本身去台灣旅行都唔係特別喜歡好地道台式既食物，但我又幾中意台式麻辣火鍋因為唔辣得嚟帶少少甜既藥膳味，感覺好似比四川麻辣冇咁熱氣。但之前問親台灣朋友都唔推薦無老鍋，本身諗佢哋可能物價低，無老鍋主要客群係旅客？可能佢哋覺得貴唔抵食，所以去左幾次台灣都冇食過佢。知佢係香港開左見尋日行完銅鑼灣6點諗食咩，就同男朋友去試下walkin都有位，咁就試一試啦！之前食過麻神，鼎王，牛大人，相比之下，無老鍋既店員都好好服務，好有熱誠介紹，係香港食飯係好難得見到店員係有笑容。個湯底同我食過既麻辣鍋好唔同，唔難食但又唔好食，一直係咁叫男朋友加高湯，覺得好濃好濃沙嗲定味精？佢既濃唔係辣，但好多油同泡係鍋邊浮住，可能我都係比較中意食以前係台灣食過馬辣同這一鍋呢類平民啲既麻辣鍋口味，佢哋既滑嘟嘟鴨血真係好入味同出色。佢醬料區只有特調醬油、香油、白醋、蒜泥水、蔥花，唔知邊一樣野係帶一陣酸酸地既醋味（冇加白醋），之後問店員拎左普通醬油，但唔知係咪形住連普通醬油都係覺得酸酸地。咁佢哋推介冰淇淋豆腐唔知咩丸啦，見佢哋都好成功每檯都有叫到，佢叮囑要煮15mins我地都有計時，但一入口個口感食落好可怕，入口就散開既丸，可能真係太習慣食彈牙實淨既丸，只能說台灣人既口味真係好唔同…另外有叫濃牛肉汁牛丸就正常好多！另外叫左豬肉雞髀肉拼盤、鵝腸、鯛魚片、粟米筍。 少貴但份量都對得住價錢，但對於兩人食每碟個份量太多，變左食到既選擇會少左啲。但食物都新鮮，肉解凍得足夠唔會一塊塊冰住咁出菜。鴨血同豆腐都係任加，佢哋既店員都加得好密，只係豆腐太散，鴨血都唔係我期待既味道少少失望。最後人均低消250其實唔難，價錢都冇話貴過吃到飽果類火鍋店好多，只係總括嚟講都唔會再食下次，因為湯底只有兩款而且都唔係我中意既味。…查看更多
最終睇左好多間之後，結論就係都係食返鮨金，原因係其實出嚟食omakase有時比呢啲價錢，係真係想食啲挑選過嘅好貨，而唔係坊間有好多比啲一定好食既食材你，即係係咪都帶子拖羅海膽，咁我去連鎖果d都識叫啦。而我哋食過鮨金嘅質素算幾高，所以最後決定就book返佢哋喇！今次我哋揀左full set, 但今次嘅食材偏油脂豐富，所以食完係超級無敵飽！師傅都係會按例問返有冇咩唔食同喜好啦，咁我哋乜都食既，真係比師傳決定啦😆成個餐廳環境都好舒服，坐吧檯可以睇住師傅處理食材啦，又可以期待下有咩食，同埋師傅每次serve 食物既時候男朋友次次都估錯係咩嚟，有互動又好笑😂😂咁full set既菜式太多放唔曬，只好揀d特別想講下既菜式啦！前菜係日本番茄啫喱凍、汁煮凍螺、海蜇，啫喱凍好好食呀！汁煮螺個汁呢..有少少似鮑魚汁，不過好入味都好食，海蜇就稍為平淡一啲。上刺身啦！呢個冇記錯應該係右口魚刺身，要特別講下刺身上面嘅紫蘇花，要用手滅出嚟連埋刺身一齊食，令到成塊刺身嘅油膩感減輕，成個鼻腔都充斥着紫蘇花嘅花香，真係好夾。呢個係由一大條八爪魚酥上面拔出來嘅兩個吸盤，加埋肉身嘅刺身，師傅本身磨左一層岩鹽係刺身上面加埋檸檬墊底唔使點豉油都已經好鮮味。吸盤食落去反而會比較有咬口所以可以點個醬汁食。睇佢一粒吸盤咁大個，成條觸鬚究竟有幾長，係一條幾大條嘅八爪魚先做得到呢😆跟住不得不提嘅就係呢一個日本北海道嘅厚岸真蠔，師傅喺蠔上邊加咗小小魚子醬，魚子醬嘅鹹香加埋真蠔creamy得嚟後尾越食越fresh,雖然同平時食法國蠔嘅感覺唔一樣，但都食到好新鮮同好豐富嘅味道，唔會過鹹亦唔會過分creamy，下次去日本都要再搵一啲蠔店去試吓
適逢呢段飲食業既艱難時期，希望出去食都可以多啲選擇一啲用心經營嘅小店！不過呢度店面不大，但店外有一排櫈坐住等，一路感受秋涼，一路同朋友大聲小聲傾計，店裡人情味太勁，好多男人一直飲啤酒吹下水都樂而忘返，所以不經不覺都等左個幾鐘。咁其實我家鄉都係潮州啦，但朋友想食潮州打冷我都會乖乖就範既，我對家鄉菜既要求都好嚴格㗎！一行五人我哋點左個大蠔仔粥、咸酸菜炒花生、墨魚片、炸大腸、韮菜炒咸豬肉，其實呢啲有部分都係我屋企成日見到既家常小菜，首先講下潮州粥咁出名！佢哋既蠔仔粥係每一啖都幾隻蠔仔落肚好足料，潮州有味粥係完全唔洗加鹽同胡椒粉，好夠味道。我本身好中意食墨魚片，佢哋既白墨魚片配左芥末豉油比我哋，又幾好食！炸大腸就有d驚喜，冇陣臭臭豬肚味，炸得好香口，配埋個汁去油膩感。鹽味花生唔係炒完凍左果種即刻軟淋淋既！老闆行出嚟都有同我哋吹水講佢都好欣賞自己炒嘅花生，唔知係有咩秘技呢，哈哈！平時我係屋企媽咪即炒既花生先有咁脆口，大部分餐廳只視佢為一個送既配菜，老闆經營咁多年依然有種小至炒花生既熱情同態度，超級欣賞！未試個蠔餅同你地應該有賣凍魚，有機會再嚟食過，希望唔洗等咁耐！
。Sukiyaki森的壽喜燒汁偏淡，但其實更加吃到牛肉本身的味道，唔靚既牛先需要用濃汁蓋過食材的味道，而且食到後頭裡面的蔬菜和烏冬都超級入味！Mini set包含前菜沙律，有主食壽喜燒、麵豉湯、飯、漬物，食完仲有甜品榛子雪糕！$280加10%整體而言算幾值得去食！做獎勵自己的午餐！
