼，我地幾個都嚼到牙骹痛。有一位我估係老闆？定經理？望過我地幾次，見我地幾個食到苦口咁面，都無過黎了解下。返工趕時間，大家求其食完就走人，不過大家都話，下次即使隔離鋪無位都唔會想食呢間野。…查看更多

今晚突然想飲燉湯，喺火炭飲燉湯既選擇唔多，走去大家x見得皮蛋湯，就走去銀禧睇下，估唔到喺街市入口就有間燉湯。$55一個燉湯，如果加埋飯就total$73。 感覺上有少少貴，行近啲睇佢啲燉湯係用錫紙兜一個個獨立燉好包裝好既。因為真係好想飲湯，最好係清清地，有啲排骨食下....就買一set黎試下啦。我嗌左個姬松茸螺頭淮山杞子燉排骨湯，加個蔥油豬扒飯。兩樣野買上手都熱辣辣，個湯一打開，有幾舊好腍既排骨，有螺頭，有好多松茸，味道好濃，感覺好足料，湯面無咩油。雖然有少少失預算，因為我本身以為係清清地既湯🤣點知咁濃味...只能怪自己對燉湯唔認識🤣🤣個湯好大碗，食+飲左半碗就已經飲唔落，太飽啦！個湯飲完一啲口渴都無，我相信都係無落味精。至於個豬扒，因為太飽緣故，無食到留番俾屋企人第二日帶飯。打開見到有五塊豬扒，豬扒下面有8-9條大菜芯，飯量都好多。後黎問番屋企人，佢話都幾好食。呢個餐以呢個份量，呢個味道，同埋健康無味精黎計，$73我覺得唔貴啊。不過份量真係太多，兩個人食一個餐都已經夠，或者等下次餓啲既時候再嗌啦！😆…查看更多

突然好想食片皮鴨，阿爸阿媽唔肯出門咁遠，唯有喺屋企附近搵。上網搵到呢間富東閣既片皮鴨話又好食又抵食，趁長假期前黎試下啦。酒樓環境舊舊地啦，有一張大枱一路用熱水浸緊啲餐具，務求令你放心食野。我哋入座時都無咩人，食到差唔多走時同層都差唔多滿座啦。環觀四周，唔係食緊火鍋就係食緊片皮鴨。我哋四個人就嗌左半隻片皮鴨一食，燒腩仔例牌，黃金豆腐煲同埋一碟類似生炒骨既野。片皮鴨上枱時暖暖地，肉好厚，皮唔脆，配料都夠。可能因為我太耐冇食啦，所以我係食得幾滿足既，不過父母評價就一般，覺得唔熱同唔算香，但佢地都覺得食完好飽，份量係算唔錯既。燒腩仔唔熱，暖暖地，但好脆，燒得幾好食👍，算係驚喜之作。至於個豆腐煲，有幾舊魚柳，魷魚咁，普普通通，少貴。而碟生炒骨，就好重雪味，炒得唔夠酸唔夠甜，唔好食。4個人埋單600$幾，想食片皮鴨同燒腩仔可以黎試下，其他野食就暫時評價麻麻。…查看更多

呢間野長期大量外賣車隊等候，同附近其他店形成強烈對比，今日我都終於試咗啦。我同朋友從一盒盒擺喺度等緊外賣仔黎拎既外賣睇到，最多人嗌似乎係個拌麵。不過今日想食飯，我地兩個人都嗌咗鹽酥雞魯肉飯。我唔飲茶，所以我個餐飲就轉左-$10優惠價嗌咗個芋圓糖水。唔好睇盒飯仔細細咁，打開都pack到幾滿，份量都幾多。有半隻蛋，有啲酸菜，有啲青瓜絲，有勁多魯肉，同埋塊雞扒。雞扒炸得幾好，唔會好多粉漿，又唔會炸到好熱氣咁，雞肉好滑。啲飯都煮得岩岩好，魯肉唔係肥淋淋油淋淋嗰款。我呢排胃口唔好，都差唔多食哂成個咁濟。芋圓糖水無影到相，芋圓係幾煙韌，糖水甜度適中，不過唔算令人印象深刻。只係附近工廠區都無咩糖水嗌，想食糖水時都可以試下。下次想試下拌麵同埋個鹽麴雞。睇人地個鹽麴雞飯盒啲雞好似份量少少地咁。下次試咗再寫食評啦。…查看更多

呢間野係關注組度俾人講到咁神級，放工就黎試下啦。位置唔算方便，地鐵出左都要行一段路。到左餐廳，環境細細都坐得幾逼下。我嗌左碗最出名既雲吞麵試下，四粒雲吞，啲蝦係好爽好彈牙，不過豬肉得勁少，食落去既感覺就似係一粒雲吞包得一隻蝦其他咩都無咁。 雲吞麵都煙韌，份量算少，食完個肚空寥寥。個湯底就相對上比較油同埋濃味咗啲，食完個口唔係太自在舒服。$33一碗.....不過不失啦，網上評價就有啲名過其實。可以一試，但你話再專登走黎食既話，我就唔會啦。以佢既份量，要喺度食到飽應該要嗌好多野。我對面位一對男女，兩碗麵加一碟油菜加一碟鯪魚球同炸兩，聽佢地講食咗190幾蚊佢地覺得貴。要食飽既應該唔會黎呢度，過下口癮都可以既。…查看更多

之前聽同事話呢間唔錯，自己一個試過幾次walkin都話無位要等至少十幾分鐘..lunch時間珍貴，終於今次打電話訂左位先，就有得試下啦。入到去，原來再入啲仲有幾張枱，唔知點解今日我見嗰幾張枱都無人坐，亦無「留座」牌，可能平時得我一個人佢唔開四人枱俾我？午餐都喺其他網友貼出黎嗰幾款，$58午餐原來包一杯餐牌上$40樓下既飲品，咁真係好抵。我嗌左個鴨胸意粉，上枱個樣都幾靚，啲蕃茄汁濃度岩岩掛到上啲意粉度，意粉煮到岩岩好軟硬度，鴨胸都有好多塊，少少咸，成個份量我一個女仔食會覺得都幾飽。個餐湯係白湯，凍凍地啦，無咩味唔算特別。杯榛子朱古力就好香。餐廳環境唔錯，野食呢個價錢呢個質素我都覺得唔錯，服務員都幾快手同有禮貌，如果唔怕行得遠我都會再黎食，想試下個蜆肉意粉😆。…查看更多

日日諗食晏食咩諗到頭痛，又唔想訂位，又唔想太油，又唔想太遠。雖然呢間台灣野都幾遠，但聽同事討論過話幾好食，咁就早啲出發試下。黎到都13：07啦， 排哂隊，收銀姐姐一腳踢，又聽外賣電話，又賣餐，又叫人執枱，又要搞啲外賣平台單，可以睇得出佢一頭煙。建議最好唔好中午一個人黎，因為佢係排隊落單買野，我一個人無辦法搵位，好好彩阿姐幫我落單時佢叫我hold一hold,即刻搵到個位俾我，如果唔係源源不絕既人流我根本無可能又排隊買野又搵到位。間鋪唔算大，但人手都唔夠，得一個送餐執枱一腳踢既姐姐，同個後生仔（應該係做水吧既，負責送餐飲）。出餐唔算快，麵食好似需時耐啲，我見隔離位都要等20-25分鐘先有麵食。我嗌左個鹵肉飯加夜市小食。碗飯啲鹵肉大大粒，幾惹味，又有三條菜仔，不過真係好大碗，我肚餓去食多左都食唔哂。夜市小食係鹽酥雞同花枝丸，花枝丸有三粒，好味🤤。雞都炸得幾好，不過全部岩岩炸起，食完之後個上顎有啲損左🤣。個餐加$10換杯蜂蜜檸檬，甜得濟同熱得濟，拎都拎唔到。總括而言呢餐都食得滿足，同勁飽。$70喺舊區食一個台式午餐.....如果佢個飯細啲，計番我$60蚊，就更好啦。…查看更多

本身諗住去食Ring's， 點知裝修緊，唯有係條街度行下睇下。因為想食意大利粉，見到呢間價錢又唔係貴，就入去試下啦。可能新開未請到人，一入到去一個侍應都冇，自己搵個位坐低。隔左一陣有人係廚房出黎，就落左個大蝦墨汁意大利粉。佢個lunch set包埋個湯同杯野飲。個湯應該係南瓜湯？（侍應冇介紹，餐牌冇講）一粒粒都幾好飲，係有少少凍啫。之後上碟意大利粉，有三隻連殼大蝦，一小束迷你豆苗，份量正常，望落去都幾吸引。個意粉味道唔錯，可惜三隻蝦都未烤熟，透明咬落去就知未熟。無奈有左唔敢食生野，唯有吐番出黎，齋食個粉。如果啲大蝦可以唔連殼上就好，一黎廚師可以睇到熟哂未，二黎我真係唔係好識用刀叉去殼。見隔離枱啲all day breakfast都好大份，有煙三文魚好似幾好食。可能遲啲再黎試下啦。不過希望侍應唔好用手去摸口罩外面，然後再用同一隻手拎餐具俾我。…查看更多

係呢間野未係咁出名之前，已經時不時黎食，後來愈來愈出名，次次都要排好長隊先入到去食，就減少左黎食既次數。本身我係好鍾意食米線既，加上鍾意食辣，所以呢間真係好岩我口味啊。最鍾意嗌豬軟骨竹笙豬紅蘿蔔芝士丸，帶阿媽食過豬腸木耳冬菇，佢都話好味。試過一兩次雞翼等小食，不過因為就咁一碗麵都已經好飽飽到食唔哂，所以都好少嗌，費事浪費啦。呢間野係好香，食落去係覺得好正，但唔好既地方都有，就係落好重好重好重味精。次次食到一半，已經覺得好渴。唔係因為食辣既渴，而係好似「X仔」系列咁，食完你飲幾多枝水都仲係覺得渴既感覺（感覺佢味精重手過「X仔」好多）。 以前佢仲會明目張膽大大包味精放係後門位置，驚死你唔知佢落左味精咁🤣。不過有時俾自己放肆下，都會去食味精麵既，因為真係好好食🤣。另一樣係佢既辣度好波動，有時嗌BB辣，但就紅過辣過我朋友碗小辣，好難捉摸。未有疫情前真係坐得好逼，而家有限制，反而坐得舒服左，唔駛成日坐係廁所門口睇住人出出入入。…查看更多

本身係見之前既食評見個滑蛋賣相唔錯，決定試下呢間。 嘩，一打開個盒，我以為自己嗌左「獻汁」叉燒飯，成盒野究竟有冇用到半隻蛋？？ 淨係見到好零碎既蛋碎，仲要啲叉燒燶到咁.......飯就正常普通飯堂既硬度，個肚好餓唯有推走啲「獻汁」食多啲白飯，不過唔掂，即使肚餓到咁我都唔想食啲「獻汁」。我食過既滑蛋唔係咁架😭。雖然飯堂$42蚊一碟飯唔應該有太大期望.......叉燒都有7-8舊，但肚餓時卻要食頹飯咁，真係好失望。重點：我部手機對食物係有自動美化色系功能。實際顏色比圖片淺淡好多。…查看更多

間野外面望落去UPUP DUPDUP，但平日都見有唔少人出出入入，估計唔差，就入去試下。嗌左碟淨咖哩魷魚，一碟九菜豬紅。魷魚32蚊,豬紅23蚊。當碟魷魚上到黎，已經好失望，本身都唔預大碟，但無諗過咁細碟😅，唯有希望味道搭夠。一入口，嘩！凍既？人生第一次食凍既咖哩，仲要無咩味道......好失望.......雖然碟豬紅都好細碟，但23蚊， 而且味道唔錯，就覺得合理啲。食完呢兩樣野，已經唔想再試佢其他野啦。隔離枱哥哥仔嗌左一細碗類似雲吞既野，一細碗麵，一細細細碗涼粉，承為70幾蚊，個人覺得唔抵。不過我見隔隔離枱有人嗌豬扒飯，雖然都係細細碟，但佢個樣食到津津有味咁，有興趣既人都可以去試下既。個人感想：環境，服務，食物質素同價錢唔係咁成正比。可以一試，睇下彩數。…查看更多

一直住係大圍，之前覺得晚餐價錢貴所以無食。今日朋友話想食西餐，見午餐價錢中中等等，就入黎試下啦。我地三個人，一個嗌左黑松露蟹肉意大利飯，一個嗌左安格斯牛扒，一個嗌左煎雞扒意粉.....最後一致認為好難食。問個服務員牛扒有幾重，答唔到。最後.......意大利飯食唔到蟹肉，個牛扒又薄又乾，七成熟變全熟，雞扒無味，個汁又無味，薯條係粗款薯條，不過淡而無味，亦唔脆。本身仲想嗌個fish & chips, 幸好無嗌。好彩朋友平日都係將啲碟碗食得乾乾淨淨，我地先叫做無浪費野食。:(…查看更多