FeiChaiAndMuiMui的个人专页

服務:成店得一個樓面，要有耐性。但次次都唔該前，唔該後，十分有禮。食物:窩貼。三十五蚊得四隻，貴左啲啲真係。勝在即叫即煎，底夠脆，但皮厚左啲，肉不太肥。但都可以唔叫。小籠包。三十八蚊得五隻，仲費過"頂太豐"。皮有點厚，但頂部冷了也不會硬。值得推薦。菜肉雲吞。我唔明點解豬肉會有羊肉的燥味?!?!?不推薦。雞肉煨麵。湯夠濃但不夠清，太杰身。雞粒用雞腿肉，夠滑，仲有少少青菜同菇。但都可以唔叫。…查看更多

朋友離港多年指明要黎先會黎。服務:依舊係按鈕叫人，好。 好過依家好多餐廳，舉左手勁耐都扮睇你唔到。食物:豉椒炒蜆。冇沙夠穫氣，份量比餐牌所展示大好多。成晚最驚喜呢個。芝士焗年糕。韓式條狀年糕，但個芯唔熟透。成碟都係芝士粉味。係芝士粉呀！唔係芝士呀！味道單一冇層次，食左一啖冇再食。避風塘炸豆腐。豆腐外脆內嫩，炸料夠香，但略微太燶，但撈飯仍然不錯。白咖哩炸魚柳飯。白咖哩夠香夠滑，可加飯底撈晒啲汁。魚柳炸皮太硬太厚。…查看更多

環境:一般麵店格局。要搭枱。坐路口都唔會比人撞到背脊。枱面地下都夠乾淨乾爽。食物:豬紅蘿蔔雞奕尖油麵。豬紅夠軟又冇腥味，屬市面少有。蘿蔔夠甜。雞奕尖夠入味。每碗麵都有少少菜。菜剪到細細條，食指長度左右，一啖一 "住"菜，唔會有咬唔斷菜呢啲尷尬野發生。麵底偏細。我女仔食完覺得"係，我係食左野"，但冇飽既感覺。店係出名腩汁湯底，但我只覺得係死咸，冇香味冇層次。飲左一啖都已經要叫飲品解咸。蘿蔔本身甜都冇用，一浸落湯就咁甜味都蓋過晒。或者清湯會好啲？不過我就未必會再試。…查看更多

環境:熟食巿場預左熱，但佢有大大把風扇吹到行弓行，空氣又流通，夏天黎食到唔怕食物:香辣肉碎飯豬肉碎同九層塔一齊炒夠晒惹味! 肉碎仲有肉汁之餘又夠乾身。啲肉汁撈飯的確一流!見到餐牌上有二雙辣椒仔圖案，其實個心都有啲怕太辣，但辛辣度合適，配飯一流! 仲有二片扎肉唔會得一味餸咁寡! 四季豆夠脆，生得黎又冇草青味，為個飯加多一層口感。飲品:椰汁珍多冰珍多爽口，但太多冰, 椰汁不夠香濃，味道偏淡。…查看更多

環境：落地玻璃，又陣陣冷氣。曬到太陽又吹到冷氣，正。服務：親切有禮，難得。食物：辣汁半熟牛肉沙律。又辣又有少少酸，夠醒胃。薄西冷岩岩medium ，沙律菜夠爽脆。$48，但份量略細。不過餐牌講明係簡便套餐，份量小都正常。( 星期六日公眾假期要加一，平時唔洗)飲品配果汁，但我更喜歡熱咖啡，唔係話特別好，但貪佢無限添飲，坐足二個鐘都唔趕你走。…查看更多

環境：以午餐黎計就太暗，太依賴射燈來提供光源，一個唔該坐正係燈下面就射到臉都紅。通風稍遜，而當日中午有成三十度都冇冷氣。食到一半已經冒汗，後期開返冷氣就冇問題。建議坐近門口，樓底高又有風同自然光。服務：態度親切，亦因同行友人本會說西語，感覺服務特別好。而我用英文都梗係冇問題啦。食物：Mushroom soupportobello mushroom， 菇味十足，夠濃夠香。但用以final touching 的松露油太重手，略為蓋過湯一上桌時應聞到的菇香。9M jamón with tomatoes topped on toastJamón 夠香，油脂有橡果香。值得一讚。Grilled Sea Bass with peacocks and spinach.魚皮夠香夠脆，但魚柳略為乾身。食物溫度不夠高，需注意。Manchego Cheese served with honey and hazelnut蜜糖清甜，Hazelnut 為一重要點綴。但若有二三粒提子on side 個人黎講就更好。整體：咁既價錢，不過不失。…查看更多

環境：工業區飯堂，傳統茶餐廳佈置，乾淨企理最緊要。價格：價格公道，返工首選。同區有不少中產餐廳咖啡店，但若日日食成七十幾九十蚊一個午餐，搵幾多都唔係辦法。呢到午餐係一半價錢，唔帶飯出街食都唔肉赤。食物：咖哩魚柳飯。咖哩夠香夠濃，唔會死辣，仲有少少椰香。龍利柳肉嫩皮脆，肉夠厚皮夠薄，一切開仲有煙，小心燙嘴！飯就茶記一貫水平，撈埋汁，一粒飯都冇剩。服務：有禮貌的侍應真係買少見少，始終做打工仔街坊生意，特別窩心。…查看更多

時段：早餐食物：$27 雪菜肉絲通粉起初睇落以為得好少料，但食落啖啖都可以有通粉有雪菜。雪菜不會死鹹。+$７火腿炒蛋指明用金妹火腿。炒蛋夠香夠厚身。不過跟塊多士又要7 蚊就覺得唔太抵。包熱飲奶茶夠茶夠香。可選菜蜜或柚子蜜都唔洗另外加錢，茶餐廳少見。服務：等你坐底一陣先主動埋黎落單，唔會一坐底就問你食咩。你知啦，有時比侍應催落單個心理壓力其實真係會好大，慘過搭小巴唔夠膽叫有落一樣。環境：卡位偏窄，枱偏細。要坐四個成年人其實唔係太舒服，食野一定撞手肘。叫個餐，每人至少三個碟，今日三個人九個餐具都放唔落。…查看更多

時段：晚飯。餐廳是該區家庭飯聚之選。記得訂枱，否則有排等。訂六點，七點九還枱，時間合理。服務：上菜都好快，真係人齊先好叫餸。但落單好慢，明明見到你舉手都唔行過黎，茶壺加水都至少要叫三次。惠顧次數：基本上都每星期都同家中長輩黎一次。食物：沙薑雞溫度同味道都勁冰鮮，不推薦。鮑汁炆豬手豬手夠爽，汁夠濃。用汁撈飯都得。OK。涼瓜牛肉生炒涼瓜夠爽夠甘，配豉汁牛肉，鑊氣夠。推薦。韮黃蝦仁炒蛋雞蛋夠香夠滑，又實身。蝦仁夠大夠爽。推薦。檸檬蒸烏頭烏頭沒有黃油。一般。琵琶豆腐。汁太多太厚身，令豆腐本身的炸皮軟掉。炸皮亦太厚，食落成口粉。不推薦。總結：溫度夠熱有鑊氣，小菜從四十元至八十多，價錢相宜。 不過味精有點多，食完有時勁口渴。小心小心！！！…查看更多

環境: 室內冷氣開放，踏完單車個身熱辣辣一去個下的確爽。但要小心因為坐得耐又真係會吹親。室外有位置泊單車。食物: 泰式金邊粉。叫得炒野，先唔好話鑊唔鑊氣，最低要求要係熱。碟粉最多只能叫暖。唔要求你出晒煙，但食物溫度唔夠高，幾好食都假。更何況佢根本唔好食？味道平淡且單一，成碟粉都係得一種味，全無層次，香氣全無，配料偏少。不推薦。飲品:熱華田。熱飲唔夠熱，仲叫唔叫熱飲？…查看更多