如果依度嘅定位係一間餐廳，佢嘅食物質素可以講係一塌糊塗。我喺香港去超過20間寵物cafe, 呢間絕對係數一數二咁差我先從就食物質素去一一道來。我叫咗一個$8x 肉醬意粉+$20餐湯,個餐湯一上嚟已經知道出事，首先，由頭到尾冇人同我講過依個係乜嘢湯，我先估佢係一個粟米湯，個湯稀到我瞌埋眼以為飲緊水，之後仲發現入邊類似有海帶既物體，我心諗唔使咁有創意呀嘛，飲咗兩啖我就叫個職員幫我收埋佢。之後就上個肉醬意粉，肉醬意粉都係好普通，味道上真係冇咩好講。有趣嘅事就嚟啦，我見佢冇咩味，就問個職員攞支Tabasco，拎完過嚟之後成支Tabasco得嗰兩滴，咁我用完就叫佢拎嗰支嚟啦，點知佢同我講冇晒，我想講你個肉醬意粉已經冇咩味，連我自己調味都唔俾，最後我都冇食晒個肉醬意粉。另外，我女朋友嗌咗個黑松露野菌意大利飯，一上枱我女朋友即刻話唔想食，佢嗰碟嘢係望到成盤都係油，冇辦法之下我幫我女朋友頂咗幾啖，入口嘅質感完全唔係飯，依碟嘢應該改名係意大利粥，一啲口感都冇。老實咁講，如果你個定位係一間西餐廳，依個質素依個價錢我食薩莉亞都冇咁勞氣。不過，如果你諗住佢係一間貓Cafe，我只可以講個體驗亦都係我去貓Cafe最差嘅一次。首先一入門口，一陣貓尿味衝埋嚟。唔緊要，有寵物有味道係正常嘅(雖然我見其他Cafe都解決到)。咁我同女朋友叫完餐，等緊嘢食嚟嘅時候，當然係想玩吓貓仔，正當我女朋友想摸隻貓之際，有個應該係老闆娘嘅人同我哋講食完嘢先同隻貓玩。講真呢個體驗真係第一次，佢成間野嘅格局，完全就係一間餐廳，冇諗過任何可以比人同貓相處嘅空間，所有枱凳擺到密密麻麻，根本就係開完間餐廳求其放兩隻貓就當係賣點。最後，我認為個位老闆娘應該要理解吓餐飲業服務係乜嘢一回事，由我入餐廳一刻開始，佢講嘢嘅聲線，我以為佢想同客人分享佢公司嘅業務。當中包括衝入廚房大聲講 : “你哋出錯單，麻煩睇清楚啲。” , “幫我出去買Tabasco” , “你哋唔使特登入貨，我自己買都得” 。老實講，你食物質素唔掂都算。咁咪正正經經比個舒適環境客人去同貓玩下囉。但係你連基本設施，基本服務態度都未知，咁不如攝高枕頭諗吓點解你星期六生意都咁慘淡啦。…查看更多
