ErnestC1的個人專頁

週末落雨天陰陰，無咩做就走去cafe坐吓食吓嘢。喺大埔中心行行吓去咗太和嗰邊，見到以前the right place個鋪位原來轉咗另一間。見未試過，就喺呢到醫一醫肚。入到去都算闊落，裝修偏暗，撞啱出面落雨都幾襯個環境。坐低咗好快就嗌咗個安格斯burger set同americano。先唔講個burger，個炸薯條真係出色，脆卜卜，但出奇地唔係好油，搞到唔小心食晒。Burger塊安格斯牛食落去有嚼口得嚟唔un，有油香同埋牛味好濃。另外個包外脆內軟，有淡淡geh麵包香。杯Americano 就正常，唔算話太特別，不過不失。整體嚟講啲嘢食唔錯，價錢又唔算貴，值得推薦。…查看更多

同班frd 喺沙田大圍踩完單車，諗諗吓都好一段時間無去富東閣食飯。二話不說就去決定富東閣食片皮鴨。好好彩一去到就有位，食咩未諗就嗌定個片皮鴨先。睇咗陣就揀咗啲套餐，嗌咗幾個小菜。有薯仔牛柳粒、菜心炒豬頸肉、柚子骨同羅漢上素。等咗唔駛好耐，片皮鴨已經上枱。水準依然，片脆有油香，連帶少少鴨肉有埋嚼頭。另外幾個小菜，雖然係套餐，價錢亦唔貴，但水準算高。上枱熱辣辣，唔會係煮定。柚子骨直頭有驚喜，有淡淡geh柚子香但唔會有酸澀味。希望富東閣會繼續做落去，繼續可以支持佢。…查看更多

夜晚收工諗住食埋先番屋企。諗住平平哋食，就去咗蘇杭冰室。:)本身打算食個茶餐，但晏晝食咗又廢事食番差唔多嘅嘢。望望吓見個叉燒炒蛋飯唔錯，就嗌呢個加蝦仁。夜晚無乜人，等咗一陣已經有得食。上到枱賣相唔差，炒蛋滑身有蛋香，叉燒就普通茶記會食到嘅叉燒。至於蝦仁就有啲凍冰冰。嘢食嚟講就不過不失啦，無乜特別驚喜或者失望。不過有段小插曲，臨俾錢嗰陣見到張單打多咗一項寫住外賣，跟住收多兩蚊。我唔知係唔小心定點啦，如果大家會嚟食嘅話就記得checkcheck張單先好俾錢啊。…查看更多

上晝去行鋪，見出開去灣仔又好耐無食過金鳳。所以就去佢到食個lunch再番Office。一如以往門口都係有條一龍喺到，不過好快就有得入去坐啦。每次嚟到金鳳都覺得所有嘢都好mini，而啲嘢食就好大份。可能為咗就番啲咁細張嘅枱櫈啦。坐低就即刻嗌咗個煎蛋菠蘿包，雪菜肉絲米。菠蘿包可惜唔係啱啱出爐，不過食落去嘅味道就係舊式茶記出品嘅麵包味。:)煎蛋係即刻煎就差極都有個泡。合格。雪菜肉絲米嘅雪菜肉絲俾得好多，搞到有啲浸唔到落個湯到，鹹咗少少。最後杯凍檸茶就正路啦，舊式茶記沖嘅茶膽，實香嘅。味道如一，值得繼續幫襯。…查看更多

夜晚陪爸爸睇完醫生，見無乜幾可同佢嚟港島呢邊所以就食埋飯先番去。見佢話想食Pizza，二話不說就帶佢去銅鑼灣食Jacomax。平時都係去開上環嗰間，銅鑼灣分店都係第一次去，無得睇住啊老細猜個餅底。喺門口等咗一陣就有位坐，本身想嗌blue cheese pizza，可惜爸爸驚咗嗰浸味，所以嗌番普通嘅。最後叫咗一客肉丸，青口同埋辣肉腸pizza。等咗唔係好耐，肉丸已經出現喺眼前。肉丸本身好食就不在話下，出色嘅係個蕃茄底，食落去唔會好酸，但又無茄膏嗰浸假嘅蕃茄甜，配埋大量嘅mozzarella cheese拉絲。好食之後嚟嘅就係啤酒青口，份量都唔少，啤酒味重，青口有鮮味同淋身，唔會un。可能好味嘅關係，食完先醒起無幫佢影相。最後嚟嘅辣肉腸pizza，啲餡好食得嚟辣肉腸唔會太鹹。但最出色都係個餅底，有少少烤嘅香味但又無燶到，餅邊少少脆但成件pizza係淋淋哋，但又唔會好似pixxa hxt嗰啲好似麵包咁。Jacomax果然唔會令人失望。出開去食pizza，一定係揀佢 …查看更多

今日忙到甩轆咁滯，啲會一個接一個，晏都無時間食。所以求其喺公司樓下間龍記食個快Lunch再番上去做嘢。一坐低即刻嗌咗個茶餐，多士奄列，雪菜米。茶記果然係最有效率嘅餐廳，唔駛5分鐘，所有嘢已經嚟齊。多士佢係俾丹麥酥，咬落去好鬆化同有淡淡嘅甜味，可惜呢排戒緊口，所以食咗一半就要擺低。奄列唔係就咁火腿奄列，入面除咗火腿之外仲有洋葱同磨菇。食得出係即煎而唔係整定，唔錯。雪菜肉絲米就正路啦，唔會好好食又唔會好差，合格。:)由坐低到埋低前後都係用咗十五分鐘。趕時間嘅話龍記都不失為一個好選擇。…查看更多

番到大埔一時三刻諗唔到食乜。搭巴士經過廣福道，諗諗吓都有段時間無去食東昌街間Homeland一於今晚就去佢到食飯。一於以往，裝修同之前都一樣，啲staff都nice 同helpful。我哋嗌咗芝士焗西蘭花同青口做前菜，肉醬pizza做main同一件cheese cake share。芝士焗西蘭花，焗嘅時間唔夠，個底有啲濕。或者係灼完啲西蘭花未索番乾，同之前食過嘅差少少。青口方面擺盤唔錯，每隻都有番咁上下size，可惜上到枱面食落去凍咗少少。如果熱啲食落去應該唔錯。肉醬pizza方面，佢個pizza底係硬同脆身，有啲脆餅乾底。呢個有啲扣分，記得之前喺到食pizza係軟身意大利嗰種，依家變咗偏日式嘅pizza。最後cheese cake真係一般，雪得唔夠硬，件餅好似食緊cream咁，而餅底都好淋，講唔上係一件好嘅cheese cake。如果唔同之前比較，Homeland都算係唔差嘅選擇。可惜比以前退步咗。…查看更多

今日下晝放假，lunchtime 特登去佐敦嗰邊食經過泰泰，諗起都有一排無食過就入去食個海南雞飯睇吓水準keep 唔keep到先食晏時間好好彩仲有一張空枱唔駛等位。一坐低就餐牌都唔駛望，直接叫咗個海南雞飯。上到枱賣相唔錯，油飯令身，食落口又唔會好油。雞肉淋身同好滑，可惜我唔食雞皮，因為望落都幾好食。至於伴碟ge青瓜同蕃茄都幾好，青瓜爽口，蕃茄唔酸。不過個例湯就鹹咗啲，唔夠清，飲完有啲口乾。整體成碟海南雞飯都唔錯。餐廳d staff都幾nice，繁忙時間人多忙都好，都好快手執好啲嘢同上菜。未食過ge可以試吓，食過ge都值得翻食。…查看更多

OT夜咗收工，又咁啱要去一去大埔中心嗰邊。本身諗住去榮暉睇吓有咩食，但經過海寶見到有間老馮茶居，食d點心填吓肚都唔錯。入面裝修特登搵番啲舊香港做裝飾，雖然我麻麻哋呢啲夾硬做出嚟geh舊嘢，但都叫有啲心思。:)點心都係揀番啲平時食開geh，燒賣啊排骨啊嗰啲。但當想揀腸粉geh時候，佢特登highlight住牛腩腸粉。真係未試過，究竟會係點呢，所以無猶豫直接tick咗。第一樣嚟geh就係牛腩腸粉，但有啲失望。本身我預佢係用腸粉皮包住啲牛腩，點知係齋腸加牛腩就咁擺埋一齊...味道就普通啦，無話好特別，但唔算係難食囉。但建議下次揀番啲正常腸粉。之後嚟geh蘿蔔糕、燒賣、蒸排骨同菜心都係正常質素。另外嗌咗一個香芋流沙包，賣相唔錯，係薰衣草色，食落去有淡淡geh芋頭味。喺其他地方真係未試過，值得一試。總括嚟講，唔算話特別出色，但就不過不失。諗唔到食乜或者喺附近想食點心geh，可以嚟老馮茶居。…查看更多

Lunch 時間要去donki買啲嘢，打算喺附近快食。之前朋友講過呢間拉麵係日本人開geh，個名又幾特別，見去開附近所以就去試一試。一拎起餐牌就見到啲拉麵係以蔬菜做主打，即刻嗌個溏心蛋拉麵加菠菜。等咗陣，碗麵終於擺到上枱。佢同一般拉麵鋪真係好唔同，唔會同低擺到靚一靚，重點都唔係塊叉燒/蛋嗰到。但所有嘢食落去geh感覺又真係好似佢鋪頭名咁，點都會有菜味，食落好似好健康咁。講番碗麵先，叉燒唔係話好特別，溏心蛋亦都無話點流心，麵質咬落去都係正常。之不過佢個湯底飲落去係舒服，唔會涸喉要係咁飲水，有一種清清哋geh感覺。食完都覺得可以下次再嚟食。如果你係追求湯底要好夠味，叉燒要燒得好靚，麵質要彈牙/ 麵香要足夠，呢到就未必啱你。但想有一個非一般拉麵geh感覺，值得嚟呢到試一試。…查看更多

喺旺角行街行到攰攰哋，想搵個地方食個tea。可惜西洋菜南街呢邊無乜舊式茶記，所以就求其去咗紅豆冰室食。去到門口講低話兩位，入面啲staff已經唔係好理我哋。過咗分零鐘就有個行埋嚟問幾多個，咁我就話兩個啦，佢聽完之後就行咗入去，我以為佢係帶我哋入去咪跟住行囉。行咗幾步就唔太耐煩咁嗌我哋去門口等，未有位住....  我心諗都唔知佢做乜。本身想去過第二間架啦，不過朋友話是但照等啦，咁就喺門口等咗幾分鐘。坐低咗開始睇吓食乜啦，咁過程都正正常常geh。講番啲嘢食先，我嗌咗個茶/常餐，火腿炒蛋牛角包加茄牛通。牛角包就擺耐咗有啲凍，火腿似係烚熟定一大堆放喺到，又係凍冰冰geh。至於炒蛋就還好，唔會好老同唔算油。茄牛通一食落去就好重人造蕃茄味，用大量茄膏開出嚟geh 湯底，得好少部份係真蕃茄，唔掂。總結係無咩必要就揀其他餐廳食啦…查看更多

今日收工約咗女朋友喺佐敦食飯，但有少少唔舒服所以想食得清淡少少。喺openrice 揀咗好耐，見到上海點匠滬點小廚好似都okay，所以唔諗咁多，快啲去到坐低快啲食。想清淡就選擇唔太多，揀咗小籠包，豬肉水餃麵同一個四季豆。小籠包入面啲湯汁keep到，皮唔會好厚，但又唔會一夾就爛，食落都唔錯。至於水餃麵就不過不失，豬肉餡有少少一patpat，無乜咬口，麵質偏淋。最後四季豆就炒得唔錯，幾香口同唔會食到成口都係油。餐廳大致上都唔差，可惜狀態唔好試唔到其他嘢。等好番之後一定會番嚟試埋其他嘢。…查看更多

今朝早要去深水埗行一轉，順便喺㺯弓食埋早餐。但朝早有好多餐廳都未開，所以都係揀番啲茶餐廳食。喺openrice 睇到間榮華茶餐廳，望落去唔似新開嘅茶記，應該有啲保證，就決定去試一試。每去到未食過嘅茶記，例牌會嗌早餐A試吓。多士即烘加分，蛋即煎唔會凍冰冰，反蛋得嚟蛋黃仲會流出嚟，加分。火腿通粉就正常，熱辣辣咁樣。熱檸茶，茶味夠香，係舊式茶記用茶膽先沖到出嚟。總括而言，無中到伏，環境算乾淨，正常茶記服務。…查看更多

今日喺荃灣上完堂，突然好想食拉麵。上openrice睇喺地鐵站附近邊到有啦，搵到路德圍有間丸京，二話不說即刻去食。可能8點半ge關係，門口無乜人排隊，等咗幾分鐘就有位可以坐低。呢排有少少唔舒服，唔想食得咁重味，最後揀咗清湯ge真叉燒拉麵，即係3塊普通3塊慢煮ge叉燒。雖則話有3塊係普通，但味道同咬口都唔錯，有應有ge肉味，同有𡁻頭。慢煮嗰3塊就係一個字淋，同埋有肉香。兩種唔同ge叉燒配搭真係唔錯，尤其係塊叉燒ge邊邊位，有一種好似食緊黑椒豬手ge香味。湯底清甜，唔會好鹹但又夠味。食完飲晒個湯都無問題。麵質我揀咗淋，但佢無煮到糊狀一patpat咁，仍然有應有ge咬口。喺香港食碗拉麵都要8/90蚊ge情況下，丸京ge拉麵性價比真係算高。…查看更多

今日lunchtime 真係諗無可諗，諗唔到食咩好。同事突然間話想食越南嘢，即刻有晒方向，二話不說去越蘆越南牛肉粉食晏。12點零去到唔算好多人等緊，好快就有位。坐低睇menu就掙扎咗好耐究竟食生牛肉河定牛丸好？其中一個同事就好似食神上身咁，諗咩丫，溝埋一齊咪得囉。好！就憑你呢句，就嗌咗個生牛肉牛丸河。生牛肉，淋得嚟有啲咬口，正牛丸，唔會鬆泡泡，有彈性同入面有少少筋喺到，好！最緊要係個牛湯，夠味得嚟唔會死鹹，配埋啲香料真係想飲多兩啖。唯一差啲ge就係份量唔算大，胃口大ge朋友可能會唔夠食。…查看更多