Iloveeatgoodwest的个人专页

網上面啲人都話要提早book定位，我哋早一個星期先打電話去，但係好好彩最後係有位！星期日嘅menu係omakase brunch，12點食到3點。$538就有五道菜，加多$60就有八道菜。所以我哋都毫不猶豫揀左八道菜。另外佢仲有得加錢任食生蠔，仼飲酒。我地都有加到既。次次都會心思思睇吓其他人食評，想知道有啲咩食，今次又衰多手睇咗，但係最後同我今日食嘅都唔同！首先佢就會上左兩個麵包，其中一個係藍莓，另一個聽得唔係好清楚，不過就太硬所以冇食到。藍好味嗰個好鬆軟，但係藍莓味道唔算突出，反而麵包會有少少嘅紫藍色。比較特別嘅係佢附上嘅係海苔牛油，少少鹹，帶有紫菜嘅香氣，不過我就比較建議拌另一個麵包食啦，味道比較夾。今次任食嘅係日本岩手縣嘅生蠔，每隻蠔嘅size好大，肉質鮮甜，有加上小嘅海水味。本身上網睇食評，之前喺法國生蠔，仲要自己出去拎。但係今次疫情關係，佢哋都會好貼心咁樣三隻三隻上俾大家。第一道菜係乳鴿汁茶碗蒸，入面有鮑魚，冬菇，黑松露。第一下聞落去香氣撲鼻，未食已經聞到蛋同黑松露嘅香。佢嘅蒸蛋好滑，鮑魚亦都唔會太韌，冬菇亦都好入味，不過我就少少略嫌蒽嘅味道太重，搶走左本身食材嘅味道。第二道菜係北海道帶子配coriander sauce。本身對芫荽冇乜好感，但係佢唔算好重芫荽味，不過醬汁除咗有芫荽味，亦有少少辣味提升整體嘅鮮味，整體可以接受。帶子本身都有煎香兩邊，肉質彈牙，亦都保持嫩滑嘅口感。第三道菜係sea bass配上雲南薯仔同魚子醬既汁。相對呢一度就比較失望，本身對呢道菜嘅期望可能好高，擺盤相當精緻。但可能烹調過咗少少火，竹質略嫌有少少實，而sauce味道唔算太大嘅驚喜，魚子醬冇辦法帶到足夠嘅鹹香味，整體唔算好match，有少少失望。第四道係龍蝦天婦羅。龍蝦外層係有墨魚汁同竹炭粉，另外亦都配左 avacado sauce。龍蝦都好爽口彈牙，但個人對於係面衣加上墨魚汁嘅味道一般。好似破壞咗本身龍蝦嘅味道。第五道係慢煮春雞。可能本身對雞一般，所以對於呢度菜略嫌有少少失望。肉質唔算好鮮嫩，但係醬汁嘅黃酒味好香，第一個印象係黃酒煮雞。第六道菜係煎鴨肝湯飯。再配上雞湯，日本米同日本松茸。呢道菜係我覺得相對地吸引，佢嘅鴨肝份量十足，入口油脂感十足，呢個時候湯飯就發揮功用。雞湯鮮甜。鮮甜嘅雞湯有一個好好解膩嘅效果，雞湯唔會好油膩，單淡淡都係雞嘅香味。嗰個人好想飲多碗雞湯啊。第七道菜係澳洲和牛，配上黑松露汁。個人認為，餐廳主要依靠黑松露汁，有幾道菜都會配上黑松露汁。牛肉一上枱已經見到係好靚嘅三成熟，肉質帶有牛肉香氣，亦都有少少嘅油脂香。好味！最後一道菜係豆腐雪糕。另外仲有抹茶mousse，以及菠蘿同芒果。豆腐味同抹茶好夾，亦都為呢一刻餐上完美嘅句號。可能因為有任食生蠔同任飲，所以覺得好飽。整體來講，呢個價錢，我覺得都好合理。而且真係食足三個鐘，叫做好好享受一個午餐。希望下次再嚟嘅話，亦都會有唔同既菜式。…查看更多

本身自己都係一個食肉獸，見到呢間餐廳午市有七折，而且都好多好評，於是就book位試吓。去到餐廳都幾多人，而佢嘅裝修都好有日本feel。我哋點左一個九宮格盛盒，包括有厚切牛舌腩，A4和牛上蓋，prime牛小排，A4和牛腩，m9內裙肉，安格斯霜降牛，生薑燒牛小扒，壺漬牛肋肉，燒汁護心肉。盒上面冇紙寫上邊隻肉，職員只係提我地，由淡味食起。我覺得啲肉都好高質，就咁食已經食到肉嘅味道。當然佢嘅source都好配啲肉。但係個人對生薑燒嗰隻味相對冇咁鍾意。因為佢嘅薑味太重。另外仲加咗紫菜月見飯，牛油蒜蓉雜菇，同m9內裙肉。但係個人唔係好建議加呢個肉，可能因為佢比較接近橫隔膜肉，所以肉味有啲誇張。未必個個接受得到。其實都好想試吓佢嘅海鮮，不過佢寫住暫停供應。可能因為呢段時間，唔係好多海鮮運送黎。所以就冇機會試到。其實佢七折咗之後真係好抵，佢一啲豚肉類嘅都好平，不過我哋今次主要都食牛，所以就冇試到其他啦。另外生啤都做緊買一送一，大家不妨都可以嚟試吓！…查看更多

平時都好少去觀塘呢頭，見網上面嘅評價都幾好，於是就試吓呢一間。去到都唔少人㗎，地方尚算寬躺，每一張枱都有足夠嘅距離。我哋嗌左兩個lunch set，一個係明太子北海道鮮帶子扁意粉，同埋All day breakfast。意粉入邊嘅帶子一啲都唔孤寒，都有好多粒㗎！而且佢唔會煮過龍。旁邊仲有一舊蒜蓉包，點佢啲汁都幾配㗎！ 入邊仲有一啲雜菌同蘆筍，配料都好十足。呢個價錢，相比起其他餐廳，呢度好似更加足料，同好食。至於all day breakfast，睇個份量都幾大㗎。見到佢都幾有心思，仲會配上一杯小小嘅乳酪。唯獨是粟米，有少少淡味。呢度嘢飲嘅選擇都好，特別係我呢啲唔飲得咖啡嘅人。非咖啡類嘅嘢飲都睇落好吸引。其中嗌左雲呢拿芝麻鮮奶，粉藍色，真係好夢幻，打卡一流，見到都唔捨得飲。雲呢拿香同芝麻香，飲落去好細滑，唯獨是略嫌有少少甜。另外嗌咗一杯冰磚鴛鴦，都幾靚仔，又可以打下卡。好香，奶茶好順滑，奶茶底唔會過甜。到咗落去啲冰磚到，兩者都好match，唔會話搶走咖啡味。整體來講，都好滿意，有機會會想再試下佢嘅其他嘢！…查看更多

我哋今次都一樣係經OpenRice book枱，但因為去到冇咩人，佢都冇問到我哋係咪book咗位，就叫咗我哋入去。去到都有兩、三台客，環境都幾適合打卡。好似去咗個森林咁樣。我哋叫咗一個lunch set，前菜有沙律或者湯，我哋就選擇左湯，而主菜我哋選擇左阿根廷西冷。餐湯係蕃茄湯，個人認為有啲酸，但都算開胃。至於西冷，味道唔錯，唔會煎得過熟。而且佢配上source，配搭得好好。相比起出邊嘅西冷黎講，算係比較出色。如果想食牛，過吓口癮，呢個都唔錯！另外我哋仲嗌左個優雅版牛油果多士，入邊有煙馬友魚，車厘茄，牛油果。佢嘅賣相都好靚㗎，我覺得呢個就相對特別啲，魚唔算腥。友人唔鍾意食魚，但佢都覺得呢個幾好食。鍾意牛油果嘅朋友，不妨可以試呢一個。本身都食得幾開心，但因為lunch set包個杯嘢飲仲未到，我哋就問吓個侍應。佢個樣唔知點解好似有啲唔滿意，沖完個matcha latte，佢拎過嚟嘅時候，勁大力咁樣dum落張枱到。當下，有少少不解。其實，嗰陣時計埋我哋都係得返兩台客，佢哋都唔算好忙，喺度好得閒傾計。同佢講嘢飲未到姐，使唔使咁既反應。本身仲想嗌佢嘅甜品試吓，但見到佢咁嘅態度，即刻咩胃口都冇，嗱嗱聲飲完杯嘢就走人。…查看更多

好耐之前親戚帶過我嚟食呢一間餐廳，記得價錢都好合理，而且個八寶飯都好足料，海鮮亦算新鮮。諗住今次帶朋友嚟呢間餐廳食，點知10分失望。一去到可能因為當其時係大閘蟹當造時間，餐廳推出左大閘蟹放題。於是餐廳手忙腳亂，仲要去到嘅時候先得知八寶飯套餐暫停供應。我哋被迫選擇另一個套餐。最後我哋選擇咗個餐就係一啲海鮮然後任食一啲打邊爐同點心。首先每人都會有一個燉湯，嗰日係蟲草花雞腳湯。味道還算可以唔會有味精味道好材料亦算合理。蒸海鮮方面包括有開邊龍蝦，桶蠔，元貝皇，鮑魚，大花蜆，聖子，龍躉，海蝦。其實種類係算多，而且都幾新鮮，唔會有沙。食到呢度本身都唔係話好嬲，到準備食粥底嘅時候就開始失望。佢嘅粥底唔係好成功，唔似粥，好稀。咁之後我哋就直接打邊爐，真係唔好對佢嘅嘢食有咩期望。佢啲肥牛好似啲組合肉，建議大家都唔好食咁多。佢打邊爐嘅肥牛叫安格斯肥牛，但係我以前食佢嘅八寶飯套餐嘅安格斯肥牛同呢個係完全唔一樣。我覺得完全受騙。咁但係始終都唔夠飽唔通就係食菜咩，所以我對佢呢一個餐完全好失望。如果大家唔係食佢嘅八寶蒸飯，基本上都唔使食佢嘅邊爐。除非你食完海鮮會飽！…查看更多

我哋一早book好咗位，去到依然都有好多人排緊隊，等咗陣先有得入去。我哋一開始叫咗一堆壽司，酒煮蜆，蔥吞拿魚腩卷，海膽燒帶子，同埋一杯生啤。我哋一共叫咗7款壽司，基本上都好新鮮，而且刺身嘅大小都幾大。特別值得推介嘅係活象拔蚌。我覺得好好味，好新鮮，好鮮甜。之後想再嗌已經冇晒啦。另外海膽都好抵$38有兩件，而且份量都唔少，最緊要係食落冇咩腥味。但係黃金蟹膏壽司可能就唔係好啱自己口味，食落去浸味有啲怪。酒煮蜆就好推介俾大家，但係佢只係晚市先供應。可能大家要等一排先有得試啦。佢酒味好香，唔會過濃，而蜆嘅數量都唔少，味道清甜唔會有沙。至於海膽燒帶子有少少失望，因為我覺得佢偏鹹，而且其實都冇咩海膽。帶子肉質可以接受，唔會燒到過老，喺調味略嫌有啲失色。我哋最後嗌左一個700 mL嘅啤酒，因為我哋發現叫兩杯細嘅仲貴，情侶嘅可以考慮吓呀，而且大大杯打卡都好靚。最後我哋叫咗個芒果雪芭收尾。一開始想試限定口味，但係佢得芒果味，由於店員話得返半個另一半壞咗，於是佢收咗我哋一半嘅價錢。總結活一線都值得大家來試試，我都會想再嚟不過會主攻一啲壽司，今次都冇試到一啲期間限定，下次為大家直擊報道。…查看更多

香港人去日本通常都會去食水產，原因係覺得啲海鮮好新鮮，而且價錢亦都平過香港好多。而家冇得返鄉下，唯有試吓香港嘅水產啦。喺OpenRice一搵其實都見到好多間，於是我哋就求其試咗一間。本身講明只可以食一個鐘左右，但係其實你去到就會發現燒係要燒好耐，所以到最後佢都冇吹我哋走。我哋一共四個人，嗌咗以下嘅嘢食：活貝大盛帆立貝x2甲羅燒x2露筍煙肉牛油燒蟹子蟹肉薯仔沙律赤蝦鬼殼磯燒刺身五點盛烏賊磯燒北海道海鮮炒飯炸蓮藕片日式甜醬牛肉烏冬活貝大盛有帆立貝兩隻，蠔兩隻，鮑魚兩隻，另外仲有四隻白蜆。鮑魚都幾大隻㗎，所以佢剪開左之後其實四個人都夠。基本上都會有人幫我哋燒，再幫我哋加埋啲醬汁。所以熟咗之後我哋就可以直接食。甲羅燒，其實我哋係嗌咗兩款，不過當佢燒熟左之後都分唔清楚。味道就覺得有少少腥。蝦要$60 1隻，但係就唔算大隻，有少少唔扺。刺身都幾新鮮，而且海膽都冇腥味。整體來講，味道唔錯，環境都好有日本感覺。…查看更多

由於母親大人生日，早一個月就book定呢到既weekend brunch。我哋book到嘅時間係11點半，一點前離座就有個8折。最低消費係398一個人，當然如果你想食某啲main course，就要加錢。佢嘅頭盤係有海鮮拼盤，同意大利凍肉拼盤。我地一共有三個main course，因為我地加左個炭燒連骨肉眼扒伴薯仔及蘆筍，佢係for2個人，就加左350蚊。另外，仲有帶子蒜香橄欖油意粉，同新鮮龍蝦車厘茄羅勒意粉，呢個就要加80蚊。而且我哋每人都加咗99蚊，有得紅、白酒，汽酒同啤酒任飲。因為我哋四個人，佢將二人份量嘅放係同一個碟。圖中係兩人份量。海鮮拼盤入面有八爪魚，蝦，煙三文魚同吞拿魚他他。整體拼盤不過不失，但係吞拿魚他他略嫌有啲難咬，相反八爪魚又OK喎。凍肉拼盤都係正常貨色，但係得一舊蜜瓜，肉就有幾舊，唔夠夾住食，就有啲鹹。連骨肉眼扒，都叫做加錢加得合理。都算係唔算老，肉眼芯都keep到五成，可能側邊博少少嘅地方就會熟啲，份量絕對十足㗎，其實兩個人都未必食得晒。仲有好香嘅碳香味，人數比較多我真係極力推介，但唔好掛住打卡唔記得食，熱食嘅時候真係冇得頂。另外兩個意粉正正常常，龍蝦都算大隻，龍蝦有少少痴殼。帶子蒜香意粉就有四粒帶子，唔會過熟，味道就係蒜香意粉冇咩特別，意粉兩碟都有keep到al dente。整體來講，呢度係打卡為主多個係食嘢食。如果係為咗想食佢嘅嘢，我覺得會有更加多嘅選擇。只係佢嘅地方選址係一個海景，影相係唔錯嘅。…查看更多

之前都嚟過一次，覺得佢啲豬肉都幾好食，今次再嚟食。今次係經OpenRice book枱，全單會有七折。一嚟到佢會先送前菜，蒜子蕃茄沙律。呢個係會計錢嘅，如果大家真係好唔想要都可以同佢講。不過其實都幾開胃。上一次嚟係星期日，可能因為咁，佢係規定每款串燒要兩串起，但係今日竟然唔洗，終於可以試多啲唔同款！🍡西班牙產夾心肉🍡豚肉蠔卷🍡白菌🍡豬心🍡豚肉流心蛋卷🥑牛油果芝士🍡皮蛋紅薑卷🍡肩肉串🍡豬肝🍡免治豬肉釀冬菇🍚三文魚茶漬飯夾心肉同肩肉串，都好好食。豬肩肉油脂比較多，入口有肉香，油香戲口入面爆發。不過相對地，夾心肉肉味更加重，鍾意肉味重嘅朋友可以考慮。豚肉蠔卷，比想像中更加好食。冇腥味，而且蠔都幾大隻，蠔本身嘅鹹味同豚肉嘅油脂香好夾，推介大家試吓。皮蛋紅薑卷就十分之有驚喜，平時酸薑皮蛋食唔少，但係串燒都係第一次，味道相當有驚喜。豚肉流心蛋卷都好推介俾大家，相信月見雞蛋配免治豬肉棒大家都食過，豚肉流心蛋卷都好類似，豚肉燒到香口，配流心蛋黃，入口淡淡雞蛋同豬肉香。上次黎食過個燒豆腐好值得推介，但係今次去冇貨啦。如果下次黎食記得試吓啦。整體都唔錯，如果鍾意食燒豬嘅朋友就一定要來啦，但係牛魔王朋友就可能比較少選擇。…查看更多

其實早起中學嘅時候，每逢考試完結，都會搵一間附近嘅西餐廳食返塊牛扒慶祝吓。咁啱大學完sem，於是決定同有人揀間屋企附近嘅西餐廳賀一賀佢。其實大部份中西區嘅西餐廳都有做lunch嘅set，價錢比夜晚相宜好多，所以不時都會見到啲中學生去食。咁啱聖誕就嚟到，喺餐廳都有一啲聖誕嘅裝飾。 午市套餐包括前菜主菜同埋甜品，其實都幾豐盛㗎。前菜可以揀餐湯或者係沙律，因為嗰日係西蘭花湯所以我哋冇揀到，於是我哋揀咗一個煙三文魚沙律同埋一個水牛芝士沙律。煙三文魚都唔算孤寒，比嘅份量都好，味道都唔錯，有淡淡的煙熏味，而魚身都有油光。沙律菜都好新鮮，整體來講都唔錯。主菜方面我哋揀咗牛扒配薯條，同埋當日限定嘅慢煮羊膝。西冷牛扒分量大概8安士左右，雖然我叫咗medium但係黎到就有啲過熟。最估唔到係牛扒都配有沙律菜，早知啱啱前菜就試吓個湯啦，聽到隔離枱對湯嘅評價都唔錯，但係綠色一碗真係麻麻哋好睇。薯條係幼身嗰隻，如果係粗身嘅就好了。唯一嘅優點就係即炸熱辣辣。一開始我哋以為呢個係羊架，點知嚟到嘅時候係羊膝。味道方面比較中東style，但係雖然係慢煮，但係啲肉質都比較乾，調味相都比較重，但都有蕃茄味嘅。至於甜品方面係意式奶凍。上面亦都有啲士多啤梨果醬同一粒藍莓。奶凍十分香滑，亦都有奶味。我覺得成餐飯最好味就係最尾嘅甜品啦。…查看更多

呢間餐廳係以CBD大麻為主題，原來CBD係有消炎嘅作用，亦都有舒緩嘅作用。作為香港人壓力咁大，係時候嚟呢度食吓放鬆吓。我哋一共嗌咗三樣嘢，包括帶子蟹肉牛油果他他配薑油黑醋汁，鐵板青咖喱安吉拉雞捲同板燒西班牙八爪魚海鮮炒長米飯配秘製醬油汁。帶子蟹肉牛油果他他幾好食，唔好睇佢細細盤，作為前菜其實佢嘅份量都真係幾多。牛油果食到粒粒嘅果肉，有口感，不過佢嘅法包片偏硬，咬得有少少辛苦。青咖喱安吉拉雞捲，見佢有啲特別。佢其實就係墨西哥嘅一種食品。佢嘅咖喱唔算好辣，但係味道好好味。平時呢道菜上面諗嘅係辣椒醬，但係換咗做青咖喱好特別好fusion但係都好好味。同埋佢嘅卷餅唔算話好林，仲keep到脆脆地。最後就係八爪魚海鮮炒長米飯，一嚟到就已經聞到好香嘅味道。而且個八爪魚都好大件，未食已經覺得好吸引。八爪魚唔會好乾，好Juicy，海鮮飯入面都有其他海鮮，包括有蝦同蟹柳。可惜當日所有CBD signatures既嘢飲都冇，搞到我冇得試。於是我哋就嗌左cocktail。整體來講，味道幾好，有機會都想試吓佢其他嘅嘢食。…查看更多

聖誕節想食好啲，於是就去搵吓omakaze，見如意嘅價錢都好合理，重點係聖誕竟然都冇轉餐牌。我哋係由12點食到1:30嘅，因為之後會有下一輪。去到嘅時候其實佢已經安排好晒座位，當其時係有四台客嘅，但係唔知點解無啦啦佢叫我哋每人都移動少少，好似係因為多咗枱Walk in客。我都叫做勉強少少可以見到師傅係度整壽司，但係隔離嘅客，就慘啦。因為師傅得三位，佢直情係冇師傅喺佢前面啊。我哋叫咗12件既set，先嚟咗一個沙律，茶碗蒸，同蟹子薯蓉。沙律正正常常，薯蓉幾好食，可惜茶碗蒸就有啲失望。佢入邊只係得雞肉粒，同魚蛋。一啲海鮮都冇呀。感覺就普通咗少少。12件壽司為:🍣目仁奈🍣金目鯛 柚子皮🍣新鮮帆立貝 鹽岩 柚子皮🍣深海池魚🍣鰂魚 or 牡丹蝦 綠蝦子 金色飛魚子🍣油甘魚 柚子胡椒🍣燒銀鱈魚 紫菜醬🍣細池魚 🍣三文魚籽 柚子皮 or 燒黑驢魚🍣中拖羅🍣海膽🍣吞拿魚腩手卷由於一開始就問咗我哋有冇啲咩唔想食，所以呢有兩件壽司呢我哋就係會唔同嘅。第一件係目仁奈，對我哋來講就有啲新鮮，因為呢我哋係未食過嘅。不過呢佢味道就有啲淡，又或者係因為由淡食起嘅原因啦，所以我哋都覺得正正常常。因為大部份嘅壽司呢都係omakaze常見嘅，咁所以我都唔逐個多講。值得一讚嘅係佢嘅牡丹蝦，佢整到個蝦尾好靚，味道好甜，而且隻蝦都好大隻。另外燒銀雪魚都好味，魚質好嫩滑。三文魚籽亦都係相對地比較驚艷，入口鮮甜，好香魚油味，唔會有腥味。最後有個咖啡雪糕，雪糕口味冇得揀。整體來講，成餐飯好似都冇咩好好嘅記憶點，比起上一次嗰間就有啲失色。但係呢個價錢都真係幾親民價。…查看更多

除夕夜又再次嚟到呢間餐廳，其實今次同食廚師發板冇分別，因為我哋係完全冇睇過餐牌，由師傅幫我哋安排。今次呢我哋都一樣揀咗兩款刺身，又係師傅幫我哋攞材料，揀啲啱嘅刺身俾我哋食。我哋食左金目鯛同另一款唔記得咗叫咩名。都可以見到啦，魚非常大條，肉質厚實，鮮甜肥美。我哋有預先同師傅講過想食生蠔。今次一共叫咗兩打，可以見到非常大隻。不過呢唔知點解第一盤嚟嘅比第二盤好食啲咁。味道來講充滿海水味，非常肥美，亦都唔算話有腥味。最重要嘅係，食完返屋企唔會唔舒服呀嘛！好多時出去食生蠔，最怕就係肚痛。今次一個人食成四五隻都冇事呀！豬胺架，師傅都預先帶定頭盔，話呢有少少咸。其實呢我個人就覺得未係好鹹嘅，可能再點埋芥茉醬啦，就中和翻啲未。講返個豬先，油脂都好豐富呀，味道其實都唔錯。油脂入口即溶，好有肉味，唔會有烤燶嘅炭燶味。然後就嚟咗一系列嘅串燒，包括有青椒仔，青椒牛，燒雞翼，黃金汁燒大蝦，冬菇串，車厘茄煙肉，仲有個雞軟骨。除咗雞軟骨外，其他都係我哋之前黎食過，可以參考返上兩次嘅食評。再次食，咁當然有信心保證啦。雞軟骨都好大碟，而且呢唔會係話死炸，好多油嗰啲。咬落去真係有咬口嘅。最後又點少得，豆腐野菜烏冬鍋。將刺身嘅魚骨，魚頭同魚尾，去熬製嘅湯，真係好鮮甜。就咁聞都聞到魚香味。其實呢間餐廳都成為我哋嘅聚腳點，最主要都係嘢食好味，價錢合理，師傅又友好。最重要係，你叫佢幫你發板，一定唔會當你水魚，收你好貴。…查看更多

聖誕節又再次嚟到九町屋，為咗慶祝節日，叫咗師傅準備咗啲新鮮嘅刺身。今次有得食池魚同鱸魚。佢將兩條魚擺埋一齊，睇個圖都知道非常之大隻呀。肉質鮮甜，爽口，唔會係好薄一片。池魚口感爽脆，脂肪比例適中，入口清甜，魚油回甘。大家食完唔夠喉，於是又嗌多咗一條細魚，魴鮄。粉紅色和白色的魚生交集，肉質紮實鮮甜。當然啦，一定冇頭先嗰兩條咁肥美。之後就嗌左呢碟，半生熟牛肉(我哋唔知其實佢叫咩)。值得一讚嘅係佢下面嘅洋蔥，好甜。牛肉好嫩，唔會韌。肥牛蘆筍卷，蘆筍好嫩，唔會有根。幼幼一條，入邊都放咗好幾條㗎。肥牛雖然唔係啲咩特別野，但係依然唔係出邊好鞋嗰啲。車厘茄豚肉卷，呢個又係我哋特意叫師傅整嘅。因為我哋實在太鍾意食車厘茄。佢個豚肉呢係豬五花，車厘茄中和返肉嘅油膩。燒雞翼，黃金汁燒大蝦同原條燒茄子，呢三樣都係上次有點過嘅，所以今次都唔多講，有興趣嘅朋友呢，我哋歡迎可以睇返上一次嘅食評。汁燒魷魚筒，雖然size就比較細，但係味道呢都OK 㗎。用嚟送下酒，唔錯。茶漬飯，估唔到呢個都好好食，味道唔會過龍，又可以食下少少飯飽肚。豆腐野菜鍋，鍋物入邊係用返原條刺身嘅頭尾去熬製。諗都諗到非常甜，一個字，正！如果你哋有想食嘅刺身，都可以向師傅入貨。又或者佢都會介紹一啲當做嘅刺身，最緊要係價錢合理，又食到高質素嘅食物！…查看更多

友人生日，平時我地都會係天后試下唔同嘅餐廳，於是今次就簡左黎間新開嘅日本餐廳。因為壽星女鍾意食希靈魚，所以我哋都叫咗刺身，另外仲有中拖羅刺身。因為我唔係好鍾意食希靈魚嘅緣故，我覺得呢個刺身正正常常，唔好有腥味，融雪處理都OK，唔會好硬。而拖羅刺身個樣就靚靚仔仔，但係可能係因為啱啱拎出嚟，所以都真係好硬，上到嚟仲要等多幾個字先融到雪。但係油脂分布均勻，可惜都有啲筋，不過聽講佢哋已經轉左供應商啦，所以想食嘅朋友都可以試。跟住我哋叫咗一系列嘅串燒，包括原條燒茄子，冬菇串，鹽燒油甘魚骹，雞翼，大蔥安格斯牛，牛油燒帶子串，銀雪魚西京燒，黃金汁燒大蝦。原條燒茄子清甜，調味恰當我唔會全部都係孜然粉嘅味道。另外火候啱啱好keep到茄子嘅水份。冬菇不過不失略帶冬菇嘅香氣。油甘魚骹好好味，燒完可以將油脂溶咗係啲魚肉入面，而鹽可以將魚嘅鮮味帶出黎。外皮燒到香脆，真係極力推介俾大家。雞翼亦都係壽星女最愛之一，外皮香脆，雞翼亦都有幫大家一開二，方便大家分享。大蔥安格斯牛有肉味，入口牛油會起口溶化，亦唔會太韌，大蔥亦可以幫大家解膩。牛油燒帶子好食，熟度啱啱好，大家可以一試。西京燒調味甜而不膩，魚肉彈牙，亦帶有魚肉鮮甜，燒烤後於油香融入魚肉入面，jeng！至於黃金汁燒大蝦都好好食，平時蒜蓉大蝦食得多，黃金汁都係一個唔錯嘅選擇，想食大蝦而唔想食蒜蓉燒嘅就可以試吓黃金汁啦。食完串燒之後，我哋就嗌左個爆炒雜菜，主要都係想食下啲菜健康啲。冇乜特別，入邊有唔同款嘅菜，炒得入味。最後我哋叫咗個豚肉雜菜鍋。呢個鍋原本係泡菜湯底，但因為我哋唔想食辣，所以就幫我整左個清湯。豆腐好嫩，湯都好飲，可以暖下個胃。總結，價錢唔算太貴，味道唔錯，會再返轉頭食！…查看更多