Sell的个人专页

之前去食過早餐，質數都滿意，但今次再去幫襯，就真係令我好失望！兩個人，叫咗兩個沙爹牛肉出前一丁跟腿蛋面包早餐，出前一丁已經每碗要加$4，但我地都會照叫，因為其他面真係唔好食，點知出嚟嘅質素真係同果d大光面一樣，但都要我加$4，我覺得好唔抵，同佢地講，但收銀姐姐同我地解釋，話我地果兩碗係出前一丁，仲要話可能係個師傅煮面時出過水，面會淋d。(我心諗，有師傅咁好死會同客出水？)跟住仲同佢地d員工講，又係d出前一丁比人投訴，原來我地都唔係第一個反映應見，換句話講即係之前顧客所提出的意見聽咗，不過冇改善囉！奉勸各位食家下次去開食嘢，如果真係想轉出前一丁面，要三思而後行呀！…查看更多

其實去過好多間唔同地區嘅pokka cafe，佢地間間d服務都令我好滿意，所以這點係我首選呢間食肆嘅主要原因，因為食嘢唔單只講味道，仲要有環境同服務去配合，呢間餐廳做得十分之好，不妨一嘗。次次去都冇刻意去book位，不過其實今次都係6:30pm去到，侍應問我地有冇book位，我地話冇，不過可能時間尚早，都唔使等即刻有位，我地兩個人，但因為我懷孕，個侍應話比張寬闊d嘅枱我地，呢d咪係細心，令人舒服囉！仲有平時我地嚟，都係凍水，今次佢仲比杯熱水我，真係份外warm呀，雖然天口熱，但佢都會先問你好唔好至比杯熱水，我當然冇拒絕啦，之後佢地就介紹今日廚師推介，我地睇咗陣menu就落單，佢都有講話要等15-20分鐘，呢個我地係預咗的。在等候期間，比我地發現咗有個我諗係經理級嘅呀姐喺度教個新仔，可能個新仔d服務未令佢滿意卦，隱約聽到佢話要介紹廚師推介時要清晰，又叫佢多練幾次，之後個新仔過到呢關，但又過唔到斟水果關，因為人地教佢唔好拎起隻杯斟水，但佢都要咁做，我唔知佢唔明定唔記得，總知又比人訓話啦，雖然我覺得個新仔比人鬧好似好慘，但諗深一層，唔鬧唔教點會有咁好服務質素？所以我都希望佢受教，我下次嚟食都可以見返佢，而且有進步添啦！食物方面，我地叫咗個A餐羊扒同B餐牛扒，味道很好，但比我地點羊扒嘅介辣就少咗D，仲有D薯菜，種類都好多，不過個薯仔就硬咗D，我都係食咗半個，餐飲咖啡都係早咗一D上，因為熱嘢真係襯熱飲至最完美，喺我地餐中就到，我先品嚐一啖，無得彈，但到我地食完個餐之後飲，就已經冇咗果種味道，建議佢地一係再遲D至為我地送上餐飲，一係就換個D保暖杯，我諗咁就真係無械可擊！品甜冇乜驚喜，好普通，可能只係跟餐卦，食飽見出面D人開始多，所以我地都埋單，因為有7折，所以今餐好抵食！…查看更多

齋聽個名，仲以為係食一d「有營」的食物，點知坐低睇餐牌，同區內幾間食肆食的食物相差無幾，不過呢度d員工態度差好多，冇質素。事緣我地一家四口在上星期日晚上光顧，叫咗4個餸同想另外叫一碟蒜蓉炒西蘭花，點知佢落單就當我地呢個蒜蓉西蘭花係一個小菜套餐，即1個餸+白飯+飲品的套餐。個職員完全冇講，只係我喺張埋數單度見到佢寫呢個蒜蓉西蘭花的價錢同我地叫的小菜套餐價錢係一樣，於是我地同佢講，我地只係想要個炒菜，唔想跟飯同飲品的，一嚟我地覺得食唔晒，二嚟我地覺得價錢應該會平過叫一個套餐，(因為同佢同一間機構又喺同村的果間食肆，我地一樣係咁落order，佢計我地個蒜蓉炒西蘭花都係大約HK$30，我地都覺合理。) 點知佢好唔like咁講，炒一個菜同套餐的價錢係一樣，之後我地都未講完想點，佢一支箭就走咗，跟住我地叫第二個侍應，因為我地想取消之前叫果4樣嘢的其中一樣，呢個仲衰個之前果個，擺明唔係好想睬我地。唉…食物又唔係好食，員工態度又冇水準，真係請我都唔再嚟呀！…查看更多

食晚飯前有少少時間，適逢又經過開呢間cafe，所以不得不上去打發時間！上到去座位尚算闊落，環境唔算清靜，因為有好多細路走嚟走去，有架大電視，有話冇聲，所以唔知睇乜，好在有d update的雜誌消磨吓時間，我地叫咗一杯mocha同一杯招牌薑味咖啡，我覺得mocha好飲d，但一定要好快飲晒，因為好快會凍，暖的咖啡很難飲！…查看更多

由於一早已book位，而且我們到的時間是6pm，所以跟本毋須等位，不過比咗張我地唔係好想坐的枱我，想轉卡位，佢地就話full晒，唔轉得！服務態度：ok，斟茶次數密及快，值得一讚！食物方面：基本上叫過一次後未必再有食物想食多次，但質數ok的，但欠缺甜品，希望可以改善。座位方面：枱與枱之間太狹窄，客人座了下去，侍應不能入去執枱。環境方面：坐滿客人後，開始覺得嘈吵，且有擠迫的感覺，廁所只有一格，需時輪候。…查看更多

喺稻香打邊爐都唔係第一次，但由上年起，朋友們通知我要check單，我都不以為言，但我的朋友多數都有check，叫做「係咁二」check吓啦，次次都ok冇錯卦！好可惜，尋晚再去打，今次終於都我了，落咗單嘅冇嚟，冇落單嘅送咗嚟，由於打邊爐，其實叫咗咩嘢食都唔係好記得，好在朋友們都仲記得食咗d乜，埋單諗住比錢，點知朋友們又提一提，check吓單先，唔check由至可，一check真係把幾火，有3樣火鍋料叫咗冇嚟，但要我找數，乜佢地d會計凈係會睇入單紙，唔會睇食物咭咩？唔識對吓？！真係把幾火，但佢地d等應好似覺得冇咩奇怪咁，同我地講冇嚟就刪咗佢囉，再開過張單比你地！真係痴線，佢哋都唔知咁樣食咗人幾多錢呀，仲好似一d改善都冇....朋友們，你地記得check單呀！…查看更多

見到佢地裝修都ok，6:45pm又冇乜人，最緊要係唔使等位，於是就比佢地d門面「握」咗入去，一入去侍應幫我地斟茶，手勢真係「一流」，斟到周圍都係，成張枱濕晒咁濟....呢d真係叫技術，仲有佢講嘢我完全聽唔清楚，佢話有甜品送，免費的，嘩...真係聽死我呀！2個人叫左4個菜：(1) 雞絲粉皮 - D醬很啖口，份量算OK(2) 上海炒年糕 - 顏色很深色，但冇味(相信係用咗好多老抽)，年糕似食粉團，菜似格夜霉菜(3) 津白 - 味道尚算OK，份量算少(4) 小籠包4隻 - 我們覺得不是即叫即蒸(但係最後先上菜)，有翻蒸熱的感覺，涵內的肉質「鞋」又不夠熱，皮又厚，醋沒有醋味。埋單都要二百幾，都算唔值....食食吓碟炒年糕，仲空降隻蚊「之」落嚟，好在叫做已經食到七七八八，否則一定會叫佢換過碟。都係嗰句，食1次就夠了！…查看更多

上星期六去食下午茶，叫咗個生牛肉麵同咖哩牛腩飯，我哋兩個人食完都覺得唔知食咗d乜，食物冇味，一d都唔好味，d位又迫，同隔離枱果兩個人好似一齊食咁，佢不停傾計，煩到嘔，又喺度研究果度最低消費HK$15 O既問題....煩、嘈！以後都米使旨意再去！佢哋設立果個最低消費HK$15，都唔知係指每人定每張枱！令人混淆呀！…查看更多

今日和朋友到此地吃午餐，侍應們給了我們一張兩人枱，可惜我們點了很多食物，食物不斷送來，那張小枱根本放不下，但他們亦繼續擺上，食得好不容易，希望可以改變一下擺枱的位置，不是放得多枱就是好的，亦要顧及客人進食時的感受！點了一個千島沙律，沙律醬太少了，有點「姑寒」的感覺，其他的有「雞軟骨棒」感覺幾得意，味道亦不錯，價錢合理，值得再食！到了結帳時，我們共吃了173元，給他500元，他竟問我們有沒有碎紙，我們感到驚訝，真是堂堂一家大食肆，不可以多唱點散紙嗎？…查看更多

嘩！佢d乳豬d皮勁唔新鮮，林"吱""吱"，勁難食，上次食都唔係咁。飯後食甜品，佢個楊枝金露仲唔掂，"楊枝"是苦的，西米多個水，傑"tat" "tat"。下次去都唔敢再試呢兩味了！…查看更多

首先，去呢處地方路標或指示牌唔清，兜好大個圈至去度，最慘係我之前已經打電話去問佢落西鐵點去，佢仲答我搭西鐵好近，行一陣好快到！一心以為真係西鐵站附近，誰不知要我行成半粒鐘至搵到！一入到去，大堂已經唔grand，上到9樓，竟然冇人招呼，要我等成半分鐘至有個人埋帶位，坐低去搵食，我係食LUNCH BUFFET，其實我都預少，不過冇諗個真係咁少！三文魚係我食咁多間切得最厚O既一間，真係食幾舊都飽呀！壽司就冇乜款，睇到都冇衝動去食！熱盆款式都少，果款香煎豬扒簡直係絕頂....難食，豬扒"鞋"又冇味，另外果款唔知係津白定娃娃菜，有陣豬籠車經過果陣味，好難頂！佢仲有一款叫粟米班塊，班塊與粟米汁係分開的，我見到個大叔竟然用個小湯碗去"裝"粟米湯，成碗滿呀，"筆"完真係齋食班塊，佢可以考慮除羅宋湯外加多樣粟米湯啦！侍應服務又唔可以話差，又唔叫得好，我個FRIEND坐果張搖搖，佢都諗住唔好咁衰換隔離果張，於是叫個侍應幫佢換，點知佢換隔離果張比佢就算，執碟仲搞笑，未食完果D就執，食完果D又唔執，吹賬...睇係佢仲有好多地方要改善喇！…查看更多

可能係適逢憑滙豐信用卡有半價優惠最後一天，多人到不得了......十樣食物，有三四樣是冇得食的，明知多人，食物出得太慢了，有點不夠分同人爭食的感覺，食物不算太吸引，很普通，據聞佢哋做緊「星、中美食」，半價咗都要180蚊一位，一d都唔抵食！仲有我哋坐果張枱好似"搭"咁，喺兩張枱o既中間，冇糖、冇牙簽...可憐！…查看更多

我一行6人，order唔同o既食物，大家感受都係覺得貴夾唔抵食，飯後整杯茶，其中4人叫了檸檬茶，係爛檸檬茶至真，擁有幾間分店o既餐廳，有咁o既水準，真係有d失望，但我都有去過荃灣果間，質素都冇呢間咁差，都唔知點解！…查看更多

好耐都冇去過，突然想食粥，於是就特登去國記食，一坐低，D阿姐就好似唔比時間你諗想食D乜咁，係咁問你食咩食咩，好煩！ORDER之後，就度等食物期間，另外一個阿姐又問...一路食一路"砵"烏蠅，真係分分鐘食落肚都唔知！我叫碗牛肉粥、一碟炒米粉、一碟炸兩，碗粥都OK，米粉好硬，又凍，炸兩都算好味，但用切炸兩果把刀就唔係好掂，好污嘈，個蓋都係，點算？睇怕都唔使旨意我再去！D阿姐都唔係好友善！…查看更多

每次去屯門市中心覓食，一想到要飲杯凍奶茶，一定非"大利"莫屬，茶味香濃，每每覺得飲完都未夠喉！不過，果位收錢o既伯伯就真係唔多有禮貌，說話有鄉音，問多句就感受到佢好惡！…查看更多