ODE的个人专页

已經來過三次，以呢個價錢提供利用質素嘅食物同服務，喜來登簡直超出我嘅期望好多～食物好有質素，唔係大件夾抵食，又唔係用啲中等嘢扮好high去收好貴。而係有良好嘅食材，充份嘅烹調技巧加創意，製作出美食，整出嚟無一樣嘢係行貨，唔會乜都加芝士落去搞到好邪惡好豐富咁嘅所謂美食，如果要食果啲嘢就建議千祈唔好去。所有服務人員都有禮貌而且親切，依家響香港嚟講真係難得一見，感受到20年前去酒店食飯得到嘅服務。環境開揚，乾淨，洗手間都好乾淨，我無敵滿意，平時謙三謙四嘅嘴尖男朋友，都非常難得地滿意。…查看更多

黎巴嫩菜，個lunch menu 淨係揀主菜就得，所有野都包齊一碟過～同埃及菜好似～重口味但好食。今日食鱸魚，煎得香，夾埋好咸既配菜好和味～豆泥好正，係個包就一般～Rice pudding 稍稀。音樂正，好似去左中東，啲香味真係。。。。似乎無就到香港人口味，呢樣最難得， I like～😎服務就當然唔錯啦～有eye contact ～午餐呢個味道只係百四咁上下，有湯，頭盤主菜，甜品飲品，其實好超值。…查看更多

裝修幾好玩有啲台灣味，有懷舊氣息，枱面細不過啲碟頭細影響不大。其實食物還ok由其係個鹵水併盤，鹽酥雞排炸得好，但我唔明點解要落孜然粉攪到有羊味。蛋餅算ok，飲品就好一般，我地係叫招牌奶茶同檸檬蘆薈，檸檬呢杯有啲米水既怪味。個刀削面真係唔知點解值$60,淡口麵淋。個芋丸就直情唔使提潻啦。我地兩個人下午五點零五分落單，員工食食下好緊張熱切地要收野，好明顯係想趕人走既感覺，唔止一個員工係咁，好誇張，五點三十五分就好熱烈地全部收曬等你走。通常都會比三次機會啲鋪頭，試清楚，但呢間肯定唔會有第二次，食得好唔舒服。…查看更多

我熱愛口水雞，今日試下呢一間，叫左個口水雞米線同凍奶茶。小店服務係ok的，之後上個奶茶，好，怪味奶茶雖然少有，但我可以唔飲，呢杯野個味根本唔係奶茶，係好立克加咖啡重有啲唔知乜嘢味。再上個米線，米線同口水雞分開上，個米線係唔好食，無肉碎味，無酸菜味，我真係唔知係乜嘢黎，然後個雞，雞本身無乜味，個醬就有莪朮油味，個味道同辣法同之前食過既所有口水雞完全唔係同一回事，我唔知雲南啲口水雞米線係咪真係咁味，有機會我會去試一試，不過呢個味道真係多謝曬。我好少浪費食物，但有次真係好唔對路食左少少就要走。…查看更多

已經黎左四五次，每次都非常滿意，由其係個豬扒！肉鮮嫩，香！酒店都食唔到呢個質素，每樣野都好比心機去整。火魔蜆正！唔記得講個忌廉湯，味道濃郁好無敵。甜品試左兩個，一個係燉蛋？另一個係蘋果肉桂多士，年紀大唔記得個名，相信試過既人都知質素有幾高。現場係會嘈啲，不過都係一種氣氛黎，有大玻璃窗望到外邊，著左小夜燈，夜晚都幾靚。服務係好有heart的，好感謝滿場不停走來走去的女待應～有時間限制，記住個半鐘交枱呀～…查看更多

食過兩次，一次午市套餐，九十幾，限時一個鐘。一次午市食到飽，限時個半鐘，百六蚊果隻啲牛肉好好食～有啲香港少有既食物，燕餃，蛋餃，旗魚餃，感覺好似去左台灣，墨魚滑，旗魚滑好鮮味～醬料多種選擇，唔係一般味道好正～不過啲沙白同鱸魚片真係麻麻地，鹵水牛定豬肚好硬唔好食。凍豆腐少少地降溫得黎好冶味～最特別係個飲料櫃，好多樽裝既茶包沖茶，菊普只有菊點飲都無普，桂花烏龍就兩樣都好夠味～服務有禮快速，記住出去攞野時要用口罩啊～…查看更多

去動漫展前先醫肚，行過見到唔錯就試下，係午市套餐，叫左兩個tapas,一個係呑拿魚他他同多士仔，一個係蛋，估唔到蛋加炸過既酸子會咁夾。主菜係盲曹，魚好嫩滑，正～價錢$17x係值既～…查看更多

午市bang bang聲搵食，唔想食飯，見到門口有個麵字，人又唔多...(查實係少到有人企響門口招客) 食左先算，名叫碰麵，logo設計都好似係食日本面，但原來係車仔面，唔緊要車仔面通常好食......我錯，超錯!!日本腐皮+午餐肉+腸仔+米粉，跟豬骨湯底....首先，個湯係豬骨湯(稀釋5倍)，腐皮淡口甜甜地有點怪味，直覺認為係變左味，午餐肉，你唔會覺得係豬肉，都有可能係肉，但又梅又核凸的貨色，腸仔同午餐肉都係同一個家族....個米粉係好食的，檸蜜都唔錯的，但成碗野係可以用"嚇親人"來形容，實在好唔得。食野途中有幾次好想望下個廚，一個點既廚可以煮到d咁難食既野，入d咁難食既貨？佢自己有無食過？？係咪已經準備好....但我望佢唔到...會比多一次機會佢，不過肯定唔係食麵。…查看更多

Kubrick太多人，要去其他地方搵食，記得多年前隔黎有間樓上cafe，去睇下重響唔響度，果然重有間cafe，但係改左名，不過格局都無乜點變，係多左d boardgame~ 叫左個煙肉意粉，beautiful monkey (banana，apple something...)碟意粉樣靚，味足，係濕左少少，杯野都大杯又好味，時間係星期日中午1點幾，全場得4個人，木台好大!!真係hea得過的地方....…查看更多

其實呢間舖見左好多年，從來無入過去，今日見佢新裝修到好似酒店咁，又無乜人又諗唔到食乜，就去試試...朝11點8去到，唔知係咪太早之過，我未食過咁難食既燒味飯.....叫$57套餐，切雞燒鴨雙拼+老火湯+蛋白炒飯，湯先到，好飲 !!因為應該充滿住味精，下午我飲左一大支水止渴，先確定佢係好好味的味精湯~上菜的侍應呆呆的都不要緊，但佢手指甲有d黑邊就要緊，跟住廚房傳來4下超大乞次聲，講真送未到已唔想食.....跟住飯同燒味上，飯有蛋白金華火腿都幾好食，燒味就好細碟下，鴨凍雞皮乾厚，幾條菜係冰凍，我認為呢碟野已好辛苦咁等左我十幾個鐘，為左多謝佢等我咁耐，我食晒去.....之後我眼花，都可能唔係佢錯，天花板吊左數個中國花樽改造既射燈，無錯係射燈，而台係雲石台，咁衰我又響度睇電話，好難先較到個角度唔會比燈燦爆眼....接落黎係有食客埋單投訴d飯凍.....跟住疑似太子女叫師傅翻翻d飯，當然係採佢都傻....再緊接係2名男士入來坐，想坐4人台，有個阿姐帶佢地坐2人台，當時全店只有3名食客，好多位的，時間係11點55分，2人覺得太窄轉坐6人台，阿姐就講句：啊，唔緊要，反正你你都唔係坐好耐!好野，講得好，好耐未聽過人趕客...再緊接住既係阿姐們嗌來嗌去，鬧來鬧去既聲，街頭嗌街尾果隻....唔好意c，係我誤會呢度個格調高左少少，係我錯，或者可能有機會係裝修誤導左我，其實跟本係傳統背脊有隻燒豬吊響度地面油淋淋果種燒味店，無變過，而且d食物重咁差，通常d差舖我會比3次機會佢，但呢間唔會有，無下次。不過要提下係有幾位員工係好有禮貌做得好好，可惜間舖有d咁唔掂表現既人同食物，真係唔好彩....唔知呢間舖最大聲果個阿姊係咪就係事頭？如果係的話，我都希望佢會改進下...…查看更多

食左好耐都唔記得寫翻.....當日搵左好耐先搵到呢度，途中的屎佬唔識路，又建議去食水佬....對面街既茶舖哥仔唔識呢間舖....應該真係屬於隱世店!!一踏入舖頭就感受到老板涼既熱情，其他伙記都好好服務~全場只剩一張台，即刻坐落去幾驚無得食......由於唔係好肚餓，叫左個糯米酒...豬骨煲？炒蜆...由於太耐之前食，已唔記得個名係咪雞煲，只記得個煲都頗大，重有好多骨桶，好似食極唔完~~第一次用飲筒啜骨髓，好滋味~~d肉好淋~個糯米酒湯底又香又順喉，無得頂呀~最後叫個麵隊落去索埋d湯~正~!!想食多次，不過膽固醇太高短期呢味都係唔食得咁多~:(…查看更多

食飯前行過見好多人排隊…又見有朋友提過話幾好食…以為好正，飯後買個即食…淨係由個袋羅出來果下已知出事，支簽幾乎篤唔住個羔，食一啖 ，成個係咁散曬，揩到個袋pat茄咁！好狼狽！糊口到不得了…又唔香，從來未食過咁難食既砵仔羔，心裡有d奇怪，點解會有咁多人排隊？唔通個個好似我咁人地話好佢又試？實在係奇怪…奇怪到我要來查清楚係咪去錯店，點知驗明正身確係正舖…建議響店名前加番難食兩個字...…查看更多

今日同朋友去左食下午茶自助餐，其實香港幾難搵得到好既下午茶自助餐，而重要係平日食，但萬豪解決晒所有問題~環境正，服務好，食物方面有d人可能認為呢度提供得少，但我就認為好足夠，d野求其揀幾樣都係高質野，同果d提供200樣野比你揀但有90%同大xx差唔多既野，咁不如花幾十雞去食大xx好過啦。當日冷盤有....鮮果沙律，意粉沙律，蟹柳沙律，新鮮三文魚，煙三文魚.....鰻魚，蟹子，腐皮壽司.....冷面....自製沙律bar...巴馬火腿+哈密瓜，三種沙樂美腸，四種橄欖，西瓜，波羅...有車打芝士，藍芝士，紅椒芝士..熱野有....小籠包，魚翅餃，蟹子燒賣，糯米雞仔，炸豬扒，炒面，百花魚肚...一個counter有專人整包，切豬肉片夾沙律菜~一個counter整生滾粥，粥料有蝦，帶子，皮蛋，鹹蛋，魚柳.....一個counter整班戟，料有香蕉，哈密瓜，士多啤梨甜品有....朱古力蛋羔，朱古力慕絲，杏仁餅，柑橘jelly，提子鬆餅，蛋羔仔，麵包條....3點半hea到6點，連埋餐茶都係$210，但樣樣都唔錯，絕對係值~不過有d人食唔慣凍野可能會嗌無野食~重有哈根大小杯裝雪羔添呀~~~…查看更多

為左唔想留響賭場太長時間，我揀左無雷公咁遠既呢間舖頭食晏，第一次去路環，時間尚早，舉目無人，有點寧靜漁村風味，心情好愉快~去到門口重差幾分鐘先開門，店員發現就立刻請左我地上二樓坐，之後半個鐘都係得我地一台，包場一樣，艾like~睇完一輪餐牌，對照自己響openrice抄既貓紙，我地點左...檸檬蜆，蒜片蝦，馬介休球，鴨飯...食住佢比既餐前橄欖，響度慢磨，真係好寫意...係唔like頭上部喇叭，我覺得最弊係呢樣野，攪到嘈住晒。野食慢慢到齊~檸檬蜆實在係必食推介~馬介休亦正，蒜片蝦又唔錯喎，雖然望落去個量少d，但食完就覺得夠勒....至於最後個鴨飯....呢個係自己叫錯左，我諗所有鴨飯都係會勁騷的....唔關佢個飯事，我見隔黎台係食得幾開心的，但我第一啖就幾乎嘔....好似食緊隔拉底~~其實我係同樓下位食友同一日響果度食飯，睇食評嚇然見到自己個頭.....所以都寫翻篇紀念下~…查看更多

同朋友食完晚飯行過，口痕想試下新野，就入左呢間白雪雪既甜品店....亦都叫左2個白雪雪既甜品~呢度主打係北海道牛奶製既甜品，由於已好飽，所以只叫左兩個... 椰子凍冰冰同埋北海道牛奶奶凍~北海道牛奶奶凍<<<好滑，講真食落去果下覺得好過義順....可能同心情有關掛，呢度比較簡約無壓迫感~哈~~~ 椰子凍冰冰<<<對佢個外型好感興趣~食落亦好滿意，其實係類似雪葩既甜品，清清地，幾唔錯~個室內環境係有d似幼稚園~但感覺好清純，唔會好似一般甜品店咁，將d menu貼到差d天花版都係，無咩壓迫感，可以比你些少時間靜一靜......d食物亦無話乜都大大堆頭，睇見到飽果隻....個人覺得唔錯~…查看更多