Hoglund的个人专页

數蛇口影劇院附近食肆唔係太多, 計有海鮮酒家, 東北菜, 中式快餐粉麵, 燒臘飯店, 相信以康樂最有號召力.是日行完南水步行街, 又到午飯時間. 對內地燒臘(德記)無甚興趣, 就行返出蛇口新街穩食. 行過康樂, 見店面以坐滿, 另有其它人係度等位. 反觀斜對面馬路另一魚仔檔客人廖廖落落, 附近其它食店亦係人客不多, 就決定試試康樂. 行多個圈返到黎剛剛有枱, 好彩同侍應小妹單左聲, 唔係就會比兩個趕住入去既同胞坐左. 店面相當逼夾, 枱與枱之間空位不多. 如果食物係好食既, 呢個都唔係太大問題. 侍應小妹工作非常忙碌, 叫左幾次都攞唔到菜牌. 最後有小妹話牆上果個就係菜牌. 菜牌上選擇不多, 但客人亦可以落單用唔同既煮法.Order左個一個豆腐雜魚湯同一個番茄炆紅衫魚. 餸菜大都好快上枱, 相信係D魚晨早以運送到小店, 師傅一早劏好同清洗好D魚. 豆腐雜魚湯鮮甜, 豆腐滑, 雜魚祗認得有泥猛, 可幸湯無泥味.番茄炆紅衫,魚先炸過再用鮮茄炆. 炸過之後魚既鮮味都去得七七八八呢. 以前細個時屋企照顧我地幾兄妹既姑婆時常整呢樣餸, 魚先煎, 再用好多番茄炆. 太耐無食真係十分回味. 如果師傅可以落多D番茄再煮耐D會更加好食. 下次有機會可以試下清蒸魚.連下兩碗白飯, 食完快快走人, 唔好阻住老細番枱, 因為又有一大班客係門口等緊枱. 小店賣既都係平價魚仔為主, 唔見有豬/牛/羊肉類上枱. 喜歡食貴價海鮮或肉類既朋友可能會失望而回. 另外侍應小妹工作非常忙碌, 落order或要其它野時要有D耐性. …查看更多

係光明逛得差唔多又到午飯時間. 公明地方唔大, 相對食肆亦唔係太多. 中心區既食肆好多以排檔/快餐店形式經管, 另有好多排檔式食肆未開門, 睇黎衹做夜市. 行左一大圈, 光明大街呢段路有港式燒臘飯店, 粵菜酒家, 東北餃子館及湘菜館. 湘菜係我首選, 見樓面都有唔少客, 就入去試試.樓面差不多有二十張大細枱, 但燈光比較暗. 侍應哥哥小妹都算有禮貌. 我話睇睇餐牌先點菜, 侍應哥哥就話"沒事", 一直笑笑口企係旁邊等. 其它小妹都係一叫即到. 菜牌係我最喜歡既形式 - 多圖小字. 魚係呢期必叫之物 - 家鄉活煮魚, 用新鮮鯇魚, 紫蘇葉, 酸菜, 小紅椒粒及羗片滾湯而成. 鯇魚多細骨, 非我至爱, 但勝在魚夠新鮮. 湯有小酸帶辣, 紫蘇味重, 非常醒胃. 茄子豆角, 都係一般湘菜通病 - 多油, 但係炒出黎都熱騰騰, 送飯一流.家鄉紅燒豆腐 - 炸豆腐以花腩肉, 紅椒粒等同煮 亦係送飯佳品. 求求其其既一餐, 餸既份量唔小, 雖然油多左少少, 其實味度都幾ok, 加上侍應哥哥小妹都幾有禮貌, 比個笑呢. …查看更多

是日無無聊聊, 一早深圳灣過關. 隨便選了E19公巴到光明遊蕩一下, 全程10蚊, 只停大約10個站. 差不多45分鐘車程, 話咁快就到. 有雨既日子, 行街真係無咁方便. 好彩果日係小雨, 到左光明雨以經停左. 週維行下想去食個早餐先. 呢頭選擇不多亦唔見有茶記之類, 見呢度有咖啡茶/麵包賣就入去食個快手早餐兼偈下腳. 店子不大, 一半地方係cashier同擺麵包+糕餅, 另一半就擺在幾張枱兼賣咖啡茶凍飲/小食. 店後方有麵包餅房即制新鮮麵包. 因為地方不大, 所以麵包款式亦不太多. 要左個日式蛋卷及牛奶做早餐. 蛋卷面層鋪滿椰絲, 以些少忌廉作夾心, 尚算鬆軟. 牛奶就一般無咩味. 對早餐不大講求, 填飽肚子就算. 坐多陣就繼續行程. …查看更多

南山大道呢一段路比較少食肆, 除左附近有一間4星酒店+餐廳外, 以海月算有個最好既門面. 餐館標榜湛江風味, 小子無知, 對湛江菜一知半解. 想當然係小魚小蝦小蚧 ... 等等既海鮮菜式. 當日約朋友係佢公司附近午飯, 見海月好似坐得幾舒服, 二話不說就入去攞位. 11點多無咩客, 見窗邊有卡位就問服務員可唔可以坐窗邊卡位. 答案係唔可以, 窗邊位係要預訂. 當堂O咀, 你D窗邊位係望住個停車場同南海大道, 唔係望住海邊啵. 不過來食飯唔係來谷氣, 唔得就算. 我估D窗邊位係留番比D熟客. 言歸正傳, 唔等朋友來我落order先. 菜牌相當簡潔精美, 對湛江菜有簡單既介紹. 先選招牌菜清煲黃花魚. 菜牌上黃花魚照片買相不錯, 先將魚煎至金黃再放上湯上鍋. 但我既order好似白烚一樣, 就好似油鹽水煮魚 好彩黃花魚仲算新鮮. 第二道招牌菜水晶雞order半隻. 雞身比較細小, 肉質偏向有D咬口, 要40幾蚊既價錢係完全唔合格. 再加個上湯雜菜雜菇煲. 雜菜衹有西洋菜同白菜仔, 雜菇就衹有些少金菇, 其它欠奉. 西洋菜煮得過火太老, 湯底似味精水, 又一個唔合格. 服務員態度尚算ok, 希望今次衹係我唔好彩, 不過我唔會有下次. …查看更多

明香開業20年, 主打海鮮小炒, 同街另有分店, 兩店地方都非常寬敞. 光潔明亮. 午市晚市生意火紅, 自己同朋友都來幫襯過幾次. 今日同小妹華强午飯於此. 11點多來到未有咁多客, 坐底嘆杯茶先慢慢叫野食. 涼瓜牛肉 - 涼瓜夠淋身, 牛肉調得入味, 豉味夠, 炒得香口, 唔多油, 同香港某D小炒飯店炒出來無咩分別. 清炒大白菜 - 要少油, 厨房亦做得到. 清蒸桂花魚 - 魚身剛剛熟, 豉油調得夠味, 好滑. 呢餐食得非常滿足. 侍應哥哥妹妹反應有時慢D, 不過部長們都幾熱情. 呢間野價錢唔係太貴, 都食得過. …查看更多

是日華强北睇玩具, 知早前振華路一帶重裝後, 開左好多新食肆, 今日專程過黎睇睇有咩食. 快餐店, 湘川菜, 西餐, 粵菜等等, 各式其式. 不大肚餓, 隨便選左間快餐店門面既食D野. 店子有十多張四人枱, 夠光猛及幾干淨. 果日飯市以過, 所以客人不多. 主打快餐飯為主, 另有小炒及沙鍋雞, 套餐等等. Order左個家常笋干炒肉餐, 26蚊, 跟飯, 清菜及炖湯(是日花旗蔘老雞), 另再加蒜蓉炒菜心一碟, 13蚊. 唔知係唔係因為飯市以過既關係, 飯同湯都係暖暖咁, 笋干肉同菜心都係即炒, 所以夠熱. 笋干炒肉帶小辣, 味度可以, 湯就一般味精水, 菜心唔夠蒜蓉, 好在炒得夠油水, 但少左D蒜蓉香. 食快餐唔可以要求太高, 求其干干淨淨, 食得飽無事就ok呢.埋單時(不同正式快餐店咁比左錢先落order), 女部長幾好笑容. 呢度有免費WiFi, 可以一路食一路上網. 另外門口有台式奶茶賣. …查看更多

中午飯時份, 西鄉步行街附近除港式茶餐廳, 快餐店, 餃子店 ... 外, 算這間門面最見得人. 因有小雨, 唔想再行, 就試呢間.家鄉燒茄子小辣, 油太多, 見到都唔多想食, 好彩味度仲過得去, 衹食面一層, 仲要用茶過一過D油先得. 土豆絲骨頭肉小辣, 炒得夠干身, 雖未至於香氣四溢, 但比起茄子以經好上百倍. 茄子食淨半碟, 土豆絲清左九成, 埋單時侍應哥哥木口木面, 連飯 + 紙巾 41蚊, 平. 不過D service 同food quality deserve個差. …查看更多

是日天氣清爽, 係行街遊蕩既好日子. 以前坐公巴曾經過衣度, 今日就專程過黎行下. 與羅湖東門步行街當然無得比, 連西鄉步行街亦不如, 但總算係比打工一族消磨時間既好地方. 步行街內食肆不多, 主打都以湘菜快餐為主. 早上從華强坐幾蚊公巴過黎, 行到正午以經肚餓. 選址港鴻食午飯, 因為見D侍應小妹係街上招客時笑容滿面. 小店一般快餐店格局, 木枱木椅, 茶水是自助式. 午飯時間主打快餐. 當然我就主攻小炒. 餐牌菜式不多, 亦不會對食物有太大期望, 可以飽肚就算.點了個西紅柿蛋湯及土豆紅燒肉. 蛋花湯滾一滾就上桌, 番茄味和蛋味都唔重. 土豆夠淋身入味, 應是一早煮好, 加上紅燒肉, 五花腩位肥多瘦少, 再熱一熱上碟, 兩種食味好似係各有各一樣, 感覺總係有D唔對板. 不過兩樣菜份量都唔小, 食飽絕對唔係問題. 好彩食完之後全日都無特別需要去洗手間. 比個ok因為老板娘同侍應小妹都好好笑容, 食物價錢平及份量都幾大, 食味唔算太差. 食友未黎過呢度行街, 亦無需刻意過黎. …查看更多

三日假, 星期六就約妹子晚飯. 妹子收工都7點多, 南山大道食肆眾多, 可以慢慢行慢慢穩. 轉入海德二道, 原來衣度食肆商鋪林立, 更可遠望海雅百貨, 書城, 海岸城 .... 等等都近在只尺, 所以晚上遊人不絕. 各式食肆計有湘, 川菜, 重慶火煱, 潮州鹵水沙煱粥, 餃子, 牛肉麵 .... 應有盡有. 對潮州鹵水, 火煱等興趣不大, 見店名趣怪, 就選左鄉吧啦食晚飯, 街上眾多食肆似乎最旺係衣間.餐館本身以竹, 木裝飾為主, 加上幾個大紅燈籠, 另具一格. 8點多9點仲有9成客, 睇黎生意眞係唔錯. 餐館每日有一款特價小炒, 星期六係茄子豆角, 就叫黎試下, 另外再點左拍黄瓜, 平鍋魚頭王及干鍋牛蛙. 拍黄瓜, 瓜身比較老及硬, 唔夠爽口, 味ok. 食左小半碟就無食. 茄子豆角炒得香口夠味, 油稍多. 可能係是日特價, 所以份量比較小. 魚頭王用鯇魚頭, 酸菜, 豆皮等煮成, 帶小辣, 用小火爐上. 多台食客都點呢個菜. 魚頭幾新鮮, 豆皮亦夠淋身, 味道咸中帶酸辣, 食落幾開胃. 呢個菜要食得快, 因為煮得太耐D汁會變得好咸同好酸. 干鍋牛蛙, 肉多而大件, 不愧係牛蛙. 小火爐上, 用紅椒, 洋葱等同煮, 香氣四溢, 一句好味就足夠. 白飯用木桶上, 大約4-5小碗份量, 兩人食相當足夠. 飯後可惜無生果送.侍應小妹都算禮貌週到, 埋單都多謝前多謝後. 餐館價錢大眾化, 以後可以再黎幫襯. …查看更多

久未來過蓮塘. 是日無聊就上來一逛. 蓮塘街道比以前干淨, 亦有好幾座新建築, 如華潤萬家, 非常熱鬧. 閑逛到午飯時間, 蓮塘大街國威路食肆頗多, 都係主打東北, 湘川菜為主, 亦有紅荔村及港式茶餐廳. 見呢度幾多客人就入來試下. 茄子溜肉段 - 師傅幾重手, 油稍多, 味一般.魚頭豆腐湯 - 魚頭唔多所以湯味偏淡, 可幸無腥味, 而豆腐亦唔夠滑. 總括來講, 所試食物只係一般, 下次可以試其它食肆. …查看更多

去過兩次, 店子細細, 可以坐十零二十人左右.第一次食凍核桃糊湯丸. 核桃糊夠"杰"身但味淡亦不太甜. 湯丸應是手造, 比一般甜品店用既來貨湯丸滑, 皮夠薄, 餡亦多, 每份有5粒, 芝麻花生各有一D. 14蚊.第二次食凍綠豆沙湯丸. 綠豆沙似是落左豆粉, 無起沙, 綠豆唔多亦唔夠甜. 湯丸就好似上次一樣, 水準之作. 12蚊.值得一提係服務員既態度. 第一次去都ok. 第二次午飯後2點幾去到, 無客, 2個女服務員見我入來都無理, 只係坐係度玩手機, 等左成分鐘都無比menu我, 要自己攞, 最後要甜品師傅take order. 唔知佢地係唔係唔憂做. 希望可以改善一下呢.湯丸比個good, 其它就一般. …查看更多

前身即北街之大順清湯腩. 濶別差不多年幾, 今日收工經過市政大廈, 樓下有指示牌話新開張, 二話不說即飛奔上街市二樓熟食中心. 熟食中心地方幾大, 晚市有各式食肆可以選擇 - 小炒, 火鍋, 雞煲 .. 等. 地方算清潔, 有冷氣, 近百張枱, 坐得亦算舒服. 熟口熟面既老板老板娘, 見到份外親切, 寒暄幾句即來個自家例牌 - 清湯腩飯. 老板話新鮮牛腩食味比以前更好, 牛骨湯底更濃更香. 以經食左多次從未失望. 腩又分牛腩, 坑腩同爽腩. 另有白切雞, 鹵水鵝, 鹵水豬脚/豬肉/豬耳 .. 等新菜式, 老板特別强調全部新鮮肉類制作. 試過鹵水豬肉非常入味. 價錢比一般粉麵店清湯牛腩貴, 但覺物有所值. 係西環喜歡食靚牛腩既同好, 你地有口福了.…查看更多

從龍華坐3號觀光巴出到華强, 遠遠以望見個招牌. 以前經過以經想試下, 今日就的起心肝. 坐落已1點多, 仲有好多台客, 亦一路有客入黎. 鋪面相當寬敞, 20-30枱大细抬坐得唔逼, 兩面有落地大窗, 但室內燈光就比較暗. 先黎餐牌及一般前菜(無要). 餐牌由頭睇到尾, 有頗多特色既東北菜, 有D係第間東北館子見都未見過既, 不過自己一個人都食唔到咁多. 最後要左一個茄子肉絲燴麵及一個甜酸里脊(唔係好記得個名)..肉絲麵係干撈無甚特別但麵身幾爽口, 調味亦ok. 里脊上粉炸得香口, 而粉上得夠薄, 炸至金黄香脆, 甜酸汁調得不太酸不太甜, 甚合胃口. 值得一提既係呢個餸由上枱一刻直至掃清為止, 里脊肉都係十分脆口, 唔會因為有甜酸汁而"淋"身, 師傅既功力值得一讚. 服務方面就一般般, 都係一叫即到, 笑容欠奉果種, 對我呢D好食大過天既人黎講, no big deal. 呢間餐館值得番叮. …查看更多

係龍崗食完午飯後舊同事就車左我去巴士站坐車去皇崗返香港. 直通巴油麻地落車, 順便行去好耐無黎過既明記食碗粥當下午茶/晚飯. 雞什粥睇落夠綿, 料多, 但食落有小小燶味, 無叫佢換因為來來去去都係果煲粥底, 換黎都無意思, 快手清左D雞什食多兩口粥就走人. 希望今次只係我唔好彩啦. …查看更多

過到龍崗都成1點, 舊同事係吉祥地鐵站pickup左我. 問佢食咩好, 佢話試下西餐, 我就提議食辣野, 佢一家人食辣無問題, 於是就車左我黎衣間毛家菜. 以為呢間野同深圳頗有名氣既毛家飯店同一系列, 所以就無咩所謂. 前身係叫西典咖啡, 以前係龍崗做野時常到飯堂之一. 多時無黎龍崗, 十年人事幾番新, 好多地方都變左啦. 閑話少說, 呢度地方幾大, 共二三十張大細枱再加VIP房及閣樓, 坐得都叫舒服. 舊同事既小朋友先叫左個薄餐, 新鮮熱辣即整, 餅心帶點點紅應該係strawberry味, 但食落除左小小咸, 就咩味都無. 之後跟住上川北涼粉及泡椒皮蛋. 兩度凍盤除左辣之外就係辣. 涼粉唔夠味, 舊同事太太要叫小哥另外攞D醬油及醋調調味. 皮蛋無溏心, 辣味蓋過蛋味. 小朋友又叫左一個香辣串蝦, 蝦唔新鮮, 有D蝦串仲"nut"皮"nut"骨, 味度唔洗講只得辣. 外婆菜及清炒筍算係比較正常, 味度一般但唔夠熱, 好似擺左係廚房好耐先拎出黎咁. 最後既孜然寸骨亦係唔夠熱, 毫無孜然味, 亦炸得太干. 整體黎講呢餐係十分差, 食淨左一半野, 好彩早前係優品打左底先. 食完飯同舊同事傾D正經野, 要麻煩佢幫幫手搞D事, 呢餐更係我架呢, 連汽水紙巾白飯立立雜雜共銀192蚊. 呢間野比起深圳同級既稍貴幾蚊, 好食既就無所謂, 不過呢間就真係 .... xxx. 服務亦係一般. 食食下飯經理坐係隔離枱食烟睇報紙, 其實佢可以行遠少少既, 大把吉枱. 另外前菜既酸羅白舊同事太太都話唔入味. 佢地都唔係簡飲擇食既人, 所以我相信呢間野真係唔多掂. PS 叫左半只口水雞, 好彩佢地漏單.…查看更多