loveeatghost的个人专页

最近口罩荒，個個人都為左口罩四圍撲。今日放工約左人出旺角交收口罩，而家啲口罩真係貴💀，但無又唔得。買完口罩，就泊左架車去家樂坊搵地方食飯。朋友之前同我講過係家樂坊附近有間任食雞煲，好味又抵食，招呼好，地方大。年紀大，記性壞，唯有再打去問下果個朋友，間餐廳叫咩名😂原來間野叫富盈雞煲，係通菜街。上去 openrice 搵下地址，原來真係好近家樂😂就禁睇真係好抵食。上到去，地方真係算大，檯同檯之間好有距離(呢個真係好重要)。火鍋，韓燒既配料真係要有都有。重有熟既野食可以拎，有麥樂雞，咖喱魚蛋，不過我一心想食雞煲，所以無試🤪飲品選擇堅多，重有細細罐 coke zero，抵讚！Yeah! 雞煲黎喇！上黎之後，煲多4分鐘左右，食得。岩岩好，堅好味🤤🤤，啲雞好入味，啲菇又好入味。雞煲配Zero，一絕😋好快食完一煲，唔夠喉，再加多煲先。食完2煲雞之後，就加湯打邊爐🤪加埋湯，食山根，超好味！韓燒真係食唔到😂太飽喇。留返下次再黎食過！食左禁多野都係2百幾一個人，抵到爛！…查看更多

今日去天后探朋友，泊左架車係栢景臺，探完就係附近搵下有咩食。經過皇悅酒店附近，見到呢間燒味鋪，啲裝修同平時既燒味鋪好唔同，好文青，就入去試下喇！晚餐，係天后黎講，算好平，二人餐都係158蚊🤭已經有一蝶燒味，一個小菜，一個灼菜，白飯同野飲。我叫左燒鵝拼叉燒拼油雞，豉油皇炒鵝腸，灼菜同2罐無糖可樂。間鋪個名叫壹。燒鵝，佢啲燒鵝真係有料到，唔止燒鵝，叉燒同油雞都好食！個員工話全部都係佢地自家制作！豉油皇炒鵝腸好入味，又唔肥！算係好難得！灼菜心有驚喜喎，好淋喎！凍到出晒水既無糖可樂，正！…查看更多

忙左一排，完全沒時間。同埋呢一排真係出少左街食飯。不過火鍋怪又出現喇！早2-3個星期同朋友傾開計，佢介紹話係旺角有間打邊爐都唔錯，人又唔算多，可以靜靜地傾下計。禁難得平日終於有時間，就渣左架車去旺角，泊左係家樂坊。老老實實，係旺角泊街一陣還可以，我真心唔夠膽係旺角泊街。泊好車就行去今日目的地：天下糧倉牛肉火鍋專門店！內裡裝修都幾得意，唔知點解令我諗返起細細個打吞食天地🤣好多野都做半價。我地一人揀左一個一人餐，再加$68變配料任食任飲。野飲任飲我叫左一個海鮮拼盤，一個A4和牛拼盤。湯底叫左個鴛鴦湯底，潮汕牛骨湯拼重慶翡翠綠麻辣個牛湯我都飲左2碗海鮮拼盤有大虎蝦，聖子，扇貝，青口，脆鯇腩，東風螺海鮮新鮮！打邊爐真係好少食東風螺，又幾好味！A4和牛拼盤就有鹿兒島A4牛肩胛，宮崎一口牛啲牛唔差喎！一口牛重好有肉汁！佢啲手工餃同雪吞幾好食，我叫左幾轉🤤打邊爐又點少得金菇同烏冬🤩煩囂嘅鬧市中的一片綠洲！…查看更多

早幾日係呢頭附近食左另一間打邊爐，食完之後四圍行下，很喜歡這附近的寧靜，亦發覺呢頭附近真係好多野食。決定再搵一晚過黎食其他餐廳！今晚食嘅呢一間，就係果日行過，見到都幾多人嘅表叔火鍋！亦因爲之前見到好多人，今晚決定早啲黎食，實無死！7點鬆啲到，都重有位，到我食到一半嘅時候，已經 full 晒了！出奇地，啲野一啲都唔貴，重可以講話平黎形容！蕃茄薯仔鍋個魚湯好好飲，介紹大家，蕃茄打邊鍋，其實係一流！手切頂級牛頸脊好軟熟！滾一滾就食得！一啲都唔韌！手打鮮蝦丸拼手打墨魚丸2隻丸都十分彈牙，一啲死蝦味都無。鮮豬腳筋一開始上檯，見佢硬倔倔。不過人不可貌相，野食都一樣，煲左一陣，變得超淋！即炸響鈴好熱辣辣！一上一落，即刻食得！脆鯇骨腩好彈牙，得一條大骨，正！白菜仔+稻庭烏冬白菜仔好新鮮，洗到好乾淨。不過烏冬應該係普通烏冬😂矛根竹蔗水好飲，叔叔話係自己煲。成間鋪啲伙記都好有禮貌，可能因為都係叔叔黎。同埋真係好控食，食到捧住個肚！…查看更多

今日去九龍城買野，泊左架車係九龍城廣場。買完野之後，差唔多食晚飯時間。不過左諗右諗，九龍城廣場都無咩好食，禁就行出去出面食，選擇多啲。九龍城，最多人食一定係泰國菜。大人話有啲掛住小曼谷個咖哩炒蜆。得！明晒！即去！😂九龍城大大話話有成3-4間小曼谷，大人想食咖哩炒蜆，我就想食下燒烤，禁就去佢地間燒烤屋喇。去到已經有人等緊位，禁好好彩，我得2個人，好快就安排到入座。海鮮孖寶鹽燒虎蝦+鹽燒鮑魚虎蝦燒得好出色，重有膏！鮑魚亦燒到岩岩好，好彈牙！風味燒豬頸肉豬頸肉份量唔少，配埋個醬汁一流。泰皇咖哩炒蜆+泰式原味烤酥餅+泰式蒜蓉包大人的主角來了！好好味！一定要加埋酥餅或者蒜蓉包，食埋佢啲咖哩。我大貪啲，2樣都叫晒🤤泰式飛天炒通菜今日個菜炒到好辣，不過好惹味芒果沙冰+泰式奶茶所有野都整到好好食，係無咩冷氣😅…查看更多

今日要去尖東做野，放左工，大人過埋黎搵我食飯。大人今日好攰，話想搵間近近地靜靜地嘅餐廳食下飯。甘講真，要係尖沙咀搵間靜靜地嘅餐廳真係有難度，一係就唔好食，一係就勁貴。左諗右諗，又上網搵下，搵到間野靜靜地食蒸氣海鮮，禁就渣左架車去天文臺道8號泊低，再行上去天文臺圍到睇下。間野叫有蒸氣海鮮石鍋專門店，佢有自己門口，又可以係酒店果邊塔電梯上去。上到去地方算好大好闊落，起碼空間感好夠！起碼我講野唔洗擔心隔離枱會聽到😂睇下個 menu，選擇亦都好多。有蒸氣鍋，亦有小菜可在食。不過既然間野叫有蒸氣，無理由唔叫蒸氣鍋食🤤。招牌黑松露蒸蛋出面啲蒸氣鍋好少禁樣食蒸蛋。佢地時間預得十分好，個蛋勁彈勁滑，加埋黑松露，絕配！北韓象拔蚌刺身Size 2個人食岩岩好，平時果啲太大條2個人又食唔晒。肉質好鮮甜，同埋唔貴🤤大連鮑魚同埋啲花甲一齊蒸，花甲好鮮甜，一啲沙都無。鮑魚岩岩好，好爽口彈牙👍🏻👍🏻日本元貝蒜蓉粉絲蒸，好好味，隻日本元貝好鬼大隻🤩清蒸龍蝦平時多數食開芝士焗，食到一半會好漏。今次蒜蓉蒸反宜無，我重不停左刮右刮埋啲肉同膏出黎食🤣冬菜蒸馬友本身唔係太好馬友，不過食得出好新鮮！安格斯牛小排手剁墨魚丸個墨魚丸超級彈牙！個牛小排都好靚，唔算肥！甜梅菜蒸菜心苗精華粥🤤集上面之大成，點會唔好味🥳我係出面都食過下幾間蒸氣鍋，有平有貴，不過呢一間性價比最高，因為啲海鮮真係好新鮮。同埋佢啲侍應態度同服務真係好好，適當時候做適當既野，一啲都唔會亂！下次約多啲人再黎返食🤩…查看更多

心煩氣燥壓力大，呢7個字可以總結我最近呢一個星期嘅狀態。所以，今日我決定搵個靜靜嘅地方，可以比自己放慢一下，refresh 一下自己！有左呢個諗法之後，心入面不其然彈出左幾間餐廳。最後，揀左呢間係上環普慶坊嘅我愛慢煮。泊低左架車係附近，慢慢行過去。附近環境真心舒服，好寧靜。其實間餐廳都好易搵到，門口一對左青龍右白虎。入到去大大個牌扁寫住”我愛慢煮”餐牌簡單易睇，唔會五花八門。個腦都已經諗左成日野，簡單就是美。美國黑安格斯牛肉眼扒（12安士）好好食！好有肉味！煎得岩岩好，唔太生又唔太熟，好淋！強烈推薦！焗卡邦尼意粉因為焗嘅關係，佢加多左芝士，好食。不過記得一上就要撈均佢，唔係隻蛋會煮晒😂小食拼盤（七味一宇雞翼，吉列蝦，英式炸魚，炸吉列蠔，炸脆薯條）一次過滿足晒，樣樣都好食。佢薯條有用脆漿，特別香口！青檸薄荷特飲其實想試佢啲 craft beer，不過渣左車。所以叫左呢個，同啲香口野又幾夾！士多啤梨特飲朋友話好味，唔太甜！食完係附近行下，心情都放鬆返！…查看更多

平時做野經過銅鑼灣 L Square 樓上食lunch，有時見到𨋢門係1樓打開，入面人頭湧湧，礙於食lunch要快，所以一直未有機會試。好喇，今晚收工終於有時間，一於去試下，間野就係Fûhn！平日黎講，都算多人，我地食到一半個場已經full左。佢地都好貼心，湯粉有分3個size：普通，大，加大。特式牛河粉 大(生熟牛肉，牛坑腩片，手打牛丸，牛筋片，牛腩邊，牛栢葉)由於特式牛係無普通size，我又好想咩都試，就叫左個大size。餸！真係堅多！食極都未食晒！好足料，樣樣都好食。湯唔肥，但好夠味！2個女仔叫個大size 黎share食都應該夠。生熟牛肉牛栢葉河粉 普通size普通就係正常size，佢個牛唔肥，我地好怕啲牛肉好肥！豬頸肉米紙卷個豬頸肉佢炸過，所以十分香口好食。二人份小食拼盤(越式炸雞翼，手打蝦餅，春卷)本身大人話想食炸雞翼，我話禁不如試佢個2今金食拼盤。個蝦餅堅彈牙，入面重有隻蝦！青檸梳打，白桃沙冰個白桃沙冰白桃味好重，幾好飲！又多一個食越南粉嘅好地方！…查看更多

有睇開我地既，都知道我同大人好鍾意打邊爐！早幾個月去過食太子嘅吞Pot，之後又食過旺角果間吞Pot。今晚黎開尖沙咀，點都要食埋尖沙咀呢間😂渣左車，附近最好泊最近，應該都係美麗華廣場，泊左架車，之後就行過去山林道。同其他分店一樣，夜晚9:30後入坐，火鍋配料同小食都係半價。早左上到去，佢地都好好照計我地半價比我地入去😄重慶麻辣雞煲 半隻叫左BB辣，都食到，好野味，一舊接一舊。食完就可以加湯打邊邊。頂級安格斯牛小排之前叫開極品本地手切牛頸脊，不過真係好大碟。所以今次就試另一款牛，啲紋理都好靚。唔太肥，又唔太瘦，好味！蟹子墨魚滑好彈牙！加埋蟹子好好味！牛柏葉好爽好好味，滾一陣食得！自家製鮮蝦雲吞自創爆芝響鈴呢個係每一次黎都要叫既，真心肥，不過堅好食🤣必食！滾一滾，入面啲芝士溶溶地！野生竹笙吸晒啲湯好好味！好野！佢地間間分店都keep到水準！…查看更多

今日去炮台山果邊做野，泊左架車係電氣道AIA Tower。環顧全個炮台山，最方便最好泊就係呢到。做完野都差唔多成8點鐘，就係附近搵下有什麼好食。行返出英皇道，就見到呢間大澳德發，見裡面都幾光猛，就一於食呢一間喇。入到去，阿姐十分熱情招呼我地去坐卡位，唔講以為我地係熟客仔🤣。一坐低，就見到檯面張墊檯紙好多推介，一睇到就覺得好吸引，加上聞到蝦醬味，開晒胃。太難選擇，我地得2個人，樣樣都想食，最後選擇左惹味卜卜蜆煲（配鴛鴦米泡飯）金磚吹豆腐拼墨魚餅漁村蒸肉餅（蝦乾，土魷，銀魚）惹味卜卜蜆煲（配鴛鴦米泡飯）好好食！啲卜卜蜆好新鮮，好入味，佢加埋蒜蓉同辣椒。食完重可以加湯煮鴛鴦泡飯！金磚脆豆腐拼墨魚餅呢個好有驚喜，連平時唔係好食豆腐嘅大人，都不停夾黎食。個墨魚餅勁好食，我食完2塊都唔係好夠喉。漁村蒸肉餅（蝦乾，土魷，銀魚）好足料，餸飯一流！凍檸茶茶味好濃，又唔算澀，正！盲蹤蹤入到黎呢間野，又出奇地好味同好招呼！…查看更多

今日早收工，好想食喇沙，左諗右諗去邊到食好。最後比我諗起幾年前係大坑食過嘅肉骨皇。禁就即管渣架車去睇下泊唔泊到錶位。好好彩！真係好好彩！可能因為早去到，唔洗10分鐘就等到個車位喇。平時呢到有排等的。泊完之後就慢慢行上去。其實我都幾鍾意夜晚嘅大坑，靜靜地，人唔多。感覺有點遠離凡囂。招牌都幾當眼。可能早去的關係，人不多。肚仔餓喇，拿拿林叫野食。海南雞喇沙油麵溝米粉個喇沙好正宗，同幾年前嘅一樣，保持到水準！啲雞肉都唔鞋口！馬來麥皮蝦蝦炸到好脆，可以連頭連殼食！加埋啲麥皮，甜甜地又不會太over！臭豆參巴煎蛋餅喜出望外！少少辣，好惹味！大大塊！抵讚丫，禁耐無食都維持到水準！下次等天氣涼少少搵個機會黎再食肉骨茶！…查看更多

今日遲左收工，口痕痕想食泰國菜。平時都會行過去利舞台食金不換，不過今天沒訂檯，也懶得走過去碰運氣，就上來Openrice 看看附近有沒有什麼新餐廳。看着看着就找到這一家在世貿中心旁的Tower 535 的小曼谷泰國美食站。小曼谷是我去九龍城必食的泰國菜之一，這家應該是剛剛在銅鑼灣開張的。裝修很有特別，大量舊式火車的裝飾。現場還有人唱Live，整個感覺很懷舊。餐牌食物跟九龍城的也差不多，不過這一家連串燒也可以點，比九龍城更多元化！牛油蒜蓉燒蟶子燒得很香，只是我嫌蟶子不夠大隻🤤。冬陰公湯水準之作，每一次去也必點的。虎蝦大大隻，很彈牙！泰式炸蝦餅好大塊！我已經點了一個小的！比九龍城的還大塊🤣。豬肉碎生菜包可能叫了少辣，有點辣度不夠，下一次來可以不用少辣了😝泰式馬拉盞炒通菜又是大大碟的！很有鑊氣！小曼谷海南雞飯油飯好好味！泰式蒜蓉包這個也是必點！泰式冰奶茶和芒果沙冰少甜後剛剛好！🤤比起九龍城的，這一家地方更乾淨，舒服，空間感更好。可能有人唱Live，氣氛更好！…查看更多

今日本來放假，不過起左身之後，都係決定返一返公司執下文件。咁返得公司，又唔洗趕頭趕命，就係公司附近搵下有咩好食，順便叫埋同事一齊食lunch。早排聽同事講係銅鑼灣喜喜茶餐廳隔離開左間食日本野的，其實呢個位真係算幾清靜。店面唔算大，不過裝修睇得出下過功夫。好彩去到都算早，得2檯有人坐緊。午市Set Lunch 選擇都算多。 放假都要返工，對自己好少少，我和同事分別叫左安格斯牛扒照燒定食同銀鱈西京燒定食。水果沙津日式沙津汁加水果原來都幾開胃。茄子呢個涼食整得好好食！麵豉湯安格斯牛扒照燒定食燒得啱啱好，唔會太熟唔會太生。師傅功夫好好！銀鱈西京燒定食一樣，啱啱好，無燒到散晒！甜品平時係出面食果啲日本蕨餅，多數本身無咩味。呢個日本蕨餅本身有味，所以好好味！店內環境一流，食物水準高，下次可以嚟試下佢晚餐嘅火鍋套餐🤤…查看更多

呢2個星期工作繁重，每天返工放工返屋企訓覺，連食餐好的機會也沒有。襯著明天放假，今晚放工之後要好好對待自己，食餐好。一早 book 左尖沙咀呢間花木日本料理，其實因為早一陣子來過食lunch，發覺裝潢好好，望落去好放鬆，好舒服。去到尖沙咀，泊左係佢地大廈停車場，HK$500以上電子消費就可以免費泊3個鐘頭。不過個停車場位就唔多，同埋好多奇怪柱位。不過都唔係重點😂。今日上到去，人唔多。我地左睇右睇，最後叫左個鹿兒島和牛盛宴大滿足之火鍋。前菜芥辣魷魚好得意，好開胃。壽司三貫刺身三點，波士頓龍蝦半隻，法國生蠔任食北海道松葉蟹好味喎，呢個一定要返叫🤤任食鹿兒島和牛呢個又好好味，返叫返叫！任食沖繩黑豚肉呢個肥左少少，不過豬肉味好濃。稻庭烏冬新鮮野菜花木自家制日式甜品整體好好。環境一流。招呼好周到。永遠唔洗提佢地已經知道你想佢地加茶收野。好飽好抵食。我都唔知佢地點回本🤣。淨係食松葉蟹同和牛都抵返晒。🤪…查看更多

今日放工，我打算去買少少電腦野，大人就打算去買2隻game玩下，所以就渣左架車去深水埗。黃金電腦，一次過滿足晒2個人嘅願望。泊好車後，大人話好肚餓。收到！無理由要大人餓住行腦場，咁不如快快趣食個飯。就係附近搵左呢間標記樂園潮州粉麵餐廳。入到去無晒卡位，無所謂，求其搵張無人圓檯坐，就快快手叫野食。地方好光猛，個人嚟講十分 Like。因為我好鍾意啲茶餐廳好光猛，因為一定係好乾淨先至敢咁光猛！叫左2碗粉，1碟菜同1個淨牛肚標記新鮮牛三寶河呱呱呱！啲牛腩煮到好淋好入味，一啲都唔肥。有時食牛腩都驚肥多過肉！牛腩好味不特止，牛肚更加好味，一定係炆左好耐。牛腩牛丸米粉牛丸好彈牙，好似係深圳打潮州邊爐食果啲生牛丸咁。係好好食！得2粒，大人割愛分左一粒比我食🤤。蠔油菜心菜心煮到好淋，好大碟下！淨食秘製五香牛肚因為太好食嘅關係，我哋忍唔住叫多左個淨食！佢啲蘿蔔又係煮到好淋好入味！痴線！點解可以煮到咁入味！有Coke Plus👏🏻👏🏻唔係到到有，夠凍！好耐未試過係茶餐室食粉麵，小食同菜係會清晒底。下次過開嚟再食過🤤。…查看更多