ray412m的个人专页

味道無法評論，但一碗得一舊羊腩嘅羊腩粉絕對不值$53。擦出劣食新境界。老實講，隔離任何一間茶記或快餐店，不論質素、份量、味道都會比呢度好。冇乜嘢請盡量避免，謝謝。…查看更多

將軍澳餐廳選擇有限，呢間應該係少有嘅單頭小店，但老實講，貴得來非常一般。所謂「玉子」，即係蛋，亦即係將現有食譜加蛋，或提供有蛋嘅菜式，毫無特色可言。LUNCH SET最平$58，烏冬加蛋加飲品，仲要加一，比你去丸龜仲要貴。點咗個豬軟骨加雙蛋飯，well，除咗醬汁換成燒汁，呢碗飯同茶記雙蛋午餐肉飯完全冇分別，但就收$77（未計加一）！如果唔係坐低咗一定要order，否則可免則免。要食飯又要平，行過少少去吉野家算數。…查看更多

放假諗唔到附近有乜好食，太太見呢度有大量blogger強力介紹，於是決定試下係一回咩事，點知...兩口子各order拉麵一客，麵底拍得住味千咁優良，豬骨湯底擺明係味精底仲要開得非常稀，唯獨豬扒即炸，算係補返少少分。所謂果茶，茶味全欠，一飲就飲出糖漿味，人工程度拍得住隔離碗拉麵味精湯底。我明白，俾得五十幾蚊食碗拉麵，就唔好咁多要求；不過呢種茶記級數，絕對唔值而家呢個價。同一價位，如果去大門會合理好多；又或者，平少少食譚仔好過。再唔係，返屋企煮日清ラ王 麵都得。衛生方面，眼見還可以；裝修？同食有乜關係呢？是旦啦。到底今日班飲食blogger可唔可以俾返少少職業道德，寫食評時貼返地少少呢？…查看更多

韓燒呢幾年大行其道，旺區開到成行成市。但小弟覺得非常奇怪，一個位於亞熱帶嘅城市，點解市民嘅口味可以咁extreme，而又唔會嫌熱（同熱氣）日日食韓燒呢？不過，當香港吉野家都可以做到全天候365日供應火鍋套餐嘅時候，對應冰冷氣候嘅韓式燒肉店開到梗有一間喺佐近，又有何不可呢？香港近年吹起哈韓風，對韓食要求自然有所提升。仲講X陽苑？咁同你話食拉麵去味X有乜分別，咪玩啦。近兩年來食過最高水準嘅韓燒，非尖沙咀「韓珍」莫屬……但冇返三五七人，又冇返四五百（蚊）筆直的話，就真係唔好諗。低一個Tier的選擇多好多，但質素亦非常參差。梨滿園亦係其中之一，仲係高質嗰隻。衰啲講，韓燒涉及烹調技術並唔多，最多只得「烤」嘅過程；當然要控制烤嘅時間，但肉本身唔夠鮮嫩嘅話，就同烤死屍冇乜分別。小弟就有過呢種經驗，仲要食足成個鐘，非常難受……又咁講，呢次嘅experience都唔錯。唔明嘅話，自己睇相。仲有冇upload相嘅醬油蟹，第一次食，個人麻麻地因為好喊，但新鮮就係事實。食完，Conclusion係堅大鑊，因為停唔到口，又要做運動keep住身型。…查看更多

今時今日，冇受領匯魔爪影響嘅屋邨少之又少。9成9公屋商場，唔係變晒快餐店，就係連鎖茶樓。最離譜算係黃大仙公屋居然有元氣壽司，要草根階層俾幾舊水食魚生菜當晚餐，你冇嘢呀嘛？剩返少之又少嘅公屋商場，依然由政府管理。而當中，又存在少之又少嘅小店，KK算係其中之一。肯肯定，去到祖堯邨呢種荒蕪之地，除非你係車主，否則平日專程會上去嘅，一係街坊，一係就學生。斷估唔會有碼頭工友衝上山搵食吧！所以，星期六黃昏時間走到KK，見到成間餐廳半個人影都冇，又覺得好正常。因為冇人，成間餐廳任坐。兩個人坐六個人大枱，如果係大商場食店，肯定俾人鬧爆祖宗十八代。點菜，基本係一個地道粟米沙律頭盤，加Garlic Nam及Chicken Masala，另配兩杯特製芒果奶昔。事先聲名，呢杯奶昔唔點唔得，一來好味，二來印度菜重口味，冇杯甜嘢中和的話，都幾難受。栗米沙律醬汁濃厚，好此道者不應錯過；Chicken Masala辣度適中，一言以敞之，有中價印度餐廳嘅水平。相比近年稍為跌watt嘅重慶森林，KK算係驚喜。當然，港島區恆河依然保持水準。其實應該叫多幾個朋友開餐，咁至夠人試足咁多道菜。結果埋單兩百蚊左右，不過不失。重點係，呢種小店真係冇幾多間，趁仲有機會，快試。…查看更多

物離鄉貴，食物亦唔例外，喺布魯賽爾街頭平到嘔，多到喊，低至1歐羅一件嘅Waffle，來到香港變中價堂食，就係最佳例證。Green Waffles，之前食過一次。當日游完水在JP分店點咗超Lite的早yogut餐，味道還可以，而且有些少生果伴碟，冇乜特別complain。第二次，係女朋友建議，星期日專程走去中環食brunch，但感覺，有點失望。唔係件waffle有幾難頂，但同布魯賽爾街頭嘅質素不分上下，我食咗兩百幾，而當日在歐洲，連成set嘢只係幾蚊歐羅。話說點頭，當日我點咗個all-day breakfast，半件toast換成半件waffle。成碟早餐味道不過不失，scrambled egg溫度、軟度、甜鹹度還可，bacon就脆得濟變咗梳打餅，而主角waffle，咬感就偏軟。諗諗下，換埋舊包，去是旦一間brunch restaurant都食到差唔多質素。女友點咗full set waffle連Affogato。都係……不過不失。自問味覺不足，我食唔到呢度嘅Affogato，同出面嘅有乜分別。而主菜waffle，亦如上文所言，軟咗些步。埋單兩舊幾水；但自問，呢個價加上而家呢個歐元匯率，去到布魯賽爾，夠你去當地Grand Place啲國寶級餐廳食件Waffle加小食同飲兩三杯craft beer。But, it's Hong Kong，食waffle，你冇太多選擇。…查看更多

睇完show已經夜晚十點幾，一大班同事打算宵晚加吹水，於是去到陸陸。香港人一年四季打邊爐，已經見慣不怪，但夏天三十幾度焗住食麻辣雞煲，就真係搲爆頭都唔明。係為咗大魚大肉，抑或邊食邊傾，實在不得而知。Anyway，我亦唔明點解來自大陸北方嘅雞煲會傳入香港，因為呢種食法以至格局，其實唔係太適合南方氣候，一來濕二來熱三來味道濃烈，食完汗疊汗仲食苦過做苦力。但同事們強推，於是放開心情一試。個人感覺係，雞煲本身料足，雞肉入味，煲汁即使係走辣亦惹味；就算再用熱水沖稀加料打邊爐，配料亦好入味。同時間叫咗個小辣煲，點點刺激過癮非常。我唔係食開辣亦食得開心。但講真，自己胃口偏細，加上煲汁太油膩，即使以齋菜為主，食完都好滯下。或者，呢啲係滋味嘅代價。即使係8至10人，如果人人胃女細，其實淨食個煲都好夠下。當然，最好叫多些少菜，咁食落健康好多。因為煲入面，想搵條菜都難。唯一要投訴嘅，係枱上嘅電磁爐經常自動熄爐罷工，開開關關好麻煩。…查看更多

灣仔食lunch選擇多，但講到拉麵，就有點頭痕。唔係話冇choice，係行得遠咁解。之前新開神虎、黑龍及Tokyo Agura，係較近商業區，又同時具有相當質素嘅小型拉麵店。其中，又以黑龍湯底最吸引。前後已經食過3次，牛筋麵配過不同湯底。今次，主要帶同事翻尋味，專登㨂咗沾麵。食過沾汁麵都知道，除咗湯汁要夠熱，麵亦要夠爽、暖同彈口，食落先享受到沾汁麵嘅全部。年初去過三重製麵所，個麵竟然凍到似未煮咁，令人相當失望，甚至可以話差過而家開到周街都係嘅武藏。呢個牛筋沾汁麵，果然不負所望，溫度適中，麵身夠爽，湯汁亦夠濃又入味。即使唔係招牌菜，亦做出水準來。係牛筋份量差少少。跟多塊肉應該唔使死掛…。事先聲名，呢個沾汁比算係招牌牛筋拉麵嘅變種。麵底唔同，但個湯汁就有幾分相似。Anyway，灣仔打工嘅朋友，黑龍絕對唔可以miss，就算收得唔平，亦要一試。…查看更多

畢業後，超過8成時間在港島區工作。活在商業區，想找平價一點，質素稍稍正常一點的粵式餐廳並不容易。通常，沒有一百幾十也不能落樓。其他收你幾十元一餐的，質素不見得好到哪裡去。要不，便要行接近一公里去到灣仔區的茶餐廳，但等位需時；當然，你亦可選擇相對較抵食且「正常」的吉野家……若不嫌悶的話。而兩「大」快餐廳，免得就免。第一份工的辦工室位於天樂里附近，知粥嘗樂是慣常的選擇。尤其，腸粉與生滾粥本身就是無需特別思考的菜單；咖哩或牛腩撞腸粉，倒是有趣的配搭。熱辣辣的咖哩取汁代麻油甜醬，成為鮮滑腸粉的佐配，倒不是甚麼奇異配搭。反正，腸粉不過是中式廣東麵食的另一種呈現，是河粉的變種，配咖哩有何不可？說實在，以三十多元的價錢來說，稍稍辛辣的咖哩雞，不粉雷雷的腸粉煲已經合格有餘。當然，灣仔一帶有更多出色的咖哩餐館。多年後重回舊地，與女友點了咖哩雞煲，水準與效率依舊，唯獨份量差一點點；另點生滾牛肉弼及生菜一碟，不過不失。七十多元埋單，以商業區級數來說，絕對合理且物有所值。…查看更多

電召外賣或排隊外賣，目的是節省時間完成手頭上的工作。在灣仔區，通常你走過鴻x或喜x，買個三十幾或四十幾蚊叉雞雙拼飯加支可樂了事。無錯，大啖肉味道唔差，價錢平份量合理，但就犧牲健康。再唔係就食南亞外賣，或大大塊pizza，但同樣非常不利健康。Subxxx 三文治做緊$25特賣，但一落mayo 或 mustard sauce就等於搽肥油上件包度。其他茶記的狀況亦不惶多讓，差別只在油量及味精量。即使坐冷氣房，望住一嚿嚿變種肥豬肉，熱氣唔在講，有時都覺得唔開胃。工作已經夠忙，老細已經夠mean，連食個lunch都要算到盡為砌份copy犧牲健康，唔係啩？你老闆出份糧，係買斷你每日8個鐘，唔係買斷你條命。你，值得一個健康又美味的lunch box。但不幸地，你唔係jamie oliver，你老婆或阿媽亦唔係方太，你老豆更加唔係李錦聯，結果去到另一個極端︰隔夜叮飯。其實唔係無選擇。廈門街Tallore，主理人睇唔過香港主流lunch box交行貨，味精西湯紅白紅紅白，於是自立門戶推廣家鄉比利時湯水文化及lunch box。而Tallore在比利時語的意思即係「碗碗碟碟」。menu不算複雜，每日約5款湯，另配三文治、pasta（螺絲粉）、沙律或墨西哥牛肉飯是旦一款，最後配一款topping，適合任何患有嚴重午餐選擇困難症的打工仔。今日encore第二次，與女友各自點雞心豆沙律及飯，無味精添加已經令人感動，足料湯水亦教人明白︰有情真係飲水都杯。當然，前提係要食清湯料。係，78蚊一個外賣套餐，足夠買兩個叉雞飯盒餐；不過，能夠品嚐到媲美真正歐陸小鎮自家製小廚級數，不單買回健康，亦係對自己一個尊重。辛苦得來自在食，係千古不變的道理。再者，拎住一個媲美流行時裝店的精美外賣紙袋，女同事亦會對你另眼相看吧。有型，此刻無價。…查看更多

無啦啦，我哋興用個「真」字強調一件事。但係，海鮮就海鮮啦，咩叫「真」？當然，M記魚柳飽夾嗰塊魚柳都係真，但經過n重加工咁鮮。如是者，除咗食刺身，都冇乜可能食到最raw最真嘅海鮮。係連你阿媽夜晚撚兩味，都要落鹽加鼓油。咁煮法，已經叫好輕手。於是，飲食版朋友推介，要真味就要去皇朝！一行8人，終於明白何謂「真」。真者，重原味，無須加添任何配料，簡單嘅荷葉蒸鍋煮，忠實呈現材料原汁原味。大膽講，只要夠fresh夠天然，而且蒸煮控制得宜，唔使用任何勺鑽方法煮嘅菜都好好味。大大隻青口、帶子、瀨尿蝦、蟹、鮮魚……大啖大啖品嚐無添加嘅原味。事前，老闆特登落定米同水喺鍋嘅下層，上層一路蒸煮海鮮，下層一路滾粥，同時盡收上層食材香氣餘韻。最後一道菜，正係呢鍋飽肚粥，即使得米粒同菜，經過上層多重蒸煮後已經盡收百味，調配出無可比擬嘅百鮮之味。呢餐教人一試難忘，亦為我哋上咗寶貴一課︰海鮮同搵老公一樣，真材實料最重要。老闆亦好健談，詳細講解選擇食材之心得。尋常住家菜，有著一般認為頂級。大廚帶至俾到你嘅好味道埋單，友情價位位$380。係貴，不過，此刻鮮味無價。…查看更多