孤兒仔苦榮的个人专页

在特別的日子, 想必要有精美的蛋糕與她慶祝. 碌碌社交平台, 今期流行黑芝麻甜品, 一於順應潮流. 苦榮專登去太子挑選黑芝麻蛋糕.屋企晚餐之後, 拿出蛋糕, 凳燈凳凳~~~賣相精緻, 質地好綿滑, 黑芝麻味突出, 蛋糕唔是太甜, 而且夾雜住咖啡朱古力味, 堅正. 原本諗住雞仔胃的我倆要分兩餐食, 結果食到唔停口, 一次過KO晒,  有料.看見她吃得一臉滿足, 苦榮的心比蛋糕更加甜.最重要是, 價錢好貼地.…查看更多

她, 要與閨蜜BOBO餞別, 換言之又有朋友移民, 無奈.她叫苦榮找地方. 主角要求好簡單, 川菜和點心, 因為怕在外地吃不到正宗味道. 苦榮想到了早前與她食過, 念念不忘的望月軒. 蝦餃燒賣做到傳統口味, 啤梨咸水角外型吸引, 味道唔錯. 酸菜魚好大份, 桂花魚片好多, 好嫩滑, 酸得黎小小辣, 開胃, 苦榮追住黎食. 甜燒白苦榮第一見聽, 原來係四川傳統野, 是糯米飯蓋住五花肉和豆沙, 上面有埋砂糖, 當咸食又得, 當甜品又得, 有趣.  叫多份真正甜品, 雷沙湯丸, 好熱, 好香芝麻味, 軟熟好食.苦榮與她, 祝BOBO在外地生活愉快.…查看更多

她, 忽然說要帶苦榮去吃平民好東西, 苦榮開心都黎唔切. 跟著走, 去到食肆林立的L Place, 入笠, 看她按的樓層, 原來是大戶屋.百幾蚊的定食, 係中環黎講, 直頭係窮人恩物. 定食包埋嫩滑茶碗蒸, 色彩斑蘭健康沙律和麵豉湯. 她的五花腩拼牛扒, 苦榮的牛舌, 都好好食. 牛扒軟腍, 五花腩的肥脂恰到好處, 簡直為麻甩苦榮之設. 牛舌薄薄, 口感爽彈, 苦榮與她都好滿意. 食物比唔小幾百蚊的居酒屋優勝.…查看更多

苦榮與她在荃灣游走, 想起良朋推介係富華的豚本家, 一於午餐就來醫肚. 即使是假日的中午, 人客還不算太多, 苦榮仲可以坐到卡位. 價錢堅平, 南蠻炸雞定食58, 另加左15轉苦榮最喜歡的蕎麥麵. 炸雞份量好大, 香脆嫩滑, 南蠻醬汁似係普通的Mayo, 底下一埋椰菜俾你清味蕾, 又跟埋兩款醬, 苦榮覺得都可以. 蕎麥麵啱苦榮心水, 熱天嚟食個凍既仲正. 定食跟埋麵豉湯茶碗蒸, 性價比真心高. 她的鰻魚配豚肉生薑燒定食, 據說都唔錯, 只係鰻魚稍稍未夠香, 不過都好食.午市唔洗加一, 苦榮與她滿足地離開, 好多謝朋友的推介, 有料.…查看更多

聖誕假期, 苦榮與她沒有離港, 反而選擇在荃灣幾個商場閒逛, 買些心頭好, 想吃什麼就走進去.原來荃新天地2期的地下, 已變身做食街, 有唔少西日餐廳進駐, 苦榮與她對西餐廳最有興趣. 套餐有跟沙律或湯, 都要了沙律, 胡麻醬可以俾多少少啦其實. 苦榮的慢煮腩肉水波蛋意大利飯, 腩肉甘香帶脆, 意大利飯勝在口感煙韌, 帶少少勁度, 苦榮幾鍾意. 試左少少她的比目魚, 質感肯定及不上銀鱈魚, 不過都算嫩滑, 起碼佢無呃人比目魚當銀鱈魚咁賣. 跟餐有果汁, 苦榮又唔生性加錢轉左杯flat white, 後悔莫及.…查看更多

苦榮平日我行我素, 但過時過節, 都會與小苦妹幾家人聚埋一齊做節.做冬日子, 苦榮唔會期望太高, 食酒樓套餐方便快捷. 八人喜樂宴, 不是一圍人, 就唔是乳豬全體, 而是燒味拼盤, 叉燒燒腩仔煙鴨胸木耳和雞絲粉皮, 大碟得體. 虎蝦伊麵, 苦榮久久未食過伊麵這好東西, 遺憾虎蝦質素欠佳. 碧綠炒螺片, 玉環瑤柱脯, 苦榮細路時去飲就食呢D. 愛護環境的她早已較曉苦榮不要食翅, 所以紅燒雞絲翅留俾有緣人. 過節要有雞有魚, 沙薑雞毫無沙薑味, 苦榮以為是白斬雞, 叫服務員俾薑茸. 花尾躉好足秤, 火侯估佢唔到咁好, 大受歡迎. 壽桃包好大隻, 有原個蛋黃, 是苦榮心頭好.…查看更多

她, 曾在北角工作數年, 對阿鴻小吃有份情意結, 所以今天在官塘處理完私事, 她說想回味下鴻哥的鹵水, 苦榮肯定全力支持.由阿鴻小吃變身阿鴻小館, 地方大了, 還增添了點心. 都是蝦餃燒賣叉燒包咸水角之類 並不會找到粿等潮式點心, 但味道是好的. 沒關係, 苦榮與她的目標著眼於鹵水, 鵝片和腩肉雙拼, 鹵水依舊香, 鵝片嫩滑, 腩肉甘香. 再叫一碗蠔仔粥, 好大碗, 好多蠔, 漲卜卜很鮮美.苦榮愛甜, 她批准苦榮放肆地吃反沙芋, 鬆脆, 綿滑, 好味道. 與她分享甜蜜, 苦榮幸福感滿滿.…查看更多

她, 被苦榮感化了, 間中會食得放肆D. 往時她一年吃不到一次漢堡, 而家每月都有一兩次. 今次E間, 係荃灣屋苑內, 家庭式運作.  除左漢堡, 還有日式西式飯類, 苦榮以為自己眼花, 驚見有水煮魚酸菜魚出現在餐牌之上. 店主話單靠賣漢堡難以生存, 要懂得變通. 苦榮和她始終沒勇氣點川菜. 她最穩陣, 吃魚柳漢堡, 魚柳好大塊, 配千島汁, 包身軟熟, 她說合格. 套餐仲有可配薯條/薯角/炸燒賣. 她大讚炸燒賣好食, 真估佢唔到, 只要她她喜歡就好. 苦榮的和風牛肉飯, 醬汁甜甜好送飯, 肥牛至少唔會韌. 飲品不一定罐裝汽水, 仲可點咖啡奶茶. 要多謝B哥推介, 有料到.…查看更多

她, 說辛苦工作一整年, 要食餐好的獎勵自己, 苦榮有藉口食好西, 肯定舉腳贊成. 苦榮知道她最愛上海菜, 識做地訂了IFC的江南, 其實苦榮都是上海菜粉絲, 這只不過是自肥計劃. 三色小籠包, 顏色亮麗, 她一眼看中紫色的黑松露帶子, 的確香噴噴, 她讚不絕口. 黃色的蝦頭油鮮蝦, 蝦肉融入其中. 苦榮吃的冬蔭公口味, 湯汁四射, 辣到標眼水. 蜜汁火腿香脆可口, 用黑白色烤餅, 賣相得體. 鱔糊賣相油亮, 有韭黃伴隨, 味道咸甜, 看她吃得一臉滿足的樣子, 苦榮也開心.既然要獎勵自己, 就要食埋甜品. 士多啤梨奶凍, 好多西式感覺, 香甜幸福.苦榮與她沒打算卦內地吃喝, 京川滬菜癮起之時, 就在香港找些有水準的來吃, 已經心滿意足.…查看更多

她, 美貌與智慧並重之外, 更加是鋼琴高手, 最近考獲演奏級資格, 苦榮超戥佢開心. 於是, 又再黎到我倆都好喜歡的食店望月軒, 慶祝一番. 既然是慶祝, 苦榮就有藉口飲啤酒. 最好的佐酒食品, 梗係小龍蝦. 今次要食麻辣, 試吓蒜香做法. 帶起手套, 大快朵頤. 張小龍蝦一擰一咬一吮, 勁嘢味, 小辣既辣度, 苦榮接受到. 第一次食蒜香做法, 有驚喜無驚嚇. 另, 叫埋苦榮一向喜愛的樟茶鴨, 鴨肉嫩滑, 熏香陣陣, 又是一味佐酒好西. 有咁放肆, 都要食個菜, 維持均衡飲食. 生建議清炒咼筍, 爽口好食. 今餐好似係苦榮在慶祝多D喎.…查看更多

送她出席活動後, 有一粒鐘時間, 苦榮獨個兒找吃. 不其然又去了我們最近經常幫襯的這所茶餐廳, 因為既有苦榮喜歡的麻甩佬燒味, 又有她愛的點心, 間中還可以食辣, 選擇甚豐. 苦榮愛玩命, 沒吃男人的浪漫, 大熱天時吃煲仔飯, 食到身水身汗最過癮. 蝦干排骨煲仔飯, 熱辣辣送上最正斗, 打開煲蓋煙霧彌漫, 淋完豉油可以起筷. 排骨鬆化, 冇雪味, 蝦干咸咸香香, 唔硬. 食到底, 有煲仔飯最緊要的飯焦. 飲杯小甜凍奶茶, 精神爽利. 尚有時間, 買啲dur零食, 再去會合她. …查看更多

她, 吃得健康, 謝絕刺身等生吃. 所以苦榮會待她不在時, 放肆一下. 肉搏食堂午餐, 四款配料之丼飯, 才六十元, 已包湯, 加八元連飲品, 認真抵食. 人生好難, 眾多的配料, 苦榮對住餐單苦無頭緒, 好容易才點中火炙三文魚, 左口魚, 火炙鮑魚, 三文魚籽. 跟洋蔥湯, 苦榮重口味, 覺得淡如水. 三文魚燒一邊, 兩面不同層次. 左口魚滿載油香, 三文魚籽脆卜卜, 大愛.   凍熱飲品同價, 孤寒苦榮點會執輸, 唔飲凍勢係假.…查看更多

她, 最近工作不順心, 希望轉換環境, 苦榮肯定全力支持. 陪她去荃灣見工後, 有一小時空檔, 苦榮便找地方醫肚. 心情比她更緊張的苦榮, 沒考慮吃什麼好西, 求其入0左間日式餐廳, 隨便嗌碗丼飯. 元祖燒牛肉飯份量大, 牛肉嫩, 醬汁開胃, 幾十蚊收費, 對得住價錢. 期間收到她電話, 說過左人事部個關, 要等見大老細, 成功機會好大. 苦榮好像放下心頭大石, 立即叫一件芝士蛋糕預慶, 即使只是現成貨, 心情不同, 好像特別好味. …查看更多

她, 新居入伙在即, 拉了苦榮到區內了解周遭環境, 順道午餐. 午市客飯抵食, 有主菜, 白飯, 湯或飲品, 但她還是鍾情滬式點心, 皮薄多汁小籠包和軟熟生煎包, 看她吃得一臉滿足的樣子, 可知是好東西. 除了上海美食, 餐廳仲有地道港式食品, 苦榮的豬扒包香脆美味, 在未能與她並肩同遊澳門的日子, 這個豬扒包頓時成為了心靈良藥. 飲住香濃奶茶睇Viu TV, 比被迫看CCTVB好得多. 既然餐廳有播英超, 搵日捉埋兩個老友嚟睇波飲啤酒.…查看更多

她, 平時多菜少肉, 偶爾會細味素菜, 吃得健康. 大自然素食是她喜愛的素食館之一, 久唔久會光臨.   這間素菜館的仿素食像真度高, 兼且美味, 她卻更喜歡簡單的真蔬菜菜色. 濃湯粉絲雜菜煲是首選, 貪有多款蔬菜, 濕濕地有助增強食慾. 另外, 手工菜情迷脆豆腐又是必吃的, 香脆, 層次分明, 就算無肉不歡的苦榮也大愛. 疫情肆虐期間, 我倆許多時候亦會選擇外賣, 既有半價優惠, 亦可吃得安心.…查看更多