happywong的个人专页

佢既樓底非常高，似係原本係茶樓，佢啲座位好闊落，唔會好焗好迫咁，但係唔知點解佢比我嘅感覺好大陸？B餐，加一後人均$262「特上USAD Prime牛肉套餐」貪佢呢個餐唔貴又可以任食海鮮喎，佢有封門柳，又有特別啲既食材試，例如松露手打牛肉滑，花雕浸雞子。欣賞佢蝦滑牛肉滑係一粒粒好方便，可以試多啲唔同既野，就無咁曬野，不過味道就普通，無乜特別大驚喜。另外都欣賞佢地好多菜既種類你揀，照顧到啲食肉同埋食菜既人既需要。啲牛肉味道還好，無想回頭既慾望。佢個冬陰公湯底唔算好濃味，感覺還好。佢有自製既冷泡茶，亦有較大路既飲品，又有冷盤小食畀你食住先，味道亦唔差，最鍾意食佢個胡麻醬秋葵，等野熟時食。然後甜品都好多野揀，有啲慕絲，果凍，又有好多味道既雪糕杯，但都幾難食下。整體啲野又唔算好差，價格都幾抵食下，不過佢呢口價我又寧願會去食台式火鍋。…查看更多

成日經過呢間松藝館都好有衝動想試，感覺松露專門店松露菜式應該好出色，點知，一試之後相當失望，唔會再食。餐廳嘅環境係比海景環繞既L型格局，如果夜晚黎食嘅話，景色應該幾靚既。Brunch Set $428/person- Starter - 香煎鵝肝．紅酒蘋果．野莓醬．松露 + $48油脂味好香濃，紅酒蘋果同啲醬都幾夾，解除到鵝肝嘅油膩感，但食唔到松露味。- Starter -香煎帶子．松露鮮茄莎莎．松露三粒輕輕煎香左既帶子，伴有幾片松露，整體非常清淡同埋清新，單獨只食松露，會發現其實松露無乜味，口感類似雪梨，唔係指個味，係指口感，有一種沙粒感。- Soup -牛肝菌濃湯．松露對比起啲前菜，佢呢個湯算係幾有驚喜，牛肝菌同松露非常夾，互相襯托到個味，發揮到大家既香氣，而唔會有一方太搶。- Main Course -意大利麵．烤大蝦．龍蝦汁．松露 + $58烤大蝦烤得較黑燶，賣相已經扣左啲分，大蝦既肉質非常霉，而且好癡殼，難剝，感覺好唔新鮮既蝦，同埋超粗超多蝦腸，花我好多時間處理，真係一道手工菜黎。再講佢龍蝦汁係淡，啲意粉又煮到過龍，成個意粉好唔優秀，但保持到零松露味☺️- Main Course -澳洲M6和牛西冷．松露 +$98份量比較細塊，無乜牛味，唔覺係M6，同埋佢煎得過熟，感覺係浪費左塊牛肉，松露感覺係多餘既野，因為無味帶出黎。呢個質素， 就算有 coupon 都唔會再黎。…查看更多

門面簡約，位置距離地鐵有啲遠。餐牌精簡，專業地發揮好佢專長。Guest Chef Flat Iron Steak $238嫩口既蘆筍，配有香甜既烤粟米，牛扒切口比較求其，賣相一般般，但勝在牛香味撲鼻，熟度剛剛好，呢個價位都算抵食，值得再食的。Prime Flat Iron $268賣相簡約，牛扒熟度拿捏得好好，色澤均勻，令人望落去就有食慾，唔會好肥，無膩喉感，牛香濃厚，每一口都好好享受同珍惜唔浪費。富有黑松露香既任食薯條係佢噱頭，但係雖然佢好香口，但都唔會食多，始終薯條都好飽肚，個人認為夠味，連番茄醬都唔需要，會遮左松露味。Dirty Lemonade $40我仲特登問店員呢個特飲係咩來頭，原來係用烤過嘅檸檬，帶有焦糖味，不過我飲完之後就覺得唔值呢口價，因為完全飲唔出有焦糖味，一般般。…查看更多

呢間應該同芽莊係同一個集團，因為佢啲野食既款式都好近似。佢裝飾好靚，好有感覺，又闊。餐牌上有好多唔同種類既選擇。「越式生蝦」同泰式生蝦差唔多，相差個汁，同埋擺盤風格唔同，味道相似。泰式圍圈，大量椰菜花型咁擺；越式堆放，無乜太多既伴菜底。作為一個清新頭盤，表現出色，只係稍為辣左少少，但接受到。「越南蜜柚燒蝦沙律」柚子非常肥美又甜，燒蝦數隻🍤燒過既蝦份外香口，紫蘇葉碎，增加左視覺上享受，提昇層次，炒香左既腰果酥香，增加口感！「安格斯牛肉粉」上菜會另外跟青檸，同埋香草🌿最正既係肥肥芽菜，青檸無核！湯底清澈而不清淡，無味精味！生牛肉優秀，無筋，入口軟糯！「燒牛肉撈檬」燒牛肉都有六七塊，色澤均勻，燒既火侯掌控優秀，中間五成，香氣迫人既牛肉味，軟糯無筋，加上炸蒜片，花生，互相呼應，而檬粉亦唔會成團，口感適中，加上酸辣魚露拌勻，精彩絕倫。「蘇丹王榴槤沙冰」好少見有榴槤沙冰，值得一試！入口口感綿密順滑，榴槤味重，流連在口腔內不散，打嗝回味🤣其實唔可以叫沙冰，佢無冰感，反而係非常似奶昔，奶香濃厚，一吸，一吸，再吸，不捨得完。…查看更多

經網上預訂下午茶自助餐，兩百幾蚊，食完直接當晚餐咁，又平啲，幾好呀🤪地理位置都幾方便，接駁住廣場過黎。準時入場，所以全部野食都仲係滿滿，見到好多海鮮，麵包蟹，青口走唔甩，第一次食麵包蟹，大家瘋搶，我又夾🤪朋友都第一次，話蟹好臭濕毛巾既味，我一聞，嘩，差啲暈左，唔岩我口味，我嘗試閉氣去食佢既肉同膏，都唔得🥲直接放棄，轉戰生蠔，每次拎到兩隻，其實下午茶有生蠔食，性價比都高既，而且生蠔既質素都唔差，賣相都剔透。有泰式串燒，冷盤，沙律，刺身壽司，印度咖喱，中西野，其實都應有盡有！全部野食都正常，無話特別出眾既款，刺身色澤都唔太優秀，口感都好奇怪，稍後有驚喜就係個煙鴨胸沙律，好食。然後我當然就不能錯過甜品，款式多🍮懷著超級期望與興奮既心情出去覓食，但係全部既質素都不太出色，較失望，奶凍味道質感差，朱古力味道好廉價，全部既蛋糕同甜品都令我無意慾再拎🥲負責畢雪糕既男服務員當雪糕垃圾咁，態度不屑，帶點不耐煩，pat落碗度 💁‍♂️窩夫賣相係幾好既，但味道非常一般，佢整定左一堆係度，有客要就夾畀你。所以甜品呢個環節，用餐體驗非常差🥲除左生蠔外，完全諗唔到有賣點返黎🧐…查看更多

因為車仔麵關注組而慕名來試試佢，一坐底，發現格離卡位坐左位明星，已經提昇左少少信心，同埋期待感。我前後都黎幫襯左兩次，都叫菜底。四餸麵 $55侍應幾貼心，提我頭髮就黎浸到湯🤣佢有菜底揀，岩曬啲唔想食麵既人🥰同埋可以叫佢多芫荽，對於我黎講，絕對係兩個大加分位，份量又大方，食極都仲有咁，食完都好飽好滿足。牛舌同牛肚都好香好軟，魷魚爽口，牛筋多毛，出面其他地方好少有毛。菜底除普通嘅菜外，仲可揀白蘿蔔🥰湯底係幾濃味既滷水汁，係好惹味，特別係啲白蘿蔔索晒啲汁，好入味！第二次黎食既時侯，班底都差不多，我呢次就有叫到豬潤，口感都唔錯。之後我無再黎，因為食完都超口渴，味道份量都出色，但食完有啲辛苦。涼拌生腸 $25佢有好多花生，好多蔥，好多芫荽，好惹味，生腸凍凍地，好爽滑又香！…查看更多

經常都會同同事食有口福，選擇多，價格抵，味道好，有飯麵，仲有特色越南河。「牛三寶米粉」$48牛三寶牛肚，牛筋，牛腩。牛肚爽勁有趙頭，牛筋軟，又淋，充滿膠質果種感覺，牛腩唔算好肥，但唔會柴。配搭埋牛湯湯底，好惹味。美中不足的是米粉較難食，米粉口感比一般坊間粗糙。「生牛肉越南河」唔記得左價錢，約$40幾，賣相就幾唔錯，香氣撲鼻，生牛肉好嫩口，份量尚可，有片檸檬同埋一大堆洋蔥🧅好清新但又好夠味，優秀。…查看更多

呢間餐廳好岩慶祝，樓底勁高好寬敞，環境感覺好有氣氛，部份店員講英文。佢每一晚都會有啲特別任食嘅餐單叫，例如星期一嘅五點打後就係任食青口，我哋去食係星期二，就做緊海陸大餐，$295/人，加一，食原隻加拿大龍蝦🦞250g美國USDA 1855黑安格斯牛扒🥩再配有芝士燒汁薯條 🍟 其實幾抵食 🤪一上菜咁靚仔，已經覺得好賞心悅目，本身黎其實係因為見牛扒關注組推介，但試完後，個人認為龍蝦相對更出色。佢開邊龍蝦唔係就咁簡單燒下佢就算，佢有調味，上面有拉絲芝士同有蘑菇，兩者冇搶走龍蝦味，反而平衡得好好👍🏻龍蝦肉好嫩口，唔會煮過龍，好幸福😍牛扒其實都出色，有牛味，煮到五成，入口唔會過度訓練咀嚼肌，優質享受😎個芝士燒汁薯條份量都多，但馬馬地，燒汁搞到啲薯條好淋好濕，而且唔熱，所以入口都偏淋，唔脆口，唔夠香口。佢其實有成個酒吧檯，好多人會叫酒，但因為環揸車，所以無叫到酒精飲品，唯有叫啲望落都幾精彩嘅Mocktail飲。Tikkicolada $55“Pineapple, passionfruit & coconut cream”清新自然，帶有椰子既香，相當出色。…查看更多

到夜晚無乜食店仲有開，有串燒食都非常唔錯啦🥳 燒翠玉瓜$24 幾片薄薄既瓜仔都幾貴😛芝士大啡菇$28芝士同大啡菇係完美組合🥳金菇肥牛卷$25金菇同肥牛又係永遠都夾🤣鮮魷$38羊架$45 x 2燒得剛好又惹味，出色，羊架仲會切好曬，貼心☺️燒茄子$30蒜蓉茄子🍆好惹味呀，口感正。叫左一堆肉既串燒，全部都燒得剛剛好，食串燒永遠叫好多，加加埋埋就變好貴🤣埋單 $420，唔平，不過呢間勝在快手，夜麻麻又有開檔喎，又有得坐住慢慢嘆。…查看更多

因為有海港城嘅Dining Coupon，可以平啲嘅價錢去食啲貴嘅餐廳🥰呢間日本野我整體滿意，幾推介，環境有啲暗，帶日式古典味裝修。「和牛丼刺身藏味增漬御饍」$298好豐富，賣相精彩，配菜西京燒，刺身片，有沙律菜，兩件玉子燒，全部配菜都有質素，食得出新鮮。主菜既和牛好大片，富有油脂香，份量適中，因為和牛太多會好膩。「雜錦刺身丼」$298跟既沙律比較寡少少，單一既菜。茶碗蒸一般，我自己整得好食啲🤣胡麻醬秋葵正常發揮，清爽前菜，上湯娃娃菜好清甜，好冧，出色。油甘魚油脂味重，赤身紮實無筋，帶子鮮甜，海膽有海水味，唔腥，拖羅蓉唔似普通一般市面既質素，仲有啲蟹肉，同埋蝦都甜而不腥，整體係出色呀哈利，最後茶漬飯，盅爛啲白芝麻，再加入茶，拌勻，日本米真優秀，成個餐都好滿意。甜品係兩件卷蛋，個人覺得一般。「荔枝玄米」$18「果醋」$18前者正常味，後者酸到腐蝕喉嚨🥺…查看更多

之前牛扒關注組極力推介，就黎要改名燒牛肉關注組🤣我又慕名而來，玩下排隊，間野唔憂無生意，限時食，而且只許加單一次咁大把，第一次食咁有性格嘅食肆😏「生蝦」賣相幾靚仔，又精神爽利。特別在於佢伴碟有炸蝦頭，不過佢啲炸蝦頭係凍曬既，又唔係特別好食，無加分。生蝦自己本身就正常發揮，加埋泰式辣汁食係幾出色。「脆肉炒椰菜苗」$88椰菜苗，賣相得，但太硬，脆肉變冧肉，不及其他店。「泰式炸蝦餅」$78呢個蝦餅出色，脆口又香，熱辣辣又多汁，仲有蝦味。「燒牛肉」$88等左好耐，催左兩次至有，賣相吸引，牛味香濃鮮嫩，肥瘦均勻，肉汁豐富又香，加埋個汁，是為完美演繹！燒牛肉確實並非浪得虛名，但係，試過一次便足夠了，因為用餐體驗係非常一般，食到趕頭趕命，態度一般。但燒牛肉炸蝦餅都值好評。…查看更多

本身第一次食佢麻辣野，佢啲三併幾抵食，唔貴，選擇又好多，有素食揀，味道好，特別個牛蹄筋，口感好正，辣度又適中，而且佢門面好乾淨企理，又有中央工廠調味處理。見到佢有款椒麻手撕雞，望落去好似相當吸引咁，所以第二次再去幫襯佢，點知今次體驗非常失望😕一打開，我唔確定情況，係咪食剩得返啲骨畀我？全兜雞骨只附三四塊肉？畀$68買左堆雞骨同皮😟老實講，佢味道係優秀，好有椒麻既香，麻味足，但係一人分到兩片肉仔，真係好失望，太名貴了。我見其他人正常份量肉，可能係我今次太黑仔了😔…查看更多

鮮芋仙已經開到就黎好似7–11咁，分店越開越多，但係熱潮不減退，我都間唔中就會心掛掛想食下佢，除左仙草冰之外，我最愛佢芋頭😍布丁Q麻糬牛奶冰 + 芋頭 + 粉粿 $70一大座冰，陣容旁白，賣相精彩，布丁可愛，動感十足，味道幾好，雪糕加埋啲冰一齊食，冰凍又甜，麻糬口感Q彈，軟糯香甜，幸福。粉粿下次唔加，感覺無乜特別咁，芋頭雖然有啲貴，但真心好出色，香甜，芋頭味突出，簡單而好味。兩個人一齊食一份冰，談談說笑，性價比就因人而異啦，間唔中食，甜品本身定價就唔平，都接受到。…查看更多

見某明星推介既一間餐廳，就特登抽時間過黎試下佢，本身係朝住手工意粉而來，但竟然午市無我想食既野，咁就唯有試下佢個牛扒先。店員有禮貌，環境都唔錯，不過有蚊咬，影響左心情。個套餐跟沙律，又有野飲，牛扒份量適中，叫左五成，肉質都幾軟冧，有少少筋，不過牛味無乜，不過不失。沙律有橘子肉，非常清新，飲品叫左latte，竟然有糖，頂頭唧左cream，太過甜，飲左兩啖就停，唔太出色，但係整體性價比都算高既，一來食得飽，二來唔係貴，下次有機會再試手工意粉🍝…查看更多

本身諗住去一田買壽司上朋友屋企度食🥢但係經過呢間店，見到好多人係度排隊🚶🏻‍♀️懷着一個八卦心態睇吓，原來係韓國菜🇰🇷好多種類，擺放整齊，賣相吸引，試吓🤩Crab meat flying fish roe egg roll $48蛋卷六舊，賣相精彩，但味道稍為失望，凍冰冰，無蛋香，無蟹味，有蛋既口感，覺得呢口價呢個味道，有啲overpriced😟Bulgogi Bibimbap & Fried Egg $65呢個牛肉煎蛋雜錦拌飯，就相對好味啲，牛肉稍為有啲乾同埋柴口，煎蛋好靚仔，加埋韓式辣醬一齊拌勻食，都幾惹味既。Fresh Kimchi - Medium $60對比超市現成既泡菜，佢當然會比較貴，但係味道上會較出色，同現成既有分別，泡菜口感好爽脆有汁，味道帶微辣但香。個人覺得最出色就係個泡菜，卷蛋最差。友人都同意，可能係唔太岩我地既口味🥲…查看更多