ckinny的个人专页

坐巴士92 R由尖沙咀入到西貢。喺網上已經知道有呢一間舖頭。喺西貢行咗個幾兩個鐘都係要搵嘢食，心諗都係要試吓呢一間舖頭。我叫了$78的套餐。薯條夠粗，熱辣辣幾好食。炸魚都幾好。椰子水都好飲。雖然要坐喺門口出來，得幾張枱，不過對住公園仔都幾好。可以一試啊！…查看更多

我很少來到這一間餐廳，對上一次嘅係幾時? 我都唔記得，因為睇了一篇文章關於這間太平館的歷史，講述佢啲食物，佢有講瑞士雞翼，燒豬髀飯，最緊要講燒乳鴿啦，講下又講到啲歷史，講下又講百幾年前嗰間廣州市嗰一間，又講下孫中山，又講下蔣介石，仲有好多歷史人物，講到我又好想去試下。想起一樣食物我係未試過好想試，所以就選擇這個這個午餐試一試嗰個感受，燒豬髀飯。去試之前我睇了一些食評，有好有壞，唔緊要咁就試下啦，上到去其實都九成滿，我非常幸運有最後一個卡位，環境係舒適嘅，裝修係有啲懷舊，不過都好舒服，至於侍應生的服務其實都不差沒有食評寫得咁差。這個午餐我叫了羅宋湯，味道夠濃，材料又足夠，我個人喜歡這個味道，滿意，至於個餐包，合格嘅，幾好，燒豬髀飯呢，我個人就覺得沒有什麼驚喜，配菜都係OK嘅，豉油汁係好味嘅，白飯正常。最後飲了一杯即磨咖啡，係跟餐嘅，都OK喎。好舒服咁坐咗一陣，埋單112蚊計埋加一，其實都OK喎，唔貴。埋單之後落樓在附近睇緊櫥窗一陣嘢，突然之間，太平館有個侍應生好似衝咗落嚟樓找我，他遞給我一個小銀包，我連聲多謝，原來剛才我大意留低。過了一陣我又衝返上去，給這個侍應生20蚊的小費答謝他盡責找我。…查看更多

大約兩三年前我應該星期日嚟過，當然失望而回啦原來佢哋星期日係休息嘅，這個星期六我就真係特登嚟試下佢哋嘅豬潤麵，嚟到門口好多人，竟然發覺有一個排隊機，咁就攞個籌啦，13:52pm，前面有廿個number播，呢個區而家變咗係文青區域，但亦有很多舊派的鋪頭，左行右行，原來都行咗30分鐘以上，返到嚟的時候剛剛好仲有一個number就到，我都好彩嗱，14:29落單時間，你話我等咗幾耐，我係第一次嚟，嗌咗個豬潤出前一丁，一杯熱奶茶，好彩這碗豬潤麵亦真系值得等一等，其他人食評所講的形容詞都好啱，所以我都不需要重複啦，不過奶茶就一般水準播，不過大家放心絕對合格嘅，那個招牌西多士或者我有機會將來試一試。…查看更多

星期日8月7號我要入屯門青松觀，拜祭先人。約了一個80多歲的親人，拜完之後我們打算去茶餐廳吃過午餐，初頭是去了另外一間的，但係親人的安心出行是紅碼，很失望，我們試下第二間就去咗呢一間翠苑牛雜粉麵餐廳，當然都係紅碼，那個女店員很醒目，問我哋有冇帶針紙，用針紙一掃OK，入得，可以安心食嘢，我哋當然安樂曬啦，我唔怕肥叫了一個東坡肉飯，我的親人叫了豬扒飯，東坡肉飯有例湯送但係豬扒飯沒有，我哋跟餐都叫了奶茶，例湯OK有啲偏咸，奶茶算係好飲，東坡肉飯肥得夠甘香，豬扒飯望落都OK呀，我哋走嘅時候女店員都講咗聲多謝好有禮貌，我最滿意是他的服務。後來我發覺我的親人唔識得scan嗰張針紙入安生出行APP。幸運地我把這個動作做好所以變咗藍碼。這是一間很普通的茶餐廳，不過一個醒目女店員，令到呢間餐廳服務指數俾我評到最高。…查看更多

一連睇咗兩個YouTuber介紹呢一間叉燒飯，一間新開張嘅燒味店，果日首先喺旺角行咗成個鐘頭街先，之後去食呢一個叉燒飯，好多人買外賣，座位坐滿九成，我要求叉燒飯肥啲，果然送上來的飯係剛剛肥啲，所以都好啱我口味，啲飯都唔錯一粒粒，不過食到最後好後悔唔記得咗叫人哋走汁或者少汁，個例湯好正常，最開心係有一舊煲湯豬肉。…查看更多

因為我應該睇過YouTuber的介紹，所以特登上open rice查過呢一間和昌潮味館，食評都話唔錯，所以這個下午特登嚟呢度。幸運不用等位，但系入到去其實都幾乎滿曬，一於叫一個招牌鵝三味啦，果然沒有失望，例湯好飲，鵝肝最正，鵝肉OK，鵝腸夠爽，開開心心食一餐，有機會的話再試下佢哋另外一個招牌嘢牛臉珠。…查看更多

今日突然之間想食車仔麵，咁就去呢一間尖沙咀嘅永年士多啦，以前食過大碗麵同埋四寶麵，今天再食十寶大碗麵，食車仔麵其實就係貪佢多餸，所以食十寶大碗麵，10個餸應該10分滿足掛，今天又好鬼熱， 所以叫杯紅豆奶茶冰。排隊排咗幾分鐘，今次坐低等叫number，比以前方便得多。我叫了微辣的湯底，叫了油麵，我覺得油麵浸耐啲都唔會淋咗。菜心係甜嘅，爽爽地，蘿蔔冇揸清甜，豬紅口感都滑，我唔係食豬紅嘅專家，不過聽人講啲豬紅係豬血加雞血做出來的，總之口感好過癮就得啦。豬皮豬腸都幾好，雞翼尖都幾好味，雞翼可以呀，魷魚爽口， 紅腸OK，魚蛋我鍾意。奶茶紅豆冰都可以呀，紅豆夠淋，我照食。呢一餐唔敢話十分滿足，8分都有嘅，10個餸，一個麵，奶茶味，紅豆，加埋十三種味道及口感，都幾過癮嘅。…查看更多

我第一次幫襯呢一間戶戶餸應該係幾個月前的事了，當時見到都有啲人排隊所以我又試下乜嘢叫做兩餸飯，嗰次叫了炆鱔魚同埋黑醋骨，拎返屋企都唔敢有太大期望，竟然有驚喜，兩個餸都好食呀。第二次可能係7月頭的時間我叫了三餸飯，果次有影相，3個餸分別係牛仔骨，排骨炆豆腐卜，炸蝦。 份量好大，炸蝦就有3隻嗰次我食完係好飽。第二次沒有第一次咁好感覺，牛仔骨好味，排骨炆豆腐普普通通合格嘅，炸蝦可能擺得耐咗一啲，唔係咁正， 如果幸運是新鮮出爐的應該幾好食。今次係第3次，份量依然驚人，我特登攞3隻碟出嚟分配黎影相，真系好誇張，我食剩大半份炆豬利，留了隔天再煮。今次第3次沒有第一次的喜悅，就係覺得好大份好抵食，可能3個餸都比較擺耐咗，冇咁好啦，菜心炒豬肉okay嘅，椒鹽豬扒okay嘅，炆豬利好似唔夠林。 講真38蚊三餸飯，自己點樣買餸整啊，份量足夠兩個女孩子食，真係經濟實惠。食幾餐三餸飯可以慳返啲錢食啲貴嘅同埋好味的餐室都係慳錢嘅一個方法。…查看更多

當日有事去九龍灣一行，想起2-3年前喺附近食過一間檳城海南雞飯，上次食過都幾好味，今次又試下啦。見到有追加 (1) 味醂黃金蛋 $6  (2) 爽口火雞腎 $6  (3) 二寶 $10。問老闆二寶係乜嘢嚟嘅，佢話係加一隻黃金蛋同埋一隻火雞腎，咁就不妨試下啦。咁就坐低等食，期間係咁睇佢啲牌。佢叫得檳城海南雞飯，咁應該係走馬來西亞嘅路線，所以佢哋又有肉骨茶，當然佢哋冇蘇媽蘇媽咁出名啦。佢哋d海南雞飯有靚湯送，星期一至星期六每日都有唔同款式，當天我飲的是清補涼。雞飯同埋靚湯都嚟咗啦，個雞都係皮爽肉滑，去左骨，啖啖肉，有雞味，油飯都唔錯。試下黃金蛋，幾好，當然佢哋唔係日本拉麵果啲流心蛋，佢啲蛋黃係熟嘅，但味道是好的，應該係用咗日式調味品味醂浸的。跟住又試下火雞腎，真係爽口嘅，沾下酸辣醬及薑蔥都都幾好食。唔敢話佢啲火雞腎好食過尖沙咀肥仔小食店嗰啲火雞腎，肥仔小食店有芥辣醬，但係火雞腎沾下海南雞飯嘅酸辣醬及薑蔥都有另外一番滋味。當日天氣好熱所以我叫了一杯凍嘅薏米檸檬水，都係加多8蚊，都幾好飲，想起蘇媽蘇媽都好似有呢個飲品，但系應該要過廿幾蚊的。佢都有唔少人買海南雞飯嘅外賣，堂食佢有個熟客喺朋友面前讚佢呢度啲雞飯好正。佢有客買肉骨茶外賣，有機會我都會試下。…查看更多

我和我的老朋友時常喺尖沙咀去百樂門飲茶，可惜因為疫情嘅關係佢哋停了幾個月，疫情真係影響咗好多香港嘅飲食行業。最近想起有一間酒家係稻香酒樓，係喺尖沙咀緬甸臺嗰邊咁就不妨試下啦，睇見有個牌有啲特價點心都係$12.80 哇喺尖沙咀嚟講好抵呀，咁就叫多啲啦。再叫多一個沙茶安格斯炒河都係68蚊啫。試了一碗無味精家常湯$5。以咁嘅價錢嚟講所有食物都係合格的，自動化飲茶機都幾得意。講句真心話，百樂門的點心係比較好食，但價錢就沒有咁便宜啦。好食嘅點心就當然唔及得陳師傅點心專門店啦，但呢一度地方夠大坐得舒服，可以慢慢傾下計，掛住傾計掛住食野都唔記得影相。總之喺尖沙咀想同一班熟朋友傾計傾耐啲又平平地，的確係一個好選擇。…查看更多

今日下午嚟到佐敦道附近，想食個午餐，咁呀周圍行啦，淨係呢條白加士街都好多食店，見到呢一間《阿芳上海餛飩》，想起上次食過都幾好味，一於入去再幫襯佢啦。睇下個餐牌有乜嘢食，今次揀咗呢一個套餐，玉豆豬肉餛飩10隻，配咗”蒜泥白肉”。首先嚟咗嗰個蒜泥白肉，肉質都幾好，醬汁有啲偏甜，可能係上海人的口味係甜啲嘅，不過我接受到這個甜度，所以感覺都良好。跟住個餃子又嚟啦，即刻試下個湯先，好味夠香，飲咗幾啖，跟住食咗幾隻餃子先，皮薄餡靚，食得開心，想起尖沙咀北京餃子，皮比較厚但系都好好味，不過聽聞正宗北京餃子皮係應該比較厚的，所以上海餃子是不是薄還是厚我都不清楚，可能香港人口味係鍾意食皮薄嘅餃子，我哋香港人食得開心就是好的，跟住又試下佢哋啲辣椒醬配餃子，都幾好。見隔離檯有一個女士食五香燻魚，食得都好似幾開心咁，搵下次我有機會都要嚟食下啦。…查看更多

我和一個老朋友係香港老飯店嘅常客，鍾意呢度坐得舒服，服務也好，而且食物質素都有保證。香港老飯店在尖沙咀寶勒巷，我和這個老朋友都喺尖沙咀做事，每個月都有機會在這裡食午餐。我們嚟親呢一度都一定叫小籠包，呢度啲小籠包，皮薄餡靚，肉汁豐富，肉質鮮嫩，熱辣辣，百吃不厭。仲有一樣嘢常叫的就是醉豬手啦，豬手好爽口，酒香味很合心意。XO醬煎腸粉也是我們的心頭好。魚肉釀尖椒，不錯的選擇。香蕉蝦多士，雖然不是常常叫，但都非常喜歡。今次叫了一個拍蒜豆豉炒涼瓜，味道不錯，不過這應該是一個廣東餸。這裡的點心價錢不便宜，不過質素都不錯的。…查看更多

今日星期日下午2pm見到唔系好多人排隊我自己一個人就試下食啦。叫了一個濃香豚骨魚介沾麵。沾麵夠粗掛上那一個汁都很好,  不過一塊豬肉真系好似少咗啲, 溏心蛋也可以, 服務員很好給了我加湯的壺子, 加清湯入那個濃汁變成一個湯都可以飲。…查看更多