JS food的个人专页

諗住疫情過後，同媽媽 同初生BB去嘆個茶。入到去酒樓，無人幫手帶位都算喇，所以自己行入去搵位喇，見到有卡位 同響正角落，諗住行去坐。 點知個侍應話卡位要收三個茶錢，講完眼尾睇都唔睇我地，勁無禮貌，一副唔歡迎你，想你唔好幫襯嘅樣。咁我見其他卡位都係坐2個人喇，所以我問佢：點解人地得？我地唔得，我話俾3個人茶錢，我地想坐卡位。佢就好惡咁話：我地架BB車會阻住佢地條路！ Bb車大部我地明，咁你咪俾其他位我地囉。咁姐係間酒樓好撚大牌，你唔歡迎有BB車嘅客人喇。我地諗住一個半個侍應係咁姐，於是行去其他位，搵其他侍應幫手，😀結果都係一樣，一係望你一眼唔答你，一係就話：噢2位呀，望幾下就借D意行開。 我見都好多公公婆婆係度食嘅，相信你地都唔愁做我地呢啲未來公公婆婆生意，希望你地生意興隆。…查看更多

聽住西環嘅朋友介紹呢間日本嘢好好食，於是專誠嚟到一試。門面細小，感覺親切，一入到去個環境好舒服，日系設計，簡單又舒服，侍應亦都非常和善。職員介紹咗幾款燒物，其中令我印象最深刻嘅係秋葵！！平時自己唔太喜好秋葵，因為覺得佢口感滑潺潺，但知道佢有益，所以亦唔會特別拒絕，估唔到真係有驚喜，正🤤！佢燒得外面脆卜卜，入面有水份得嚟少咗果份成口滑潺潺嘅感覺，好驚喜！另一個喜出望外嘅係豚肉卷飯團😍佢豚肉嘅香味滲晒落啲飯入面，啲飯又唔會好黏嘅感覺，粒粒分明！另外一定要試佢嘅牛肋肉，牛肉燒得啱啱好，唔韌唔乾，啲好香嘅牛肉汁喺你咬果吓會佈滿口腔🤘！雞胸軟骨自己試過幾間日式串燒店，通常都乾巴巴，呢間嘅無論口感味道都別有一番感覺，佢唔會落太多調味料去掩蓋本身肉質啲香味，仲燒得岩岩好時間。我仲叫咗雞肝入口即溶嘅感覺一試上隱。我自己好鍾意食蘆筍，所以我叫咗豚肉蘆筍卷，亦都喜出望外佢連蔬菜類都可以做到外脆內嫩，蔬菜入邊嘅水份幾乎完整無缺，同燒香左嘅豚肉毫無違和感。西環呢間太吉，絕對係飯聚不二之選！😍👏…查看更多

好耐無見舊同事，同佢去左我地兩間公司的中間點The wave搵好西食，我地簡左去Mini Friday食，事關佢地有半自助午餐，岩哂我呢位大食積同事。餐廳面積都幾大幾寬敞下，樓底又高，裝潢佈置都幾舒服，環境唔錯，侍應帶左我地入座之後，輕輕介紹左有咩食，仲同我地講有需要歡迎搵佢地，都幾有禮貌同親切。呢度嘅set Lunch 由$88起，到$198都有，每個餐都會有個主菜、餐湯、墨西哥脆片，另外仲可以係自助沙律吧、冷盤區、甜品區、是日精選小食區任簡野食，另外，仲有再包杯野飲，午餐有咁多野食，咁豐富，返工都寧捨醒神。主菜我地簡左XO醬忌廉帆立貝意粉 同埋香煎鴨胸配紅酒提子燒汁。餐湯今日係南瓜湯，入口幾甜又順口。今次就小食區有春卷、麥樂雞、魚蛋、芝士腸，沙律區有雜果沙律、吞拿魚通粉、紅菜頭沙律、自選沙律同醬汁；至於甜品今日就有泡芙、蛋糕仔同玫瑰椰果糕。我同同事樣樣都試哂，哈哈！春卷、麥樂雞入口都仲係熱辣辣，應該係剛炸起，香口！魚蛋彈牙同咖啡室汁都夠辣；芝士腸好似用左茄汁焗豆隻汁煮，甜甜地。自選沙律嘅菜都夠新鮮，配個醬汁簡簡單單又夠健康；我地最鐘意食玫瑰椰果糕，入口彈牙帶少少花香，都幾好食。意粉配上三大粒大大隻嘅帆立貝，帆立貝好新鮮又大大粒，入口好爽口鮮甜。呢個意粉有驚喜，XO醬同忌廉呢個配搭真係未試過， Creamy得黎，帶少少微辣，醬汁好夠，意粉軟硬適中，D醬份量好夠，啖啖意粉都充分咁俾D醬包住，個醬配意粉意外地好食。香煎鴨胸配紅酒提子燒汁，鴨胸煎得好靚，入口一啲都唔韌，好有咬口，食落都幾Juicy好有鴨香味，紅酒燒汁吊味功能十足，令到道菜更加香口，個汁同個肉都幾夾，唔錯。有咁多野食，環境都好坐，埋單都$250有找，都幾抵食。…查看更多

同朋友簡簡單單去食一餐，友誼唔需要用金錢去推砌，有時平食，但可以有個空間環境俾我地放放鬆鬆去傾下計就已經好好，今日我地就去左呢個餐廳到Hea下啦。平凡中帶點驚喜，估唔到黎到呢D細餐廳都有小驚喜，呢度嘅店員服務態度十分好，我地唔知食咩好，肥哥哥就好熱情，同好耐心咁逐一介紹，同推介今日咩野食夠好。火車頭河粉： 有生熟牛肉，牛丸。識食越南粉，一定係食個湯。首先湯要夠熱，牛肉上台時係生既，但係湯夠熱，牛肉就會熟，就可以自行浸到塊牛去到自己想要既半生熟嘅程度。第二係個湯底味夠唔夠濃香，食得出呢個湯頭唔係出面果d咁落半桶水師父整出黎嘅味道，而係真正用牛骨煲出黎，有火喉嘅湯頭味，配埋d香料，牛骨香味好出。香茅雞翼撈檬：夏日炎炎，總會想有D涼浸浸嘅野落下肚，雞翼好香香茅味，炸得黎夠脆口，但又唔會過油，雞肉入口唔會乾身，咬落仲幾juicy。配菜有青瓜絲、紅蘿蔔絲、乾蒜等，份量亦十分多，最鍾意撈檬多菜，口感豐富好多，有d似沙律既感覺，配埋泰式嘅撈檬汁，酸酸甜甜又清涼，真係好好食又消暑。而且個份量好夠，我地兩個女仔share兩個面都食唔哂。越南六式小食拼盤新出品，餐牌上係未有，肥哥哥推介。份量都係大份，四個人share都可以。有牛油蝦，扎肉米紙卷，大🍤米紙卷，木瓜沙律，黃金魚皮，帶子春卷。其他野都好好食，但最鍾意嘅都係牛油蝦同帶子春卷，牛油蝦夠香牛油味。帶子春卷即叫即炸，表面香脆加入面個帶子林林地既口感好好。佢枱上面既調味料係有 heart既， 除左必備魚露之外，仲有越北是拉差醬， 河內沙爹XO醬同埋越式海鮮醬，跟足正宗越南pho既食法，要溝埋一齊點牛肉食。另外一提佢跟面既魚露唔辣，但係如果再加枱上面果d就會有辣味。…查看更多

位於金巴利街呢個百花齊放既美食街，有一間特別既私房菜。呢到集火鍋、刺身、私房菜於一身。本身想試下火鍋，但有好多配料已經無晒，想食真係要早d到!但無火鍋唔緊要，仲有呢到既招牌菜清酒卜卜蜆，再叫其他小菜都可以係豐富既一餐。卜卜蜆細細隻，就算成煲食晒都唔會食滯，唔需要擔心無胃口食其他小菜。清酒加上蜆湯，酒味唔濃，平時少飲酒既朋友都可以接受到。小菜叫左個薑蔥焗桶蠔同馬拉戔炒生菜。桶蠔大大隻，配合薑蔥焗，十分惹味。馬拉戔炒生菜則爽口開胃。成餐飯夾埋都係五百幾六百蚊有找，係幾抵食既一間私房菜。…查看更多

相信近排大家都唔想食放題，等我今日介紹大家食返d亂世佳餚。呢間丼飯店有兩個最出名ge丼飯，分別係龍王丸同蟹王丼，望住餐牌都流晒口水。一場黎到當然要食下招牌ge丼飯。呢到仲有期間限定ge時令丼飯，所以我最後決定一試招牌ge龍王丸同期間限定ge蟹三味丼。龍王丸，顧名思義龍王就係主角，見到咁大隻龍蝦頭，果然稱得上係龍王！龍王ge頭多肉多膏，千祈唔好為左儀態而放棄咁好ge享受。丼飯加入左蛋黃醬，邊食邊有種花之戀壽司ge既視感。蟹三味丼作為期間限定當然都唔輸蝕，如果大家趕得切去食，我都會推介蟹三味丼，因為丼飯上面有三款唔同蟹肉，款款都甜美鮮嫩。建議大家可以先試原味，再試加青檸汁，個人傾向加青檸汁，令呢個丼飯同蟹肉更清新開胃，突出鮮味。除左丼飯，呢到仲有唔少小食，我最後揀左蒲燒鰻魚(半條)。上碟ge時候已經切好，一口就可以品嚐，隨碟附上山椒，但個人認為原汁原味已經好好味。呢間丼飯店仲有一大亮點，就係佢免費無限任添ge麵鼓湯。同一般係香港ge日本餐廳飲到ge麵鼓湯唔同，由於加入左木魚碎，令麵鼓湯飲落有陣陣魚香，用暖水壺倒出，味道溫度恰到好處，令人不能自拔，瘋狂添飲！…查看更多

男朋友係上環返工，作為貼心嘅女朋友間唔時都會去上環搵下男朋友探下佢班，陪下佢食飯，表現貼心嘅一面，朋友介紹左呢間老撾菜嘅餐廳俾我地呢對井底之蛙黎試一試~ 一出Lift就見到色彩斑斕嘅牆身同招牌，入到餐廳見到好多好有東南亞風情嘅器皿，廚房頂頭嘅黑板畫左D日常生活情景，裝飾亦都隱約帶點異國風，非常特別。檯面上的Menu亦都好特別，除左有好多菜式簡之外，再仲部分內容係簡介呢間餐廳同老撾的背景，另外，有個貼心嘅位係，仲有一頁嘅Menu係專門俾素食者嘅餐單，岩哂一D食得好清，甚至係食素人士。唔多餐廳會咁樣特別照顧素食者，欣賞呢種誠意同心思！我地叫左是冧彈雞($58)、白咖哩雞肉見求($78)、素薄餅($68)、是拉差辣雞翼($48)、炒時菜($78)。是冧彈雞，賣相非常靚，紅紅綠綠，炸雞保持肉質嫩滑，入口好香香茅味，仲有乾蒜、青瓜、銀芽、炸兩同香科伴碟，配埋個特調醬，非常好食！本身我地兩個都幾鐘意食雞翼，仲聽店員講話係得獎作，所以非常期待！呢道菜非常貼心，將雞翼一開二，單骨雞翼食嘅時候方便好多，乾淨俐落！單骨雞翼先炸完，再用秘製醬汁再煮到稠身，再放上炸乾蒜、辣椒配搭，另外仲有烤過的竹葉伴碟，賣相吸引、香氣十足。雞翼入口嫩滑，是拉差醬十分出色，好惹味！白咖哩雞肉見求，用左個仿竹盤碟，好似以前農家人食飯嘅竹盤子咁，唔知老撾人以前係咁真係咁食飯嫁呢，呢個白咖喱唔會太辣，聽店員講因為香港人無當地人咁食得辣，所以特登調輕左個辣度，加重返個椰香味。呢個米飯由燸米同紅米混合煮食，入口煙煙韌韌，同唔會有平時食紅米飯果種太乾的感覺，另外仲配有茄子、豆角、栗米仔等配菜，仲有現炸的細細口薯角，份量非常多，十分飽肚，而且都好好食！是日炒是菜唔好以為佢係普通野，昤令芥菜本身都夠鮮甜同爽口，而個調味非常特別，係落左D芥末落去煮，而上面嘅蝦乾勁好食，入口甜甜辣辣，我諗唔鐘意食菜，怕單調無味的人絕對可以一試！素薄餅，份量同樣十分多！佢係用米紙同蛋做的餅底，上面再放左好多嘅菜蔬！食個陣建議卷一卷咁食，XD廢事D菜跌哂出黎！我地今次係呢個餐廳嘅體驗非常好，而且性價比非常高，同十分有特色，而最重要係店員都好Nice，同睇得出餐廳好有心去做美味俾顧客。…查看更多

同男朋友去左銅鑼灣行街街買衫買鞋準備迎接秋冬嘅到黎，大出血之後，我地兩個都好鬼肚餓，而銀包入面嘅子彈亦都所餘無幾，所以就沿住謝斐道行去搵好西食。見到呢間湯火功夫，門面裝飾都幾新同埋乾淨，而且價位同茶記差不多，有得試下新口味同平時食開的茶記常餐，我地兩個二話不說簡左呢個黎嚐鮮。呢度嘅野食有D似係重慶車仔麵咁，由湯底、麻度、辣度、菜粉、粉麵，到餐飲都係任你自己自由配搭，填好張菜單俾店員入單就得。呢度有4款湯底可以簡，有招牌麻辣燙、無湯麻辣拌、番茄湯底同泰式冬陰功湯湯底，有中式，又有泰式口味。粉麵方面，有河粉、粗麵、油麵、細麵、米線、公仔麵、薯粉、米粉，選擇都幾多。菜蔬有差不多20項可以簡，而丸呀、肉呀、海鮮加加埋埋差不多有成30款選擇，而麻度辣度都可以由唔辣調到去大辣都可以，無論你係食素、食肉獸、食唔到辣嘅，無辣不歡嘅，係呢度都一定會簡到岩食嘅野！男朋友簡左小麻小辣嘅招牌麻辣湯米線，配通心菜、唐生菜、重慶酥肉。我就簡左唔麻唔辣嘅麻辣湯薯粉，配油麥菜、菠業、魚腐。如果簡唔辣的話，會食到比較重D嘅花生醬味，味道類似擔擔麵湯底咁。我地試左米線同薯粉，一致覺得薯粉好食D，因為個口感Q彈，同埋好索味，入口更香濃，天加下飯。配菜份量都幾多下，個人幾鐘意呢度多菜類簡，因為好多餐廳想搵條菜食都好難。呢度$60幾蚊食到好飽，係銅鑼灣黎講性價比算係幾高了。奶茶茶味香濃，入口都幾滑。酸梅汁比我想像中易入口，無想像中咁酸，入口只係少少酸，都幾清涼。凍奶茶 酸梅汁。…查看更多

自從反送中活動開始，唔覺唔覺已經4個幾月LO，網上面講起邊D係藍絲餐廳，邊D係黃絲餐廳，果刻先發現原來有好多餐廳都係大集團連鎖式經營，有特色，有Heart的餐廳真係買少見少。行去宜昌街搵野食時，見到一間門面好日式的餐廳，望望Menu，發現原來係立食版Omakase，個概念幾得意，本時對Omakase的印象都係好精緻，無千千聲都落唔到樓嘅野，好奇寶寶於是拉左男朋友入去一試。XD估唔到意外發現到好西，男朋友食完即刻話再搵日再黎食，認真高評價。立濱的鋪面唔大，一眼睇得哂，大約可以企到十個客人。牆身係非常有日本風情的櫻花、雪山的風景畫，木制傢私同裝飾，乾淨簡潔整齊，第一印象唔錯。師傳發辦壽司盛($298)壽司盛十分推介，廚司嘅心思，同對味道的追求都充分咁表現左出黎。先由旁邊的伴菜講起，有薑片、蒜頭、芥末，佢地嘅味道都突登整得比較淡D，目的在於想喧賓奪主，薑片帶微酸同辣，入口爽口舒服；蒜頭十分驚喜，入口無蒜果種蛋烈嘅辣同氣味，入口只有爽脆，唔食蒜的人都入到口；芥末入口有D夥粒，味道好輕，配壽司食十分剛好。壽司用上上等的日本珍珠米，口感煙韌、晶瑩爽口，師傳握飯的大小剛好，飯唔會太大舊，唔會太實，剛好一口一件壽司，每件壽司都預先放左些少芥末係入面，為壽司提鮮，食材亦十分新鮮，唔會食到有腥味，呢度嘅壽司十分正宗，而且根本唔洗再加咩鼓油或者再額外加芥末，本身已經十分好食！黑松露帶子壽司，帶子本身味淡，所以師傳就加左少少黑松露係面，入口黑松露即刻係口入面散發，帶子嘅味再慢慢過黎，唔知係咪因為有呢種對比，帶子嘅味道反而意外地突顯左出黎。柚子啫喱金目鯛，啫喱係師傳自家調制，入口酸酸甜甜，非常有趣。阿根廷赤蝦，蝦味更重，肉厚肥美，上面再打上少少海膽，好好食。北海道海膽，鮮甜的海膽帶有海水味，入口即溶，濃郁嘅味道係口入面瞬間散開。中吞拿魚腩，脂肪唔太多，入口爽口好香魚味。深海池魚，池魚本身味比較輕，上面有少少生洋蔥絲，入口辣辣地，好好食。燒左口魚入口好滑，完全唔洗咬，就滑左入肚。件件都好好食，超正！大吞拿魚腩($168)，三大塊頂級擺係你面前，真係口水都流哂出黎，脂肪分佈均勻，入口魚味味四散，咬落爽口，實淨，超正！立濱丼($188)，超級足料的丼飯，有海膽、阿根廷赤蝦、三文魚、帶子、蔥吞、拖羅、吞拿魚等，上面仲有大蔥、芝麻、芥末等配料，呢個丼的食才同樣新鮮可口，而且份量十足，我同男朋友一齊食都覺得好多好飽！活赤貝($36)，橙紅色，帶光澤，入口肉質爽厚，味道好鮮甜，好幸福呀！火焰芝士三文魚($15)，濃濃芝士溶左係三文魚上，入口濃郁。食完正餐之後，師傳仲好好咁請我地食阙餅，入口涼浸浸，QQ彈彈，賣相好靚之餘，仲俾我地發現塊竹葉上面剪左個「立」字，認真有心思。我同男朋友食左咁多野，埋單都係每人$400左右，野食十分高質有Heart，性價比非常高，呢間餐廳係正反送中時開業，生意都連帶受影響，大家記得去支持下啦！…查看更多

呢個老媽台式拌麵台灣即食麵係台灣都算始祖, 引入香港果時都風摩一時, 牽起一鼓台式拌麵熱潮。 雖然呢鼓熱潮依家就已經開始冷卻左好多, 不過又有新攪作, 就係發展到實體店。 我一向都係台式拌麵既FANS, 因為最鍾意食關廟麵,有口感之餘又可以掛汁唔會食落好似成口粉。之前知道佢係將軍澳已經想試, 但係成日嫌遠又唔順路。所以今次新開左係我屋企附近咁就無籍口啦, 一定要約埋同我一樣係台式拌麵鐵粉既朋友一齊去。滷鴨舌 $46鴨舌滷水味夠濃又夠淋, 明顯滷得夠哂時間, 好有台灣夜市嘅味道。最驚有D煮得唔夠時間果D, 用好多牙力都分唔開骨和皮!澎湖花枝丸 $32新鮮即叫即炸, 有六半打, 脹卜卜金橙色好靚, 一見到就好有食慾, 攪到我忍唔住一上台就即放落口仲辣親個口。 食得出係台灣入口既花枝丸, 夠香口彈牙,不過最出色係個汁, 一定要點黎食。川味三寶牛肉麵 $78拌麵就食得多, 今次就特登揀左個湯麵試。湯底是台灣牛肉麵的湯底，川味帶有少少辣味，不過個辣味一般唔係少少辣都食唔到既人都食到。三寶盲包括牛筋、牛展同埋牛肚，三者都炆得夠淋，而且都好入味! 麵底就可以揀關廟刀削麵粗麵或關廟幼麵，而我同朋友就當然都係揀左粗麵, 貪佢夠口感之餘又掛汁。不過呢到唔知係咪就返香港人口味,呢到既麵就偏淋既。黑糖珍珠鮮奶 $33黑糖珍珠鮮奶好飲，有奶味又珍珠又算煙韌。如果鍾意甜既人, 建議叫佢落多啲黑糖就好飲啦。阿里山高山冷泡茶$22純茶又幾香, 有茶味都唔錯。…查看更多

同男朋友唔覺唔覺就拍左差不多3年拖，又到左每月嘅紀念日，朗晴坊不嬲都多野食，今次我地就好左一個都幾有特色嘅餐廳，係間阿仙奴球迷博物館餐廳，叫做Lockerroom Dining，一入去就知道店主有幾愛阿仙奴，店員著哂波衫招呼客人，牆上一個個相框架起左有簽名嘅波衫，有一道牆貼哂各路波星嘅閃卡，同埋唔少球隊的周邊商品，如果男朋友係超級球迷，呢度一定岩哂佢，同埋一定會同店員好好傾！餐廳晚市以套餐為主，由$118到$248不等，包是日精選沙律、餐湯、蒜香牛油法包同埋餐飲，而且惠顧套餐，同可以用6抑價錢加購一份自家甜品，睇套餐內容都幾抵食。是日精選沙律用果醬樽黎裝住，賣相都幾精緻，玻璃樽入面有沙律菜、車厘茄、‘甜椒、同埋蘋果爆珠，另外仲俾黑醋汁食客自行添加，味道酸酸甜甜，非常醒胃又清爽。是日餐湯係南瓜湯，上檯有淡淡嘅南瓜香，湯質地濃稠，入口濃濃嘅南瓜嘅甜味，仲隱約食到D南瓜絲，十分足料。蒜香牛油法包，十分值得一讚！上檯時陣陣蒜香撲鼻，外皮香脆，麵包芯就入口軟綿，上面果層厚厚的蒜蓉，入口濃濃的蒜香，香口但唔會覺得太咸太膩，呢個飯前嘅小食非常好食。主菜之一，燒烤醬西班牙黑毛豬肉拼北海道元貝 ($198)，黑毛豬肉不單止厚身,仲好大件，豬肉用燒烤醬煮，非常入味，而入口肉質係爽口彈牙嘅，元貝大大粒又新鮮，味道亦非常不錯，伴菜有紫薯蓉、燒蕃茄、羽衣甘藍、荔枝，賣相精美得黎，亦令到菜嘅味道得到平衡，唔會覺得只食肉而有種膩嘅感覺。法國野菌飽魚雞肉香草意大利燴飯 ($148)，大大隻飽魚放係燴飯已經十分吸睛，意大利燴飯配上雞肉、蒜粒、白草同白汁去去煮，味道非常濃郁香口，雞肉雖然同燴飯一齊煮，但肉質都仲係好鮮嫩滑口，燴飯嘅軟硬適中，而且份量十足，二個人食都覺得飽肚。意式芝士蛋糕 ($35)，賣相好靚，睇得出十分用心，上面鋪左D Oreo 曲奇、士多啤梨、Cream，下面再有芝士慕絲，最底再有海綿蛋糕，口感非常豐富，個蛋糕唔會太甜，岩哂我同男朋友口感。無論係唔係球迷都好，都十分推介黎試一試，事關無論食物質素、環境、服務都非常好，絕對值得一試。…查看更多

唔知係咪因為近排市道唔好，好多餐廳都推左好多唔同嘅Promotion吸客，酒樓就推左D中式自助餐，岩哂男朋友呢位中菜愛好者！好多時得2個人的話，明明想食嘅菜款有好多，都無機會試到，今次可以一次過每樣試少少，眼闊肚窄嘅我地，終於有機會可以大試特試！京香閣呢度嘅2小時放題，分左兩個價位，A餐係$268，B餐係$228，最大分別係一個跟加拿大龍蝦，價錢平D嘅就跟個巨型虎蝦，兩個餐都會跟碗蟲草花花膠燉雞湯，而部分野食自取，有一部分野食就要用點心紙點。是日靚湯係蟲草花花膠燉雞湯，果湯都幾濃稠，花膠好有咬口，都幾鮮甜。加拿大龍蝦 同 虎蝦都大大隻又新鮮，肉都鮮嫩肉厚，肉味都幾濃，爽甜，個醬汁酸酸甜甜同有少少辣，食落去都幾香口，蝦肉彈牙爽口，質素唔錯。京式片皮鴨係可以自己DIY嘅，皮一籠十片，Keep 住用Gas爐維持熱度，旁邊有大廚係度片一塊塊嘅脆鴨片出黎，另外再有哈密瓜、青瓜、大蔥同醬汁，俾食客按自己喜好自己夾，再自己包。個鴨肉都幾Juicy同埋皮脆，本身諗住配哈密瓜會怪，但所有野Mix埋一齊，同配埋個醬汁食，又意外地夾同多左一份爽口清甜感。檯上面呢D係唔洗點菜，任你自己嘅菜肴，而涼拌野比較多，自選區我有幾樣野最鐘意食同推介嘅，個涼拌茄子，入味得黎佢仲保留到茄子本身嘅口感，調味幾特別，幾好食；涼拌麵，帶少少微辣，麵質口感彈牙；而手指青瓜唔會太酸，爽口入味同好開胃。呢度嘅點心同小炒都幾出色，仲要係自助餐都有呢種質素。小籠包，應該係即叫即蒸，所以夠哂熱辣辣上檯，包皮夠薄，用筷子夾起黎嘅時間見到滿滿嘅湯汁好似就快要跌出黎咁，超興奮。XO醬炒螺片，螺片同荷蘭豆、XO醬去炒，上枱時香噴噴，陣陣鹹香令人垂涎，入口香辣惹味。翡翠炒蝦仁，上枱時香噴噴，翠肉瓜保持到嫩綠爽口，蝦仁大大粒好蝦口，加左少少鹽去炒，清清地幾好食。 大千雞原來係用左花椒、辣椒、大蔥等去炒嘅，雞肉唔係冰鮮貨，入口有雞味，同埋都仲係好嫩滑，帶D麻麻辣辣嘅味，好食。上湯翡翠苗，炸左D蒜僻草青味，翡翠苗配魚湯湯底，清淡鮮甜。呢度嘅自助餐野食水準都幾高，可以試到咁多野，都真係一個幾唔錯嘅選擇同享受。…查看更多

每次經過旺角都見到好多人排隊，一直都好想試，咁岩近排因為送中，經過時，見到難得少人，即刻九衝去試一試！牛油果蟹肉凱撒沙律一粒粒厚切牛油果，配上啖啖蟹肉，沙律菜亦都夠新鮮，整個配搭，好新鮮特別，入口清涼，爽。扒虎蝦墨汁意粉扒虎蝦都幾大隻下，新鮮夠哂彈牙，意粉煮得啱啱好軟硬適中，唔會太硬亦都唔會太淋，加上白濃墨汁嘅味道，加左少少辣汁，辣辣地成個配搭好好，好突出。食完同朋友依起棚牙對望，覺得好搞笑😂😂三重芝士大蘑菇黑松露牛肉漢堡超級無敵勁邪惡三重芝士，加埋黑松露醬更加超級無敵勁邪惡，牛肉煎得啱啱好好夠juicy，好重牛肉味，加上厚一厚大蘑菇 ，口感10分好士多啤梨乳酪厚焗鬆餅清清地一個鬆餅唔會太甜，士多啤梨夠香，加埋乳酪一齊食，意外地好夾，鬆餅做得好好好，鬆有口感同埋夠香濃整體來講呢間鋪頭值得一大班朋友一齊吹吹水慢慢傾計，又可以食到正餐，又可以食到甜品嘅好地方，唔使走來走去十分夠方便，態度方面員工每一個都好細心介紹食物同會細心同你講鬆餅需要30分鐘製作。食到一半時有位員工主動走過來同我地講幫我地起鬆餅，唔使我哋等咁耐，十分細心。…查看更多

係觀塘返工嘅人，無去過駱駝漆大廈的話，真係枉為人，事關呢度係集購物同美食嘅好去處，雖然唔似商場咁有個好清晰嘅目錄俾你睇哂大廈有咩行有咩買，但正正係咁，先會俾到你唔少嘅驚喜。呢度除左有日韓泰等各國特色產品、蔘茸海味、頂級冰鮮肉之外，仲有行李箱、家電、玩具店、按摩店等，你估唔到嘅野賣，係呢度可以足足行一日！是日Happy Friday同左男朋友黎呢度食好西，打算食飽飽再好好行下。呢度主打台灣野，除左一定唔少得嘅牛肉麵之外，仲有刈包、拌麵、滷肉飯，仲有好多特別台灣小食簡！選擇都幾多下，如果簡牛肉麵、拌麵同滷肉飯的話，加$32仲可以任何小食添，相當抵食。前菜因為價錢都幾抵下，所以我地叫左好浮誇咁叫左4個小食XD，分別有左手拍青瓜、蒜泥白肉、白灼時蔬同宜蘭蔥油雞；而主食我地就叫左招牌紅燒牛肉麵 同 花枝丸拌麵。手拍青瓜($20)手拍青瓜，入口十分清涼，青瓜處理得宜新鮮，仍然保持到青脆爽口嘅口感，調味亦都剛好，酸甜剛好，十分開胃！蒜泥白肉($32)同係台灣食嘅蒜泥白肉有D唔同，佢唔似傳統白肉咁多脂肪位，用左d腩肉位，肉比脂肪部分多，上面鋪上蒜泥、芝麻同特製微酸嘅醬油，入口非常香口。再夾埋青瓜一齊食，剛好中和食大量肉的油膩感，同時又可以保持我地嘅戰鬥力，廢事未食主菜先飽左。白灼時蔬($15)是日新鮮健康椰菜，配少少蠔油食，簡簡單單鮮甜又好食。宜蘭蔥油雞($63)呢度菜令我諗起客家菜，客家菜都好鐘意放好多紅蔥加醬油去煮雞。呢隻雞煮得十分出色，原因有三！第一，雞件好嫩好滑同好冰涼，雞件應該手起刀落，刀刀有力，所以食雞時，唔會食到有碎骨,雞皮脂肪唔多，皮係爽口，入口唔會覺得肥膩，而肉非常之嫩滑唔會鞋口，就連最易煮到鞋口嘅雞胸都係滑，好食嘅；第二，醬油調味好食，紅蔥、乾蒜、芝麻、醬油調配比例得宜，味道唔會太咸；第三，就係價錢，$63食到半隻雞，隻雞唔係冰鮮雞，勁有雞味，而隻雞啖啖肉，非常之抵玩！招牌紅燒牛肉麵($73)紅燒牛肉湯湯底湯頭夠哂濃郁，牛肉同樣值得一讚，事關我唔鐘意食D全筋或者全肉嘅部位，而店位剛好俾左D半筋半肉嘅牛肉我，咬落有口感之餘，又有筋嘅彈牙口感係度，牛同白蘿蔔煮得夠腍夠入味，而麵身煙韌有咬口，招牌菜無失手，Good！花枝丸拌麵 ($58)花枝丸即叫即炸，所以上檯時出哂煙，入口脆卜卜，仲好彈牙好Juicy，同埋佢係有少少用鹽酥雞果種調味，所以好惹味，唔會覺得好似齋食炸粉咁。拌麵有滷肉、酸瓜同酸菜(男朋友叫走酸菜) 等，配埋D帶少少酸嘅醬油Mix埋一齊，又係另一道開胃菜，麵地就同牛肉麵果個一樣。呢一餐我地食得好飽好滿足，一致裁定可以再戰！…查看更多

土瓜灣北帝街出名多野食，餐廳款式亦都好多元化，一到夜晚就會見到好多車泊係度，個個都係哂呢條街覓食。男朋友情有獨鐘中菜，係出面望入去見到幾近滿座，估計味道應該唔錯，就萬二個放心咁簡左呢間黎醫肚皮啦。入到去餐廳嘅職員即刻好熱情咁迎接我地，除左招待我地坐低，上菜之餘，仲會同我地介紹下呢度有D咩好推介。店員後面再返轉頭時，拎左個前菜俾我地試，話係送嘅，雖然唔知係咪檯檯都有，XD但我地覺得好被寵嘅感覺。本身我夜晚唔飲得茶，會一晚都訓唔著，不過呢度嘅茶係蕎麥茶，岩哂我呢D會訓唔到嘅人飲。老火湯係男朋友去親食中菜必點嘅野，時日靚湯係老黃瓜紅蘿蔔粟米排骨湯，一睇個6個湯嘅色水就知煲左好幾個鐘下，飲落順口超甜，夏天清熱消暑岩哂！芥末冰鎮秋葵，冰鎮苦瓜就食得多，冰鎮秋葵就真係第一次試，秋葵應該先過水後，再即刻過冷河，所以入口仲係好爽口，店家仲會再俾埋芥末同壽司鼓油你，味道意外地配合，清涼帶少少攻鼻微辣，感覺非常有趣新鮮。順德排骨粒，用錫紙包住排骨同配菜去烤焗，打開錫紙果下除左保持到肉嘅彈牙Juicy同爽口外，味道仲非常入味。上海小籠包(4隻)，近排食過嘅小籠包入面，係最好食嘅一間，新鮮即叫即整，所以夠哂熱辣辣上檯，包皮夠薄，用筷子夾起黎嘅時間見到滿滿嘅湯汁好似就快要跌出黎咁，超興奮。擔擔麵，呢碗麵非常大碗，夠哂我同男朋友一齊食，幼滑嘅麵條，惹味麻辣湯料，伴著豬肉碎、蔥花、花生醬等，再放埋花椒油落去，碗麵一開始唔係好辣，但係愈食愈起勁，每食一啖，都好似有野係條脷上面跳下跳下咁。蒸頭腩，一道特色家常菜，將魚切件，連埋木耳，再快火蒸，再加上蒸魚鼓油，簡簡單單但好食，而伴住魚蒸嘅木耳吸收左魚同醬油嘅味道，好入味！馬拉盞蝦乾炒通菜，鑊氣小炒，上枱時香噴噴，陣陣鹹香令人垂涎，入口香辣惹味，馬拉盞雖然唔係咩矜貴野，但呢個平民菜式卻可以牢牢咁鎖住老老嫩嫩嘅胃。呢度環境同服務都唔錯，而價位亦十分合理，唔怪得咁多街坊都黎幫襯，呢度仲有NowTV俾一班波迷可以電視機撈飯，同埋飲住酒狂歡睇波，可以想像到一到睇波嘅日子，呢度有幾熱鬧同開心。…查看更多