吃貨湯的個人專頁

呢日去開大埔行山，行之前梗係食返個早餐補充體力。平時少去大埔，見呢間新開茶記靚靚仔仔就入去試下。有梳化坐係舒服嘅，叫咗個扁意粉早餐。比較特別係落咗雜菌仲要係雞扒切粒嘅雞絲，可惜味道都係普通鹹鹹地嘅味，意粉都煮太淋。其他丹多火腿炒蛋係正常味道，熱齋啡夠熱嘅。合格嘅茶記早餐啦，夠大份填飽俾我行山嘅。見佢menu 有得食甜品蛋糕咁，可能蛋糕先會係比較有驚喜嘅嘢？坐住梳化歎茶食件蛋糕都好似chill chill 地嘅，有機會經過大埔先再諗lu。…查看更多

呢間餐廳係美國加州過江龍，但咁多年嚟都係得尖沙咀呢間分店，長期爆滿。其實我都係一個甜品控，對蛋糕有莫名狂熱，尤其係cheese cake。呢日係cheese cake day，每年都會呢段期間做promotion有買一送一，就特登排（排隊個排）除萬難入去歎下。食過嘅都知呢間餐廳d 芝士蛋糕頗甜，係典型美國人口味，不過勝在d 用料夠靚，餅底會香d，芝士都濃郁d。今次揀咗士多啤梨蛋糕，貪有粒生果balance 返d甜味，估唔到真係好match，同埋食得出粒士多啤梨唔係普通貨，果香味重，好正！送個件揀咗Tiramisu cheesecake。鍾意飲咖啡嘅我當然鍾意埋Tiramisu，呢個係加甜版，美國口味嘛，不過咖啡味都香濃嘅，仲要用埋佢地自家cheesecake 做個base，食完一啖又一啖，真係唔使諗減肥。其實餐廳本身都提供熱食，見到其他枱d 野食碟碟都大大份，美式得好緊要，可以多人share 野食。下次真係要約多d 人食餐勁！…查看更多

呢間連鎖式茶記最適合係冇乜特別嘅一日幫襯。平時都會食開多士，貪佢可以加煉奶花生醬果Jam。不過呢排減緊carbs，又見佢有得轉粉果就即管試下佢有幾爆汁。覺得「驚喜」餐呢個menu 係正面嘅，起碼係連鎖menu 入面會有d 嘢個個禮拜都會轉一次，百無聊賴中算有d 新意嘅。講返粒粉果，用個膠兜裝住嘅工廠製style，甚有連鎖店嘅感覺，切開係有d 汁流出嚟嘅，大部份都係油。可以一試嘅，不過冇乜想返兜嘅感覺。其他嘢都係連鎖式嘅正常，不過都係啱啱先知個雞扒汁唔一定要燒汁可以轉黑椒汁，開心嘅。…查看更多

呢日又係灣仔返工，總係想發掘下啲隱世茶記早餐。從來都以試伏心情嚟試每間茶記，今次還好啦。典型flexible 嘅茶記早餐，可以轉麵，連奄列都可以轉做雞絲。其實個雞湯麵還好，夠濃嘅，忌廉味唔太出，算好過其他普通湯麵。雞絲奄列嘅雞絲料都多嘅，冇乜雞味架啦，不過算唔係平時茶記食到嘅選擇。雖然我最鍾意啲肯創新嘅茶記，但係唔夠出色都係事實，咖啡亦係普通貨色，總體上ok嘅。加埋杯嘢飲呢個價錢算對得住，average 啦。…查看更多

行開尖沙咀灣仔總會見到呢間印度野。我呢d 咖哩控間唔中都會幫襯佢，貪佢夠重口味，d 薄荷醬 辣醬又可以任唧唔嬲。今次試下唔肉嘅咖哩。Paneer 其實係印度嘅一種芝士，口感係類似水牛芝士煙韌，有淡淡奶香。Makhani 就係一種落左牛油嘅咖哩，比起同係北印度嘅masala 會冇咁辣同creamy d。講返度菜，一如以往嘅蕃茄咖哩香味，點naan 係冇得輸嘅選擇。Briyani 係友人點嘅，呢種印度炒飯用嘅係d 瘦隻印度米，同日本米飽滿嘅煙韌唔同，口感會鬆散d，不過唔知點解好痴d 香料味，配briyani 呢種做法係有種好獨特嘅香。食印度嘢必叫嘅芒果乳酪，清甜帶d 酸味，balance 返印度菜嘅濃味。不過我稍嫌佢唔夠濃，個人口味覺得渴撻撻會更好。…查看更多

呢日出開尖沙咀做野，雖然收得早但係都冇食晏，夜晚約左fd 食飯又未夠鐘。網上面碌下見到原來呢間墨西哥bar and restaurant 有happy hour 就諗住黎個pre drink 先。入到去望到個promotion 先醒起係星期二有taco tuesday。即刻叫左個牛肉taco 填下個肚，咬落又幾juicy 喎，濃濃嘅醬汁底下仲有芝士粒，加上d 生蕃茄洋蔥粒椰菜底，就係傳統墨西哥taco 味。其實仲有chicken, fish, vege 嘅口味揀，不過轉頭又食飯就未試到。墨西哥又點會只得Corona 啤，Margarita 都係墨bar 必試嘅選擇，今次都係揀傳統青檸味frozen ，大熱天時嘅透心涼之選，不過佢啲鹽有啲大粒，係咪想我唔使齋飲有啲嘢咬下時間所限，好多嘢都冇試到，我見環境都ok chill，indoor 餐廳都幾decent，絕對適合dating 或者約fd happy hour 嘅好地方。…查看更多

呢日同friend 食完飯意猶未盡，見到淘大間地茂館終於都開門啦！之前係九龍城本店食過一次合桃露一試難忘，諗住今次唔試其他嘢，再會佢哋嘅招牌合桃露用紙碗載住嘅合桃露，唔係重點，見到碗甜品磨到幼滑無粒粒，最鍾意杰撻撻嘅texture。食落口，咦？冇咩合桃味？:(特登飲多幾啖水清下條脷再食，都係好淡味:(，唔通真係夏天食唔啱時節？老實講有d 失望，係口感上都係ok，下次要試返本店，希望純係原材料唔夠靚，而唔係成間老店都失準。…查看更多

呢日同女朋友喺尖沙咀睇完戲諗食咩好，見到間餐廳明明係一d 西式菜式為主，偏偏做到好日系幾得意，見晚餐時間尚早可以walk-in 就即刻試下先！原來大部份食材都係日本產，係真．和洋食屋，月手機落咗order 之後好期待佢嘅手勢！其實除咗京都宇治抹茶出名之外，靜岡抹茶都好有名氣架！第一次試到呢種抹茶嘅Matcha Latte，抹茶味濃郁，估唔到都可以咁好飲！薯條點味噌醬咁特別？仲要有蟹肉！隻醬嘅蟹味好出，拎嚟點薯條有驚喜，鹹香味配搭幾好，薯條面仲有紫菜粒點綴，超正！牛舌燒得啱啱好，外脆內軟，入口好甘香，落埋檸檬汁夠晒fresh！想講佢個米係用富山縣天盛米，係從來未試過嘅飯。係珍珠米無誤，但係粒粒分明唔會一pat 飯咁，有口感得嚟又香！呢兩樣跟丼飯加$18就有，但係一d 都唔hea 嘅薯仔沙律，調味上平衡得好好，鹹鹹地又有青瓜、洋蔥同沙律菜補充口感，加埋芝士碎，幾種香味係個口入面齒夾留香，絕對唔比其他菜式失色！係洋蔥湯胡椒味太搶，d 洋蔥味同菇味出唔到，少少可惜。:(當然要有甜品埋尾啦！d 蘋果同肉桂煮到焦糖化，上到枱係超香！女朋友係肉桂控即刻好興奮切嚟食。食落去連個窩夫都有驚喜！唔係脆口即散個種，係少少煙韌但又少少脆，牛油味好足，配埋cream 就唔會太乾，成件事好perfect！Feel 到佢所有嘢食都好盡善盡美，呢種味道足以令我會想番兜好多次！嗰日見到隔離枱食緊Pizza好吸引，下次會想試埋！…查看更多

早喺幾年前某個夜晚已經有幫襯過呢間Bar，印象中只係記得佢嘅Classic 裝修，之後冇返開呢邊工就已經冇再嚟過。呢日做嘢又經過呢到，先知原來佢有做Lunch 喎，包個Main、蒜蓉包、湯、飲品。好有驚喜！你估唔到一間Bar 整個蘑菇忌廉湯咁認真，飲得出blend 到滑嘅蘑菇香味，淨係碗湯都足以令我想encore 幾次。蒜蓉包脆香，油份啱啱好，點落d 湯到真係...好食到唔識形容 簡簡單單咁煎已經夠好味，魚肉係有咬口嘅質感唔會一切即散，薯菜竟然唔係薯條，係一舊舊香草炒薯角，外脆內軟，唔會度度都有得食嘅味道。埋單冇加一，以為自己食緊茶記，望住佢疫情下都keep 住浸懷舊味，而且仲生存到確係難能可貴，有機會去開灣仔一定要再幫襯先得！…查看更多

疫情兩年黎望穿秋水都未等到可以去泰國旅行呢排實在太掛住，即刻約咗個friend 食下呢間成日排長龍嘅新泰。想講每次想walkin 都幾難等位，今次終於食到！原來入面咁大咁多位，見到仲有vip room。點解可以仲有咁多人排，心諗真係咁好食？:(本身以為燒豬頸肉沙律係凍食個種，點知同生菜包係friend。唔緊要，我同個friend 一人一個私家生菜籃仲開心。講返個餡，燒豬頸肉係會用埋d 金不換之類嘅香料炒，勁香！雖然油d，用生菜包住食fresh 好多。第一次食鴨肉鬆嘅生菜包，估唔到d 鴨味嘅生菜包都幾match，唔錯嘅創新口味。用咗好多蒜粒加青紅椒炒，好惹味喎！我覺得送啤酒一定好正！不過嗰日冇叫到酒今次個主菜就係明爐烏頭！就係呢種酸酸辣辣嘅味道，仲有下面個火滾住條魚熱辣辣，醒胃又鮮味，好有曼谷夜市大排檔整嘅風味，係可以一解思鄉之愁。其實我成餐最期待就係佢，一上枱噴煙嘅？原來d 糯米紫米飯都係熱上，連個椰汁都係熱架！食落係比平時香勁多倍！加上酸酸甜甜嘅芒果，我覺得個糯米飯係呢間餐廳必點嘅選擇！飲埋個清新嘅椰青，刮埋d 椰肉食，真係心諗幾時先可以去到泰國？…查看更多

話說呢排要氹返女朋友:(俾佢話事揀間餐廳我請佢食，仲諗住好彩唔係超貴fine dining，點知上網睇相系間嘅打卡cafe，超粉紅、超唔係我style，仲有好多某團體嘅裝飾相，唔怪得餐廳叫Error，好啦，為左氹下佢，就容許我做下前夫啦一到門口就已經係一個打卡位，係好fancy 嘅圈圈韆鞦+花花背景，係靚嘅，我諗冇乜邊個女仔會唔鍾意。牆上面仲有好多某團嘅相，仲播埋歌，作為前夫只可以淚目本身對野食冇咩期望，始終係樓上cafe 丫嘛。咁諗嘅我就錯啦，估唔到係野食方面都有heart 喎，係有驚喜嘅先嚟兩杯野飲，芒果洛神花、冬瓜益力多梳打，淨係聽d combination都好error。:(作為試伏專員已經有晒心理準備，咦？又ok 喎，洛神花嘅酸配芒果香、冬瓜糖嘅甜配益力多嘅酸，你係唔會諗到點解可以咁match。實冇error 嘅選擇，新鮮炸出嚟仲要熔熔地嘅芝士，點埋黑松露醬，係會自動波「快吞轟」。一d 都唔求其嘅肉醬意粉，最鍾意佢粒粒blend 爛嘅蕃茄蓉，唔係純一pat 茄汁，意粉仲要煮到al dante 煙煙韌韌，正架！雞胸煎得香，係有dd 過火:(有d 位食落乾d，有d 位食落就啱啱好，其實d 野菌爽爽地又夠香，我覺得幾好食（我知我錯重點）Well , 食得cafe 我都預咗女朋友只係想食甜品，其實我都係個甜食家，所以唔會反對呢個梳乎厘係超級梳乎嘅soft，相影唔到佢嘅動感，冇錯，係動感，係會好似日本布甸個種搖嚟搖去面頭審左浸咖啡粉，個底又有平時tiramisu 手指餅，苦苦地，呢種大人的味道完全啱晒我，當然最緊要女朋友鍾意。仲諗住無啖好食嘅我係有d surprised 嘅，我絕對唔介意嚟再做前夫嘅…查看更多

前排終於都放寬返可以多d 人晚市堂食，即刻瘋狂約人dinner。友人話涼涼地suggest 食烏蠅館，心諗烏蠅館食咩架？特色創新料理想我試伏？去到先知原來係食川式烤魚冒菜嘅！問題嚟啦，有人食得辣有人唔食得，唯有全都要，4個人叫2條魚！一開蓋d 蒜味湧出嚟勁香！同本身味道比較淡嘅海鱸魚好match，蒜味又唔會蓋過晒魚嘅鮮味，加上冇乜骨啖啖肉，好啱我呢d 唔想噒骨嘅懶人。 相比之下珍珠班細骨會多少少，但係都好多肉，肉質比海鱸魚嫩d，有少少腥，但係佢哋嘅辣汁僻咗d 腥味，仲要麻麻辣辣，唔覺唔覺就有d 欲罷不能，烤魚就係咁先正！烤魚食到差唔多就可以加湯變邊爐。想講一定要叫寬粉！川菜嘅精粹莫過於索晒d 濃汁嘅寬粉，超煙韌，勁正！（太好食，唔記得影相）響鈴都係必點，唔係出面嘅街邊貨色，豆味香又唔易淋。貢丸同墨丸都出色，貢丸肉味好濃，墨丸係有食得出嘅鮮味，連濃味湯底都蓋唔過！野飲一定要講，未試過食烤魚可以叫黑糖鮮奶，仲要係配桃膠雪燕，我自己本身叫咗檸檬蝶豆花，清新解膩之選，但係偷飲咗友人d 黑糖鮮奶，黑糖味好香，又幾好飲喎！點知自己encore 多一杯，唔係純為好飲，係食到後尾要解下辣！下次嚟會想試埋冒菜，再食寬粉！…查看更多

又係喪OT 嘅日子，呢日做到口啖啖想食d 濃味野獎勵下自己，見到呢間茶仔嘅menu 有d 炒粉麵飯，俾個侍應招下手就行咗入去試下。見有個「泰」字都會諗起菠蘿肉鬆之類嘅配料，不過「泰皇」真係想像唔到係咩味。又係自動請纓試伏嘅moment。竟然係冬蔭功味！但係又唔差喎，估唔到冬蔭功可以用嚟做炒飯，酸辣味出，用海鮮做配料其實就係海鮮冬蔭功湯變咗做炒飯。我覺得呢種創新好難係普通茶仔搵到，feel 得到有heart 做，加上佢d staff 都好好態度，我絕對會想再嚟試其他嘢！另外杯凍鴦都唔錯。茶同啡個底入口味道都幾香。…查看更多

呢排食得好西多勁熱氣，但係好死唔死同女朋友睇炸雞相關嘅韓戲，俾佢係咁嘈話要食。好啦，最多食多一次先戒口啦。呢日行開觀塘就順便寵下佢（同埋我)。我都唔知觀塘有間咁有韓味又fancy嘅炸雞舖，唔會細細間好迫夾。天口熱就一人叫咗杯yogurt smoothie，柚子同芒果，夏天飲凍得嚟都幾fresh，雖然對我嚟講係有d太甜，但係女朋友鍾意就得啦！Dodam Salad炸雞舖食沙律係咪玩嘢先，呢d 叫balance ，係balance 返我呢排d 好西。沙律菜都好新鮮，仲要有菠蘿花生提子乾，食落唔會太寡，仲幫埋我開胃準備食雞！韓式海鮮煎餅未等到雞，先嚟個海鮮煎餅。煎得好脆口，最重要係d 餡勁多，d 魷魚係多到夾上黎都會跌幾粒出黎咁多，但係都keep 住爽口同香，仲有蝦同青口，海鮮同煎餅本身就係perfect match，我要多謝我自己咁識揀。蜂蜜牛油香蒜焗雞壓軸嘅炸雞，唔係，係焗雞終於出場，多謝女朋友體諒叫個冇咁熱氣嘅。但係一上枱嗰浸香味係驚艷，以為焗雞會冇炸雞咁好食？No no no，係近乎燒雞嘅香脆口感，蘸滿晒蜂蜜，邪惡得嚟又唔膩，有埋醃蘿蔔平衡返味蕾，明明唔肚餓我都清晒成碟雞。好彩粒痱滋冇變大，容許咁熱氣嘅我又再放肆，可以搵次happy friday夜晚encore!…查看更多

好早已經聽朋友講呢間沙嗲牛麵必試，今次做野要去去觀塘就順便試下佢早餐。點知睇餐牌見到個好盞鬼嘅combination: 香辣魷魚麵？呢d 唔係邊爐先會見到嘅配搭？最有冒險精神嘅我唔會放過呢d 機會。魷魚係勁彈牙同入味，重要係個辣汁，完全符合說明嘅好香同好辣！我轉左米粉，係幼身米粉鎖湯汁一流！順帶一提個丹麥多士，烘熱咗係有heart 嘅香脆口感，都正！杯鴛都係唔錯，其他野食就正常發揮，整體係一間值得再試嘅一間早餐茶記。…查看更多