本身都無諗過要寫食評，畢竟成世人都未試過做"foodie"，但因為「屯門牛」呢間餐廳比較新，眼見一間咁高汁嘅餐廳好似未獲得相應嘅名氣同評價，有啲替佢抱打不平，所以就決定親自寫一篇了！（無錯，就係好味到戥佢唔抵嘅程度LOL）就好似標題所講，我喺短短一個星期食咗「屯門牛」三次——到底係點做到㗎呢？是咁的，自從上星期三嗌過一次外賣，食過佢嘅經典牛堡以及素食漢堡之後，家母一直對「屯門牛」念念不忘，仲誓言話要食哂佢Menu嘅咁多款包，結果⋯⋯the rest is history由無圖無真相嘅食物講起先啦！（因為一開頭食太肚餓，完全無影相，sorry）我覺得經典牛堡嘅漢堡扒真係好有牛味，甚至係和牛咁樣嘅油香，同就咁用免治牛肉，又或者其他餐廳好「肉餅式」嘅漢堡扒好唔同，出面煎得少少脆，入面又keep到好粉嫩，家母仲話係食過最好味嘅牛肉漢堡（雖然佢好少食漢堡⋯⋯好啦不過我都同意haha）至於素食漢堡嘅配汁就非常出色，黑松露汁正中我哋嗰味，既有平時講笑嘅「煤氣味」，又有一種甘甜嘅感覺，令到包入面嘅鮮菜都有種提鮮嘅效果。用洋蔥圈、菇、洋蔥同埋生菜組成嘅「漢堡扒」亦都好有驚喜，食落同經典牛堡不相伯仲，各有千秋！就連我呢個對蔬菜無咩食慾嘅人都食得好滋味：）再之後（姐係三日後）就試咗黃金雙層蝦堡同鴨胸堡了，全因自己同家母都有啲心思思，又想食下高質漢堡，所以又去咗買外賣自取。值得一提嘅係老細 (? 又或者負責嘅同事都態度好好，嗌外賣時仲會親手遞上（可能因為我睇落太cap手cap腳），令人覺得好體貼窩心，食物仲要咁好味，公平咩？！因為黃金蝦堡嘅價錢係鴨胸堡嘅至少兩倍，所以我一將啲包送到屋企，我同家母就急不及待鋸開鴨胸堡大快朵頤，諗住食咗平嘢先，最後慢慢嘆。點知超平嘅鴨胸堡竟然有意想不到嘅驚喜：個青檸羅勒汁酸酸甜甜好開胃（令我諗起附近間屯門咖哩屋嘅印度青醬），啲鴨胸好似係用慢煮烹調咁嫩口，仲要啖啖肉好厚身，成個配搭係出乎意料地好味，令到我後來再encore咗一次。但好可惜嘅係（證明我唔係打手），個蝦堡唔知係因為墨魚汁個醬無咩味，定係鴨胸堡太重口味，食完鴨胸再食蝦堡變得無咩味道，剩係得脆口爽口嘅texture，但就欠缺咗一啲flavour (ABC tone)雖然有兩塊炸蝦餅確實係非常足料，但美中不足就真係唔太突出，要去到最後一啖先覺得「好味喎！」，滿足感係完全不敵平價親民嘅鴨胸堡：（奉勸大家食蝦堡就全心全意食啦，唔好三心兩意食完其他嘢再食最後今日食埋最後一個未挑戰嘅包——雞堡。不嬲都唔係雞堡嘅fans，就算好多年前食金拱門都未曾食過板燒雞腿包咁濟（紅店，不了）所以今次試食都係抱住滿足強逼症嘅心，無咩特別期望。不過整體嚟講個包都唔錯，個醬味道好出，雞扒都好厚身滑嫩，但自身嘅味道就無乜。相對其他餐廳嘅話絕對係好味，但因為食過牛堡、素食堡同埋鴨胸堡嘅原因，所以覺得雞堡好難超越到佢哋，麻麻哋推，可能我哋真係比「屯門牛」養大哂胃口，返唔到轉頭haha總括而言，屯門牛真係一間好值得支持同嘗試嘅餐廳，尤其係 牛堡 = 素食堡 > 鴨胸堡 > 蝦堡 > 雞堡（純屬個人意見），職員又好好態度，裝修仲好典雅，真係要搵日午市去感受下。點解要午市？靜靜雞話你知，因為屯門牛仲要係良心黃，6點後只係做外賣，唔堂食咪唔洗要「安心」先「出行」囉；）P.S. 期待之後見到更加多人留低中肯嘅食評，咁我就可以收山嚕～…查看更多
