男人的个人专页

近年每晚要到油麻地開工，對工作餐沒甚麼要求，附近平民食市早已經全部食過晒，上月中發現有新車仔麵餐廳，裝修簡約企企理理，即管試下，自此變了近排最愛飯堂。 ^^最先一次去幫襯係食正路嘅車仔麵，点左蘿蔔/ 豬大腸/ 豬紅/ 牛腩/ 泰式魚餅 好豐富既五餸麵 (嗰一次冇影相) 加腩汁同埋咖哩汁，送凍綠茶。 埋單好似50蚊左右，今時今日响正彌敦道茶餐廳晚飯點都要六七十，都ok啦，一試食物真心ok，學食神話齋： 豬紅合格唔要一夾就散，豬大腸合格要冇污糟嘢，蘿蔔就要冇渣，佢果種羅白值得一讚，唔係食開嘅味道同埋尺寸，餐牌叫做大根蘿蔔，見到係推介食品，大半隻手掌咁大，唔止冇渣仲好好食。 曾經聽過有人話炆蘿蔔要加冰糖 ，唔知王媽媽加咗乜嘢秘密嘢，總之味道係我食過最好味嘅蘿蔔。。。 牛腩雖然斬碎上, 但亦可能因為咁，非常淋好入味，我畀滿分！ 仲有泰式魚餅，估佢唔到嘅質感，似混合咗豬耳或者雞軟骨？ 湯底可以話係每一間車仔麵嘅靈魂，坊間好多俾人推到上神枱嘅車仔麵湯底都係一味夠辣，食完全日口乾，不過王媽媽的湯底辣得黎似乎冇味精，難得！ 呢一間車仔麵唔俾人推到上神枱真係冇理由。。。 講咗咁耐正常車仔麵，但係其實我想 post 嘅係佢哋新出嘅蟹麵 XD 佢嘅蟹麵係配青咖哩公仔麵，夠膽賣港幣88蚊，(唔係88蚊貴，只係佢哋其他嘢相對上平)一試青咖哩麵好特別，應該唔係食開嘅任何一個牌子！ 而最重要隻蟹，實實在在冇花冇假好多蟹肉。 加上一碟酸酸地嘅醬汁，夏天食都好醒胃，之前講過黃媽媽嘅湯底冇乜味精，呢一個咖哩麵唔敢講有冇，不過我叫咗絶配既山楂羅漢果冰，唔太甜，清熱潤肺好過飲可樂。 好耐冇特登 login 入嚟留食評，都係希望佢多啲人幫襯，唔會咁快畀地產租金玩殘。 畢竟有心做又做得好嘅食店值得支持。 ^^…查看更多

入正題！近來唔知點解，可能多左人注意健康，好多米線鋪都出番茄湯底。有d上菜時個番茄醬同個湯係分離既，一開始食淡口到極，食到落底先知有好濃既番茄醬。吹漲。。。不過最差果d就係感覺上食緊化學物入口咁，只有酸味，百貨應百客，可能係我唔岩口味，晌呢到唔點名講邊幾間了。譚仔呢隻番茄湯賣相幾好，上面鋪上唔少份量既真蕃茄，最重要既係無影晌我本身食左咁多年既湯底味道唔止係加左蕃茄味道咁簡單，而係 enhance 左個開胃程度。今次又係叫番茄湯底，小辣，竹生，豬潤，細土匪雞翼，凍檸茶少甜。食得譚仔就預左要同食客一齊迫，好彩果日唔算多人，但係對面有位呀姐食食下流鼻血！！！救命呀！我要用一分鐘調整我既心理質素先食得落我面前呢碗紅色既番茄湯米線。好嬲。 想搬去隔離檯繼續食，不過算啦人地又唔係想既，晌咁惡劣環境之下，到最後我食完成碗米線連湯都飲埋，證明真係好食到一個點。不過其實我唔係完全 buy 晒譚仔既食品，佢果隻扮喇沙既湯底可以算失敗之作，似淡口開稀左既喇沙湯。。。 …查看更多

榮式雞扒應該已經好多人捧場，唔需要點介紹，不過我就偏偏鍾意佢既鹽酥雞扒併肉燥飯多些，朋友覺得佢地既肉燥太鹹，我覺得撈飯剛剛好，通常2星期都會幫襯一次，呢排發現佢既燒茄子都幾好食，佢地個價錢策略係單叫飲品十幾蚊，但係加多十蚊就有埋兩大件燒茄子，所以而家次次都係幫襯呢個組合。講完食品，其實特登寫呢篇食評係想講講員工，唔係話佢地對客人無禮貌，當佢正正常常茶餐廳級數唔係特別好或差，但係員工之間對話語氣好差，可能食飯時間大家係忙，但係發同事皮氣，我地客人食飯心情都會受到一點影晌。:(…查看更多

一向好夜收工，好彩返到光輝圍屋企左近仲有好多餐廳未收，由上年年頭開始多左呢一個新選擇，可以話變左我其中一間飯堂，相比起左右隔離佢唔係平，光輝圍比較多平民食市，要平真係二三十蚊掃街食得飽，但係又唔可以咁計，因為晌呢到食緊既係燒海鮮，我差不多一星期都會黎一次，有時係同朋友，不過多數係一條麻甩佬，叫一碗烏東，幾吋吋燒或者幾隻燒豪，兩三支啤酒，百零蚊食完好滿足。之前岩岩開既時候有個老闆仔得閑時會同客人吹下水，個感覺就好似深夜食堂咁，雖然食店老闆同客人打成一片係光輝圍小店既特色，晌第二個區好少有。因為光輝圍主要都係做熟客生意，加上一般小店係老板做埋樓面，同其他區連鎖店好大分別。。。不過近幾個月好似好少見果個老闆，其它員工木口木面，唔算係無禮貌不過無左份幫襯小店既人情味。any肥，呢d都係extra既，服務方面無扣到分。。講翻正題，我鍾意食燒雞，佢有好多種唔同既醬汁燒法，通常我就每樣叫一串，仲有好少地方食到咁脆既燒雞皮，無叫雞亦因為相對地普通。佢有幾款拉面同烏東，我通常食豬軟骨烏東，湯好鮮甜烏東好滑，唔係果種好粉或者好實既低級野。另外佢有4種方法燒蠔，其中辣汁最好食，值得推介，不過我通常一次過叫晒4種。…查看更多

每日返工放工都經過，開左幾個月幫襯過六次，每次都係一條友去食，岩岩開店時就幫襯過佢lunch，見主打食豬，就順理成章叫炸豬扒蛋包飯，但係比佢個價錢嚇親…以lunch黎講80幾蚊好貴喎。不過食物賣相同味道都幾好，侍應有禮，總結對佢印像除左貴d都ok既…第二次幫襯時…我因為果排工作辛苦想食餐舒服d既…呢次唔知點解塊豬扒係就係好厚，但係好肥好肥，肥到有d部份係肥到入唔到口…而且完全無味，之後全日有d反胃既感覺，呢個經驗好差，諗住唔會再幫襯！亦都發現開始少左人幫襯…第三四次都係食下午茶餐，見到下午茶餐有我鍾意食既鰻魚炒飯，三十幾蚊包杯野飲，人又少，就比多次機會佢，份量好ok唔會因為下午茶時段而變得細份，味道唔錯！只係覺得油左d…食得炒飯都預左油，但係佢又真係油得過份左。改改就好了。對呢間野開始改觀既同時，感覺人客亦越來越少，第五六次都係幫襯樓上果位食評介紹的午市咖哩魚柳餐，好好食，佢地個炸粉好得。食物賣相精致，不過上一次幫襯有三塊魚柳，今次就變了兩塊，好彩都唔算細。三十二蚊仲唔洗加一真係抵。前日下午茶幫襯時咁大間餐廳…只有我一個客人！以屯市既租金，加埋每位waiter廚師既工資，我企晌佢地立場諗，成半個鍾頭先賺到我三十二蚊…真係有d替佢地擔心，可能佢地一開業時既價格定位同埋唔穩定既食物質素嚇怕左人…希望佢地唔會咁快摺埋啦。…查看更多

自從好多個月前樓下開了呢間mos之後，幾乎個個星期都幫襯兩三次以上，初時是因為食物既包裝同味道，賣相同埋晌日本旅行時食既感覺一樣，每個麵包同幅廣告相一樣咁精美，味道亦都滿分！講到味道，我最鍾意食佢個蝦漢堡，每隻蝦都有蝦應該既質感同味道！唔好以為呢樣野係好基本要求，只要食過另一間M字頭早前出過既蝦漢堡就知呢個看似基本既要求已經唔一定做到…另外佢既炸雞塊都好好食！比起另一些炸雞店又唔油，個包裝又設計得好，唔會整油了隻手。總之晌呢間分店出品既所有野我都比好高評價。誇張d講直情係食出幸福既味道！不過驅使我login寫食評既原因~係因為我好欣賞呢間分店既絕大部份員工既工作態度！睇得出佢地都係好鍾意呢份工，對客人笑容好友善，唔會好機械式咁去收銀。其中一個矮矮地既男仔同埋兩個好似已經無晌呢間鋪做既女仔最好工作態度。另外，因為近排商場外牆裝修，窗外景色被遮住了，本來個景都令人好relax的。希望快d裝修好……查看更多

本來幫襯了十幾年，都算有份感情…見到而家咁少人幫襯實在唔想再落井下石…但係裝修後幫襯了兩次，覺得百份之百唔係以前食開既味道，正如上面有人留言，兩間呀龍既來龍去脈只有知情人士會知，我唔會去理係老板開定係前員工開，因為老闆都唔一定代表掌握到果份味道，相反落手落腳既員工青出於藍亦不是沒可能，作為食客我地只係用味道去分好壞就是了，話說一星期前一晚收工特別夜，天冷又行經佐敦，第一時間諗到去呀龍到醫肚，望望手錶已經十一時半，回想從前呀龍應該十一時前已經收鋪，再望望鋪內發現原來翻新了，員工依舊，但全鋪只有2檯客，相比以前天冷通常要等位，覺得有點出奇。照舊order了一客咖哩牛腩飯，一入口咸得不合理，牛腩一絲絲的又鞋口…夾雜中間忽然有一舊肥的不能吃的…咖哩汁比以前更加水還水渣還渣…心想一定已經換了廚。前日晚飯時間又再行經佐敦，心諗上次可能係太夜幫襯或是預備明天賣的牛腩未唸所至。總之就替這家幫襯了十多年的店子想了些原因，還是比多一次機會它吧。當然又是order咖哩牛腩飯，這一口牛腩飯真的令我有點感傷…說實的，味道遠比上一次好，由難食變了一般，已經沒有了過咸的致命傷，但牛腩一樣鞋口…幫襯十多年的味道說再見了。當它是一間新咖哩店還可以的。見老板娘和食客寒喧，內容是生意難做…作為十多年來的捧場客，見著興衰當然感傷…但人情味並不是味覺一種，食評還是要寫的。埋單後驚覺在旁有另一家"亞"龍，才醒起以前幫襯開的是"亞"龍，再看到易拉架上的四眼佬更清楚是甚麼回事…下一次試了再寫食評。…查看更多

琴日中午去佐敦見客，因為無乜時間食午飯，諗住快快手搵間近近地既茶餐廳，見呢間茶餐廳唔算太多人又幫襯過幾次印象ok既，入到去同個呀姐order 凍咖啡同埋干炒牛河，隔左一陣個呀姐隊杯熱咖啡埋黎，係咁話我頭先係叫熱咖啡，我只係搖頭話係叫凍咖啡，佢隔左一陣換左杯凍咖啡同時隊埋碟干炒牛河，我放第一啖牛河入口已經咸到想噴翻出黎…我心諗會唔會係師傅落得重手左呢？但係嗒落竟然係有好明顯一粒粒既粗鹽…炒牛河點可能有粗鹽晌面？似比人整蠱多d！我即時拍檯，個老板都算ok話幫我換過佢，不過如果真係比佢d員工整蠱既話，我仲敢食佢d野？之後放低三十五蚊就走人，廢是比人以為我拿著數。不過條氣有少少頂住所以同客人改後個 meeting 一小時去左酒店食餐好d既。…查看更多

寫完旺角樂園牛丸，點可以唔寫下元朗勝利牛丸…我唔知牛丸係點為之正宗，不過我食左咁多間牛丸真係得呢2間係會令我專登搭二十分鐘車去食，佢地都好明顯口感上係牛唔係粉，同樣彈到飛起，不過勝利牛丸加埋佢100分既牛腩真係天下無雙，可能我鍾意食濃味既食物，佢個腩汁好正，而且牛腩超琳，我自從十幾年前晌九記食過一樣水準既牛腩之外從未食得返，而家既九記得翻七八成水準，已經唔好提了…不過勝利係細碗少少…每次我都要食兩碗，餓起上黎兩碗都未飽，陰工，不過好食成咁，ok啦。味道一環，加果爆燈可以選6分，我會比夠佢6 分。…查看更多

我覺得食物真係唔算差，環境又闊，坐得舒服，最重要既係任食任飲啤酒，埋單真係每人$86真係無野好投訴…出面好多時食打邊爐，除了1哥火窩係明碼實價之外，有d酒樓會亂收錢，話58蚊埋單會變左168蚊，呢一間一晚飲佢6罐啤酒，只食牛肉都食到飽，都係幾十蚊，當然，如果佢唔係任食，我對食物既要求水平亦會高好多…應該都唔會再幫襯。haha…查看更多

任食打邊爐真係我至愛，所以十九區都試過好多間，講好食呢間一定無份，不過講就腳晌mk又唔算太爆太難搵位呢間就算係咁…我見呢到好多人彈呢到既食物同埋環境，其實我覺得以任食火鍋黎講都算合格了，而環境就真係太噪太迫…不過佢其實晌9樓都有少少檯，如果係2個人食好多時會上9樓食，真係靜好多，好似有個肥肥地既唔穿制服既哥仔晌上面，我估係老闆之一掛，所以晌9樓食真係連服務都好左好多。環境如果我晌8樓會比1分，如果上9樓以旺角區我會比4分, haha…查看更多

因為佢近公司，好多時夜晚都會同partner去食打邊爐，初時以為佢好平，原來埋單飲下野幾次每人都要過$150 蚊，真係唔係就腳既話，去旺角任食都大把選擇…不過咁，幫襯過咁多次都唔係無理由，因為佢果d牛坑爪真係好正，以前邊有人打邊爐會用牛坑(即係靚既牛腩)？原來係咁好食。不過唔好心急，落完等半個鐘先好食。另外佢既肥牛有3 4 5星選擇，試過晒，不過好唔穩定，有時4星都正都爆，有時5星都係普普通通咁…可能之前既牛價加得太貴掛…另外佢一個好大既優點係開到半夜兩三點。官塘工廠區呢個時間真係不二之選……查看更多

晌旺角好似好多間樂園咁，原來睇真部份係唔同既，有樂園牛丸王，樂園牛丸大王，仲有X記樂園牛丸，一個旺角至少5 6 間唔同既樂園…有一d賣十蚊碗，平就真係夠晒平，不過d食物質素同埋環境真係唔得，咁多年黎幾乎間間試過晒，係金聲戲院果間老鋪同埋旺角中心對面呢一間新店既味道最正，從餐紙上面既資料睇完來呢2間先係同一集團。黑椒牛丸同埋花膠醬爆牛丸都好彈牙，我成日覺得出面第二d牛丸唔係用牛黎做，呢2間比我感覺就真係好有牛肉味道同口感。新店大碗d，好似味千拉麵咁大碗，貴舊店兩三蚊，不過好坐好多，位又闊d感覺衛生d，埋單都係二十八蚊碗，ok啦。…查看更多

最近多了去呢區工作，發現原來北角都好多好野食，前幾日下午時份經過呢到，見到間小店咁細但係整既野食又咁另類，憑我直覺應該係有好野食既，因為見過好多好有heart既小店都係呢類形。下午茶唔想太飽所以叫了一碟瑞士雞亦，一碟芝士青口，瑞士雞亦個汁唔夠味不過都好食，不過我個人喜歡味濃一點，個青口就好食夠味又四大隻，加埋一杯大mocha，好滿足。感覺衛生又唔係貴，下次試埋佢d意粉先。…查看更多

其實我從少都唔係好鍾意食牛雜，心理上覺得唔夠乾淨，不過有朋友介紹過呢一間野之後，我又心思思想試下，上星期經過一次，奈何因為牛肉供應不足，竟然無牛雜賣，唯有叫了一串齋試試佢個汁，試完無乜感覺，前日經過見到有牛雜，睇見幾衛生，連我本身無食開牛雜既人都聞到口水流，即時試了一小碗，25蚊，食完結論係以後經過北角又多一樣必食街邊野。…查看更多