sjsp4a22的个人专页

我見依間餐廳都幾多好評，所以同朋友嚟咗試。其實都想食西班牙餐好耐，依間係主打食蟹嘅西班牙餐廳，好似都幾特別。點知完全係伏。首先係個前菜，係蟹鉗沙律，都唔算有咩特別，唔好期望有蟹肉。之後叫咗個好似幾得意嘅蟹鉗焗蛋，簡直係唔掂之中嘅唔掂。個蛋係熟到好似蛋糕咁硬，但完全無蛋味，亦都無口感，啲蟹亦都無蟹味。基本上就好似食一堆粉咁，係一啲都唔好食。跟住就到我期待咗好耐嘅西班牙炒飯，個飯完全冇炒香，直頭係太水。雖然係紅色好似吸晒汁咁，但都係無味。然後面頭有啲蝦同貝殼類，但全部都非常唔新鮮，完全無味。依間餐廳仲要都唔平，佢嘅包裝同餐廳設計都好似好靚咁，但食物真係有改善空間呢。…查看更多

上網搵咗依間餐廳同朋友慶祝生日，因為嘢食好似不錯咁。但原來都幾隔涉，我同朋友分別去但都搵咗好耐，唔清楚係喺邊度。確實，啲嘢食真係幾好味同好有心機，好似個蜆咁，會有啲白汁同火腿拌埋一齊。不過我都係鍾意個櫻花蝦炸丸，好香口同埋點埋個汁好好味。主菜我食滑蛋鰻魚飯，真係原條鰻魚，好正好大條！而且啲蛋都無留手，包住晒全個飯。我試咗幾啖朋友個海鮮意粉都好好味呀!不過因為店舖比較細，所以廁所都要去街外嘅公廁。原來係要行過隔離2條街嘅一條後巷，夜晚一個女仔行去都幾恐怖，而且係一格細細嘅廁所，唔好期望有任何衛生可言。所以大家記得去定洗手間先好去餐廳喇！…查看更多

其實去過泰歡迎好多次，因為真係好好味，所以今次點都要比個好評幾位泰國人。雖然環境比較舊同衛生情況睇落唔太理想，但佢哋嘅食物真係用大鑊炒，每次都聽到廚房嗰啲火候聲，真係好正。如果食佢哋嘅炒餸，一定唔會後悔，因為真係好香口，而且唔會太油，係真係食到佢嘢食嘅香味，同埋個獻汁。我自己就最鐘意通菜，因為夠爽夠甜，又可以吸晒啲汁。另外就係炒肉碎包生菜，就算唔包生菜淨係餸飯都好夾。佢個冬蔭公唔算話超級辣，但係好正宗，有齊晒冬蔭功要嘅料，例如草菇，所以成個湯會好甜，仲有after taste。當然Pad Thai都好好味啦，不過就真係好飽肚，如果嗌到成枱餸，就難啲食得晒，睇下你幾多個人啦，因為佢啲嘢食都相當多同足料。重點係佢有成3個員工，又有咁多泰菜選擇同咁好味，但價錢一啲都唔貴！應該係話相當之平先啱！…查看更多

依間餐廳幾好，勝在夠隱蔽，入門口要經由樓下Sasa先入到加上可能我哋去嗰陣係晚餐時間，所以店內都唔多人，可以同好朋友好好咁傾計，唔會怕太嘈。我叫咗個滑蛋鰻魚飯同杯朱古力，碗飯都好有好大塊鰻魚，而且完全無骨，有時候食鰻魚飯點都有啲骨會覺得好麻煩。加上個蛋都好滑，整體上都不錯。不過個碗就有啲細，如果大食的話可能未必夠，要加返啲小食喇。仲有杯朱古力都整得好細心同好靚，上面仲有啲朱古力碎，令成杯朱古力有濃濃嘅味道。不過當然價錢都唔算平，但係勝在整得夠精緻。…查看更多

成日聽朋友講pici有幾出名同幾好味，自己今次終於有機會試下。入去之前佢都要登記其中一個食客嘅個人資料，個人感覺唔係幾良好，因為明顯同疫情無太大關係，而且政府亦無規定要咁做，反而感覺係佢哋想借機收集客戶資料。果然不出我所料，無幾耐就收到佢哋啲marketing SMS。入到去都係好多人，已經滿座，但樓底好高，啲音樂同人聲夾埋都幾嘈，我同朋友坐對面傾計都聽得唔清楚，要講得好大聲。我哋叫咗個2人餐，有生牛肉、芝士肉丸、番茄扁意粉、黑松露意粉同意大利雲吞，仲有2個甜品，分別係奶凍同埋Tiramisu。雖然依間餐廳少貴，但因為佢唔收加一，所以員工們都好熱情同好客，而且會不斷添水。講返食物，我聽朋友講中環依間係最好食，我唔知係咪真，但我覺得每個dish都真係好好味同高水準。我本身唔太鍾意食生牛肉，但佢依到嗰啲係無筋，而且醃得好味，唔會一陣血味咁。另外個肉丸好大粒，仲有芝士喺入面，真係好豐富。而3個意粉更加唔使講，雖然唔大份，但係有成3個真係好夠，同埋都真係好好味，唔會一味得啲芝士味。最後個甜品完全係驚喜，而家講返都好想再去食！特別係個Tiramisu真係超好味呀!…查看更多

喺openrice見到好多人推介，所以自己一個膽粗粗嚟咗熟食中心試，第一次嚟，行咗兩個圈先搵到間餐廳。之後搭枱坐低就嗌咗個餐蛋麵、西多同一杯熱咖啡。餐蛋公仔麵好快就上咗，但對於我嚟講唔算有咩特別。午餐肉唔係話煎得香口或者外脆內軟；而蛋都係求其煎到熟透，公仔麵就ok la, 軟硬適中。至於杯咖啡亦唔係特別香，我覺得奶直頭多咗，無落糖都覺得好甜同好澀口。坐咗好耐都仲未有西多，原來係漏咗單，唯有繼續等。終於都到，我完全唔明白佢有咩咁吸引，冇錯，係新鮮煎，但係連蛋漿都冇搽勻成塊面包又點算係西多呢。仲要係炸得唔夠耐，得條邊脆，入面都真係林嘅麵包口感，唔講以為係佢獨特嘅西多煮法。咁就食咗$70，個人認為只係一間普通嘅茶記，無咩值得話必去之類。…查看更多

見到有新開嘅專食叉燒店，忍唔住要即刻去試吓，一到lunchtime好多人排隊不特止，仲有好多人嗌外賣，一心諗住應該好好味。之後叫咗最傳統嘅蜜糖叉燒飯外賣，佢嘅餐具好環保，係叉同羹嘅2合1，另外就係佢個紙盒同餐具都好實淨，確保唔外賣會整污糟，同埋夠力吉啲叉燒，個人覺得餐具方面做得好好。至於個飯，我嗌咗菜飯，都唔使加錢。佢叉燒同飯嘅比例近乎1:1, 超大碗，女士嘅食量嚟講真係未必食得晒。個蛋都煎得好靚，半生熟，方便篤爛佢撈埋啲叉燒食。啲叉燒係厚切，但我嫌我嘅叉燒比較肥，所以肉感唔夠，如果可以瘦番少少就好喇。同埋雖然我揀蜜糖，但其實蜜糖味唔夠，只係食到好小好小嘅蜜糖味。總結嚟講係唔差同值得一試嘅，但值唔值得成日食就真係見仁見智喇。…查看更多

見有間新開嘅泰國嘢，即刻去咗試。一入到去，原來舖頭十分之細，坐低咗攬埋自己個袋都真係好迫，同埋同隔離枱坐得好埋。而且咁細間鋪，得一個泰國哥哥仔睇舖，但佢都完全無留意客人嘅需要，例如要menu或者準備落單等等，全程就係望住部手機，唔知佢係咪因為新做所以咁啦。個冬蔭功十分之辣，而且都煲得夠耐，個調味都好啱，酸酸甜甜咁，但如果食唔到辣就最好唔好嗌喇。之後個通菜炒得都算香，連埋佢啲汁亦都係甜甜地，菜都算靚同新鮮。個泰式炒飯就真係麻麻地，唔夠鑊氣，亦都唔夠調味，不過佢炒得夠乾身，所以食落口唔會成口油。最後其實已經好飽，但為食叫咗個芒果糯米飯，好可惜佢唔係傳統嘅紅白米，不過都唔緊要，但佢啲揶漿真係唔夠味，好淡，同埋個芒果一啲都唔新鮮，可能因為唔係當做季節，但依個甜品真係大為失望呢。…查看更多

成日都覺得太古好似無咩好食咁，見係星期五，所以試下間貴少少嘅法國西餐廳，當係TGIF。其實好耐之前已經試過一次，無咩特別好感，但見而家成日都咁多外國人去，應該都可以，所以就再去啦。我哋叫咗個洋蔥湯，三文魚同牛扒，諗住依啲嘢喺西餐嚟講都算大路，應該唔錯。點知一嚟到碗洋蔥湯就已經好唔掂，好稀，無洋蔥亦都無洋蔥味，完全好似只係味精溝水咁。同埋飲完都覺得好口渴。我個三文魚先奇怪，唔知係啲咩fushion菜，但完全無三文魚味，仲有一陣怪味，同埋個口感一啲都唔似三文魚，我一度懷疑其實係熟未。到牛扒，理應係西餐廳嘅基本菜式，但嗌半成熟都可以全部都係筋，切又切唔開，咬又咬唔爛，本身想堅持食埋佢，但真係搞唔掂！咁就嘥咗半塊扒！依間餐廳真係永遠都唔會再幫襯，而且服務都麻麻地，好似好寸咁，真係唔明點解平時咁多外國人喺度食嘢！…查看更多

依間韓國嘢真係好抵，有超級多材料，仲要如果食飯女士真係好難先食得晒！我今次叫咗個飯卷餐，佢除咗有成10大舊飯卷之外，仲有辣年糕同韓式粉絲。飯卷好睇你叫咩，我就叫咗豬，你見到佢餸同飯嘅比例近乎1:1,甚至飯係少啲，所以唔會怕食飯卷會食咗好多飯又無咩餸嘅依個顧慮，而且10個其實真係好多，食5,6個其實都已經飽。至於個韓式年糕，都真係幾辣，但佢煮得好夠林，唔會好難咬，而且啲辣都真係好入味，同埋年糕都好飽肚。個粉絲其實都係飽肚嘅食物，佢係油油地但好香麻油味。不過韓式餐就唔好期望佢好似啲粉麵飯咁熱辣辣，除咗個年糕之外，其他都係凍咗嘅。另外我再買咗支梨茶。…查看更多

嗰日經過銅鑼灣見到依間餐廳排晒隊，估計佢應該好好味，所以喺等朋友之際就決定排隊等吓，一排就排咗個幾鐘，而我後面仍然有一條長長嘅龍。雖然我唔明白點解佢唔用派籌形式，以致所有人都要企喺條街到等佢慢慢入，最搞笑係餐廳一共只係得8個位，而且係熱食，加上入到去仲要等佢出嘢食都算耐，所以個流動率真係好低。至於個湯，係真係好濃郁，但對於食開唔太重口味嘅我嚟講，我覺得有啲chur。當然，佢係有好濃郁嘅番茄味，啲肉亦都係靚同煎得好嘅。但講真，唔係話真係咁爆，食到返尋味嗰種。要排咁耐，真係可一不可再。…查看更多

正當週圍行睇下有咩好食嘅時候比我哋發現依間咖啡店，好好彩嘅係我同朋友坐咗最後一張枱，之後有人想入嚟都要排隊了。不過依間係好輕鬆嘅咖啡店，所以完全唔會有趕人走嘅壓力，好多人都係飲住咖啡傾計。我叫咗杯洋甘菊茶，而朋友就叫咗杯Latte, 咖啡好好飲，眼見佢個廚房都應該係好叻沖咖啡嘅咖啡師。跟住叫咗個南瓜湯，好濃味，唔會漏，唔會話好細碗。我不嬲好鍾意食fruit bowl, 依間都唔錯，不過隻乳酪略嫌有啲太甜，而且燕麥片同生果比較單調，唔係話好多生果。但個蟹肉risotto好好味，啲飯唔會太硬，啱晒香港人胃口，另外蟹肉好多同埋好有味！至於環境方面，佢係坐高枱嘅，因為始終地方唔大，但係正因為咁，唔會有人入咗嚟企喺你隔籬等位，同時亦播住啲好輕鬆嘅歌。…查看更多

今次係第二次食Lobster Roll 2.0 喇，因為上次食完真係覺得好好味，加上佢外賣menu都有，所以等佢12點一開門就嗌外賣，可惜嘅係外賣app無得嗌Christmas burger。個龍蝦包唔知係改進咗定係我咁好彩，大過之前我嗌嗰個好多，而且啲料好似都多啲咁，可惜嘅係可能天氣凍嘅關係，攞到返屋企短短嘅距離啲食物已經凍晒。但個包依然係好好味，麵包好有牛油香味，啲餡唔止有龍蝦，仲有西芹同其他醬汁。今次另外再嗌咗Duck Fat Sidewinders, 佢個鴨油香味勁香，而且個薯都好大舊，一大包，非常抵食。另外再嗌咗Calamari，佢個脆粉做得好夠薄，亦都係有好大包。基本上食完個burger，都食唔晒2包小食 haha…查看更多

居然而家仲可以食到咁平嘅中式糖水! 有次經過蜆殼街諗住食隔離餐廳，點知要等位，所以留意到依間糖水舖。成間舖頭好細，但明明晚飯時間已經好多人幫襯買外賣。佢門口已經係一格格擺滿糖水嘅鐵櫃，我哋見咁旺，所以就去堂食，仲要只係$20碗, 而家真係好少有咁平嘅。坐低堂食先知道原來本身執咗，老闆同老闆娘已經諗住退休休息，但最近又開返舖，所以街坊們都好支持。有咁多捧場客果然係名不虛傳，食落真係係好足料，好濃味，似係好多材料煲咗好耐，唔會淡茂茂，亦唔會太甜，味道剛剛好。個名無改錯，真係有種養生嘅感覺。同埋好大碗，真係好抵食呢！…查看更多

終於有機會試個期間限定蟹肉沾麵，比想象中更加好味！個沾麵湯底非常濃郁，綠綠地色咁，應該好多蟹膏喺入面，只係飲一啖試已經係好香嘅蟹味。成碗麵好多，湯底睇落好似好少咁，所以一路食會一路就住，因為擔心個湯唔夠點啲拉麵，點知原來有淨湯底，所以本身食應該唔駛就住就住。個麵底有好豐富嘅蟹肉同蟹籽，而且好新鮮同好甜，好好味。我叫咗暖麵，再加埋個熱湯真係好正。同埋follow佢哋ig可以獲得大阪燒風味餃子一份，有3件，真係好抵，食完都真係夠晒飽。…查看更多