shankaka912的个人专页

平時都有去開呢間觀塘火鍋店打邊爐，貪佢食材夠新鮮、湯底好味、坐得舒服，但平時價錢就貴左少少。咁啱見到佢近排係openrice出左優惠套餐，五百幾蚊二人全包，仲要情人節都適用。即刻訂台訂埋餐試試佢。個餐包2罐野飲、有牛、鵝腸、黃喉、蝦滑呢d唔錯既野食，個菜籃仲要幾大下，又有糖水、甜品。食材照舊新鮮，唔夠仲可以自行散叫加單，佢地做緊全日免收加一。情人節果日真係特別多人，如果冇訂台應該要等一、兩個鐘，但有訂就可以準時入座。果日佢地既服務態度都好好，就算多人等，佢地都冇話趕你食、趕你走。我地二人安坐卡位，食完個套餐，仲加左單，埋單加多二百幾，真心飽飽。抵食。…查看更多

一個月前諗緊老豆生日去邊到慶祝好，咁啱睇到幾個YouTuber都話呢度個$980餐抵食又好食，就即刻book台諗住帶老豆黎試下啦。Book台果時仲問埋佢一個月後仲有冇呢個餐食，佢仲話就算冇左都可以做返比我地。尋晚醒起佢冇打黎confirm booking，10點幾打去冇人聽，可能就收工。今日中午再打去問，佢竟然話搵唔到我地個booking，但就幫我地即刻落返。我心諗，如果我地係到左餐廳先搵唔到個booking，我老豆餐生日飯點算呢？食野方面，唔知係咪我地唔識食呢。明明呢到好多人都讚，但我真心覺得麻麻地，所有野都好濃味，但都冇乜食材既味道。燴花膠有d咸，吉品鮑既口感係特別既係同出面既鮑魚唔同既，鵝掌好淋，生菜係食鮑魚汁味，蟹蓋係食洋蔥味，雞係好味既皮香有雞味，炒飯都ok，杏仁茶超級杏仁，美點雙輝好食。可能只係我地唔識欣賞，又可能因為食完每樣野都要飲好多水。服務方面，本身覺得普普通通啦，酒樓咁囉，對熟客好好笑容，對生客梗係生疏d啦，都冇咩問題既，但收碟就有d搞笑。因為佢地每樣野都係位上，所以每次食完都要收碟，我地坐中間果行4-5人台，兩邊行人路，我感覺佢係想企係同一個位收哂全部碟。咁佢收完近果d，要收遠d果隻碟，佢係企係度期望我地遞隻碟比佢，佢係冇諗住要行近d拎既。我果一刻就諗起，上次團餐食12人一圍三千幾蚊果間酒樓，個姐姐直情叫我地遞d碟比佢啦，起碼今次佢係冇出聲，佢企係度等啫，而咁啱又有人忍唔住好心咁遞左比佢啦。去到食炒飯既時候，可能佢又expect你只係會用匙羹食飯啦，因為佢係會收左你對筷子。整體黎講，可能我地唔係富豪啦，所以食唔慣，係我地問題。感覺應該係：試過就算啦。…查看更多

上網睇到好多人介紹呢間老字號，話魚蛋一d粉都唔落，只用魚同冰製。咁魚蛋粉係我既至愛，就一定要黎試下係咪真係咁好食啦～可能因為多人講又係紅日既關係，要係門口排隊，排左大約半個鐘。入到去間舖其實好細，得五、六張台，張四人台其實係二人台大少少，就剛好夠你放兩碗粉一碟炸魚片兩支汽水。兩碗粉叫左魚旦魚片河同紫菜三寶河。粉先到，飲湯，好淡。明既，冇味精，不過又唔係好濃魚味。河粉薄身，魚蛋，一d都唔彈牙。明既，唔落粉，所以好淋身，但又冇乜魚味。反而墨丸幾好食，可能有溝粉，彈牙d又有墨魚味，紫菜都幾好幾新鮮。期待既黃金炸魚片後到，放低見到有油出但唔算熱，夾起一食，都係貫徹淋身口感，新鮮但唔香，炸得唔香，可能係健康做法。因為湯淡，所以落左少少辣椒油，一食，辣到噴火，建議唔食得辣嘅人一滴都唔好掂。其實大致上都問題不大，只係如果要排隊我應該就唔會排。佢地個冷氣又極度唔夠，係門口熱住排隊果時已經出晒汗，入到去食粉仲要繼續流汗。成個體驗既總結係：攞苦黎辛左。…查看更多