.karen的个人专页

星期五晚約左好朋友聚一聚，地點係銅鑼灣。我要求食日本菜，朋友就介紹我食東京。都好，我未試過。七點半左右上到去，入座率只五成 (唔通又係金融海嘯 o既原故?) 。(環境)ok 啦，冇乜特別。睇個樣已經叫自己對食物唔好要求咁多。(服務)由於係樓上舖 o既關係，o係樓下已經有一位知客姐姐招客 + 招呼。整體服務都算係咁，一舉手就有人黎招呼，雖然笑容欠奉，但勝在有效率，我鐘意。(食物)有個唔知咩豆腐沙津、咖喱酥餅: 中規中矩不過不失咁啦。個咖喱酥餅算係有特色，唔算太辣香香地不過我覺得唔夠熱。天婦羅烏冬 - 未食過冇蘿蔔蓉 o既天婦羅，烏冬太硬個湯一來唔夠熱，二來太淡，實在係失敗之作。好戲在後頭。話說我朋友叫左個牛肉鍋 (即係有個 gas 爐 + 沙鍋果 d)，我地食完以上 3 味菜都未見個鍋上，我地就叫待應催下廚房啦。個待應答，因為剛才我地臺面放滿食物，冇位放個爐所以暫時叫廚房 hold 住，等我地食咁 d 先。仲好好服務即刻咁同我地收起臺面 o既吉碟，拿拿聲放個 gas 爐上去。我地頓時感覺非常良好，覺得呢間野 d 待應都幾細心。之前食果 d 都算係頭盤，咁我地引頸以待個牛肉鍋啦，點解等左一陣，連隔離臺都有，都仲未見我地果個。由於前後等得太耐 o既關係，我地決定取消，個待應就話「整緊架喇，不過我可以幫你取消」，同一時候，我見到另一個牛肉鍋去左另一張臺，待應再補一句「你地仲想唔想要，我叫佢地整啦」，我地立即灑手兼拎頭隨便叫佢埋單。待應行開左之後，我同我個 friend o係度爆笑，笑個待應前一句講「整緊架喇」後一句又講「我叫佢地整」，咁即係點? 我地幾欣賞個待應 o既急才，但幾唔滿意食唔到個牛肉鍋。擺明就係佢地唔記得落單，記得上個爐但又唔記得上個鍋。算啦，醉翁之意不在酒，同朋友相聚，都係求有個地方落腳傾下計 jer，唔好咁計較。…查看更多

要 o係情人節訂臺食夜飯都預左係貴夾唔抵食。而一向情人節我都交俾男友話事。今年佢揀左去圓方呢間 Wooloomooloo... (嘩...原來個名好鬼難打)唔知係唔係金融海嘯 o既關係，2 月頭訂位都 ok 喎，不過對方要我地俾 500 蚊做 deposit。我覺得 ok 啦，都 fair o既，反正我地都預左果餐都一定 over 500，俾左佢我地點都唔會蝕。訂位時對方問我地想住店內定店外 (店外為半開放形式)。男友話不如坐裡面啦，應該會靜 d (咁情人節都係想浪漫 d jer)。 好，入正題啦~~環境(好) 店內燈光昏暗，臺上有燭光，而且有紅玫瑰花瓣散在臺面上，都幾 romantic。格調都唔錯，身邊食客大多為斯文人，環境安靜。(差) 我地被安排坐 o係店內最後角落，sofa 位 (但唔係卡位喎)。雖然格調幾好，但係略嫌太迫，太多臺同埋 d 臺拍得太埋。-------------------------服務(好) 門口知客動作好快，笑容都唔錯。好快咁安排左入坐。本來以為情人節晚餐都預左要捱貴餐 (仲要係套餐冇得揀果隻啦)。點知竟然可以問待應欏 menu 散叫，有得揀梗係開心。(差)一坐低，已經覺得冷氣好凍，原來靠牆邊天花係風口，d 風直接吹住我個頭。我同待應哥哥講，要求調位。對方冇出聲，淨係示意其他人熄左個冷風。我見熄左個風都接受到，所以都冇堅持要調位。過左一陣，其他客都黎得七七八八，個冷風突然著返，d 風一吹，支爉燭當堂吹熄左，仲吹走哂我臺面 d 花瓣。最匪夷所思 o既係…全程冇待應幫我地點返著支爉燭，真係有冇搞錯! -------------------------食物(好)值得一讚 o既係，d 食物水準都算唔錯。我地叫左一個 appetizer + pasta + lamb cutlets，三樣都好好味，appetizer 中規中啦，矩我個人最鐘意係個 pasta，個白汁好濃好香，正! 個羊都好正，但我覺得唔夠羶。(差)都冇咩差，d 野其實都幾好食。-------------------------後話食完餐飯之後幾日，wooloomooloo 打返電話黎，問我地意見。我男友如實反映，講完果通電話之後，對方話會寄張 coupon 俾我地 (喎)，但到呢個 moment 我地仲未收到。男友問我仲去唔去食，我話，都冇咩所謂，反正唔算貴。而且我絕對有理由相信，換左係閒日，服務態度應該會好好多。某程度上我都諒解佢情人節太多客唔夠人手 serve 我地。…查看更多