Mini Keroppi的个人专页

一直好鍾意食泰式船麵，朋友介紹我到九龍城昭拍耶試吓，話保證唔會失望，今日離開九龍城梗係要試一試。我哋兩個人叫咗兩個午餐1）昭拍耶船河：係豬肉丸豬肉船河，湯底的而且確值得一讚，算係香港食船麵都幾出色嘅一間餐廳，香濃得來呢spicy　帶小許甜，好味好味2）泰式乾炒牛河：選用正宗泰式河粉，配上瘦豬肉，芥蘭，同脆爆蝦米仔，炒得極乾爽香口，鑊氣十足，好食到停唔到口！總括而言此店泰式口味正宗，環境就普通一點，但食物份量十足性價比高，朋友绝對無推介錯。…查看更多

我老細唔響辦公室，同事們想食午餐火鍋，比較過幾間，最後揀了好呷，加－前價錢未夠－百。品質都超乎我哋expectation. 我點了最普通火鍋午餐，可以揀肉兩份，其餘食品和飲品任食，放飲品個雪櫃有三至四個六呎高雙門雪櫃，有台式冷泡茶、手搖飲品，其他罐裝飲品，食物選項多到不計其數。總括嚟講我只用「多」字來形容。湯底方面有兩款係唔需要加錢，其他就需要額外收費，如果要鴛鴦鍋就要加$50。我哋三個人每人都點咗2分牛肉，OK喎～上枱都仲係凍冰冰。每份肉有四件，而size都唔算細。而其他食物選擇多，台式貢丸、墨魚丸、甜不辣，和角色丸子包羅萬有，目不暇給。真係要俾個like！…查看更多

今日去開尖沙咀又想食韓國嘢，於是行咗去韓國街嗰頭隨便揀咗一間韓國餐廳，我哋響門口行緊嘅時候個老闆已經不斷向我哋介紹，而且仲講出咗佢哋一共有六間同名嘅餐廳響尖沙咀。我哋入咗佢嘅6號店，隨便點咗兩個午餐：1）石鍋豬肉拌飯有驚喜，以為自己去咗韓國，味道亦好正宗，材料簡單得來好好味。石鍋飯最緊要係個鍋夠熱，的而且確上枱嘅時候只要撈慢啲，就會有好多飯焦。2）紫菜飯卷 正正常常，唔算太花巧，勝在份量都大總括嚟講前菜未算太吸引，但其他食物都算好有韓國嘅味道。我相信如果我再想食韓國嘢嘅時候，都會再嚟！…查看更多

自小住大坑，已經－直食開店主爸爸媽媽煮嘅車仔麵，之不過後來佢班仔女爭個大排檔牌照，呢邊就分咗出嚟，另外改名入咗舖頭。雖然係分出嚟，反而先至係以前細個食開嘅味道。車仔麵餸菜方面好多選擇，出邊好多已經冇做東風螺，佢哋都仲有。而且記得加甜醬同特製咖喱汁，真係冇得輸。屋企人就最鍾意食佢嘅腸粉話好滑，外面都唔一定食到。加埋甜醬、麻將同芝麻仲有特製咖喱汁就超正。大排檔出身嘅老闆，一直都係用傳統方法做茶底，所以佢嘅檸茶同奶茶都絕不欺埸。檸茶絕對係我嘅至愛。老實講，只要呢間餐廳一日仲喺度，我都一直會幫襯，因為食到龍龍嘅人情味，同埋嗰啲代替唔到嘅咖喱汁味。😋…查看更多

中式糖水店越來越少，晶晶係其中一間都說仍然有好多選擇嘅一間。但價錢方面就相對貴。一碗合桃糊加2粒湯圓（$48），杏仁糊加2粒湯圓（$46），再嚟多個鮮龍眼西米豆腐花（$45），兩個人食三樣嘢其實都好飽。提－提龍眼的而且確係新鮮嘅！😄合桃糊係好滑而且香，同埋唔會有一嚿嚿粉。杏仁糊亦都唔算太甜，而且好滑好香。以份量同價錢相比，性價比就係低嘅。湯圓就只有兩粒就唔夠喉。論味道就唔錯，但價錢方面，一碗糖水嘅價錢真係可以食到一個快餐連飲品嗰隻。…查看更多

何文田廣場入面台灣餐廳，質素一向都好參差，時好時壞。今日經過其實已經傍晚5點，但仍然可以點午餐，見佢咁抵食，就俾多次機會佢。我哋兩個人叫咗台灣牛肉麵餐包台式茶飲（各$68）再加－碟湯青菜（$24）份量都算大碗，份量十足，如果要刀削麵，另外要加錢。台灣牛肉麵味道都唔錯，湯都算濃，未道正正常常，以傍晚5點幾仲可以食到午餐嘅價錢都算唔錯。其實呢間餐廳午餐同埋下午茶都係可以食到5:30嘅！…查看更多

有時工作清閑一點要食餐好，響銅鑼灣第一時間會諗起芽莊，其越南食食物都算幾好質素。但兩個人一人一碗粉加埋10%都要$90有多落樓一個人。性價比可能低咗啲，但食物質素都算幾穩定。燒雞撈檬：檬粉份量相當之多，雞就只有兩舊，蔬菜配料都唔少，有紅蘿蔔、青瓜、乾蔥、生菜和花生。加埋魚露就好好味。河內魚餅撈檬：香口嘅魚餅有兩大件，各切四份，共8小件，好襟食，加埋大份量檬粉同配菜，以性價比計算，心理平衡好多，點埋魚露就Perfect。…查看更多

星巴克其實大家都認識，但我同幾位朋友都不期然喜歡你美麗華呢間星巴克。主要原因地點就腳，座位都算充裕。字元坐，得耐都冇壓力。試過好多次去星巴克都冇食到藍莓scone, 今日居然有，梗係要食返一件。你尖沙咀嚟講呢間星巴克都算坐得幾舒服！😆…查看更多

之前都有聽過石田屋都幾出名食牛，今次終於開咗分店響銅鑼灣。🐮佢開左幾日，立即book張枱食晏。可能新開11點打12:30都仲可以book到位。以為好貴，但又有午餐套餐，可以燒烤同燒烤都有得揀。套餐有湯、有沙律，仲有一兩碟小前菜。1）澳洲和牛舌（$128）我哋叫咗兩客，每克都各有10片，三個人分2個set都好足夠。望落都好新鮮，味道都好好，有口感但唔靱，送飯一流2）和牛石鍋泡菜拌飯（$128）上枱時候熱騰騰，飯面佈滿紫菜，滿有驚喜，生蛋、和牛肉碎和飯攪勻後，食落口更有濃濃嘅🍄香菇味，真係好正好正！環境唔需要講~新淨，因為開咗只係有一星期。而且位於世貿中心有無敵海景，直程係風景送飯。午餐性價比相對高，絕對可以個個星期嚟幫襯。…查看更多

同同事今日特登嚟咗皇室堡呢間餐廳，經過門口已經覺得好少女feel, 入去坐低，見到成個環境，又有兔耳椅，都覺得自己夢遊仙境咗！中午有套餐有飲品又有湯，三個人試左三樣嘢：1）暖心。滷肉飯 （$98）顧名思義就係台灣滷肉飯，上面再加一隻溫泉蛋。滷肉唔算太肥，飯又唔算太多，女仔食就夠2）我家。牛肉麵 （$118）份量都大碗，牛肉好冧，但有點油，味道方面都ok3)青醬奶油雞腿麵跟沙律 （$120）Pesto 醬汁的意大利麵，都幾好味，個汁好香濃，下次可以再叫餐飲方面，～（熱）仲夏熱帶水果茶，果味濃，有好生果切粒，但略嫌太甜，都可以斟到兩杯～（熱）鮮奶latte , 個連唧花都好靚嘅，味道不錯食物CP 值就低D，都算貴。但係如果講環境target女仔食下waffle，拍下拖就ok 😅…查看更多

今日放工行過金萊餐廳，見到佢都有精美小菜套餐就嚟試吓。兩個餸、兩個白飯、兩個例湯加多一杯凍飲多謝$188。1）蝦乾粉絲雜菜煲用cast iron pan 上菜，都有幾隻蝦乾，都係正常茶餐廳味道，份量兩個人夠食2）黑毛豬咕嚕肉好，咁仲以為自己去咗灣仔生記，脆卜卜咕嚕肉淋咗酸甜汁勁開胃，重有好多配料3）兩碗例湯，今日喺粉葛湯，都ok講到環境有兩層，可以枱之間亦都唔算太狹窄，OK啦，呢個價錢銅鑼灣食晚飯都係咁上下！放工開餐都可以考慮再嚟！…查看更多

平日都會成日食福建菜，今日去咗銅鑼灣嘅莆田食晚飯，餐廳8點鈡已經坐滿人。兩個人叫咗幾個餸：1）鹹香黃花魚依舊好香脆，有五六件魚，但今日真係太太太咸。2）鹹菜大肥腸大腸係肥美嘅，但係個湯其實同酸辣魚個湯一樣，辣到飛起，唔食辣嘅就唔好叫3）莆田扁肉湯呢個絕對冇得輸，扁肉爽滑，芫荽點綴下更好味4）金湯時蔬即係金銀蛋時菜，正正常常嘅味道5）薄荷琵琶凍琵琶凍質地似涼粉，但味道似枇杷膏，面頭再有一粒橙黃色的琵琶果肉，超好味！必食推介之－。餐廳環境比較狹窄，可以枱之間都算親密，所以如果要傾密計就未必咁適合。…查看更多

今日天氣涼涼地，同事帶我食呢間以雞湯出名的麵店，的確有驚喜。中午未夠1點入鋪頭已經坐滿人，都算幾火。1）花膠雞湯翅（$68）飽飽地簡簡單單飲個湯，份量唔算大，口味清淡，但絕對有雞味，花膠三件，魚翅都有細細兩三匙，金華火腿就細細粒，要六十幾蚊嘅價錢嚟講都算係咁。2）砂鍋花膠雞米線（$82）上枱已經熱騰騰，天寒地凍食最啱，雞有四至五件，都算幾滑，花膠三至四件，當然唔係矜貴貨色，但大大件已值回票價。午餐價錢中規中矩，但勝在平民價食到魚翅魚翅花膠撈飯響銅鑼灣邊度搵？…查看更多