ashleycy的個人專頁

又係星期一，又係冇帶飯，於是上OpenRice搵吓附近有咩食，但係要平嘅..結果唔小心，我就見到呢間茶餐廳有啲焗飯意粉。我揀咗個$68嘅忌廉白汁三文魚焗意粉仲要加咗凍檸茶（凍飲加$3），落樓$71。食物質素唔錯嘅，份量都叫做OK；嗰碗白湯我都有驚喜。唯獨因為我得一位，所以只能安排側邊係收銀嘅枱（都近住門口）；所以喺冷氣不足嘅情況之下，我係滴汗食住個焗意粉！本來諗住睇咗架步，試咗好唔好食先至會帶啲同事過嚟食；我諗都係要三思。可能入秋或者冬天嘅時候先至帶同事過嚟試吓啦，否則太熱焗親同事就唔好啦。其實出嚟食飯都預咗要洗啲錢，但係都希望係一個舒服嘅環境之下享受午餐。*PS. 如果下次再嚟嘅話想試埋個焗田螺。…查看更多

又係星期一，又係冇帶飯。去完銀行行過駱駝漆見上次海南雞飯都正常，今日天口咁熱，竟然見到佢有個海南雞凍檬；於是乎就試吓啦，點不知….打開先知，原來個凍檬入邊已經有湯（我諗可能係冰水）；可能係啲酸瓜再加麻醬嗰啲味道，所以個湯係有啲酸酸地。入邊有：蕃茄仔、紅洋蔥、青瓜絲、酸蘿蔔紅蘿蔔。但係估唔到佢竟然落咗日本麻醬……！因為係凍檬，我一心以為係泰式；我完全冇心理準備！我習慣係將啲餸雞肉夾開一碟，食幾啖粉先。用日本麻醬我都算啦，一食啲雞外皮鹹到不得了；係鹹到苦，尤其是雞翼同埋雞翼尖！我仲見到有其他食評朋友所講嘅有骨雞翼！$52送個冰嘅白桃烏龍茶，我諗唔會有下次啦。直頭差到我連相都唔記得影…..祝我好運啊，我一向都係玻璃肚…查看更多

今日特登冇帶飯，就同兩個同事喺公司附近食吓嘢傾吓偈。首先係小插曲，其實都預咗要等嘅；12:40我已經攞咗飛，後來先至知道我同事已經用Apps攞咗飛，不過早我兩個號冇人應就被作廢。然後到我嘅號碼，因為我哋三個未人齊；要我等齊人先至入去我都理解。我未入去之前店員已經不下兩次提醒我要喺75分鐘之內完成用餐，因為佢哋限時。我亦表示我哋唔會用餐多個60分鐘。唔知點解當時入邊都有好多張吉枱，我哋人齊都唔可以入座。而且當下亦都唔見得餐廳入邊係繁忙。到我哋12:50入座，分別點餐。最遲點餐嘅最早上菜我點：人氣 No. 1 名物丼「極の海鮮丼」，等到1:10之後向三位唔同嘅店員查詢，最後告知我呢個魚生飯製作過程係最複雜嘅需要時間去處理喎。其實一度有以為佢哋係漏咗落單，因為我哋附比我們遲入座嘅枱，都已經上晒菜。我點魚生飯係覺得佢應該最快上菜嘅，結果係強差人意。本來想取消張單，但係店員表示1分鐘就可以處理完成，咁我照等啦。終於1:15左送上，「極の海鮮丼」終於上菜睇落確係好豐盛，但係因為趕時間你根本唔會有心情去影相記錄。店員亦有提及呢一個飯係有三種食法，但係我根本冇時間去試。而最敗筆嘅地方係，中間嗰一堆碎魚生仲係有冰㗎，未曾解好凍！可能呢個就係佢哋所講嘅製作需時，特別處理啦！結果我喺10分鐘之內食完，趕住1:30返公司。總結12:50入座-》1:15上菜-〉1:22結帳離場。就係呢個咁特別嘅體驗，我好樂意花啲時間幫佢打一篇文。…查看更多

今日三個女仔約埋一齊食lunch，喺公司附近搵一間就腳又唔怕路程遙遠怕遲返公司嘅；就試吓呢間きっと勝つ。同侍應姐姐問咗兩句先至知，原來佢哋開業唔夠三個月仲算係一間好新嘅日式餐廳。我哋三個女仔都俾千層吉列豬扒吸引咗，仲要大家都係食咖喱沾烏冬。而飲品就係選擇咗三款唔同嘅口味，但係啲名呢就唔係好記得啦。如果女仔嚟講佢哋嘅份量呢就係十分之足夠，甚至乎可能呢係太飽。整體而言食物/飲品嘅造型同埋佢哋嘅味道都係有驚喜嘅。以午市$88 +1服務費呢個狀態個人嚟講其實都係可以接受嘅（跟餐飲品不用加錢）；雖然平時我都係帶飯返工嘅比較多。特意在此聲明：本人並沒有收取上述餐廳之任何餐飲優惠或是特別款待；是次午餐乃全部自費。…查看更多

其實睇嗰間餐廳廚房得唔得？你試吓星洲米就知道。呢間喺樂富開咗唔係好耐，之前只係得隔籬嗰間茶餐廳，新開就梗係試吓啦。一直我哋只係食佢嘅早餐，都係正正常常；基本上如果你要飲水或者洗餐具都係自己去吧枱度斟杯水搞掂。今日晏咗起身，我就自己去食午餐，叫咗個星洲炒米，凍奶茶少甜多奶。自己去斟杯水諗住洗筷子啦。斟咗杯水埋位就發覺唔對路啦，個杯裏便仲有黏住啲橙色嘅油；水面就浮咗好多油花！心諗之前都唔係咁污糟個喎，於是乎過咗一陣我就叫咗個侍應嚟望一望杯水。咁佢都即刻收走咗杯水，亦都冇補返一杯俾我。（其實都唔緊要嘅洗筷子啫。）跟住大概過咗15分鐘左右嗰碟星洲米就出咗嚟。用幼嘅米粉去炒，面頭係米粉底下先至係配料。賣相只不過係中規中矩（見圖），但係味道就好鬼鹹！結果因為實在太鹹我係冇食晒。。。星洲炒米加杯凍奶茶要$66 諗住星期六悠悠閑閑食個lunch冇諗過係咁樣，$66值唔值得真係見仁見智啦。中途見有唔少人催單，亦都唔見佢有多客人等位嘅情況；咁嘅環境唔知道佢又可以撐得幾耐。…查看更多

$39/兩餸，蒸魚嘅汁都要我問佢攞先至肯俾少少而且以前魚係有兩件嘅；「乜餸」呢間嘢喺觀塘唔使做㗎啦（唔包括圖中飲品）；為公平起見我要說明，這是本人要求少飯。其實當下我都唔識俾反應，攞咗盒飯返公司攤開；個個同事都媽媽聲。喺俾錢之前我有再三確認係咪只係得兩件？佢哋好Firm咁答我係..而家見到其他師兄師姐post出嚟其他地方嘅兩餸飯，仲要平過$39；咁靚，真心唔知嗰日食咗啲乜嘢🤦🏻‍♀️有師兄語重心長咁話：百物騰貴，燈油火蠟又要出人工，而且而家魚啊海鮮都好貴；成本好高喎叫我體諒吓，唔好下下投訴喎🥹（我幫襯咗咁耐，第一次有咁失落嘅感覺）如果唔係由佢開業我已經幫襯佢，成業街咁多食肆；真係唔會輪到佢。ps.喺社交媒體網站仲有好多護航之友添。…查看更多